Patrimoniu

El Conseyu de Patrimoniu Históricu, aconceyó en Potes el 30 y 31 d’ochobre, aprobó l’espediente de la candidatura que’l Ministeriu de Cultura va presentar a la UNESCO pa que se declare Patrimoniu de la Humanidá l’arte rupestre Paleolíticu de la cornisa cantábrica. Na propuesta incluyense 14 cueves de Cantabria, Euskadi y Asturies.
La Peña de Candamo, Tito Bustillo, Llonín y El Pindal son les cueves asturianes seleccionaes nesta candidatura de la que tamién formen parte Chufín, Hornos de la Peña, El Castillo, La Pasiega, Las Monedas, mientres que d’Euskadi seríen Santimamiñe y Ekain.
Esta candidatura a Patrimoniu de la Humanidá, ye la única que va presentar l’estáu español en 2007, y ye una ampliación de la cueva d’ALtamira como Patrimoniu de la Humanidá. Les cuatro cueves asturianes sumaríanse al arte prerrománicu y a los monumentos d’Uviéu que yá formen parte del patrimoniu de la Humanidá.

Los grabaos de Giovanni Battista Piranesi, una colección de 60 pieces propiedá del Muséu de Montserrat, van salir per primera vegada del muséu pa ser asoleyaos n’Uviéu, Sabadell, París, Málaga y Andorra.
L’amuesa de los meyores grabaos de Piranesi, que tien por títulu “Los Piranesi de Montserrat”, corresponde a les series de “Vistes de Roma y Vistes de monumentos (1748-1768).
Esta ye la primer vegada na que los grabaos salen de Montserrat. La mayoría de les obres de Piranesi fueron alquiríes en Roma pol padre Bonaventura Ubach a fines de la Primera Guerra Mundial. Anguaño, esta colección de grabaos ta considerada la más importante del estáu, xunta a les de la Real Academia de San Carlos en Valencia y la de la Biblioteca Nacional, el muséu de Montserrat tien 18.400 grabaos.
Na exposición, que se podrá visitar hasta’l 10 d’avientu n’Uviéu na sala d’exposiciones del Bancu Herrero d’Uviéu, podrá vese tamién el llibru “Il Campo Marzio dell’Antica Roma” na edición de 1762.

wikipedia Piranesi (catalán)

El Principáu d’Asturies, na sección de corporaciones locales, decidió ayeri nel xuráu de los premios de calidá turística reconocer a comuña los conceyos de Gozón y Ribedeva, mentes que’l premiu«Turemprende» 2006, que distingue la meyor iniciativa empresarial turística asturiana, foi pal Hotel Casa Pedro, de Santalla d’Ozcos. La dirección Xeneral de Turismu del Principáu entrega estos premios cola fin de valorar los axentes turísticos de la rexón que destaquen pol serviciu, el tratu, el cuidáu, la imaxe y la puesta en valor de los recursos autóctonos.

L’ establecimientu de restauración El Llar de Viri, de Candamu, y La Casona I de Pravia, tamien foron reconocíos con estos premios, mentes que’l d’empresa de turismu activu quedó ermu. La escelencia turística foi pal restaurante Palermo, de Tapia, y los hoteles La Cepada, de Cangues d’Onís, y Regente d’Uvieu.

Per otra parte, el primer premiu del II Concursu de fotografía dixital ‘Tineo entrefotos’ foi pa la semeya titulada ‘Desde el Bar Centro’ de Manuel Benigno Fernández. El segundu y tercer premiu, foron pa ‘Sobre el río Navelgas’ de Gregorio Acebes y ‘Braña’ de Jesús Rodríguez.

Xose Nel Navarro, autor del ensayu que lleva por títulu ‘L’Horru: una arquiteutura del sieglu XXI’, va ufiertar una charrar sobre l’horru como graneru de riqueza, güei a les ocho la tarde, na Llibrería Ítaca de Xixón. Con esta conferencia la llibrería asitiada na cai Marques de Casa Valdes vuelve cola so programación de seronda, na que tamien va poder esfrutase de la esposición fotográfica de Paco Buda.

La llibería Ítaca, per otra parte, sigue cola ufierta comenzada nesti mes de setiembre, pola que los llibros de les secciones Frikis, Novela Negra, Ensayu y Lliteratura Xeneral van tener un descuentu del 50% hasta la fin de les existencies.

La Plataforma pola Defensa de Redes pidió una reunión a la Ministra de Medio Ambiente aprovechando la so visita a Asturies el próximu martes 3 d’ochobre. En tala Plataforma quier tresllada-y a la Ministra Cristina Narbona les razones de la so oposición a la construcción del embalse de Caliao y les posibilidaes d’una nueva política del Agua n’Asturies.

La Plataforma ye optimista sobre la posibilidá de celebrar esta entrevista que foi solicitada güei al travies del gabinete del Ministeriu de Mediu Ambientu.

En talu encuentru va treslladase-y tamien al Ministeriu’l malestar de les organizaciones integrantes de la Plataforma pola violación de los derechos civiles que se dio esti fin de selmana na acampada celebrada nel área recreativa de Caliao.

L’acampada convocada en Caliao pa esti fin de selmana pola Plataforma pola Defensa de Redes contra la construcción d’un embalse nesta localidá casina divide a los socios de gobiernu asturianu. Mentes que los responsables de Medio Ambiente del Principáu prohibieron la celebración de tala acampada a travies d’una nota unviada pola Viceconseyería de Medio Ambiente, firmaba pol director xeneral de Recursos Naturales, Cristino Ruano, el conseyeru de Xusticia, Francisco Javier García Valledor, manifestó’l rechazu a esta decisión, de la que desixó la ‘inmediata rectificación’, afalando a los participantes a mantener la convocatoria por tar dientro ‘de l’absoluta normalidá democrática’.

