Patrimoniu

El Muséu Etnográficu del Oriente d’Asturies, xestionáu pola Asociación El Llacín de Porrúa, ampliará les sos instalaciones y la so actividá cultural. El Conseyu de Gobiernu d’ayeri aprobó una partida de 243.000€ empobinada a esta ampliación. Del mesmu mou l’Ayuntamientu de Llanes roblará güei un conveniu cola Asociación El Llacín cola fin d’executar el proyectu d’ampliación.

L’aportación del Gobiernu d’Asturies a l’ampliación del centru etnográficu del oriente del país serdá de 243,000@ colos que l’Asociación El Llacín entamará l’ampliación del Muséu del Oriente d’Asturies.

L’asociación cultural EL Llacín de Porrúa, conceyu de Llanes, nació en 1994 depués de la donación, d’un indianu purruanu, d’una güerta y delles cases al pueblu llaniscu. Cola fin de difundir la cultura y les tradiciones del oriente asturianu l’asociación entamó’l Muséu Etnográficu del Oriente d’Asturies, el Mercáu tradicional de Porrúa, la Banda de Gaites El Llacín, la escuela de música tradicional de Porrúa, asina como bien de publicaciones pa cumplir con esta finalidá. Anguaño l’asociación cultural El Llacín cunta con más de 500 socios.

La Conceyalía de Comerciu de Mieres entama un plan pa potenciar los chigres tienda nos pueblos del conceyu como forma de dinamizar el turismu rural. El programa dará ayudes y asesoramientu pa modernizar estos establecientos o abrir nuevos con imaxe propia.

La rede “Chigres tienda” ye una iniciativa empobinada a meyorar y modernizar los comercios del ámbitu rural en poblaciones d’énte 150 y 3.000 habitantes na Montaña Central d’Asturies.

Ente los obxetivos d’esti plan tán el de mordenizar l’aspectu internu y esternu de los establecimientos, adecuar el sutíu de productos y servicios, cola fin de cubrir les necesidaes mesmo de los vecinos del llugar como de los potenciales turistes.

Pa llevar alantre esti plan, les alministraciones implicaes facilitarán l’asesoramientu a los y les emprendendores nesta materia, materiales corporativos de la campaña, llinies d’ayuda o la una campaña de publicidá que resalte’l valir del comerciu tradicional nel mediu rural del país

Ente los actos que la Conseyería de Cultura ta preparando pa la conmemoración de los diferentes aniversarios que cellebrará Asturies en 2008, Carlos Madera, Director Xeneral de Promoción Cultural y Política Llingüística presentó ún proyectu que tien por obxetivu axuntar toles cruces medievales n’Uviéu.
Ente les cruces que yá tan afalaes pa venir a Uviéu ta la de la Corte Caronligia, cola que la monarquía asturiana mantenía rellaciones diplomátiques. Estes cruces europees amosaránse xunta a les dos cruces asturianes, la de la Victoria y la de los Ánxeles.
Amás de l’amuesa de cruces medievales, dende la Conseyería de Cultura se ta preparando delles muestres sobre la documentación medieval y los incunables que s’alcuentren nos archivos de les diferentes instituciones asturianes.

L’añu 2008 conmemórase la fundación d’Uviéu, la declaración de Soberanía, la fundación de la Universidá, ente otros acontecimientos que marcaron la historia d’Asturies.

Les güelgues de dinosaurios asturianes candidates al Patrimoniu de la Humanidá. La UNESCO va recibir nel primer trimestre de 2007 l’espediente de la candidatura d’Asturies, La Rioja, Aragón, Cataluña, Valencia y Castieya na que se solicita la declaración de Patrimoniu de la Humanidá de les güelgues d’estos animales prehistóricos.
Les fuelgues de dinosauriu, nomaes icnites, alcuéntrense n’Asturies ente los conceyos de Xixón, Villaviciosa, Colunga y Ribeseya. Nestos yacimientos alcontráronse 446 güelgues. Na playa de la Griega, Colunga, atópense güelgues de 130 cm de diámetru, les mayores del Estáu español y énte les mayores que s’alcontraron nel mundu.

La Conseyería de Cultura publicó nel Boletín Oficial del Principáu d’Asturies la resolución de calificación de muséu a les Termes Romanes de Campu Valdés y al Parque Arqueolóxicu de La Campa Torres. Los dos equipamientos culturales, de titularidá municipal, veníen siendo consideraos como museos, anque nun gozaren del reconocimientu oficial agora algamáu.

