Patrimoniu

El Grupu de Baille Tradicional San Félix de Candás acaba d’asoleyar ‘Asturies n’otra dómina. Los bailles y les dances’ col que quier desplicar a los más neños al traviés de dibuxos y actividaes los bailles tradicionales d’Asturies. Dende los bailles xuegu que faen los más neños hasta los bailles y les dances que la xente del pueblu facía nes fiestes de los pueblos d’Asturies: xota, mulera, gallegada, valse…

Los dibuxos son de Míriam Navarro de la empresa IGRAFIX y los testos y la idea orixinal ye del Grupu de Baille Tradicional San Félix. Esti nuevu volume sigue la serie entamada’l pasáu añu col asoleyamientu de ‘Asturies notra dómina. La ropa’. Ta a al venta en llibreríes por cinco euros o nel corréu grupusanfelix@hotmail.com

Ediciones La Cruz de Grau va presentar güei a les 19:30 na Casa Cultura de Lluanco un calendariu hestóricu del conceyu de Gozón. El calendariu ta decoráu con semeyes antigües del conceyu y quier ser el niciu d’un futuru llibru de semeyes antigües de Gozón. Nel actu collabora l’Ayuntamientu de Gozón.

L’Academia de la Llingua lleva munchos años trabayando na recuperación de la toponimia de toles parroquies d’Asturies. Pa ello, espubliza la coleición “Toponimia”, que nun futuru y rematada la xera va convertise nun gran volume “que pueda llevar el nome Corpus Toponimicum Asturiarum”. Nesti casu, la coleición llega a los númberos 114, 115 y 116, que pertenecen a parroquíes de los conceyos de Cangues d’Onís, Colunga y Ayer.

El númberu 114, dedicáu a la parroquia de Gobiendes, nel conceyu de Colunga, tien por autor a Inaciu Hevia Llavona ya inclúi un entamu, delles notes llingüístiques y un llistáu completu de los toponónimos d’esta parroquia. El volume, que ye’l cuartu dedicáu al conceyu de Colunga, tien más de sesenta páxines.

El númberu 115 tien por autora a Mª Conceición Vega Obeso y ta dedicada a les parroquies de Cuadonga, La Riera y el puertu de Cuadonga, siendo’l númberu cuatro de los dedicaos al conceyu de Cangues d’Onís y cuntando con entamu y datos llingüísticos nes más de 65 páxines del cartafueyu.

El 116 de la coleición toponimia ta dedicáu a les parroquies ayeranes de Conforcos y L.lamas y ye’l númberu 5 de los dedicaos a parroquies d’Ayer. L’autor ye Jorge Álberto García Fernández, inclúi “Trazos llingüísticos” y más de venti páxines de llistáu de topónimos.

El primer fin de selmana d’Avientu, La Puela d’Allande va acoyer la octava edición del Seminariu d’Estudios Asturianos que tolos años organiza la Fundación Belenos, cola participación d’investigadores como Berto älvarez Peña, Jesús Suárez López y Ramón Sordo Sotres.

El programa del VIII Seminariu d’Estudios Asturianos de la Fundación Belenos que va celebrase en La Puela d’Allande el 1 ya’l 2 d’avientu d’esti 2007 entamará’l sábadu 1 d’Avientu a les 10 y media la mañana cola conferencia d’Alberto Álvarez Peña “La mitoloxía asturiana nel marcu les mitoloxíes europees”, a la que va siguir a les 12,30 la de Jesús Suárez López, del Archivu de la Tradición oral del Muséu del Pueblu d’Asturies, “La cervantina bendita y la culebra maldita: raíces profundas de un conjuro asturiano”.

Tres de la xinta del sábadu, Nicolás Bartolomé Pérez va ufrir unes “Notes de mitoloxía lleonesa” a les 16,30 hores y darréu d’elli, a les 17,30 falará Cristobo de Milio Carrín sobre “Xanes y vírxenes: el cultu a la Buena Señora n’Asturies”, pa finar la xornada col etnógrafu Ramón Sordo Sotres que falará sobre “Mitoloxía cántabra: definición, personalidá y parentescu”.

El domingu día 2 d’Avientu pela mañana, dende les 11,30 hores, va desendocase un conceyu abiertu sobre “Investigación y tradición oral: estáu de la cuestión y nueves prespeutives” al que siguirá a les 14,30 la Xinta y pieslle d’esti VIII Seminariu.

El númberu de places del seminariu ye de 36 y el plazu matrícula finó’l 28 payares, con un preciu de matrícula de 36 euros. L’agospiu opcional en réxime de pensión completa na “Nueva Allandesa” tien un preciu por persona de 60 euros (dende la xinta’l sábadu a la xinta’l domingu, too incluyío dafechu).

La Dirección Xeneral de Turismu invertirá alredor de 450.000 euros (454.459) na dinamización turística de la comarca de Fuentes del Narcea. Asina lo aseguró la Directora Xeneral de Turismu, Elisa Llaneza, nuna rueda de prensa na que anunció que la metá d’esi presupuestu va tar empobináu a llevantar un museu etnográficu en Cecos (Ibias) y remocicar l’albergue esistente.

Llaneza tamien informó que’l Plan de Dinamización tamiñen incluí la cellebración de talleres d’Innovación. “Buscamos hacer nuevos formas de hacer productos turísticos”, declaró Llaneza. Amás d’estos talleres, el plan de dinamización recueye la celebración de cursos d’atención al cliente y seminarios sobre certificación y sistemes de calidá.Otra de les inversiones que anunción Llaneza foi l’aportación de 120.000 euros pal Parque Multiaventura de Cangas de Narcea.

