Patrimoniu

L’agrupación local d’Andecha Astur d’Uviéu pide a la Conseyería de Cultura la declaración como Bien d’Interés Cultural (BIC) pal molín d’agua conocíu como La Zurraquera, asitiáu a poca distancia del centru urbanu de la ciudá del carbayón. La formación nacionalista tien mieu que les obres pa construir una vía dica San Cloyo destruyan esti molín qu’inda caltién tolos sos elementos preparaos pa funcionar.

Andecha pide la protección pa esti inxeniu hidráulicu, ún de los pocos que se conserven nel conceyu d’Uviéu, y col so encamientu a la Conseyería afirma recoyer el deséu de los vecinos de la zona que ven amenazáu el molín. Los nacionalistes consideren qu’amás del bon estáu de conservación del inxeniu, la so prosimidá al centru la ciudá podía facelu afayadizu pa convertilu en sitiu de visita didáctica sobre’l patrimoniu etnográficu.

Andecha Astur presentó una alegación énte la Conseyería de Cultura a la posibilidá de que la Plaza Toros d’Uviéu se declare Bien d’Interés Cultural. La formación nacionalista considera que l’edificiu de Bellavista nun tien valor arquitectónicu y ye un sitiu onde se faen “actos de tortura animal”.

La organización nacionalista ironiza nun comunicáu col “dilema” nel que se debatieron enantes de presentar la alegación “o dexar que fore nomáu BIC, en vista de cómo son trataos esti tipu d’edificios pola alministración asturiana ya que, na mayoría de los llugares onde esisten edificios catalogaos y protexíos estos tan en grave peligru de ser declaraos en estáu de ruina, sobremanera si son de propiedá privada”, razona Andecha.

Nel so comunicá A.A. opónse a que’l cosu de Bellavista se declare como Bien d’Interés Cultural, poro protexíu y defende’l baltu de la Plaza, un edificiu qu’a xuiciu de la formación nacionalista “tendría de tar valtáu fai abondos años, aforrando asina l’ayuntamientu un bon montón de perres de toos nosotros en comprar más de la metá del aforu d’esta plaza pa que pueda ser medianamente rentable al empresariu que, según ellos, la xestiona y que, de nun ser sobencionau económicamente pol ayuntamientu nun fadría dengún tipu d’actu en dicha plaza”, afirma la organización.

La plataforma Cellagú, un colectivu en defensa del patrimoniu hestóricu y etnográficu del país, presentóse esti xueves 26 nel Club Prensa Asturiana d’Uviéu después de que lo ficiera va unos díes cola so primer denuncia na mano. El colectivu pon como casu el recién estrozu del castru astur de Cabezón en L.lena, un espoliu más de los que se vienen faciendo de contino, afirmen los integrantes de Cellagú.

La plataforma llama l’atención sobre casos asemeyaos al del castru l.leniegu como la menacia d’una cantera de caolín a los túmolos de Penousén en Salas;el cercu por otra cantera del castru’l Picu’l Mancobiu, en Les Arriondes; la destrucción del castru de Castrovaselle en Tapia pa la construcción d’una esplotación agropecuaria; el deterioru de la necrópolis tumular de Monte Areo en Xixón, convertida “en vertedoriu”; la estroza d’un xacimientu paleolíticu en Perlora o la de los xacimientos arqueolóxicos de Balmonte por mor de la estración d’oru.

La plataforma Cellagú ta formada por un grupu d’especialistes en patrimoniu etnográficu -al frente de los cualos ta l’investigador Berto Álvarez Peña- arqueólogos, biólogos y simples ciudadanos esmolecíos pol destin d’unos bienes d’interés cultural davezu abandonaos poles administraciones, como denuncia’l colectivu, qu’acusa a los conceyos de vulnerar les sos propies cartes arqueolóxiques en casos de concesiones de permisos colos que s’espolien xacimientos o a la Conseyería de Cultura, a la qu’acusen de pasividá y permitir estrozos irreparables. Cellagú pidió la dimisión de los principales responsables del departamentu autonómicu, el director xeneral de Promoción Cultural Carlos Madera y la mesma conseyera Ana Rosa Migoya, pola so responsabilidá nos fechos que denuncien los conservacionistes.

Andecha Astur critica nun comunicáu la posición qu’a xuiciu d’esta formación caltién Izquierda Xunida nel gobiernu autonómicu énte la especulación urbanística de la costa asturiana. La organización nacionalista acusa a la coalición d’izquierdes de practicar un doble llinguaxe “como gobiernu y oposición” énte l’esfarrape medioambiental de les estayes costeres.

