Música

El grupu Skolvan foi l’encargáu esti añu d’entamar la IX Folixa na Primavera de Mieres, que cada añu tien meyor acoyida ente la xente. La banda bretona dio bona cuenta de la so procedencia y de la música que faen. Gilles Le Bigot a la guitarra, Youenn Le Bihan cola bombard y la gaita bretona, Bernard Le Dreau col saxofón sopranu, Dominique Molard a la percusión y Loig Trole col curdión diatónicu amosaron como pue sonar nun directu del calidá el repertoriu musical de Bretaña.

Con venti años d’historia al llombu, la puesta n’escena nun tien secretos pa esti grupu. Amosaron mui bon soníu y paecía que’l públicu nos primeros temes entamaba a animase, baillando pieces bretones a ritmu de danza prima o pasudobles. Presentaben les canciones en francés, anque delles vegaes, Youenn atrevíase a acabar con un tímidu ‘gracies’. Nos últimos sones, quiciaes por mor del soníu llinial del grupu, el públicu nun paeció esfrutar tanto de la música, y pue dicise que yá nun esconsoñó hasta qu’aportó’l descansu y apaeció n’escena Mercedes Peón.

La intérprete gallega supo conectar muncho meyor cola xente col so espectáculu y escenificación, esi mecigayu de ritmos fuertes, con cantares intimistes y con glayíos musicales que ye tan carauterísticu nella. La combinación musical yera perfecta. Por mecer, fízolo hasta nos idiomes, con un amestáu ente’l castellanu, gallegu y asturianu.

Mercedes Peón ye capaz de combinar ritmos africanos agresivos con soníos dixitales o colos cancios más dulces de la tradición gallega, de la que ye gran conocedora. Non sólo eso, sinón qu’amás fai música con dellos instrumentos pocu conocíos o pocu ortodoxos. Ella y los sos músicos toquen dende campanes hasta xiblates palestines, anque lo que más pue llamar l’atención ye que puea facer música col so propiu pulsu, col so ritmu vital, gracies a un amplificador especial, que fai metese al públicu nesi mesmu estáu de ‘misticismu musical’ nel que paez tar Mercedes nos sos conciertos.

Queda un mes pa que Paul McCartney abra en Xixón el fueu de la so xira europea y unos 13.000 ‘fans’ del veteranu músicu británicu yá tienen la so entrada pal conciertu que l’estadiu d’El Molinón acoyerá el prósimu 25 de mayu. Pesie a que l’aforu de la cancha xixonesa pa esti tipu de recitales pue llegar a los 40.000 espectadores, l’Ayuntamientu decidió poner a la venta unes 30.000 llocalidaes pa la cita col ex baxista y vocalista de los Beatles.

Según fontes del Teatru Xovellanos, sociedá municipal encargada d’organizar y xestionar el conciertu de McCartney en Xixón, la venta d’entraes sigue a bon ritmu y ye previsible que s’intensifique conforme vaiga aprosimándose la fecha’l recital, pal qu’agora queden cuatru selmanes.

Paul McCartney namás va ufrir trece conciertos nel contestu de la so xira europea ’04 Summer Tour’, con dos úniques incursiones nel Estáu español: Una en Xixón y la otra en Madrid. Por esa razón, los organizadores del recital n’Asturies esperen atrayer a Xixón a públicu d’otres comunidaes autónomes interesáu en ver en directu al míticu músicu británicu.

Les llocalidaes pal conciertu d’El Molinón tán a la venta, a un preciu de 45 euros, na taquilla’l teatru, nos caxeros de la rede Caxastur, na Fnac, nel númberu de teléfonu 902888902 y na web www.ticktackticket.com.

Web de compra d’entraes pal conciertu

Dixebra, Skontra, Skanda, Ciquitrinos y La Bandina. Esi ye’l cartel que con toa probabilidá tendrá esti añu el Conciertu pola Oficialidá, que nesta edición va cellebrase el sábadu 8 de mayu nel entornu’l Muséu Etnográficu del Pueblu d’Asturies, en Xixón. La cita reivindicativa musical pola reconocencia de la llingua asturiana contará amás colos sones de varies bandes de gaites.

La hora estimada pal aniciu’l conciertu ye les 19,30, puntu d’arranque d’una actividá musical continuada que nun rematará hasta bien entrada la nueche, en términos asemeyaos a les ediciones d’años anteriores.

