Patrimoniu

L’Academia de la Llingua Asturiana ta acabante d’espublizar un númberu nuevu de la coleición ‘Toponimia’, el 117. Una entrega nuevada dedicada esta vegada a la toponimia de la parroquia urbana ya industrial de Xixón, la que lleva’l mesmu nome que’l conceyu y onde ta asitidada la ciudá más grande d’Asturies. L’autor d’esti trabayu ye’l profesor y miembru de l’ALLA, David M. Rivas Infante.

El trabayu dixébrase en trés partes. La primera ye un ‘Entamu’, onde Rivas fai delles alvertencies sobre la dificultá de ponese a recoyer la toponimia d’una ciudá y les especiales característiques de la Villa de Xovellanos. Na segunda parte recuyénse los topónimos tradicionales como tales. Un llargu llistáu nel qu’apaecen barrrios, zones, cases, caminos, playes, peñes, praos, ríos y regatos ente otros fenómenos xeográficos.

Na segunda parte Rivas recueye, separtaos, lo que denoma ‘Toponimia Urbana’, un llistáu nel qu’apurre los nomes populares de zones, negocios, edificios, estatues, caminos y zones de la ciudá que reciben nomes que fueron puestos na época industrial y post-industrial. Asina n’esti apartáu podemos ver topónimos como L’Algodonera, La Ilesiona, La Escalerona, El Molinón, La Lloca’l Rinconín, La Ruta los Vinos, El Parque los Vieyos, El Pinchu Murunu, Miami o la Plaza’l Parchís, ente munchos otros.

El cartafueyu, que lleva unes selmanes nel mercáu, va presentase en Xixón nel mes d’avientu y ta a la venta nes llibreríes del país.

Continua la polemica alredor de los daños que ta sufriendo’l texu de la ilesia d’Abamia nel conceyu de Cangues d’Onis. Tres les denuncies escontra’l metodu col que se tan faciendo les obres de remocique de la Ilesia al cargu d’Amigos del Texu y d’Amigos d’Abamia y que n’opinión d’estos últimos taríen dañando dafechu l’arbol, la coalición Unidá pidió a la Conseyería de Mediu Ambiente la declaración del texu como Monumentu Natural.

Según la llei del Protección de los Espacios Naturales del Principáu tolos espacios que contengan elementos naturales d’especial interes podrán ser declaraos como protexíos. La llei tamiñen especifica que estos elementos naturales son aquellos elementos de la naturaleza constituyíos básicamente por formaciones de
notoria singularidá, rareza o belleza, que merecen ser oxetu d’una protección especial. Unidá recuerda a esti respectu que los texos son un árbol menazáu dientro del ecosistema asturianu amás de ser una planta de unos 500 años d’antigüeda y avenceyáu hestóricamente a la ilesia d’Abamia.

Unidá tamien basa la so petición en la anterior declaración como Monumentu Natural de otros texos del territoriu astuiriano. “Ye poco comprensible que xunto a los texos de Bermiegu, Santa Coloma, Santibáñez de la Fuente, Lago, Salas y Pastur, declaraos nel so día monumentos naturales, nun se haya reconocíu tovía esta categoría de protección pal texu d’Abamia”.

Amás la coalición recuerda a la conseyería que’l texu ta en situeción clara de peligru dende qu’entamaron les obres de rehabilitación de la Ilesia, que orixinaron el corte de los raigaños del árbol por mor de la excavación d’una zanxa de 40 cm de profundidá y más de 10 metros de llargu cerca d’una muria ente la ilesia y el texu. Por eso Unida pidio “inmediatamente que s’incuya el texu na Rede d’Espacios Protexíos del Principáu d’Asturies.

La conseyera de Cultura y Turismu, Encarnación Rodríguez, y la directora xeneral de Promoción Cultural y Política Llingüística, Consuelo Vega, presentaron esti llunes delles de les propuestes del Gobiernu del Principáu pa les conmemoraciones ‘Asturies 2008’, ente les que destaquen actividaes relixoses, históriques, musicales y escéniques.

La Conseyería organiza pal 2008 delles actividaes xunto a la Universidá d’Uviéu, el Conceyu d’Uviéu, l’Arzobispáu y la Xunta Xeneral del Principáu, con motivu de les efemérides de los 400 años de la fundación de la Universidá, los 1.000 y 1.200 de les cesiones de les cruces de los ánxeles y la victoria a la Ilesia, y los 200 del llevantamientu escontra la invasión francesa. Amás, la propuesta del Principáu inclúi’l centenariu del descubrimientu de les cueves rupestres del Pindal; y los 40 de la de Tito Bustillo.

Cultura va organizar ente los díes 22 y 27 de setiembre del 2008 el ‘Symposium internacional sobre aspectos de la Europa Altomedieval y relacionaos colos XI y XII de les cruces d’Uviéu’. Amás, según señaló la conseyera na rueda de prensa d’esti llunes, otra de les iniciatives del Principáu va ser la edición de la “Biblia della badía della cava dei Tierrni”, que ta en Nápoles y que tien el so orixen nel Reinu d’Asturies.

La Axencia de noticies Europa Press facía esti martes l’anuncia de que la ministra de Vivienda, Carme Chacón, dexaba afitao na so visita a Avilés “la disposición del Ministeriu pa qu’en feches futures pueda firmase un protocolu ente Vivienda y la Fundación Centru Cutural Niemeyer pa que s’establezan les bases de collaboración ente dambes entidaes que posibiliten qu’esti espaciu torne na sede permanente de la Bienal d’Arquitectos”.

