Patrimoniu

Asturies, con una candidatura conxunta del Principáu y les ciudaes d’Uviéu, Xixón y Avilés, va competir con otres 15 candidatures españoles a ser Capitalidá Europea de la Cultura del 2016, según informó esti día’l Gobiernu asturianu nuna nota prensa de la Conseyera de Cultura y Turismu del Principáu d’Asturies. La Conseyera, Mercedes Álvarez González, visitó’l Ministeriu de Cultura, xunta’l viceconseyeru de Promoción Cultural y Política Llingüística, Jorge Fernández León, y los conceyales de Cultura de los Ayuntamientos d’Uviéu, Xixon y Avilés, José Suárez Arias-Chachero, Justo Vilabrille y Román Antonio Álvarez, pa participar nuna xornada informativa rellacionada cola capitalidá europea de la Cultura 2016, a la que van optar les tres ciudaes asturianes nuna candidatura conxunta.

El Ministeriu de Cultura convocó a les 16 candidates pa presentar el calendariu de referencia de los plazos de tol procesu de selección de la candidatura española, que va entamar cola convocatoria pública del concursu de candidatos enantes de finar 2009.

Les ciudades que compiten cola candidatura asturiana son son Santander, Cuenca, Valencia, San Sebastián, Córdoba, Burgos, Cáceres, Alcalá de Henares, Segovia, Les Palmes, Murcia, Pamplona Zaragoza, Tarragona y Málaga, munches de les cuales, como Segovia, lleven más de dos años desendolcanco acciones de marketing pa asitiase como favorites nesta llucha.

España y Polonia van compartir la capitalidá esi añu 2016.

El mes d’abril va ser otra vuelta l’escenariu onde se desendolque la XXX Selmana del Folklore Astur qu’organiza’l Grupu Folklóricu y de Investigación El Ventolín y qu’esti añu va cincar a “El baile n’Asturies”.

Les actividaes d’esta XXX Semana del Folklore Astur entamará’l lunes 6 d’Abril a les 20 hores cuando se presente nel Club de Prensa de La Nueva España la programacion de la selmana.

El llunes 13 d’Abril a les 20 hores na Casa Municipal de Cultura fadráse l’apertura oficial cola entrega de medalles de plata y un conciertu de curdión a cargu de Xuan Nel Expósito.

La programación de la Selmana inclúi tres esposiciones pa la selmana del Folclore astur

El miércoles 15 d’Abril a les 20 hores na Casa Municipal de Cultura celebrarase una conferencia sobre’l tema “El baile n’Asturies” a cargu de Fernando Manuel de la Puente Hevia.

Y el xueves 16 de Abril, a les 20,30 hores representarase na Casa Municipal de Cultura una escenificación de teatru costumista asturianu a cargu del Grupu de teatru de Carbayín cola obra “Ello yera una vez……”.

Pa finar la selmana, el sábadu 18 d’Abril a les 20 hores na Casa Municipal de Cultura celebrarase’l tradicional Festival Folclóricu Nacional colos grupos Vezos Astures, Centro Asturiano de Madrid, profesores de la escuela de música tradicional del ventolin y el G.F.I. El Ventolín.

El Grupu Folclóricu y d’Investigación El Ventolín foi creáu en 1978 como rempuesta a la necesidá esistente de fundar una asociación que se dedicase a la conservación, fomentu y divulgación del folklore tradicional, especialmente ente los más mozos.

L’Asociación Cultural Llacín, de Porrúa, Llanes, organiza dellos cursos ente marzu y xunu. P’apuntase los interesaos han mandar un corréu a llacin@porrua.net o llamar al 985 402 547.

Llistáu de cursos:

-Confección de traxes d’aldeana y porruanu. Del 27 de marzu al 19 de xunu. Vienres de 16:00 h. a 20:00 h. 80 € tol cursu.

-Cocina tradicional asturiana (iniciación) Del 27 de marzu al 26 de xunu. Vienres de 16:30h. a 19:30 h. 25 €/mes (inclúi material)

-Rehabilitación de muebles. Del 28 de marzu al 27 de xunu. Sábados de 16:00 h a 20:00 h. 25€/mes

-Veles artesanales. Díes18 y 19 d’abril, d’11:00 h. a 12:30 h. 10€ (inclúi material).

L’Aconceyamientu de Xuristes pol Asturianu ta acabante dar anuncia d’una rempuesta pública a la consulta fecha por delles asociaciones pa la defensa del patrimoniu hestóricu asturianu, sobre la llegalidá de les notificaciones que vienen faciendo los conceyos de Xixón y Piloña a propietarios d’horros centenarios, axuntando certificaciones individuales pal pagu del Impuestu sobre Bienes Inmuebles (IBI, popularmente conocíu como contribución). Unes contribuciones que según aclarien, nun s’axusten a la llegalidá vixente.

Según l’artículu 62.2.b) del Testu Refundíu de la Llei Reguladora de les Faciendes Llocales, afita que los horros y cabazos más vieyos de cien años, qu’hai en Galicia y Asturies tán disimíos del IBI, permediando solicitú al respeutu, pente otros, los bienes abarcaos pela disposición amestada segunda de la Llei 16/1985, de 25 de xunu, de Patrimoniu Hestóricu Español, na que s’incluyen, de los que trata’l Decretu 449/1073, de 22 de febreru. Nesi sen manifestóse espresamente la Subdireición Xeneral de Tributos Llocales, pente medies de la Consulta Vinculante V0658-08, de 2 d’abril de 2008.

