Música

Rock and roll directu al cuerpu, arrechu y apoyáu en lletres trabayaes. El grupu navarru Marea presenta esta nueche n’Avilés les sos credenciales nun conciertu pal que yá nun queden llocalidaes a la venta, pesie a que los organizadores del recital enfótense n’abrir la taquilla con un númeru mínimu d’entraes reservaes a los siguidores procedentes de poblaciones onde nun s’habilitaren puntos de venta anticipada.

Los primeros acordes de la banda sedrán saludaos, poro, na Sala Quattro, colos aplausos d’un públicu que va corrompinar el llocal. L’aniciu del espectáculu ta previstu pa les 22 hores y supondrá la presentación en directo n’Asturies del más reciente trabayu de Marea, que lleva por títulu ‘28.000 puñaladas’ y ye’l cuartu discu que saca a la venta la banda, que dio los primeros pasos na llocalidá navarra de Berriozar nel añu 1997.

El conciertu d’Avilés sedrá primer platu d’una xira que llevar a los integrantes del grupu a cuarenta escenarios d’otres tantes ciudaes d’equí a finales d’ochobre y qu’inclúi una fecha más confirmada n’Asturies: El 28 d’agostu, Marea actuará en Llugones.

Web oficial del grupu

Rafael Frübeck, Maurizio Benini, Juan José Mena y otres primeres de la batuta dirixirán a la Orquesta Sinfónica’l Principáu d’Asturies (OSPA) na so próxima temporada, qu’arrancará na seronda. Nel so nuevu programa de conciertos, qu’esta mañana foi presentáu n’Uviéu, la OSPA dividirá la so actividá en cuatro ciclos: Música romántica, pieces relixoses, composiciones pa ballet y grandes sinfoníes ruses.

Pa facilitar l’asistencia de públicu a los conciertos, los responsables de la orquesta incluiyirán una novedá nes tarifes: Podrán alquirise abonos tanto pal programa completu como pa caún de los cuatro ciclos monográficos de la temporada 2004-2005, qu’empezará el 4 d’ochobre y tendrá la so segunda cita dos selmanes depués, cola interpretación del ‘Carmina Burana’ xunta’l Coru de la Fundación ‘Príncipe’ y baxo la batuta de Rafael Frübeck de Burgos.

Esi sedrá’l pistoletazu de salida. El pieslle pondrálu, a finales de mayu de 2005, una versión pa conciertu de la ópera ‘Lohengrin’, de Wagner, un proyectu que constitúi un gran retu pa la orquesta, según precisó el so director, Maximiano Valdés, y qu’obligará a la OSPA a reforzar los sos ensayos.

Nel capítulu de cites puntuales, la Orquesta Sinfónica’l Principáu participará nos meses d’avientu y xineru na LVI Temporada d’Óprea d’Uviéu, y xirará por Cataluña en tornu a la prósima Selmana Santa. Nesti sen, Valdés refirióse a la reciente cancelación d’una xira prevista por Alemania “porque pa nosotros ye muncho más importante dir a tocar a Barcelona que a ciudaes alemanes que nun valíen la pena”.

La Conseyera de Cultura, Comunicación Social y Turismu, Ana Rosa Migoya, que participó na presentación del programa de la OSPA pa la próxima temporada xunta la xerente de la orquesta, Encarnación Rodríguez, felicitóse polos diez años que Maximiano Valdés cumple dedicáu a la música n’Asturies y sorráyó la calidá de la llista de conciertos prevista pola OSPA, que güei pieslla la temporada en cursu.

Una venta masiva d’entraes qu’evite a última hora un indeseyáu fracasu económicu. Esa ye la esperanza cola que l’Ayuntamientu de Xixón y la productora Doctor Music van pasar el fin de selmana, con alpenes un cuartu del aforu vendíu a cinco díes del recital col que’l músicu británicu abrirá la so xira europea nel estadiu d’El Molinón.

Con alredor de 10.000 entraes despachaes de les casi 40.000 que tán a la venta, los gastos de caché del ex Beatle, de loxística y de promoción del conciertu amenacien con dexar un balance negativu nes arques municipales que’l conceyal de Festexos, Iván Álvarez Raja, quier esconxurar con una fola de venta de llocalidaes ‘in extremis’.

