Patrimoniu

L’alcaldesa de Castrillón, Ángela Vallina, visitó esti xueves pela mañana, col direutor Xeneral de Patrimoniu, Adolfo Rodríguez Asensio, el xacimientu del Peñón de Raíces, pafacer siguimientu de les investigaciones encargaes y financiaes pol Conceyu a un equipu d’arqueólogos. El Conceyu Castrillón entamó hai poco un programa d’investigación, nel qu’invierte 500.000 euros, col oxetivu de conocer la importancia d’esti xacimientu que depués de les prebes de carbonu 14 realizaes paez ser clave pa desplicar la historia de la formación de Reinu d’Asturies.

Un congresu que va celebrase del8 al 11 d’ochobre nel Salón d’Actos del Centru Cultural Caxastur d’Uviéu, embaxo’l títulu ‘Nos orixes del Reinu d’Asturies, causes polítiques y militares’ va desplicar les llinies d’investigación sobre la rellación d’Asturies cola España visigoda que se taqn desendolcando anguaño nel ámbitu unviersitariu. El Congresu va finar el sábadu 11 con una visita a delles fortificaciones altomedievales y al campamentu romanu, nos conceyos de L.lena y Ayer.

El Congresu presentóse esti martes nel mesmu salón d’actos del Centru Cultural Caxastur onde se va desendolcar les estremaes xornaes, por ser Caxastur la entidá que collabora cola Asociación d’Amigos de La Carisa, organizadora de les xornaes. Nel actu tuvieron presentes la presidenta de l’asocación, Yolanda Viniegra, y los arqueólogos Jorge Camino (director científicu del congresu) y Rogelio Estrada (secretariu), amás de delles autoridaes como’l director de Patrimioniu del Principáu, Adolfo Rodríguez Asensio, y el representante de la Obra Social de Caxastur, José Vega.

Nesti Congresu, qu’entama’l xueves 8 a les 11 la mañana y que tien un programa enforma bayurosu, dellos arqueólogos ya historiadores van describir les llinies d’investigación esistentes sobre la rellación d’Asturies cola España visigoda.

Les escavaciones arqueolóxiques que se tán faciendo nel solar del Muséu Belles Artes d’Asturies n’Uviéu permitieron esti día descibrior un capitel corintiu y una moneda de bronce d’orixe romanu, que s’axunten a la fonte fechada nel sieglu IV llocalizada esti branu y que fizo camudar la hestoria de la ciudá.

El director xeneral de Patrimoniu Cultural del Principáu, Adolfo Rodríguez Asensio, fizo anuncia esti xueves de que’l capitel romanu pue datase, a falta d’un analís más fondu, nel sieglu III d.c. y sigún dixo, “el capitel tien una gran importancia nes nueves interpretaciones sobre la presencia de Roma nesta zona”.

La moneda de bronce atopada ye, sigún paez, un As del emperador Tiberio llabráu nel valle del Ebro, nel conceyu de Calahorra.

L’asociacion La Corexa va facer una esposición d’indumentaria tradicional asturiana nesta edición de l’Arribada. A mou desfile, los participantes van dir vistiéndose al empar que s’espliquen les pieces de la ropa d’entós, tanto del home como de la muyer. L’actu va celebrase güei 17:30 hores.

Dicía Xovellanos que “hai munches persones que son foriates na so propia tierra, porque enxamás s’esmolecieron por conocela”. Anguaño, cola universalización d’ elementos culturales de cualesquier orixe, el problema de la perda d’identidá ye enforma más grave. Acabante d’entamar el sieglu XXI, atópase n’Asturies un fondu desconocimientu del país, de la so historia, de les sos tradiciones y patrimoniu, al empar que l’incontenible poder mediáticu, siempre alloñáu de los intereses asturianos, algama unos niveles de penetración social enxamás vistos, que desanicien pasín a pasu la identidá y les tradiciones de nuestro.

Con munchu menor puxu, atópase tamién que la conciencia de pueblu xorrez y los asturianos participen activamente en milenta opciones socio-culturales propiciaes pola sociedá civil. Nesti contestu d’urxencia por trabayar en favor de la nuesa cultura ñació La Corexa. Col enfotu d’investigar y dar puxu a una parte del patrimoniu asturianu que nun tuviere atendida, hasta güei, como oxetu específicu d’esi llabor n’Asturies: el traxe históricu asturianu, aquelles últimes modes coles qu’asturianes y asturianos fuimos reconocíos como talos dientro y fuera’l país.