.Andecha afirma nel so comunicáu que tocante a esti asuntu IX: “critica la situación allegremente, pero ensin emplegar los medios de que dispón dende’l Gobiernu asturianu, del que forma parte” asina como de “dexar facer pa lluéu criticar, permitir illegalidaes urbanístiques pa lluéu alloñase d’elles, presentase comu oposición al PSOE mentantu se beneficia de la coalición con él…”, afirma la formación nacionalista.

Andecha Astur considera qu’Izquierda Xunida tien responsabilida nel “esfarrape paisaxísticu y la especulación urbanística na costa mentantu la coalición nun desixa al PSOE un cambiu na so política que lleve, por exemplu, a parar un bon garrapiellu d’actuaciones urbanístiques en conceyos comu Llanes, Ribeseya y Villaviciosa, marcaes esclusivamente pola voracidá especulativa”.

L’hestoriador y dirixente d’Izquierda Asturiana (IAS) Faustino Zapico volvió esti xueves 19 a pidir la devolución a la nuestra comunidá de los papeles de Salamanca referíos a Asturies. Zapico advirtió qu’ente la documentación entregada al gobiernu catalán hai archivos incautaos al Conseyu Soberanu na guerra civil.

La formación nacionalista señala per voz del hestoriador que la esistencia d’una copia microfilmanda de los documentos asturianos nun entorpez sinón que facilita la devolución y remarca que Zapatero y Areces “tienen desplicar porqué ye bono devolver les 500 caxes de documentos que se robaron a Cataluña y non les más de 700 que se sustraxeron illegalmente n’ Asturies”. Amás el miembru de la Dirección Nacional de IAS considera “otra broma macabra” que parte de la documentación asturiana s’envíe agora a Cataluña “colo que la nuestra memoria conviértese de nuevu en moneda de cambiu y amuésase’l nulu interés del gobiernu asturianu en velar pol nuestru patrimoniu”,afirmó Zapico.

La conseyera de Cultura del gobiernu del Principáu, Ana Rosa Migoya, propunxo esti martes 10 en Santiago de Compostela, na reunión del Plenu del Conseyu Xacobéu, que s’estudie pidir a la UNESCO la reconocencia como Patrimoniu de la Humanidá al Camín del Norte. Anguaño namás ta reconocíu como talu el llamáu Camín Francés.

Migoya declaró tres l’aconceyamientu en Santiago colos responsables de Cultura de les comunidaes del Camín y cola ministra Carmen Calvo, que la solicitú a la UNESCO va ser ún de los asuntos a tratar nel cume ente los executivos asturianu y gallegu del prósimu 30 de xineru. Según la conseyera del Principáu, la comunidá vecina participa d’esta iniciativa y amuesa’l so apoyu a la mesma.

Ana Rosa Migoya espunxo na reunión de Santiago les actuaciones entamaes el pasáu añu 2005 nel Camín de Santiago al so pasu per Asturies, un conxuntu de llabores que la conseyera cifró en más de dos millones d’euros. La responsable autonòmica de Cultura anunció que ye intención del so departamentu siguir apostando pola promoción de la ruta xacobea na nuestra comunidá.

L’Ayuntamientu de Cangas del Narcea quier solicitar la integración del conceyu n’asociación qu’axunta a ciudaes con tradición vitivinícola de tol estáu, ACEVIN. L’oxetivu ye aprovechar les polítiques de desenvolvimientu local entamaes nes fasteres con producción de viñales y promocionar los caldos del primer conceyu asturianu en cultivu d’uva de vino.

L’Asociación española de Ciudaes del Vino (ACEVIN) axunta a cuarenta y cinco conceyos con una política común na que se propón abordar propuestes nos ámbitos de potenciación de la agroindustria, planificación urbanística, cultura y turismu vitivinícola, patrimoniu industrial, creación d’instrumentos de promoción local y de diversificación de la actividá económica. El productu estrella d’ACEVIN ye la marca Rutes del Vino d’España de la Secretaría Xeneral de Turismu. Una Ruta del Vino ye un viaxe qu’ofrez al visitante la posibilidá de sumorguiase na cultura, tradición y costumes d’un territoriu vitivinícola, d’una Ciudá del Vino.

El conceyu de Cangas enfótase en que la integración de la tierra del vino del Narcea n’ACEVIN puede valir p’afondar nel remanecimientu d’esta industria na zona y ayudar a la so promoción turística. El principal proyectu desenvueltu nesi sen ye’l Muséu Etnográficu del Vinu que ye ya una realidá y recientemente incorporó el conxuntu de les bodegues de Tebongo.