Unes 300 persones trabayen dende’l llunes pasáu nel montaxe de la estructura enriba de la qu’actuará McCartney en Xixón, nun espectáculu que s’apoyará en 75.000 vatios de potencia nel soníu y que tomará forma a partir de les pieces tresportaes en 28 camiones de gran tonelaxe.

Un dj animará los momentos previos al recital d’El Molinón con remezcles, antes de que l’ex vocalista y baxista de Los Beatles xuba al escenariu pa protagonizar un conciertu de tres hores de duración nel que tien previsto interpretar unos venti temes de la so llarga y exitosa dómina na hestórica banda británica.

Un preciu global de 53 euros por ver en Xixón a Stray Cats, Buddy Guy, Nervous Eaters, Kings of Leon, Ray Gelato y siete bandes más. La organización del Crossroad Festival, que va cellebrase el 23 y el 24 de xunetu con un cartel punteru de grupos de rock and roll, pon güei a la venta abonos que podrán alquirise con esa tarifa hasta fin de mes.

El públicu qu’espere hasta xunu habrá pagar 59 euros por cada abonu, preciu que xubirá a 65 euros en xunetu, mes de cellebración del festival. Les entraes sueltes pa cada una de les dos xornaes de conciertos qu’acoyerá la plaza de toros d’El Bibio, en Xixón, tendrán en cambiu un preciu fixu: 40 euros pa la sesión nocherniega del vienres y 45 pa la del sábadu nueche, que rematarán Stray Cats.

N’Asturies, la compra de llocalidaes podrá facese na taquilla’l teatru Xovellanos, en Xixón; nel Louie Louie Café, la Llibrería Paradiso y el Savoy Club, nesa mesma ciudá; na tienda Turly Discos d’Uviéu y n’El Dorado, de Pravia. Tamién podrán mercase entraes pal festival xixonés nes tiendes Tipo y al traviés de les páxines web ticktackticket y crossroadfestival.com.

La segunda edición del Crossroad Festival desendolcaráse en dos conciertos conxuntos: ún inaugural, el vienres 23 de xunetu, nel qu’actuarán The Meows, Hi-Risers, Hayseed Dixie, Ray Gelato, Kings of Leon y Buddy Guy; y un segundu recital al día siguiente, sábadu, del que tomarán parte Trash Tornados, The Come Ons, Laika and the cosmonauts, The Dempseys, Nervous Eaters y los veteranos Stray Cats.

Web oficial del festival

Gatos del Fornu, Chus Pedro Suárez, Ramón Prada, Muyeres y Esbardu. Esa ye la delegación asturiana que viaxará al Festival Intercélticu de Lorient 2004, que se cellebrará nesa llocalidá bretona ente’l 30 de xunetu y el 8 d’agostu y na que la presencia asturiana completaráse coles bandes de gaites de Candás y La Reina’l Truébano. La edición númberu 34 del intercélticu dedicaráse a L’Acadie, una rexón canadiense que celebra los 400 años de la so fundación.

Según pudo confirmar Asturnews de fontes de la organización del eventu, la representación asturiana ta yá dafechu definida y viaxa a Lorient col envís de dexar altu el pabellón un añu depués que que’l festival intercélticu se dedicare espresamente a Asturies.

La banda folk Los Gatos del Fornu visita per segunda vegada Lorient, depués de la so actuación como grupu invitáu nel añu 1999. Esti grupu formóse en 1996 n’Uviéu, col envís de recoyer y esparder la cultura asturiano, y algamó convertise nun referente de la musica tradicional n’Asturies depués d’ochu años de funcionamientu.