El preciu afitáu pa la entrada al recintu ye de 2 euros si la llocalidá se merca de forma anticipada y de 3 euros pa quienes alquieran la entrada el mesmu día’l conciertu. Les llocalidaes venderánse nos díes previos al recital en chigres asturianistes de Xixón, Uviéu, Avilés, Candás, Mieres, Llangréu, La Pola L.lena y La Pola Sieru.

Dixebra prepara yá’l discu de la so mayoría d’edá. La veterana banda de rock n’asturiano, referente y símbolu na so estaya pa públicos y mocedaes de varies xeneraciones, enfótase en grabar el so trabayu númberu ocho en 2005 -añu nel que’l grupu cumple 18 años- a partir de bases musicales que yá tán debuxaes en formatu mp3 y a les que posiblemente se-yos acoplen dalgunes lletres que nun llegaron a emplegase en discos anteriores.

Con esi envís, la banda prevé da-yos trabayu a los sos lletristes y dir encaxando los testos nuevos nes músiques correspondientes, de mou que nos últimos meses del añu puea facese una esbilla de los temes qu’a la fin van integrar el nuevu discu.

Esa ye la mitá’l llabor que la veterana banda tien na so axenda más inmediata, qu’inclúi un conciertu en Lieja (Bélxica) el 25 de mayu, col que Dixebra abrirá la so xira 2004.

Los músicos avilesinos vienen de sacar a la cai, n’avientu pasáu, un llibru-cd -“Cróniques d’un pueblu”- nel que’l periodista xixonés Francisco Álvarez repasa la trayectoria de Dixebra como escusa pa echa-y una güeyada a la hestoria social d’Asturies de los últimos diecisiete años.

Amás del testu, la edición completábase con 19 temes remezclaos y una pista cd-rom col únicu videu realizáu pol grupu: “Nun llores”

Con esti recopilatoriu en circulación, y la idea d’un discu en directu postergada por razones loxístiques, el grupu avilesín nun quier dexar a so afición con secañu de material nuevu muncho más de dos años, que ye’l tiempu qu’esta primavera cumple la banda ensin asoleyar un discu con temes orixinales. L’últimu foi “Sube la marea”.

A pequeños escenarios, grandes remedios. Los ocho integrantes de La Bersuit Vergarabat fixeron como pudieron p’allugase enriba les tables de la sala Albéniz, en Xixón, y derramáronse anueche nun poderosu conciertu que castigó les rodielles del públicu asistente y foi de les vieyes melodíes a les nueves ‘cuñes’ con tastu políticu: L’auditoriu restalló nun aplausu cuando’l cabezaleru de la banda arxentina, ‘el Pelado’ Cordera, brindó n’escena pola marcha de José María Aznar, “representante d’un nuevu facismu”.

El recital empezara ensin concesiones a l’aburrición. Tres d’un arranque protocolariu col primer corte del nuevu discu’l grupu -‘La Soledad’, del álbum ‘La argentinidad al palo’-, los d’Avellaneda dexáronse contaxar pola enerxía’l públicu de les primeres files y espardieron pola sala los sones de temes conocíos incluyíos en discos anteriores, ente ellos ‘El viejo de arriba’, ‘Danza de los muertos pobres’ o ‘Perro amor explota’.

Nun hebio qu’esperar abondo pa botar con melodíes casi pue dicise que clásiques de la banda, que demostró por qué lleva quince años pisando escenarios y trai al llombu más de 200 conciertos n’América y Europa: ‘Yo tomo’, ún de los temes que llanciaron al grupu a la fama en Buenos Aires, foi’l preludiu d’una potente versión de ‘Señor cobranza’, el cantar nel que la Bersuit nun tien nengún reparu en llama-yos traficantes a los miembros de la clase política arxentina que conduxeron al país nes últimes décades y lu llevaron de la mano p’hacia el ‘corralito’ bancariu.

Ehí enganchó Cordera l’alegatu anti-Aznar, que tamién lo foi anti-Bush, anti-Menem y aplicable a tolos sos semeyantes. El llau espresamente políticu’l conciertu completóse con un recordatoriu de la presencia de les ‘Madres de Plaza de Mayo’ esta tarde en Xixón.

