Patrimoniu

El Museu del Ferrocarril d’Asturies va cellebrar el prósimu sábadu día 13, a partir de les once y media la mañana, una xornada de vapor, poniendo en marcha tol material d’estes característiques que forma parte de la colección del museu. Amás, van ponese en funcionamientu otru material históricu restauráu, qu’inclúi coches de viaxeros y vagones de mercancíes.

Esta xornada, que se va facer en collaboración cola Asociación d’Amigos del Ferrocarril de Xixón, va sirvir pa poner en circulación poles víes del interior del recintu de dalgunes locomotores de gran valor históricu. Ente elles destaca una SHE 5, de vía de 600 mm., tipu 020PT, construía en 1891 por Corpet n’Alemania. Esta locomotora vien de les Mines d’Ayer de la Sociedá Hullera Española, onde tuvo usándose en trenes mineros pa tresporte de carbón. Otres locomotores traíes de les mines ayeranes son la SHE D, de vía de 600 mm, tipu 020WT, fecha en 1920 por “Maffei” n’Alemania, y la Deutz KG 125. diesel d’anchu de vía de 600 fabricada en 1965 por Deutz (Alemania).
Tamien van ponese en funcionamientu una SAF 1, de vía anchu ibericu, fabricada por Henschel (Alemania) en 1952 pa la Mina La Camocha, y la Hunosa 3. diesel d’anchu ibericu fecha en 1975 por Babcock&Wilcox pa Hunosa, que la empleó na llínia de Turón.

La xornada va cellebrase de 11.30 a 13 y de 18 a 19.30 hores, mentes que’l Museu va tar abiertu nel so horariu normal de 10 a 14 y de 17 a 21 hores. La entrada va ser de baldre tol día.

La ministra de Cultura Carmen Calvo visita Ästuries un día después de qu’apareciere publicáu nel BOPA el concursu pa executar la reforma de l’antigua cárcel d’Uviéu col oxetu d’afayala como instalaciones del nuevu archivu hestóricu. Tito Bustillo y el Muséu Arqueolóxicu son los otros asuntos que va tratar la ministra.

Calvo llega a Uviéu pa firmar el conveniu col Principáu pa la construcción del Centru d’Arte Rupestre de Tito Bustillo, un proyectu paráu abondu tiempu y nel que nun ta incluíu como parte firmante’l Conceyu de Ribesella. El proyectu pa la cueva rupestre ta presupuestáu pol ministeriu nuna aportación de 7,4 millones d’euros.

La reforma y rehabilitación del Muséu Arqueolóxicu -otru proyectu paralizáu per años- va recibir del departamentu dirixíu por Carmen Calvo 31,7 millones d’euros y les obres pal afayamientu na antigua cárcel d’Uviéu del Archivu Hestóricu d’Asturies, cuenta con una aportación del ministeriu de 14,3 millones.

Ricardo Mojardín espón en A Fonsagrada (Lugo) la so última amuesa individual titulada “Karmanimal-muuu”, una reflexón irónica sobre les relaciones del arte col mundu animal. Nueve pintures y tres grabaos componen esta esposición del artista boalés, un de los más orixinales del panorama creativu asturianu.

Mojardín vuelve con esta amuesa a un tema y unos motivos sobre los que trabayara n’anteriores ocasiones, realizando retratos de vaques y otros animales domésticos del mundu rural. Delles de les obres espuestes agora en A Fonsagrada pudieron contemplase na última edición d’ARCO en Madrid; nelles, la vaca apaez como protagonista y espectadora al empar de la mirada del artista.

La esposición “Karmanimal-muuu” de Ricardo Mojardín va poder visitase nel Muséu Comarcal d’A Fonsagrada hasta’l prósimu 21 d’agostu.

Los promotores de la candidatura del vai de Cuna y Cenera a Pueblu Exemplar d’Asturies organizaron ayer una visita a la zona na qu’un grupu d’escritores quiso amosar cola so presencia el sofitu a la iniciativa. Fulgencio Argüelles, Montserrat Garnacho, Ana Vanessa Gutiérrez, Ismael María González Arias y Laudelino Vázquez resaltaron los atractivos d’esti vai p’algamar la distinción que lu reconoza pola so singularidá.