L’otru cabeza de cartel, Chus Pedro Suárez, tamién torna a tierres bretones nes que yá actuó, nun añu nel que vien de viaxar a Glasgow pa representar a Asturies nel Festival Celtic Connections 2004. Tampoco nun ye la primer vegada que’l compositor Ramón Prada visita la ciudá bretona. Esti añu’l músicu asturianu presentará la so composición sinfónica ‘Keltikhé’, una obra pa un cantante solista y un coru tradicional, papel qu’asumirá el coleutivu Muyeres. Son 75 minutos de composición interpretada con instrumentos tradicionales del arcu atlánticu, ente ellos la bombarda, el biniou bretón y les gaites asturiana, escocesa ya irlandesa.

El grupu avilesín Esbardu, y les Bandes de Gaites de Candás y La Reina’l Truébano completen la representación asturiana, que saldrá pa tierres bretones a finales del mes de xunetu col delegáu del Feltival n’Asturies, Lisardo Lombardía, a la cabeza.

La cabera edición del festival tuvo como protagonistes a los participantes del Conciertu d’Asturies ente los que s’alcontraben el propiu Chus Pedro, los Tejedor, Victor Manuel, ect… L’añu d’Asturies nel festival cuntó tamién cola participación de Dixebra, Hevia, cineastes, grupos de Teatru como Nun Tris y escritores.
Web oficial del festival

La visita de Paul McCartney a Asturies yá ye tanxible. Técnicos del equipu de montaxe entamen güei los llabores previos al allugamientu del gran escenariu que’l músicu británicu va emplegar nel conciertu qu’ufrirá nel estadiu xixonés d’El Molinón el prósimu 25 de mayu. El montaxe completu de la estructura, qu’inclúi una plataforma de 45 metros d’anchu por venti de fondu y otros venti d’altor, prollongaráse una selmana.

Los camiones de gran tonelaxe coles pieces de los equipos de lluz y soníu empezarán a aportar mañana al estadiu xixonés, que podrá rexistrar una entrada menor de la esperada polos organizadores si el ritmu de venta de llocalidaes nun esperimenta un emburrión final: Polo d’agora, unes 15.000 persones mercaron yá la so entrada pa ver a McCartney en Xixón, lo que supón alredor de la mitá de los títulos que se punxeron a la venta.

Magar d’ello, la ciudá prepárase pa recibir al ex Beatle per tolo alto. Paul McCartney, qu’ultima en Londres la preparación de la xira europea qu’abrirá n’Asturies, prevé facer un ensayu xeneral n’El Molinón na viéspora’l recital, énte públicu escoyíu pero emplegando yá la gran estructura allugada nel estadiu pa la ocasión.

Un princhadiscos amenizará la espera previa al conciertu con remezcles de temes conocíos, antes de que’l baxista y vocalista de Los Beatles xuba a escena pa protagonizar tres hores de música en directu.

Babylon Chat echa mano de Neil Young pa sofitar al Real Uviéu. La banda uvieína de rock-glam ta acabante grabar xunta varios xugadores del conxuntu azul un video clip concebíu como sintonía d’una campaña d’apoyu al equipu, a partir d’una versión del tema ‘Like a hurricane’ rebautizáu en castellán ‘Como un huracán’.

El cenciellu d’esa versión va salir darréu a la venta, mesmo que l’últimu discu de Baylon Chat, recién grabáu nos estudios Ecco coles collaboraciones, ente otros músicos, de la vocalista de Tahúres Zurdos, Aurora Beltrán, y de Rubén Moll, ex batería d’Ilegales. Trátase del cuartu trabayu discográficu de la banda, que contién una decena de temes propios y que rodará n’escena na xira que’l grupu empezó el sábadu pasáu na llocalidá alicantina de Pedreguer.

L’axenda de Babylon Chat pa esti veranu ta ligada a la del veteranu grupu madrilanu Burning, al que van acompañar en gran parte de los conciertos que la banda de La Elipa va ufrir con ocasión del so 25 aniversariu.

Visionáu del video na web del grupu

Hasta’l 2 de xunu. Esi ye’l curtiu plazu que tienen los grupos o solistes interesaos n’algamar dalgún de los cinco premios que’l Conceyu de Mieres va otorgar pa galardonar a los vencedores del VIII Certame de pop-rock ‘Villa de Mieres’. Antes d’esa fecha, los concursantes han unviar una maqueta con cuatro temes -d’ellos, un másimu de dos versiones- a la Oficina d’Información Xuvenil de Mieres, con dirección postal na cai Doce de Octubre, númberu 42.