Güei vienres a les cinco y media la tarde va presentase y firmase un conveniu de collaboración ente’l Grupu de Desenrollu Rural “Camín Real de la Mesa” y l’Asociación pa la Recuperación de la Arquitectura Militar Asturiana 1936/1937 nel Salón d’actos del Palaciu de Valdés Bazán, Centru de Interpretación de la Cueva de la peña de Candamu, en San Román de Candamu.

La firma del Conveniu de Collaboración va permitir, nuna primera fase afitar les bases pa ellaborar un estudiu documental de la guerra civil nel conceyu de Candamu al traviés de la recopilación y posible reproducción del toa aquella documentación d’época que faiga referencia a les acciones militares desenrrollaes nel conceyu, depositada tanto n’archivos públicos, civiles o militares, como n’archivos privaos, d’entidaes o particulares.

Amás, gracies al conveniu va poder ellaborase un inventariáu de los elementos d’arquitectura militar de la guerra civil nos conceyos de Candamu, Les Regueres y Grau, va poder establecese criteriu pal remocique y la puesta en valor de conxuntos aequitectónicos. El conveniu inclúi la definición de conteníos y ubicación nel Palaciu de Valdés Bazán d’un centru d’interpretación del patrimoniu de la guerra civil, un centru nel que va participar na xestión l’asociación ARAMA 36/37.

L’alcuerdu de colaboración van firmalu Belarmino Fernández Fervienza director del GDR Camín Real de La Mesa y Artemio Mortera Pérez, homólogu d’ARAMA 36/37. Va presidir l’actu l’Alcalde del Conceyu de Candamu, José Antonio García Vega, y el restu d’autoridaes llocales.

El Gobiernu rexonal autorizó esti día la firma d’un convenio de collaboración col Ministeriu de Fomentu pala financiación de les obres del Centru d’Arte Rupestre ‘Tito Bustillo’ en Ribesella. El presupuestu del proyectu asciende a 7.271.178 euros, financiaos plurianualmente y a partes iguales pol Ministeriu de Fomento (a cargy del 1% cultural) y la Conseyería de Cultura y Turismo del Principáu.

Col llamativu lema d’“Horru S.O.S.” ta acabante d’entamar una campaña col envís de “facer una llamada necesariamente urxente –tan desesperada como esperanzadora- pa evitar la estinción del horru más allá de la fecha referencial de 2021”, según esplica’l panfletu informativu que se ta distribuyendo.

La campaña inclúi la venta de productos pa recaudar fondos. De momentu son dos, una camiseta a 10 euros y una chapa a 1 euru, dambes dos col lema ‘Horru S.O.S. y a la venta en tiendes, llibreríes, nos teléfonos 659826759, 985232773 y nel corréu lletrónicu info@horru.com

Esti martes 13 de payares el xuráu del Premiu Internacional d’Escultura Sacejo, que organiza la promotora asturiana Sacejo Construcciones y Promociones (SCP) van axuntase p’asoleyar el fallu tanto del primer premiu como de los accesit. Un total de 64 artistes, españoles y estranxeros, opten a un premiu de 125.000 euros pal ganador y sus de 5.000 euros pa los finalistes. La promotora va donar la obra ganadora a una institución pública pa que se comprometa al so cuidáu y correcta esibición.

La directora Xeneral de Promoción Cultural y Política Llingüística, Consuelo Vega, y Xulio Viejo presentaron na mañana d’esti vienres 9 de payares l’anuariu 2006 de la Xunta de Toponimia que recueye’nun volume de 261 páxines editáu por Suburbia’l trabayu d’esti organismu a lo llargo del pasáu exerciciu. L’Anuariu centrase nos conceyos de Colunga, Nava, Xixón y La Ribera que foron los que recibieron la oficilización toponímica a lo llargo 2006.

El profesor de la Universidá d’Uviéu Xulio Viejo, ún de los responsables del trabayu, xunto con Ramón d’Andrés y Fernando Álvarez-Balbuena, tamién presentes ente los asistentes, desplicó los trabayos fechos pola Xunta y que componen esti volume del que tan editaos 1200 exemplares de los que 400 tan puestos yá a la venta a 18 euros y los restantes van distribuíse peles biblioteques y los centros de secundaria de toa Asturies.

Sigún se dexó afitao na presentación, nos cuatro conceyos a los que se refier l’anuariu presentáu güei propónense por exemplu Castiello Bernueces pa Bernueces, Cimavilla pa Cimadevilla o Soto Ribera pa Soto de Ribera. En dalgunos casos plantégase caltener el topónimu castellanizáu col tradicional (Cecea y Ceceda o Xixón y Gijón).

Xulio Viejo amosó la so satisfacción al presentar el resultáu d’esti trabayu asegurando que “el reconocimientu de la toponimia tradicional ye una llarga reivindicación del asturianismu, asina como un mínimu pasu hacia la oficialidá de la llingua”, destacando’l “rigor científicu” de la investigación, y señalando que’l so trabayu “foi acoyíu con normalidá y ensin estridencies”, motivu pol que se felicitó.

Consuelo Vega quiso tamién dexar clara na presentación el “compromisu del Gobiernu del Principáu cola recuperación, oficialización y conservación de la toponimia tradicional”.