Patrimoniu

“Pon la oreya” ye l’espaciu musical del programa “Como te iba diciendo”, de la televisión llocal de Xixón, un espaciu dedicáu a a esparder el material sonoru enartiáu a la música astur calteníu n’archivos. El programa emítese los llunes a les 19:30 hores y el “Pon la Oreya” d’esta selmana dedícase a facer un averamientu al trabayu que ficiere l’etnomusicólogu nortiamericanu Alan Lomax na Asturies del añu 1952.

La sección de Daniel García, dedicada esparde material musical d’archivos como l’Archivu de la Música Tradicional Asturiana o l’Archivu de la Tradición Oral , ente otros.

Nel programa d’esti llunes día 24 de payares, amosaráse en directu, con exemplos y pasu a pasu, como ye posible, al traviés d’interné, facer consultes que s’empobinen a archivos onde se caltienen rexistros sonoros venceyaos a la tradición asturiana, y tamién a los trabayos de campu que ficieren diferentes persones y entidades dende cuantayá.

Nesti casu, comentaráse como averase al trabayu que ficiere Alan Lomax per Asturies nel añu 1952, y consultaránse los archivos que tán disponibles en delles páxines enartiaes al llabor d’esti investigador. Arriendes, esti averamientu, va a empobinamos a la consulta d’otros archivos, como’l de la Biblioteca del Congresu Americanu, onde tamién se caltienen rexistros de música tradicional asturiana, ya dende l’añu 1939.

El presidente de la Fundación Osu Pardu, Guillermo Palomero, aseguró ayeri en Llugo que la colocación de cebos envenaos empobinaos a otros animales mató a siete osos pardos nel Cordal Cantábricu (tres d’ellos n’Asturies) nos caberos años.

Palomeró alertó nuna rueda de prensa de qu’estos cebos provoquen una “auténtica masacre” y celebró que la Fiscalía del Tribunal Superior de Xusticia de Galicia (TSXG) abriere una investigación pa conocer so emplegu en Galicia.

L’usu d’estos cebos pue suponer “multes millonaries” y hasta penes de cárcel.

Los XXIII Alcuentros pa la Defensa de los Picos d’Europa, celebraos esti fin de selmana y al qu’asistieron más de 20 representantes d’asociaciones ecoloxistes criticaron fondamente’l modelu de xestión conxunta del Parque Nacional de los Picos d’Europa que xurde del conveniu de collaboración firmáu hai poco ente les comunidaes d’Asturies, Cantabria y Castiella Lleón. Los ecoloxistes atalanten que nun permite una xestión integral y que supón una cesión y un fondu peligru de desaniciu.

Nos alcuentros participaben representantes de les asociaciones ARCA, ANA, Coordinadora Ecoloxista d’Asturies, COA, La Cirigüeña, Ulex, Ascel, la Plataforma pa la Defensa del Cordal Cantábricu y la Plataforma pa la Defensa de los Picos d’Europa.

La Xunta Xeneral del Principáu d’Asturies autorizó esta selmana al Conseyu de Gobiernu a firmar con Castiella y Lleón y Cantabria’l conveniu pa la xestión coordinada del Parque Nacional de Picos d’Europa. El preste diose güei na sesión plenaria, na qu’intervieno la Conseyera de Mediambiente y Desarrollu Rural, Belén Fernández, pa esplicar a los diputaos los conteníos del alcuerdu. Según la responsable rexonal, “ye un bon conveniu, que va garantizar una xestión estable y garante pa reforciar al Parque Nacional de Picos d’Europa como emblema de naturaleza, biodiversidá y modelu socioeconómicu”, señaló Fernández. “El conveniu ye amás reflexu d’una voluntá política coincidente p’algamar la unidá mediambiental y definir sistemes a favor de la realidá territorial y ambiental del Parque”, añadió.

La Conseyera esplicó nel Parllamentu asturianu que’l mentáu conveniu instrumenta mecanismos pa la xestión coordinada del Parque una y bona que se produzan los trespasos de competencies en materia de planificación, xestión y organización. Ente ellos, rescamplen los siguientes:

Plan d’Ordenación de los Recursos Naturales, pa la correcta xestión, alministración, zonificación y regulación d’actividaes y midíes tendentes a ameyorar los recursos naturales.

Plan de Desarrollu Sostenible, que columbra iniciatives y actividaes pa l’ameyora y progresu socioeconómicu del Parque Nacional.

Comisión de Xestión pa la dirección, tutela d’acciones d’alministración y dirección del parque.

Comité Técnicu, del que van formar parte los trés codirectores. Ye un órganu d’apoyu y asesoramientu pa la toma de decisiones en tornu a les dinámiques del Parque Nacional. Pa garantizar la proximidá de los servicios y averar la xestión a los ciudadanos, créase la figura de los codirectores. Tamién van crear un director-conservador, cargu que va recayer añalmente y de forma rotativa en caún de los directores. L’oxetivu ye llograr la unidá de criteriu.

El conveniu tamién recueye la creación d’un Consorciu del Parque Nacional de Picos d’Europa, la so composición va tar determinada polos estatutos y la so función ye la cooperación en materia económica, técnica y alministrativa. Tamién va crease un Patronatu y prevése la creación d’un órganu de participación.

La Comisión de Presupuestos del Congresu de los diputaos, a la que pertenez el socialista asturianu, Hugo Alfonso Morán, refugó ayeri la enmienda presentada por IX federal, pa que los presupuestos xenerales del estáu doten con 3 millones d’euros al plan de meyora pal Prerrománicu asturianu, qu’incluyía non solo los monumentos d’Uviéu, sinón tamién Santa Cristina de L.lena.