Pesie a la polemica, los responsables de l’acampada, qu’aseguren nun ser a creyer esta decisión per parte de la Conseyería de Medio Ambiente, mantienen la convocatoria, yá que va tiempu qu’esta taba en conocimientu del director Conservador del Parque de Redes, y amás cuenta cola autorización del Ayuntamientu de Casu pa facer esta actividá al travies del Alcuerdu de la so Comisión de Gobiernu de fecha 23 de mayu.

Acampada en Caliao en defensa del Parque Natural de Redes

La tercer fase de les obres de rehabilitación de la ilesia de Santa Eulalia d’Abamia, en Corao (Cangues d’Onís), onde cuenta la lleenda que recibió sepultura’l rei Pelayo y la so muyer Gaudiosa, sacaron a la lluz un nuevu enterramientu que, según los espertos, podría datar de la Edá Media. La cata de seis metros de llargo por dos d’anchura fecha polos especialistes al llau de la sacristía, nel esterior del templu, descubrió los restos d’un esqueletu xunto a un pavimentu que según calculen pude ser echáu a finales del sieglu XIX.

Los espertos que trabayen nes obres de rehabilitación del templu d’Abamia consideren qu’esti nuevu esqueletu aparecíu seguramente sedrá namás ‘la primera de les otres munches tumbes medievales, del sieglo XV o de primero, que se pueden atopar, yá que la costume d’enterrar los muertos dientro de les ilesies vien d’una epoca más tardía’.

El equipu de profesionales que va intervenir sobre otres dos cates nel próximu mes o mes y mediu traten de controlar el drenaxe del monumentu cola fin d’evitar humedaes nel mesmu. Nes fases anteriores nel templu d’Abamia tamien descubrieron una muria na capiella mayor que fácilmente perteneciere a una cabecera o ermita del sieglu XIII.

Otru de los trabayos que van facer los espertos en Corao va tar dedicáu al estudiu de les pintures y los revistimientos orixinales, anque inda nun se tien fecha pal proyectu.

L’Ayuntamientu de Villaviciosa acaba d’empezar la rehabilitación de los horros de Sietes, dientro d’una primer fase que va tratar la recuperación integral de siete de les edificaciones más estropiaes y con mayor valor patrimonial de la zona. La obra, con una inversión incial d’unos 116.000 euros, prevista pa un añu y mediu de duración, empieza con más de tres años de retrasu.

Per otra parte, l’oxetivu municipal ye seguir col llabor de recuperación de los horros nuna segunda fase, amás d’abrir un aula didáctica nel antiguu Casinu de Sietes, del que sólo falta l’equipamientu, y que va llevar el nome de Rafael Balbín, etnógrafu que dedicó la so vida a recuperar la historia de los horros y paneres de la zona.

Asturies, xunto al restu de Comunidaes Autónomes españoles, va tener la so rpresentación na VII edición del Regent Street Festival, que se va celebrar nesta centrica cai londinense, que per unes hores va camudar el tráficu por una playa d’arena fino, el prósimu domingu baxo’l títulu ‘Un paseo por España’. L’actu, patrocináu pola Oficina Española de Turismu en Londres y los comerciantes d’esta parte de Londres, foi visitáu nes anteriores ediciones por más de 30000 persones, según informó esta mañana la Conseyería de Cultura del Principáu d’Asturies.

La representación asturiana nesti importante eventu turísticu, nel que nun van faltar los baillarines de flamenco nin los castellers catalanes, va tar basada na actuación de los sos gaiteros, mesmo que va facer la comunidá gallega. Amás, diferentes puntos d’información turística van detallar los cientos de playes asturianes, los sos equipamientos culturales y museísticos, el Camín de Santigo asina como la infraestructura hotelera del Principáu, que ve nesta oportunidá una gran ocasión pa promocionase na ciudá inglesa.

Pa reforzar esta actuación promocional mañana va facese una presentación de les cuatro comunidaes de la España Verde al operador británicu OPODO. Nesti actu va dase a conocer tamien el productu turísticu”Bienvenido a Asturias”, que fai referencia a la existencia de vuelos directos ente’l Principáu y Londres.

Na tarde d’ayeri l’alcalde d’Aviles, Santiago Rodríguez Vega, presentó xunto al conceyal de Cultura, Juan Jose Fernández, el proyectu básicu de conteníos del futuru Museu d’Aviles, frutu del conveniu urbanísticu robláu ente l’Ayuntamientu avilesín y la compañía mercantil Proiecto Norton, SL. El proyectu busca la creacción d’un centru d’interpretación que percuerra la hestoria de la ciudá al travies de cuatro periodos claves.

Trátase de dar una visión xeneral de la hestoria d’Aviles a partir de cuatro periodos fundamentales, cuntaos al travies de la so arquitectura y espuestos nes sos cais dende hai mil años. Les cuatro grandes interpretatives sedríen: la villa medieval, la villa moderna, la ciudá burguesa y la ciudá industrial.

Esti proyectu museísticu cunta con un presupuestu de 1.461.829 €, pa un plazu másimu de 24 meses, y consta de 578 metros de superficie útil y 697,44 de superficie construyida.