Patrimoniu

El Ministeriu de Mediu Ambiente y Mediu Rural y Marín vieno acabante aprobar la inscripción de la Indicación Xeográfica Protexida (IGP) ‘Queso Los Beyos’ nel rexistru comunitariu, por cumplir colos requisitos del reglamentu de les denominaciones d’orixe y de les indicaciones xeográfiques protexíes de los productos agrícoles y alimenticios.

Nuna nota de prensa, el Ministeriu informaa esti miércoles que baxo esa Indicación queden amparaos los quesos ellaboraos con lleche de vaca y d’oveya o de cabra ellaborar nel sector centro-oriental del cordal Cantábricu, coincidiendo una parte del territoriu colos conceyos d’Oseya de Sayambre, en Lleón, y Ponga y Amieva, n’Asturies, al traviés del escobiu de Los Beyos.

L’área de producción del productu ocupa 402,48 quilómetros que llenden al norte colos conceyos de Piloña y Parres; al oeste col de Casu; al sur col de Burón y al este colos de Valdeón y Cangues d’Onís.

El Club Prensa Asturiana d’Uviéu, asitiáu na cai Calvo Sotelo, 7, va acoyer güei martes a les ocho la tarde, la presentación del llibru que contien les actes del V Seminariu d’Estudios Asturianos. Nel actu van tar presentes Javier Nievas, responsable de la Fundación Caxa Rural, y Alberto Álvarez Peña y Antón Álvarez Sevilla, pola Fundación Belenos. Nes actes, titulaes “L’asturcón, simboloxía y mitu del caballu de los ástures”, pueden atopase les ponencies y comunicaciones presentaes nel so día, ilustraes con semeyes y dibuxos de dellos autores.

El llibru inclúi los trabayos que van darréu: «Un comentario sobre el origen genético del poni asturcón», de Félix Goyache Goñi (investigador del Serida); «La dimensión religiosa y simbólica del caballo en la Edad del Hierro», de María del Mar Gabaldón Martínez (Instituto de Humanidades Ángel-Ayala, Universidad de San Pablo-CEU); «El caballo asturcón en las fuentes clásicas. Sobre équidos en la Península Ibérica», d’Irene Seco Serra (Universidad Autónoma de Madrid); «Resclavos míticos del caballu na tradición oral asturiana», d’Alberto Álvarez Peña (Fundación Belenos); y «Los ponis celtes», d’Antón Álvarez Sevilla (Presidente de la Fundación Asturcón).

José Naveiras Escanlar, Pepe ‘El Ferreiro’, nun pudo garrar esti miércoles del so antiguu despachu, nel Muséu Etnográficu de Grandas de Salime, los sos oxetos personales. La situación acabó nun discutiniu col actual director, Francisco Cuesta.

La escena tuvo llugar esti miércoles 17 a les 11 cuando Pepe ‘El Ferreiro’ foi al so vieyu centru de trabayu, dempués de llograr el permisu correspondiente del Muséu, pa retirar los oxetos personales. Foi acompañáu d’una notaria, pero nun-y dexaron garrar la so axenda y dellos llibros.

Güei, vienres 12 de Febreru a les 20.00 hores, na Casa de Cultura de Grau va presentase esti llibru que prologa Xosé Antón Fernández “Ambás” y qu’edita La Cruz de Grau cola colaboración del Círculu d’Estudios Pramarenses y el Muséu Etnográficu de Grau y el propiu Conceyu. La obra asoléyase dientro de la Colección Territorio Pramarense col númberu dos.

L’horru ye unu de los símbolos más representativos d’Asturies y unu de los fenómenos d’arte popular más importantes d’Europa, lo qu’incomprensiblemente nun torga’l so llamentable estáu d’abandonu y desconocimientu, tanto de les alministraciones como de la mesma sociedá asturiana. Por eso esti llibru titúlase “Patrimoniu olvidado” y trata de poner en valor los horros y paneres del conceyu de Grau pente medies d’un averamientu a les sos característiques, a la so decoración, a la documentación hestórica onde apaecen mentaos horros moscones, etc.

El llibru incluye más de 300 semeyes, dalgunes propuestes d’actuación y un apartáu específico sobro los horros de la villa, según un estudiu individualizáu de 70 exemplares destacaos de tol conceyu.