Na introducción de la so páxina web La Corexa cuenta lo que sigue: Cunta la lleenda que’l fiyu d’un xuez sacerdote xudío, tuvo’l determín de salir a conocer mundu. Nel so viaxe aportó al reinu d’Exiptu. Ablucáu pol calter de la vida ellí, bien llueu escaeció los sos raigaños y acoyó los vezos y el vistir del nuevu país. Una nueche dempués de dellos años suañó que, nel so llar, so pá -que naguaba por velu- texía coles sos propies manes un mantu de llana perricu. El mozu, al vistir ropaxe talo, sintió atopar la so braera identidá, vistiéndose del so propiu yo mentantu la bona prenda lu cubría. Al esconsoñar recoyó lo de so y escomencipió’l camín pa tornar a casa de so pá. Al fin comprendía quien yera. Del mesmu mou, los asturianos fuimos escaeciendo nel camín la industrialización y la imposición política y cultural, abondos rasgos de la nuesa tradición. Por mor de camudamientos innecesarios, estereotipos y estandarizaciones, ayeno too al saber popular, la indumentaria tradicional asturiana quedó amenorgada y tornóse una caricatura burllona de lo que fora n’ otres dómines, desaniciándose na alcordanza de los asturianos, tanto que namái dellos reconócenla güei como de so. Gracies a trabayos d’estudiosos como Lluis Argüelles y a los enfotos de coleutivos d’investigación que trabayaron a lo llargo los años 80 y 90 del sieglu XX, agora, nel entamu una nueva centuria, podemos ufiertar a los asturianos lo que foi la moda nel vistir a lo llargo de más de 150 años na historia de nueso, garrando puxu, pa güei y pal futuru, aquella seña d’identidá al emplegar otra vegada les prendes y los traxes carauterísticos de la nuesa tradición.

Indumentaria tradicional asturiana ye, entós, la bayura traxes y prendes que’a lo llargo un sieglu (dende 1800 a 1920) vistieron los nuesos antepasaos. Correspuende a un momentu modal común a toa Europa, que camuda y desendólcase nesa dómina meciéndose, al empar, con elementos propios del país y vezos d’estremaos oficios. Les modes quedaron marcaes polos camudamientos sociales de tou esi tiempu.

El Centru de Cultura de Contrueces, nel conceyu de Xixón, pieslla mañana la esposición “Asturcón, hestoria y símbolu”, que pue vese tovía de 10 a 13 y de 17 a 20 hores na sala d’esposición del centru.

El miércoles pasáu, 3 de setiembre de 2008, el Conseyu de Gobiernu d’Asturies aprobó’l Decretu pol que se determinen los topónimos oficiales del conceyu de Cangas del Narcea, que próximamente van publicase nel Boletín Oficial del Principáu d’Asturies (BOPA).

Con esti son yá 32 los conceyos asturianos que finalicen el procesu pa la determinación de los sos topónimos oficiales.

L’orixe de la fonte atopada nes obres d’escavación que se tán faciendo p’ampliar el Muséu de Belles Artes d’Asturies, n’Uviéu, podría remontase al sieglu IV, acordies col primer análisis de los restos fechu col métodu del Carbonu 14 nun llaboratoriu de Florida (EEUU). El Director Xeneral de Patrimoniu Cultural, José Adolfo Rodríguez Asensio, y el responsable de les escavaciones arqueolóxiques, Rogelio Estrada, informaron güei al mediudía sobre los resultaos d’estos análisis que contribuyeron a contestualizar lo que s’atopó nel solar dende’l puntu de vista cronolóxicu.

La Conseyería de Cultura y Turismu va encargar un nuevu estudiu científicu de los restos de la fonte pa contrastar la sorprendente datación del morteru de la construcción, fecháu ente los años 240 y 420 dempués de Cristu.

Hasta agora procesáronse cuatro muestres de diferentes niveles estratigráficos:

•

– La primera correspuende a carbones recuperaos baxo les cuñes d’anclaxe d’ún de los furacos de poste. La so cronología asítiase, con un 95% de probabilidá, ente los años 1040 y 1260.

•

– La segunda muestra garróse d’un sedimentu que sellaba’l canal del bloque de piedra. Asítiase, con un 95% de probabilidá, ente los años 650 y 780.