Poro, y según aclarien dende AXA, tolos titulares d’horros centenarios puen empobinar a los conceyos de Xixón y Piloña una solicitú de desimición del impuestu. Arriendes d’ello, al Aconceyamientu de Xuristes pol Asturianu abúlta-y necesario “desixir a los conceyos de Xixón y Piloña que declaren d’oficiu la desimición del IBI pa los horros centenarios de los sos conceyos porque, penriba de pruyimientos recaudatarios, ta la obligación de les alministraciones municipales de cumplir bonalmente colos principios de conservación y proteición del patrimoiniu cultural asturianu, torgando actuaciones que, como la presente, puen ponelu en peligru, propiciando la so destruición (si l’horru se valta ya nun paga impuestos)”.

L’equipu científicu del Muséu Xurásicu d’Asturies (MUJA), allugáu en Colunga, rescató esti día d’un acantiláu xuntal faru de Lluces (Colunga) la buelga más grande del mundu alcontrada hasta agora d’un exemplar d’estegosauriu. Trátase d’un dinosauriu xigante qu’habitaba na época del mesozoicu y que midía nueve metros de llargor y más de tres mestros d’altor. Según esplicó José Carlos García Ramos, el director científicu del MUJA, director de la operación de rescate de la büelga, que tien más de 150 millones d’años antigüedá.

La construcción del muséu de la cueva ribeseyana de Tito Bustillo, onde les obres tán aparaes dende hai selmanes pola apaición d’un nivel freáticu mui altu que torgaba la cimentación del edificiu, “van volver entamar próximamente”, según el director xeneral de Patrimoniu Cultural Asturianu, José Luis Vega.

Vega aseguró que les obres cuenten con un nuevu problema porque la cantera de Corcuvión ta esmoronándose polos trabayos que se tán executando pa costruyir el futuru Centru d’Interprestación de Tito Bustillo.

El ministru de Cultura, César Antonio Molina, señaló esti día que los papeles del ex presidente de la República, Aniceto Alcalá-Zamora, tán depositaos nel Ministeriu de Cultura mientres l’asuntu ta “sub júdice” (pendiente de resolución xudicial) y aseguró que’l so departamentu ta en “conversaciones” colos herederos del mandatariu republicanu, pa caltener la “unidá” d’esi archivu, que’inclúi un importante alcuentru de documentos históricos ente los que tán dende informes de la Revolcuión Asturiana de 1934 hasta documentos privaos.

Andecha Astur ta acabante anunciar que va presentar una demanda pol “espoliu etnográficu ocurríu en San Andrés de los Tacones” nel que según Andecha “súmase la vulneración de la Llei de Patrimoniu cola conivencia de les alministraciones llocal y autonómica”, que fai qu’AA tenga’l convencimientu plenu de que “nin l’Ayuntamientu Xixón nin la Conseyería Cultura van depurar les pertinentes responsabilidaes nestos fechos, darréu que dambos formen parte de la sociedá ZALIA S.A., colo que son xuez y parte nos fechos”.

La formación independentista pide pal Ayuntamientu y el Gobiernu d’Asturies, a los que considera cómplices, “una sanción exemplar en función de la gravedá de los fechos y l’alarma social xenerada”.

Pa ello, AA decidió interponer la correspondiente denuncia nel xulgáu al oxetu de que seya’l poder xudicial “el que sancione a los que son, precisamente, los encargaos de velar pol nuesu patrimoniu etnográficu”.

Na denuncia presentada, Andecha Astur resalta’l fechu de que pesia que los vecinos yá denunciaren la esapaición d’horros y paneres énte la Conseyería Cultura en xunu del 2008, “tanto’l «Principado» comu l’Ayuntamient Xixón guardaren un silenciu cómpliz fasta que la presión social los punxere n’evidencia, y entá asina, pretendieren eludir les sos responsabilidaes, culpabilizando a particulares y a la sociedá ZALIA S.A.”.

Per otru llau, Andecha Astur considera perinteresante la iniciativa presentada por «El Garrapiellu» nel sen d’aniciar una plataforma en defensa de los bienes culturales y ambientales d’Asturies, anunciando la so “disposición” a collaborar cola mesma.

El director xerente de la Zona d’Actividaes Lloxístiques d’Asturies (Zalia), Enrique Álvarez, dixo güei que tovía nun recibieron notificación d’espedientes per parte del Ayuntamientu de Xixón, por treslláu irregular d’horros.Enrique álvarez fizo estes manifestacinoes nel trescursu de la so declaración na Comisión de Mediu Ambiente, ordenación del Territoriu y Infraestructures de la Xunta Xeneral del Principáu d’Asturies (XXPA) sobre los informes de caltenmientu ambiental y l’estudiu de viabilidá de la Zalia.

La Comisón referíase al casu de los horros valtaos na parroquia xixonesa de San Andrés de los Tacones, onde ta proyeutada la Zalia y sobre los qu’Alvarez afitó que nun desapaeció dengún, y que tán toos “controlaos”.

El 26,68 por cientu de la superficie del Principáu d’Asturies ta declarada como Llugar d’Interés Comunitariu (LIC), según un estudiu ellaboráu pol Conseyu Económicu y Social de Cantabria.

El porcentaxe de LIC qu’amuesen les rexones españoles ye’l que vien darréu: Madrid (29,89%), Isles Canaries (39,9%), La Rioxa (33,25%), Andalucía (28,69%), Valencia (26,71%), Asturies (26,68%), Cantabria (25,68%), Navarra (24,24%), Aragón (21,77%), Ceuta y Melilla (21,03%), Castiella y Lleón (20,06%), Estremadura (19,87%), Castiella La Mancha (19,70%), Cataluña (18,86%), Isles Baleares (19,72%) País Vascu (18,63%), Murcia (14,75%) y Galicia (11,61%).