L’autor, Gustavo Adolfo Fernández (Grau, 1971) ye llicenciáu n’Hestoria, especialidá Archivística y Biblioteconomía, pola Universidá de Santiago de Compostela. Dende 1998 trabaya como bibliotecario y xestor cultural nel Ayuntamientu de Grau. Collaboró con distintos medios de comunicación como La Nueva España, Les Noticies, y la radio local, l’Ecu de Grau, ente otros. Nel añu 2004 concedióse-y el Premiu Periodísticu “Moscones en Xixón” na so primera edición. Nel ámbitu de les biblioteques y la animación a la llectura, participó como conferenciante en dellos congresos y tien artículos n’estremaes publicaciones especializar. Un proyectu suyu recibió’l premiu nacional de Dinamización Llectora pa Biblioteques en 2001, qu’entama añalmente’l Ministeriu de Cultura y la Federación Española de Conceyos y Provincies (FEMP). En 2004 y 2009 nuevos proyectos de so fueron esbillaos ente los siete meyores del añu. Publica habitualmente na revista de creación lliterario “Las hojas del Foro”, de la que forma parte del so conseyu de redacción. Amás ye autor d’otros estudios, artículos y conferencies nel campu de la hestoria y la etnografía. Ye miembru del Círculu d’Estudios Pramarenses, un colectivu que trabaya na recuperación y puesta en valor del patrimoniu y la hestoria de Grau.

Otru añu más, les Xornaes de Mazcaraes d’iviernu van facese na parroquia de Valdesoto los díes 12 y 13 de Febreru. Esti día 12 entamen les charles a les 7,30 de la tardi, presentándoles Mercedes Menendez con Oscar Gonzalez, etnografu, que va falar de “Estructura Organizativa de les Mascaraes d’Iviernu. Mascaraes na Península Ibérica”. Depués van tar Hélder Ferreira y Bernardo Calvo que van falar del Volumen II de “Mascara Ibérica” y pa finar Berto Alvarez Peña va moderar l’alderique con vieyos informantes de mazcaraes d’Asturies, como un paisanu de Los Sidros y otru del Guirria de Ponga.

El Sabadu 13 va facese un pasacais per Valdesoto. Va entamar nel Centru Cultural de Lliceñes a les 4:00 la tardi. Va dise al campu l’ilesia onde van representase les comedies. La primera po los escolinos de la Escuela de Faes “La modernidá”, fecha pol miembru de la nuesa Asociación MANUEL PERGENTINO DIAZ, depues la comedia de los mayores “VAYA TRACES DE COMEDIA” que ta fecha por JOSE RAMON OLIVA. Una vez terminaes les representaciones, van entamar otra vegá’l pasacais y van dir parando pe les cases pidiendo l’aguinaldu. Too lo que se saque esti día más unes huches que vamos poner nos chigres vamos destinalo a Ayuda Solidaria con los perxudicaon pol terremotu d’Haití.

Esti xueves día 11 de Febreru a les 19,30 hores unaplataforma qu’integren un centenar d’asociaciones, colectivos culturales y 300 establecimientos turísticos, fai un llamamientu a concentrase frente al edificiu de Presidencia contra’l cese de José Naveiras, Pepe ‘El Ferreiro’, como director de muséu etnográficu de Grandas de Salime.

Ente les organizaciones que van xuntándose a la convocatoria, esti día, el Bloque por Asturies afitaba nuna una nota prensa la so solidaridá “en defensa del trabayu fechu por José Naveiras pol Muséu etnográficu de Grandas de Salime y, en particular, pola so apuesta pola cultura del occidente y toa Asturies en xeneral”. Dende’l Bloque por Asturies atalanten “qu’el señor alcalde de Grandas, Eustaquio Revilla, (miembru del Consorciu que xestiona’l muséu, y nel que se tomó la decisión del cese por unanimidá) nun sólo tira pela borda un trabayu d’años sólo por un puestu pa la so xente, sinon que fai oyíos sordos a la voz del so pueblu, que reclama la realmisión de Pepe Ferreiro”.

El Conceyu de Cultura Tradicional Vezos Astures sigue col so trabayu alrodiu les mazcaraes d’iviernu. Dempués del llabor fechu l’añu pasáu na recuperación de Os Reises del Valledor, ta enfotáu nel so espardimientu ente’l públicu xeneral y asina entama una esposición sobre les mazcaraes n’Asturies que s’abrió’l día 6 de Febreru nes instalaciones del Muséu Etnográficu del Oriente d’Asturias.