Y con una dosificación perfecta del repertoriu, montaos en temes de nuevu cuñu -‘Coger no es amor’ (es mucho mejor), ‘El baile de la gambeta’-, la Bersuit aportó a un final esplosivu col inevitable ‘Se viene’ y remató la nueche con un emotivu cantar sobro la distancia y el doble camín de la emigración llatina pa ún y pa otru llau del Atlánticu.

En Buenos Aires daquién falaría del conciertu de Xixón como plenu de ‘onda’, el términu porteñu que vien a equivalir al ibéricu ‘bon rollu’. Ataviaos con piyama, como ye vezu nellos, los ocho músicos de La Bersuit dieron razones pa too menos pa durmir.

Web oficial de la banda

Pepín Robles, como autor, y Manolo Morán, en calidá d’intérprete, son los ganadores del primer galardón al meyor cantar n’asturianu de los Premios de la Música, que s’entregaron nuna gala cellebrada nel Palaciu Municipal de Congresos de Madrid. El gaiteru José Ángel Hevia y el percusionista Tino di Geraldo, los otros dos representantes asturianos qu’aspiraben a premiu n’otres categoríes, viéronse superaos en votos por otros candidatos.

D’esti mou, Hevia vio cómo’l galardón al meyor álbum de música tradicional, al qu’optaba, diba parar a la veterana María Dolores Pradera, que recibió’l premiu pol so discu ‘Canciones del alma’. Pol so llau, Tino di Geraldo vio pasar de llargu la estatuina que premia’l meyor cd de nueves músiques, premiu del que se fixeron acreedores Chambao, pol trabayu ‘Endorfinas en la mente’.

Al meyor cantar n’asturianu, que por primer vegada premia l’Academia de la Música de mou singular xunta los cancios n’otres tres llingües cooficiales nel Estáu -gallegu, catalán y euskera-, concurríen tamién los avilesinos hermanos Tejedor, con ‘Andolina’, tema escritu xunta’l productor Lisardo Lombardía, y el xixonés Nacho Vegas, como autor ya intérprete del tema ‘La canción de la duermevela’.

Magar d’ello, el triunfu algamólu finalmente el candidatu más desconocíu, el llavianés Manolo Morán, por ‘Nunca máis’, tema incluyíu nel álbum ‘Sentimiento astur’. L’autor del cantar premiáu ye Pepín Robles, tamién orixinariu de Llaviana pero residente en Mallorca.

Na octava edición de los Premios de la Música, que tresmitió la televisión pública en diferío, destacaron con lluz propia Alejandro Sanz y Las Niñas, qu’algamaron siete de los premios, ente ellos los de artista revelación, meyor canción, meyor álbum de pop y meyor videu. Bebo Valdés y El Cigala recibieron el galardón al meyor álbum.

Llista de tolos ganadores na web de l’Academia de la Música

El conciertu heavy que’l grupu Saratoga pensaba ufrir mañana, vienres 16 d’abril, na sala xixonesa Parque’l Piles, nun se cellebrará finalmente al sufrir el baxista’l grupu, Niko del Hierro, una enfermedá que nun-y permite salir al escenariu.

Según informó la promotora de Saratoga n’Asturies, el recital queda aplazáu pal vienres 4 de xunu, tamién nel Parque’l Piles, y les entraes que yá se vendieron pa la actuación qu’agora se suspende valdrán pal conciertu de xunu.

Magar d’ello, quienes quieran más recuperar les perres del billete d’accesu al recital suspendíu podrán facelo nos puntos onde mercaron les entraes, les tiendes Tipo d’Uviéu, Xixón y Avilés.

El concursu de música folk “Cuarto de los Valles” algama los cinco años de vida. L’asociación cultural ‘El Arbedeiro’, organizadora l’eventu, mantién abiertu’l plazu de la quinta edición del certame pa que los grupos interesaos puean unviar les sos maquetes hasta’l prósimu 31 de mayu, optando asina a ún de los premios en metálico que va repartir el xuráu: 1.500 euros pal ganador, 600 euros pal segundu clasificáu y 300 euros pa caún de los otros tres finalistes.