•

– La tercera muestra garróse d’un morteru hidráulicu. La so datación asítiase, con un 95% de probabilidá, ente los años 240 y 420.

•

– La cuarta muestra garróse d’una brizna carbonosa atopada embaxo’l mentáu bloque. La so datación asítiase, con un 95% de probabilidá, ente los años 1220 y 1290.

Acordies colos espertos, les tres primeres feches son absolutamente concordantes cola sucesión lóxica del rexistru estratigráficu documentáu, al que define la superposición d’estructures y depósitos. Por embargu, la cuarta fecha podría tar invalidada porque ye más moderna que los depósitos que la cubren. “Nesti casu, esiste una contaminación, probablemente d’una raíz, qu’invalida la muestra”, dixo Rogelio Estrada. En cualquier casu, la Conseyería de Cultura y Turismu camentó necesariu facer otru análisis científicu de dalgunos restos pa contrastar la sorprendente fecha del morteru de la construcción, asitiada acordies colo espuestu, na época tardorromana.

Les escavaciones arqueolóxiques, que tán en fase mui avanzada y podríen finar nel plazu d’un mes, permitieron documentar relevantes depósitos d’Época Baxomedieval y Moderna que sellaben una serie d’estructures de periodos anteriores. Son precisamente éstes les qu’algamen un mayor interés dende’l puntu de vista científicu. Pero lo más significativu foi atopar la fonte de Rúa. Ésta aprovechaba un manantial que sorprendentemente entá caltién güei un nivel freáticu estable. Esta fonte tien 2,2 metros de llargor por dos metrs d’anchor nes entalladures de les paredes. Consérvase perfectamente la pieza de captación d’agua y tol canal, que tien 8,5 metros de llargor entalláu na roca. La fonte ye asemeyada a la de Foncalada, magar que de dimensiones menores.

Acordies con Rodríguez Asensio, esti descubrimientu ye “mui importante dende’l puntu de vista históricu. Hasta güei la historia d’Uviéu taba fecha a partir de documentos pero nos últimos años l’arqueoloxía punxo importantes materiales enriba la mesa y ésti ye ún d’ellos”. Pal Director de Patrimoniu Cultural, esti descubrimientu tamién va contribuyir a “arriquecer” el “ambiciosu” proyectu d’ampliación del Muséu de Belles Artes d’Asturies. “Esto ye un regalu; tamos siendo mimaos pola fortuna arqueolóxica”, sorrayó’l Director.

El conceyal de la Zona Rural de Xixón, Faustino García, presentó estos díes el mapa completu y conxuntu de les parroquies de Samartín de Güerces y Llorio, del que s’asoleyen 5.000 exemplares que se van distribuyir ente los vecinos de la zona y servicios públicos como policía, bomberos, ambulancies o taxistes. El mapa recueye la toponimia oficial n’asturianu aprobada pol plenu del Conceyu y pol Gobiernu d’Asturies.El mapa forma parte d’un plan del conceyu de Xixón pa completar la totalidá de la cartografía de les parroquies xixoneses. Una colección que va rematase con 25 mapes y qu’amás recueye’l nuevu sistema de numeración de cases, que señala cada vivienda pol llugar métricu qu’ocupa nel camín que-y correspuende.

El llugar ta na llinde de los conceyos de Colunga y Piloña y la fiesta ta declarada d’interés turísticu rexonal, axuntando folclore, naturaleza y tradición ecuestre. Una xira de montaña pon el pieslle pal restu les actividaes empobinaes pa ganaderos y públicu en xeneral.

La celebración entama pela mañana con una misa de campaña, concursu de baille rexonal, charangues, bandes de gaites y comida d’hermandá. Depués d’esto empieza la eshibición d’equitación, la doma y la marca de los potros nacíos anguaño. A lo llargo d’esta fiesta tamién se noma al “Pastor mayor del Sueve” y entréguense los premios “Asturcones d’Oru”.

Cásique una quinta parte del territoriu de la COmunidá Autónoma (el 17,78 por cientu) ta considerao “espaciu protexío” colo que supera enforma a la media nacional, asitiada nel 6,39 por cientu.

El datu dábase a conocer esta selmana, cola apaición de la Guía de Parques Naturales y Nacionales ellaborada por Consumer Eroski y recoyida por Europa Press.