Conceyales del Ayuntamientu de Mieres, ente ellos Marcos Cienfuegos d’IX-BA -ún de los promotores de la candidatura- acompañaron a los escritores nel so percorríu pelos sitios emblemáticos del vai de Cuna y Cenera. Na visita anunciaron que nes prósimes selmanes van ser otros personaxes relevantes del mundu del arte y la vida pública asturiana los que viaxen pel vai pa sofitar cola so presencia la promoción del vai p’algamar el Premiu Pueblu Exemplar d’Asturies.

La candidatura de Cuna y Cenera ta avalada por cientos de firmes, ente elles les de personaxes públicos como’l cantante Víctor Manuel o l’actriz María Luisa Merlo. Apocayá los promotores de la iniciativa editaron venti mil postales pa que seyan los propios ciudadanos los que respalden la candidatura.

Esti miércoles 3 d’agostu un grupu d’escritores asturianos va sofitar públicamente la candidatura a Premiu Exemplar d’Asturies del vai de Cuna y Cenera. Nel actu organizáu pol Conceyu de Mieres van participar ente otros Fulguencio Argüelles, Montse Garnacho y Javier Lasheras.

Un alcuentru na propia casa consistorial y un percorríu pelos llugares del vai de Cuna y Cenera van valir pa dar un nuevu emburrión a la campaña de promoción de la cadndidatura.

Los vecinos del vai llograron ya el sofitu de personaxes públicos relevantes como’l cantante Víctor Manuel o l’actriz María Luisa Merlo. Agora acaben d’espublizar venti mil postales empobinaes a amosar l’apoyu a esta iniciativa popular.

Ente les virtúes que s’encamienten pa merecer el Premiu de Pueblu Exemplar d’Asturies tán la gran bayura paisaxística y medioambiental del vai, el respetu al entornu de los vecinos y el sentimientu de comunidá ente los habitantes d’esta zona singular de la cuenca del Caudal.

p>

La fachada y les paredes interiores del templu prerrománicu de Santa María’l Naranco d’Uviéu tuvieron nel so orixen una cubierta policromada. Los restos de les pintures primitives descubriéronse apocayá nos llabores de llimpieza y restauración del monumentu ramirense.

Los espertos n’arte prerrománicu barruntaben que nos templos conservaos del antigu reinu d’Asturies había una semeyanza con edificios de la dómina tardorromana y los frescos afayaos en Santullano yeren la preba más evidente. El descubrimientu de restos de pintures nel templu ramirense de Santa María del Naranco mientres se realizaben les obres de llimpieza y restauración del monumentu vienen a confirmalo.

Los restos de les policromíes orixinales consérvense en medallones y relieves de la ilesia. Nellos predominen los colores ocre y encarnao, talo ye común a les pintures conservaes nel templu de Santullano. Hai tamién restos d’estucao lo que fai pensar que la cubierta de Santa María del Naranco cuando se construyó en tiempos del rei Ramiru yera bien distinta de la que conocemos anguaño. Sieglos de deterioru temporal y la sinfinidá de restauraciones sufríes pol templu ficieron perder estos elementos del edificiu orixinal qu’agora vuelven quedar al descubiertu.

La esposición entamada nel Parque Arqueolóxicu de la Campa Torres de Xixón sobre afayos de cerámica atopaos nes escavaciones del castro de Chao San Martín ufierta ente les sos actividaes delles visites guiaes a castros del occidente d’Asturies.

El xueves 11 d’agostu ye la prósima salida programada pol Parque Arqueolóxicu con destín al mesmu castro de Chao San Martín y al de Coaña, amás d’una visita al Muséu Etnográficu de Grandas de Salime.

L’amuesa abierta na Campa Torres espón diversos materiales afayaos nel xacimientu castreñu como cerámiques, adornos metálicos, restos d’armas y aperios, vidrios, monedes, resaltando les más d’ochenta pieces de “Terra sigilatta” rescataes nes escavaciones. El Chao San Martín ye un de los castros más bayurosos d’Asturies en material arqueolóxicu. Nesta esposición tenta ufiertase una parte de los afayos recuperaos nel xacimientu. L’amuesa puede visitase hasta’l 30 d’ochobre.