La final del concursu, cuya primer edición cellebróse en 2000, tendrá llugar el prósimu 24 de xunetu nel so escenariu habitual de Navelgas (Tinéu). A ella llegarán les cinco bandes que más méritos aconceyen a xuiciu de los miembros del xuráu, presidíu pol direutor del programa ‘Trébede’ de Radio 3, Iñaki Peña. Los grupos concursantes habrán tener un mínimu de tres componentes y tendrán qu’unviar una maqueta en cd con a lo menos cuatro temes, dientro de plazu, a la Casa Cultura de Navelgas (Tineo), códigu postal 33873.

El certame tien dos oxetivos: Ser un puntu de referencia pa tolos grupos nuevos que quieren dase a conocer, seyan de dientro o de fuera d’Asturies, y tratar de difundir la música tradicional de tola península Ibérica. Nesi sen, los ganadores grabarán un cd conmemorativu d’esta quinta edición del concursu y presentarán la so música n’otros festivales d’España y Portugal colos que los organizadores mantienen alcuerdos de collaboración.

La llista de los cinco seleccionaos pa la final daráse a conocer antes del 20 de xunu nos medios de comunicación y comunicaráse-yos personalmente a los grupos, qu’habrán confirmar la so asitencia antes del 5 de xunetu.

Un importe máximu de 90.152 euros pa subvencionar la enseñanza de la música y la dancia tradicionales d’Asturies. Esi ye’l presupuestu col que la Conseyería d’Educación y Ciencia del Principáu d’Asturies quier alitar la continuidá del baille y los sones propios del país, nuna convocatoria qu’esclúi espresamente a les entidaes con ánimu de lucru y qu’almitirá solicitúes hasta’l 7 de mayu.

Les bases de la convocatoria precisen que les ayudes económiques nun se-yos concederán en nengún casu a entidaes cuyu fin principal seya’l meru funcionamientu d’una banda de gaites, un grupu de baille o un coru, anque faigan amás investigación folclórica. Los destinatarios precisos de la subvención son les entidaes o collectivos de calter sociucultural y ensin ánimu de lucru, llegalmente constituyíos, que seyan titulares d’Escueles de Música y Dancia Tradicional Asturiana.

Ente los requisitos fundamentales pa recibir una de les ayudes, la Conseyería d’Educación y Ciencia esíxe-yos a los solicitantes que cuenten polo menos con tres profesores, qu’ufierten llinguaxe musical y qu’impartan les sos enseñances en llocales afayadizos.

Les solicitúes, acompañaes de la pertinente documentación alministrativa, habrán presentase en tiempu y forma nel Rexistru Xeneral de la Conseyería d’Educación y Ciencia, allugáu na cai Coronel Aranda, 2, Edificiu Alministrativu de Servicios Múltiples, 33005-Uviéu.

Bases de la convocatoria nel BOPA

The Forty-Fives trai d’Atlanta a Xixón el so rock and roll ensin contemplaciones. La Sala Albéniz acueye esta nueche un conciertu nel que la banda norteamericana ufrirá una esbilla de los sos temes, a mediu camín ente la premonitoria guitarra de Chuk Berry, el soníu británicu y l’esplosivu direutu de bandes como The Who o MC5.

El preciu p’acceder al recital ye de 10 euros con drechu a una cerveza, cantidá que baxa a 6 euros si se presenta’l bonu que se reparte gratis nos llocales xixoneses Savoy, Paradiso, Toma 3 y Louie Louie Café, y en Turly Records d’Uviéu. Desembolsando esa cifra, los asistentes podrán contemplar la execución en directu de temes de los dos trabayos que tien grabaos la banda, ‘Get It Together’ y ‘Fight Dirty’.

The Forty Fives lleven namás dos años enriba les tables como formación, pero yá saben lo que ye trabayar nos célebres estudios Sun de Memphis y conocen lo que supón compartir escenariu con bandes de la talla de Jon Spencer Blues Explosion o Steve Earle.

El conciertu de Forty Fives en Xixón forma parte de la xira española que’l grupu entamó el 8 d’abril en Madrid y que lleva al grupu a llocales de Valencia, Santander, Xerez de la Frontera, Ourense y Tomelloso. The Forty Fives son Bryan Malone (guitarra y voz), Adam Renshaw (batería), Mark McMurtry (baxu)y Trey Tidwell (muérganu hammond).

Web oficial de la banda