La Campa Torres ye un asentamientu ástur, de la tribu de los cilúrnigos, que se vien escavando dende 1783. Actualmente cuenta con un muséu etnográficu. Les Termes de Campu Valdés alcontráronse en 1903 y fueron inauguraes en 1995.

Cola decisión adoptada pola Conseyería de Cultura los dos yacimientos xixoneses pasarán a ser d’interés pa la comunidá autónoma y nel ámbitu del conceyu de Xixón.

BOPA 2 d’avientu de 2002

La Conseyería de Cultura va entamar la reconstrucción del Castru de Cellagú na finca d’El Castañéu. Les pieces del históricu castru del conceyu d’Uviéu, que nun fueron a parar l’avance de la cantera de piedra, que se tien pensao resituar son la torre, la muralla y dalgunes de les viviendes. Nel proyectu de reconstrución, y reemplazmientu, ta previsto facer un aula virtual sobre la vida nesti castru.
Cellagú tuvo asentamientos continuaos dende’l sieglu VI enantes de la nuesa era hasta’l sieglu I de la nuesa era. Les tribus ástures y depués la colonización romana ficieron usu d’esti espaciu catalogáu a mediaos del sieglu venti por José Manuel González y Vallés.
La Conseyería de Cultura tien empaquetaes les diferentes pieces a reconstruyir, esperando’l momentu nel que l’Ayuntamientu d’Uviéu dea’l permisu pa poder entamar la reconstrucción nel colláu d’El Castañéu. Darréu esta concesión la Conseyería de Cultura y Readymix, empresa adxudicataria de la cantera, entamarán el treslláu.

L’estudiu sobre Cellagú fechu pola Unión Temporal d’Empreses Ánade, entovía ensin asoleyar, indicaría que les pieces, materiales de les diferentes etapes históriques nes que s’ocupó l’emplazmientu castreñu sedríen abondo como pa enllenar una sala del Muséu Arqueolóxicu d’Asturies. Ente los datos que s’alcontraran na publicación d’esti material apaecería la presencia de guarniciones de les lexones romanes.

La xornada de trabayu “Horru-Patrón” cellebraráse nel Muséu Etnográficu del Pueblu d’Asturies durante la mañana del sábadu 25 de payares. Durante la xornada de trabayu estableceráse al horru númberu tres del Pueblu d’Asturies (l’horru Uninsa” como Horru-Patrón pa la xeneración d’una métrica capaz de facer la valoración, certificación, normalización y catalogación del horri, mesmo nel campu patrimonial tradicional, como nel de les sos nueves funciones y aplicaciones.
Pa los organizadores de la xornada l’aporte d’un modelu d’estudiu va suponer una puxa nel campu de la Investigación, Desenrollu ya Innovación del horru. Con esti horru-patrón quierese permitir la puesta en funcionamientu d’un mercáu del horru, nel que los tres sectores económicos tean presentes, dago que sedría “una oportunidá histórica” pa l’Asturies del sieglu XXI.
Al acabar les xornaes fadráse una semeya de familia, ente tolos ellí presentes, xunta l’horru patrón.

Noticia relacionada

El Forum de la UNESCO, cellebráu na ciudá italiana de Florencia ente l’11 y el 15 de setiembre, plasmó la tradición oral asturiana dientro del so documentu final. N’esti alcuentru de la organizción cultural de les naciones uníes participaron más de 600 delegaciones en representación de 60 países de tou’l mundu. La Conseyería de Cultura d’Asturies comisionó a Fernando Ornosa, Jesús Suárez y Teresa Álvarez pa representar colos sos proyectos a la cultura inmaterial del país.
Los tres proyectos asturianos presentaos nel Forum de la UNESCO son “L’archivu de la tradición oral d’Asturies: nueves tecnoloxíes pa vieyos” de Jesús Suárez; “La proyección hacia’l futuru de la música tradicional” de Fernando Ornosa; y “La difusión del Patrimoniu inmaterial al traviés de les nueves tecnoloxíes” de Teresa Álavarez Acero. Los proyectos presenten la cualidá de la so tresversalidá, esto ye que compleméntense ente ellos, lo que suscitó interés por parte de les comisiones ellí presentes.