”Esti refugu a la enmienda demuestra l’actitú que tien el Partíu Socialista colos sos propios compromisos y la forma de cumplilos”, aseguró Gaspar Llamazares, diputáu d’IX nel congresu. Llamazares señaló que tovía esiste tiempu pa rectificar “esta llamentable decisión, que ensin dulda, dificulta la conservación del nuesu patrimoniu hestóricu”. Del mesmu mou considera que les pallabres “demuéstrense con fechos” y nesti casu la realidá amuesa la ineficacia de les pallabres. “ Nel plenu tendrán la oportunidá de rectificar o volver a retratase”, solliñó Gaspar Llamazares.

Esti sábadu pasáu, 8 de payares, la Tertulia Cultural “El Garrapiellu” en collaboración cola Coral Luis Quirós organizó les segundes xornaes “Las Voces del Románicu”, con un percorríu pela Ruta del Románicu de Xixón. Una ruta que constó de dos etapes pel itinerariu que xune los 11 templos del románicu xixonés.

La primer etapa llevóse alantre pela mañana visitando los templos de les parroquies de San Andrés de Ciares, San Salvador de Deva, Samiguel de Dueñes, San Vicente de Caldones, Santolaya de Valdornón y San Xuan de Fano. Mientres que pela tarde la visita percorrió les ilesies de San Félix de Porceyo, Sta. María de Llorio, Santa María Madalena de Ruedes, Samiguel de Serín y San Xuan de Cenero, onde la coral Luis Quirós dio’l segundu de los conciertos.

El guía de la ruta foi Ánxel Nava, qu’esplicaó a los asistentes les característiques de los templos que tovía conserven restos románicos, dando a conocer esti patrimoniu hestóricu artísticu y paisaxísticu de la zona rural xixonesa, “tan desconocida pa munchos ciudadanos de Xixón”, según comentó Nava.

El coleutivu en defensa d’a fala eonaviega o gallego-asturianu “Xeira” denunció estos díes la situación d’escasu apoyu per parte de la Conseyería de Cultura pa cola llingua d’entreambasaguas. Pal coleutivu cultural “Xeira” les declaraciones de la direutora xeneral de Promoción Cultural y Política Llingüística del Principau, Consuelo Vega nes que falaba d’un aumentu de les matriculaciones del alumnau na fala, “contradicen a los informes que tienen”.

Xeira recuerda que “les places de docentes nos Ozcos siguen ensin cubrir, lo que fai que los pas desconfien de la enseñanza na llingua tradicional”.

Pa Xeira “falta voluntá política pela parte de l’Alministración, yá que nos Ozcos o Grandas ufiértense places de profesores a media xornada, colo que nun son atractives, yá que col desplazamientu, si nun ye xente de la zona nun compensen a los maestros”

Xeira critica tamién “que tres más de venti años ufiertandose la materia, nun esisten entovía llibros de testu o materiales especificos pa trabayar colos alumnos”.

La plantiya de maestros ye pa Xeira “insuficiente y deficitaria” yá que son 7 los maestros d’eonaviegu pa tola zona del Occidente asturianu, trés en secundaria y cuatrro en primaria.

L’ALLA ta acabante espublizar trés volúmenes nuevos de la so coleición de cartafueyos de toponimia, nos que recueye los trabayos fechos por investigadores en parroquies y zones de los conceyos asturianos. N’esti casu los trabayos correspuenden a parroquies y barrios de los conceyos de Llaviana, Avilés y Proaza.

Nel casu de la toponima del conceyu de Llaviana, col númberu 121 de la colección, el trabayu correspuende a la parroquia de Toliva, la octava que recueye d’esti conceyu l’ALLA. El trabayu de recoyida oral ye de Xulio Llaneza Fernández.

Carlos Suari Rodrigue ye l’autor de la toponimia de les parroquies d’El Ponzón, Villalegre y La Xungarosa, parroquies avilesines tomaes pola urbanización dende vieyo. El trabayu recibió un accesit nel concursu d’investigación de l’ALLA, en 2007.

La última de les obres ye la toponimia de la parroquia de Trespena, en Proaza, del que son autores Antonio Alonso de la Torre García y Francisca Iglesias Álvarez. Col trabayu ganaron en 2008’l Concursu de recoyida de material toponímico oral de l’Academia.

Esta fin de selmana, los díes 18 y 19 d’ochobre, celébrase en Morea la XVIII Muestra de la Miel d’Ayer, organizada pola Asociación d’Apicultores del Conceyu cola collaboración del Ayuntamientu de Aller.

La Muestra entamará’l sábadu día 18 a les 11 cola degustación y mercáu de productos apícoles y cola exposición de material apícola, que va finaliz a les 15 hores, pa continuar el domingu día 19 nel mesmu horariu.

El Plenu de la Xunta Xeneral del Principáu d’Asturies (XXPA) aprobó esti día, colos votos favoratibles de PP ya IX-BA-Verdes, una proposición non de llei del PP pola que s’encamienta al Principáu a declarar espaciu natural protexíu los llagos de Silva, na población de Salave (Tapia), con arreglu a la Llei de Proteición de los Espacios Naturales. El PSOE votó a la escontra, al entender qu’existe yá bastante proteición, y que’l Parlamentu nun ye’l muérganu que tien de decidir al respective.