Chacón aseguró, sigún EP, que’l Principáu tenía especial interés en que’l Niemeyer acoyera esta importante cita: “Queremos que’l Niemyer seya sede de la bienal, asina lo propunxo’l Principáu y asina lo desea’l Gobiernu d’España”. La Ministra anunció que dende’l Ministeriu van ponese a trabayar conxuntamente col restu d’instituciones afectaes xunto cola propia fundación Niemeyer pa llevar a cabu esti proyectu lo enantes posible.

Tres visitar les obres del Museu Arqueolóxicu d’Asturies n’Uvieu, el Ministru de Cultura, Cesar Antonio Molina declaró que les obres del museu van tar finalizaes prácticamente nel primer trimestre del añu próximu”. El ministru tamien aprovecho pa anunciar que poco dempues del Arquelóxicu va inagurase tamien l’Archivu Históricu.

El Ministru señaló amás la prósima firma va d’un alcuerdu coles fundaciones de la Llaboral en Xixón y Óscar Niemeyer n’Aviles pa collaborar con elles nes actuaciones y eventos que s’entamen nes dos ciudaes. “Siguimos trabayando no que ya se fizo y proponiendo nueves coses porque la cultura ye un mediu pa una comunidá como Asturies p’atrayer turismu”, dixo.

Molina tuvo acompañau na visita al Museu Arqueolóxicu pol presidente del Principáu d’Asturies, Vicente Álvarez Areces; la conseyera de Cultura y Turismu, Encarna Rodríguez, y l’alcalde d’Uvieu, Gabino de Lorenzo, ente otros políticos autonómicos.

Sigún espubliza esti día Europa Press na so edición en llingua asturiana, “Les investigaciones nel yacimientu asturianu de la cueva del Sidrón llocalizaron el xen FOXP2, implicáu na llingua, en dos neandertales, lo que demuestra qu’estos prehitóricos tamién teníen fala y que, poro, ésta ya nun ye un fechu diferencial de la especie humana.

La revista científica Current Biology publicó la recuperación del xen nel so últimu númberu. Nel estudiu internacional participen los investigadores Carles Laluela, de la Universittat de Barcelona; Javier Forte y Marco de la Rasilla, de la Universidá d’Uviéu, y Antonio Rosas, del Muséu Nacional de Ciencies Naturales de Madrid.

La cueva del Sidrón data de 43.000 años, aproximadamente, y nella atopáronse más de 1.400 restos nendertales nunes condiciones de conservación perbones, gracies a les condiciones de permeabilidá del yacimientu.

Los ‘homo neanderthalensis’ son el grupu más cercanu a la especie humana actual y dixebráronse del ‘Homo Sapiens’ nos últimos 500.000 años. Según el nuevu estudiu de cambios xenéticos, los humanos modernos presenten dos cambios d’aminoácidu nel FOXP2, que ye lo que los diferencia d’otros primates y se desarrollen cola evolución de la llingua.

Dende’l pasáu 15 d’ochobre y hasta’l 31 d’esti mesmu mes ta disponible al públicu na nueva nueva ubicación del Colexu d’Arquietectos nel antiguu Colexu Hispania d’Uvieu (C/ Marques de Gastañaga, s/n) una amuesa de maquetes que muestren proyectos y obres de mui diversu calter feches nel Principáu. L’horariu de visites ye de lunes a viernes de 17.30 a 20.30 y los sabados de 12.00 a 14.00 hores.

El Palaciu de San Román de Panes, en Peñamellera Baxa, va algamar la categoría de Bien d’Interes Cultural (BIC) embaxo la categoría de Monumentu, tres l’aprobación d’un proyectu de Decretu del Conseyu de Gobiernu del Principáu. Xunto col Palaciu tamien se van protexer un total de 30 elementos pertenecientes al Palaciu y a la capilla. según esplicó la vocera del Gobiernu, Ana Rosa Migoya.

El Palacio de San Román levántase nel Barriu de San Román de Panes. Data del sieglu XVII y ye un de los palacios rurales meyor conservaos de tol Principáu d’Asturies. El conxuntu ta formáu pol palacio, les dependencias serviciales, les cuedres y payares y la capilla.

La Xunta Xeneral del Principáu refuga la construcción del embalse de Caliao colos votos del PP y IX-BA-LV, mentantu que al PSOE abulta-y “imprudente y radical” la postura d’IX al respetive ya “irresponsable” el sofitu del PP. La Xunta aprobó 40 de les 82 propuestes de resolución presentaes ente los tres grupos parlamentarios na última xornada del Alderique sobre la Orientación Política del Gobiernu.

La propuesta de resolución más destacada qu’aprobaron los parlamentarios foi la que propón treslladar al Gobiernu central la negativa del Parlamentu asturianu a la construcción del embalse de Caliao, por consideralu “innecesriu, inapropiáu, y obsoletu nel marcu de la nueva cultura de xestión del agua impulsada pola Directiva marcu del Agua”.

El Ministeriu de Cultura ta acabante de presentar la Biblioteca Virtual del Patrimoniu Bibliográficu, una ferramienta informatica que permite consultar vía Internet alrodiu d’un millón de llibros y manuscritos impresos conservaos nes biblioteques públiques d’España. Nesti proyeutu cooperen biblioteques de diferentes Comunidaes Autónomes.

La Biblioteca Virtual del Patrimonio Bibliográfico axunta na dirección web http://bvpb.mcu.es u total de más de 250.000 páxines de cásiqie milenta manuscritos ya impresos con imáxenes que se puen descargar o consultar por autor, títulu, fecha o dómina d’escritura o impresión, en cualaquiera de les llingües oficiales españoles y n’inglés, pero non n’asturianu.

A esti proyeutu van dir añadiéndose otres 400.000 páxines a lo llargo d’esti añu.