El plazu apremia porque’l xuráu va seleccionar d’ente el material recibíu a los cicno grupos finalistes del concursu, que protagonizarán un conciertu conxuntu el sábadu 12 de xunu, nel trescursu de les fiestes patronales de San Xuan. Nesi recital decidiráse quién ye’l ganador del certame, anque habrá premios pa tolos qu’aporten a la final: 2.100 euros pa la banda ganadora, 1.400 pal segundu clasificáu, 700 pal terceru y otros 200 euros pa caún de los finalistes restantes.

Según precisó güei la conceyalía de Mocedá del Ayuntamientu de Mieres, que presentó la convocatoria cola previsión d’atrayer a lo menos a mediu cientu de bandes al concursu, les bases del certame establecen que la edá media de los grupos participantes nun ha superar los 35 años, polo que cada grupu habrá axuntar una fotocopia’l documentu d’identidá de caún de los sos miembros.

Dixebra y SKA-P volverán coincidir enriba les tables d’un escenariu. Dambos grupos prevén ufir un conciertu en comuña el prósimu sábadu 19 de xunu en La Felguera, tres años depués de la primer participación conxunta de dambes bandes, nel recintu ferial de Xixón, nel trescursu d’un recital en solidaridá col fíu d’un trabayador del astilleru priváu Naval Xixón.

N’aquella ocasión, Dixebra precedió n’escena a la banda madrilana, cuyos integrantes eloxaron la capacidá musical y el soníu en directu de los sos colegues asturianos. L’actuación nel recintu de la Feria Internacional de Muestres d’Asturies abrió una relación candial ente dambes formaciones, qu’agora volverán a axuntar a los sos siguidores énte un escenariu común.

La fecha prevista pal recital de La Felguera supondrá-y a Dixebra facer doblete, yá que la banda avilesina viaxará esi mesmu día a Caravia pa participar nuna nueche celta. D’ehí palantre, el grupu de rock n’asturianu tien previsto actuar el 26 de xunu n’Uviéu y darréu d’ello viaxará pa Galicia.

Dixebra foi una de les bandes participantes nel Conciertu pola Oficialidá de la llingua asturiana que se cellebró con gran asistencia de públicu el sábadu pasáu en Xixón, y nel que tamién participaron Los Ciquitrinos, Skanda, Skontra y La Bandina.

Soziedad Alcoholika regresa a Asturies. Depués de la so última visita al Festival Derrame Rock, hai agora dos años, el grupu vascu amuesa en Xixón el so potente directu nuna actuación qu’alpenes pudo ser publicitada previamente, por mor de les presiones del entornu de l’Asociación de Víctimes del Terrorismu que motivaron varies cancelaciones de conciertos de la banda por presuntes sides polítiques.

Según precisa la web www.derramerock.com, el realcuentru col públicu asturianu sedrá na sala Albéniz a les diez de la nueche de güei, xueves 13, y les entraes puen mercase por anticipáu nes tiendes Tipo por 12 euros o na propia taquilla por 15.

Les actuaciones de S.A. vienen precedíes de gran polémica y, según denuncien los propios miembros de la banda, d’un gran desconocimientu, ya que Soziedad Alkoholika vióse envueltu nuna serie de denuncies interpuestes por Víctimes del Terrorismu por mor de les sos lletres supuestamente favoratibles al terrorismu etarra. Amás, esi collectivu instó a la Federación Española de Municipios y Provincias a impidir les actuaciones d’esti y otros grupos vascos nes sos llocalidaes, lo que fizo que se cancelasen dellos conciertos de la so xira en cursu.

Poro, debío a estes circunstancies, los conciertos casi nin s’anuncien nin vienen precedíos de la pertinente propaganda. Na propia páxina web de S.A. precísase la fecha de los prósimos conciertos, pero non la ciudá onde van cellebrase dalgunos recitales, pa evitar nueves cancelaciones.

Web oficial del grupu