Jesús Suárez esplicó que les intervenciones asturianes fueron siguíes con gran interés por parte de les delegaciones presentes, hasta’l puntu de que los representantes del Quebec y del Congo establecieron contactos cola asturiana pa implantar el modelu d’estudiu de la tradición oral nos sos países. Suárez esplicó que’l proyectu asturianu yera integral y que poro foi incluyíu ente les menciones del documentu final por “contribuyir a la educación, asina como por favorecer el contactu interxeneracional”. Esta mención tien amás el valir de que foi la única concedida a una entidá non estatal, polo que’n pallabres de Suárez “ábrense les puertes a una candidatura al Padremoñu de la Humanidá pa la cultura inmaterial asturiana”. Sobre esta posible candidatura Carlos Madera dixo “tar d’alcuerdu, pero que nesti intre esisten dos candidatures a esti padremoñu como son les de les cueves rupestres y el Camín Antiguu de Santiago”. Ente les propuestes de Suárez alcuéntrase crear un Centru Documental del padremoñu oral ya inmaterial asturianu, propuesta esta que recibió’l sofitu del Director Xeneral de Promoción Cultural.

Fernando Ornosa dixo qu’un de los motivos p’asistir a esti alcuentru de la UNESCO yera buscar estratexes pa la reconocencia de la música tradicional, como un padremoñu “a custodiar, protexer y fomentar”. Ornosa confirmó que n’Asturies la bona base que l’Archivu del Pueblu d’Asturies permite, asegura que los músicos, investigadores y ciudadanos que tean interesaos na conociencia de la tradición asturiana tengan un espaciu perafayadizu pa ello. Ornosa faló del pryectu de Teresa Álvarez, que nun s’alcontraba na rueda de prensa, pal estudiosu de los sones tradicionales, la importancia d’averar el padremoñu a los centros escolares significaría la salvagurda de la tradición asturiana. Fernando Ornosa esixó que’l Principáu d’Asturies desenvuelva la Llei de Patrimoniu, como forma de posiblitar un trabayu de campu d’investigación continuáu nel tiempu. A esti respectu Ornosa considera que “nun tien de ser sólo una prioridá pa los investigadores sinon una prioridá pa los asturianos”.

Ramón d’Andrés amuesóse orguyosu pola presencia nesti tipu d’alcuentros d’ivestigadores del valor de Jesús López, Fernando Ornosa o Teresa Álvarez. Pal Xefe de Política llingüística’l nivel d’investigación n’Asturies ye peraltu, sicasí “nun ta too fecho anque la simienta yá ta echada”. D’Andrés insistió na necesidá pa que la cobertura y l’esfuerzu investigador tean presentes ente la sociedá asturiano.

Carlos Madera afitó la so voluntá pa continuar avanzando nel estudiu y promoción del padremoñu asturianu. Pa elli “la tradición oral ye ún de los padremoños que más necesidá tienen de protección, amás de suponer una de les señes más importantes de la nuestra tierra”.

L’horru númberu tres del Pueblu d’Asturies foi escoyíu como patrón pal estudiu de los horros del país. L’horru nomáu UNINSA, por venir de les vegues qu’ocupa anguaño l’acería, nun presenta nenguna característica en particular, lo que sumáu a que s’alcuentra nun entornu, el Pueblu d’Asturies, nel que la so conservación ta asegurada fizo. Xosé Nel Navarro, impulsor del estudiu del horru, considera que dende esti patrón se podrá conceder un valor a cada horru estudiáu.
Xosé Nel Navarro organizó en 2004 el primber Congresu del Horru Asturianu y pal sábadu 25 de payares tien previsto facer una xornada embaxo’l títulu “L’horru=100. El mercáu del horru, una oportunidá histórica” cola que quier proporcionar un modelu base d’una de les construcciones tradicionales que más caractericen al país. Nesta xornada van participar miembros del Colexu d’Arquitectos, Fundación Llaboral de la Construcción, Universidá cola fin d’entamar un estudiu científicu sobre l’horru.

horru.com

La Conseyera de Cultura, Ana Rosa Migoya, garantizó que’n 2007 habrá perres abondo pa los proyectos d’ampliación del Muséu de Belles Artes n’Uviéu y del Centru Cultural Niemeyer, n’Avilés. D’esti mou Migoya consideró “absurda” la polémica creada dende l’Ayuntamientu d’Uviéu sobre’l supuestu desvíu de fondos en favor del proyectu a desenvolver n’Avilés.
Ana Rosa Migoya esplicó que’l proyectu de presupuestos pal 2007 incluyen una partida de 5.69 millones d’euros pa l’ampliación del Muséu de Belles Artes y otra de 3.17 millones pal Centru Cultural Niemeyer. “Nin siquiera les cifres qu’apaecíen na prensa yeren ciertes” dixo Migoya en rueda de prensa.
La portavoz del gobiernu manifestó que los dos proyectos son perimportantes pal Executivu y poro a ellos se destinaren los recursos “afayadizos”