El Palaciu de los Omaña de Cangas va rehabilitase pal so usu como Casa de Cultura del conceyu. L’Ayuntamientu acaba d’autorizar les obres pa tresformar esti edificiu hestóricu nun nuevu equipamientu cultural y l’iniciu del proyectu ta previstu pa ochobre con un presupuestu de dos millones d’euros.

El Palaciu de los Omaña ye un de los edificios hestóricos con más valir del Conceyu de Cangas y representa la casa d’una de les families más poderoses de l’aristocracia del occidente asturianu, poseedora de tierres más grandes que dalgunos conceyos. El so nuevu destín como Casa de Cultura escampla’l futuru del edificiu, un exemplu bultable de l’arquitectura señorial rural del país.

El vistu bonu al empiezu de les obres dalu’l Conceyu después de que’l Gobiernu del Principáu aprebare na so reunión del pasáu 28 de xunetu una partida de 2.111.246,58 euros destinada a convertir el Palaciu n’equipamientu cultural. La nueva Casa de Cultura va contar con sala d’esposiciones, sala de prensa, biblioteca, sala auditoriu, aules de música, Muséu de la villa, sala tecnolóxica, despachos, taller d’usos múltiples, sala de reuniones y otres dependencies. L’empiezu de les obres va ser nel mes d’ochobre.

La Comisión de Patrimoniu de la Conseyería de Cultura alcordó na so última reunión del 27 de xunetu dar el preste al fin de les escavaciones arqueolóxiques del castru de Cellagú, en Latores. Los espertos desaminaron tamién los proyectos de restauración de San Xuan d’Amandi en Villaviciosa y Santa Olaya d’Abamia en Cangues.

Pal organismu encargáu de cuidar el patrimoniu hestóricu, tres el fin de les escavaciones del castru de Cellagú y colos restos angüaño llevantaos, estúdiase la posibilidá del treslláu del afayu al núcleu de Llatores y encamiéntase al Ayuntamientu d’Uviéu a la so descatalogación tres l’estudiu fechu nes escavaciones.

La restauración del primer templu románicu d’Asturies, el de San Xuan d’Amandi, estudióse’l proyectu entamáu poles arquitectes Ana Piquero y Clara Rey-Stolle, que propón un tratamientu integral del edificiu. El proyectu que tien un presupuestu de 174.000€, fue informáu favoratiblemente.

Otru proyectu de restauración d’un temmplu non menos emblemáticu, el de la capiella de Santa Olaya d’Abamia en Cangues d’Onís, tamién s’aprebó. Nesti casu trátase d’un proyectu presupuestáu en 300.000 euros y del que ye autor Javier Arbesú Fanjul.

La rehabilitación del Institutu Francisco Bernaldo de Quirós de Mieres, la remocicación y el so tratamientu pa usu hosteleru de la torre de San Cucao en Llanera, asina como la restauración de la ilesia de La Oliva, en Villaviciosa, y l’estudiu pa la esplotación de la Mina Consuelo na Espina, Salas, fueron otros de los asuntos trataos nel aconceyamientu de la Comisión de Patrimoniu.

Un equipu formáu polos arquéologos Iván Muñiz y Alejandro García escomenzó ayer los llabores de llimpieza nel Monesteriu de la Mercé en Raíces pa entamar les escavaciones que puedan dar colos restos d’un posible templu prerrománicu documentáu en 905. Según la tradición escrita del antigu Reinu d’Asturies esi podía ser el llugar onde se llabró la Cruz de la Victoria.

Les posibles buelgues d’esi templu y la busca de restos humanos d’eses dómines son los oxetivos d’estos trabayos arqueolóxicos que cuenten cola colaboración de los espertos en Palentoloxía del xacimientu d’Atapuerca.

Les escavaciones cuenten col sofitu del Ayuntamientu de Castrillón y nuna segunda fase van tentar localizar l’asitiamientu del castiellu de Gauzón, un de los más importantes de l’alta edá media asturiana y que los arqueólogos suponen afayar nel Peñón de Raíces.