Con esta esposición plásmase’l trabayu fechu na recuperación de los traxes talamente d’ellos se tien información pero amás, quier dase una visión xeneral del fenómenu de les mazcaraes n’Asturies.

Vezos Astures tien l’andecha n’esta esposición de la asociación el Cencerru de Valdesoto y de la Asociación Etnográfica Cultural Zamarrones de L.lena que cedieron dellos traxes, un sidru de 1953 y un zamarrón. Esta collaboración ufierta entós, al públicu xeneral, una muesa de los traxes que percorrieron los pueblos asturianos ente fin d’añu y antroxu y qu’entá se siguen faciendo en Valdesoto, Tormaleo, Fonteta o San Xuan de Beleño, calteniendo la tradición viva pa les prósimes xeneraciones.

La Tertulia Cultural “El Garrapiellu”, presidida por Tino Lozano, y el Foru Arte Ciudá, que coordina Ánxel Nava, amosaron en dellos comunicaos la so protesta pola destitución de Pepe el Ferreiro de la dirección del Muséu Etnográficu de Grandas de Salime. Pa El Garrapiellu “Ye una ruindá atacar a la persona que fundó esti muséu, dotólu de material y trabayó tantos años hasta algamar l’ésitu de visitantes qu’agora tien”. Les dos organizaciones piden “la so restitución nel cargu” y denuncien “la falta de tresparencia al nomar a deu un sustitutu pa una plaza que nun sal a concursu públicu”, lo que ye pal FAC “un bon exemplu del camín antidemocráticu que siguen los responsables culturales de la nuestra autonomía, que desprecien el conxuntu de les artes y la cultura d’Asturies”.

El Garrapiellu camienta que con esta decisión “non sólo nun se reconoz el llabor de la xente que s’ocupa de caltener la cultura tradicional, talamente paez que se quier acabar cola cultura etnográfica, patrimonial o ambiental d’Asturies”, y albidra que namás se premia nesti pais “la burocracia y l’actitú servil”. El Garrapiellu sofita esta causa, pide respetu al so llabor, desixe la restitución nel cargu de Pepe el Ferreiro y la dimisión de los responsables de lo que consideren “esti ataque a la cultura asturiana”.

Amás, Izquierda Xunida va facer güei delles entrugues parllamentaries a la Conseyería de Cultura sobre esta cuestión: “¿Cuáles fueron les razones poles que dellos representantes del Principáu nel Consorciu del Muséu Etnográficu de Grandas de Salime votaron a favor de dichu cese?, ¿Qué méritos axunta’l recién nomáu Director del Muséu? Y ¿Cuálos yeren les condiciones del contratu del Sr. Naveiras Escanlar y cuálos son les condiciones del contratu del nuevu Director?”.

La Direición del Parque Nacional de los Picos d’Europa vieno acabante echar el pieslle temporalmente a la Senda’l Cares pol fundimientu de cerca de 20 metros de la mesma por mor d’un desprendimientu de tierres.

Según informó’l Ministeriu de Mediu Ambiente, Mediu Rural y Marín (MARM), esti fundimientu d’una parte de la Senda’l Cares produxo un argayu considerable na zona de ‘Los Collaos’, nel conceyu Cabrales, y frayó la canal que, dende la presa de Caín y pasando paralela al percorríu de la Senda, abastez la central eléctrica de la empresa E-On en Poncebos.

Unidá Nacionalista Asturiana critica que’l Conceyu d’Uviéu “nun tenga una política de conservación del padremuñu material del conceyu” y esixe llueu “una mayor atención pa con toos aquellos elementos histórico-artísticos que constitúin una parte vital del padremuñu cultural del mesmu”.

Pa l’agrupación municipal d’Unidá Nacionalista, resulta “hipócrita” l’actitú del alcalde solicitando dineru al Gobiernu d’Asturies pal caltenimientu y fomentu del Prerrománicu cuando, según UNA “el consistoriu de la capital tampoco nun ye a desendolcar nin tan siquiera una política cultural mínimamente seria que permita, igualmente, caltener en bones condiciones y fomentar la riqueza cultural de la ciudá”.

Nesta llinia, dende Unidá pídese “la restauración y el cuidáu del estáu de la panera del sieglu XVIII allugada nel Parque d’iviernu, que ye maltratada por viandantes que dediquen el so tiempu llibre a facer muezques y escarabayar con pintura un monumentu históricu”.