L’Ayuntamientu de Cangas del Narcea y los propietarios de les bodegues de Tebongo algamaron un alcuerdu pa remozar esta esplotación vitivinícola de fonda tradición ya incorporala a los espacios del futuru Muséu del Vino como sitiu d’ufierta turística.

El conceyu cangués presupuesta nel alcuerdu en 122.000 euros el coste de la rehabilitación del conxuntu de Villar de Tebongo y los propietarios comprométense a la realización de les obres de rehabilitación acordies col proyectu redactáu al efectu y embaxo la dirección de l’Axencia de Desarrollu Local. L’ Ayuntamiento, pel so llau , va financiar los gastos de mano d’obra y el titular de la bodega va abonar los gastos correspondientes a los materiales, asumiendo, asinamesmo, l’encargu de la contratación de la obra. Los propietarios comprométense al mantenimientu de la naturaleza de les bodegues y a facilitar les visites a la esplotación, como parte del futuru Muséu del Vino.

L’Ecomuséu del Vino de Cangas del Narcea comprende dalgunes actuaciones más y la so puesta en marcha tá relacionada col remanecer del sector vitivinícola na comarca, cola actual I.G.P. Vinos de la Tierra de Cangas. Esi ye’l casu del núcleu de Santiso, incluíu nel proyectu por formar parte del entornu del recientemente recuperáu llagar de San Tirso, onde se va afayar el muséu. El proyectu prevé la so inclusión na ufierta turística, xunto coles bodegues que conformen l’entornu, les cuales mantienen el so usu tradicional.

La selmana pasada finó n’Avilés la primer fase de los trabayos de restauración del conxuntu hestóricu de Los Canapés, que dende primeros del mes de payares venía faciendo un equipu d’ex alumnes de Restauración de Bienes Culturales y especialistes n’escultura de la Escuela Superior d’Arte del Principáu. Estes obres tán financiaes pola Conseyería de Cultura dientro l’apartáu de Bienes d’Interés Local Histórico pa Corporaciones Locales.

La restauración de los elementos de piedra de Los Canapés ye la primer fase d’un proyectu nel que tamién se contempla la llimpieza del conxuntu escultóricu del Parque d’El Muelle, y que va entamar el prósimo mes de xinero. Enantes y dientro de la mesma iniciativa, personal municipal del Ayuntamientu d’Avilés fizo llabores de reparación del horru asitiáu nel Parque de El Carbayéu.

L’horru del Carbayedo, de más de 100 años ye un de los cuatro únicos horros que se mantienen nel área urbana. En cuantes a Los Canapés, son sillares de bienvenida llevantaos nel sieglu XVIII en plenu reináu de Carlos III y sirvieron pa señalar l’antigu camín d’Avilés a Uviéu.

Finalmente el conxuntu escultóricu del Parque del Muelle ta integráu por 13 escultures con alusiones mitolóxiques y la orixinal fonte del elefante, asina como la popular “foquina” y la escultura de Pedro Menéndez de Avilés. La restauración va ejecutase nos primeros meses de 2006 pol mesmu equipu d’ex alumnes de la primer promoción de restauración de la Escuela Superior d’Arte del Principáu d’Asturies.

La Conseyería de Cultura presentó esti llunes 28 un pergamín del sieglu XIII perteneciente al archivu de la Catedral d’Uviéu y que se recuperaba pa la so vuelta al sitiu d’orixen después de la so desaparición na guerra civil. El documentu ye’l primer inventariu conocíu de les reliquies conteníes na Cámara Santa y taba en manes particulares hasta agora.

El pergamín ye l’acta d’apertura del Arca de les reliquies en 1075 con motivu de la visita a Uviéu del rei Alfonso VI de Castiella y nél detállase una relación de los bixos y afayos que constituíen el tesoru de la Catedral, asina como delles lleendes relatives a otros intentos fallíos d’abrir l’Arca.

Los propietarios actuales del documentu, la familia García Trelles, adquiriéranlu en 1971 xunto otros papeles d’un archivu priváu. Descendientes de los compradores d’estos documentos punxéronse en contactu cola Conseyería de Cultura pa conocer el valor real del archivu y tres l’estudiu de la profesora Josefa Sánz de la Universidá d’Uviéu, algamóse la datación del pergamín.

El documentu ta fecháu el 13 de marzu de 1075 y nél recuéyese la donación por parte del rei Alfonso VI del territoriu de Llangréu a la Catedral d’Uviéu.