Música

Más y meyor. El Festival Intercélticu d’Avilés, que cellebra la so VIII edición ente’l 16 y el 26 de xunetu prósimos, movilizará a 850 artistes y deportistes espardíos nun cientu d’actos, dientro d’un programa que medra un día con respectu al añu pasáu y qu’inclúi una representación del País de Gales. Un boletín diariu, editáu pola Asociación d’Amigos del Festival, informará de les actividaes del certame.

Según asoleya la páxina web del Ayuntamientu d’Avilés, qu’apoya l’eventu celta entamáu pola Asociación Cultural Esbardu, cinco países unviarán delegaciones al Intercélticu -Irlanda, Escocia, Bretaña, Gales y Galicia-, pero la presencia más abondosa pondrála Asturies, con 15 bandes de gaites, 4 gaiteros solistes, 7 intérpretes de tonada, los grupos de folclore Esbardu y Muyeres, y les bandes de música folk N’Arba, Llan de Cubel, Tejedor, Tarañu, DRD, Triba, Deua Dubra y La Bandina’l Tombo.

Ente los representantes de les naciones invitaes, destaquen los irlandeses Lúnasa, les gallegues Leilía, la Banda de Gaites ‘Ciudá d’Edimburgo’ y la Kerlenn Pondi de Bretaña. L’espectáculu de baille ‘Spirit of the dance’ pondrá la espuela, nel Teatru Palacio Valdés, a un programa vertebráu sobro les denominaes ‘nueches máxiques rellumantes’ y les ‘nueches Guiness’, espectáculos musicales que se repartirán en dos escenarios: les places del Parche -Plaza d’España- y de Carlos Lobo.

Más allá de conciertos y amueses de baille, el VIII Festival Intercélticu d’Avilés acúta-yos un espaciu propiu a los deportes tradicionales, de los qu’habrá competiciones tanto nes cais de la villa como nes cercanes llocalidaes de Llaranes y La Callizuela (Illas), y reserva amás un sitiu pa dos esposiciones monográfiques, dambes nel Palaciu de Valdecarzana coincidiendo cola callebración del festival: Una sobro gaites del mundu y la segunda, al rodiu’l procesu d’ellaboración de la llana.

Programa íntegru na web del Ayuntamientu d’Avilés

El públicu tien qu’acudir a los conciertos en vivu porque “la emoción del directu ye dalgo inigualable”. L’intérprete malagueñu Carlos Álvarez, consideráu ún de los barítonos con mayor prestixu internacional d’anguaño, fizo güei esi llamáu al públicu asturianu, hores antes de poner n’escena nel teatru Xovellanos de Xixón una representación lírica con repertoriu andaluz y operísticu.

La invitación d’Álvarez, que dixo esperimentar sudu de manos y baltíos nel corazón cada vez que sal al escenariu pesie a llevar yá quince años enriba de les tables, xustifícase, según el barítonu, na “rellación magnífica” que s’entama ente públicu y artista nel directu, daqué d’especial relevancia nuna dómina como ésta, na que les representaciones líriques dexaron de ser “un meru trámite social pa ser una necesidá”, sostuvo l’artista.

Nuna comparecencia énte los medios de comunicación cellebrada esta mañana en Xixón, Álvarez aseguró que’l so retu fundamental ye siempre “la función del día siguiente” y, nesi sen, prometió un conciertu “absolutamente explosivu” pa mañana nel Xovellanos. A ello contribuirá decisivamente, razonó’l barítonu, la elección d’un repertoriu que s’adapta perfectamente a la soprano Rocío Ignacio, que-y dará’l contrapuntu na so actuación de Xixón y cuyes característiques vocales tán “en continua espansión”.

Asina, el recital programáu pa les 20,30 hores de mañana, sábadu, nel teatru Xovellanos baxo la dirección de Mariano Rivas y col soporte musical a cargu de la Orquesta Sinfónica de Córdoba, inclúi una primer parte basada en pieces andaluces -ente elles, una obertura de Tomás Bretón y lletres musicaes del poeta granadín Federico García Lorca- y un segundu espaciu dedicáu dafechu a la ópera, ente Donizetti y ‘El barbero de Sevilla’.

La gala lírica enmárcase na III Temporada ‘Antonio Medio’, que l’Ayuntamientu de Xixón dedica a l’alcordanza d’esi barítonu xixonés, y supón-y a Carlos Álvarez un intermediu nos ensayos que realiza n’Italia pa llevar a escena una representación del ‘Macbeth’ de William Shakespeare. De cara a la prósima temporada, el barítonu malagueñu prepara intervenciones nel teatru Metropolitan de Nueva York y nel Liceu de Barcelona, espaciu ésti últimu onde Álvarez cantará xunta Montserrat Caballé y baxo la dirección de Miquel Ortega.

Rubén Menéndez Castellano, pol guión técnicu y el plan de grabación del videu del tema ‘Estampida’ del grupu Maurizios, y Óscar López Ponte, por facer un llabor homólogu sobro’l cantar ‘Completamente loco’, del grupu Crash, repartiránse los 8.400 euros con que ta dotáu el concursu Videos Musicales 2004, convocáu pola Conseyería de Cultura, Comunicación Social y Turismu y 40 Principales Asturies.

El xuráu -presidíu pola Directora del Institutu Asturianu de la Mocedá, Carmen Barrera- taba compuestu por Alberto Toyos, llocutor de 40 Principales Asturies; José Luis Cienfuegos, director del Festival Internacional de Cine de Xixón; Luis Pascual, responsable de la Estaya d’Audiovisuales de la Fundación Muncipal de Cultura de Xixón; Beznar Arias, productor musical, y Carlos Francisco Martínez, músicu.

Rubén Menéndez Castellano (Avilés, 1979) ta activamente involucráu nel mundu audiovisual dende hai tres años, con especial atención a la edición de videos. Pol so llau, Óscar López Ponte (Uviéu, 1976), ye técnicu superior de realización y trabayó, ente otros medios de comunicación audiovisuales, en Tele Asturias, Televisión Llocal Xixón y el centru territorial de Televisión Española en Galicia.

El Derrame Rock desembarca en Pravia. L’apertura al mediudía de la zona d’acampada abre la puerta a tres xornaes de rock nes que venti bandes darán-y forma al primer gran eventu musical del veranu n’Asturies, qu’abandona Llangréu depués de cuatro ediciones y ufre un cartel encabezáu por Barricada, Los Suaves, Brecha, Kannon, Koma y Segismundo Toxicómano.

Con unes condiciones climatolóxiques meyores que les qu’arrodiaron el montaxe nos díes anteriores, los organizadores del Derrame esperan atrayer a partir de güei a miles d’espectadores al recintu ferial d’Agones, que según datos asoleyaos pola productora Santo Grial, qu’entama el festival de rock, xirará alredor d’un escenariu equipáu con 50.000 vatios de soníu y el triple d’iluminación, pero incluyirá amás dos zones de compres, un espaciu d’acampada y la posibilidá d’un eventual abellugu nun polideportivu cercanu en casu de lluvia.

Ente otres bandes, actuarán nel IX Derrame Rock Barricada, Brecha y Bourbon (xueves); Sugarless, Funk Illo, Meinhoff, Jacky Trap y Hora Zulú (vienres); y Koma, Poncho K, Los Suaves, Silencio Absoluto, La Fuga, Segismundo Toxicómano, Skontra y Akto Vandaliko (sábadu).

Distribución del recintu na web oficial del Derrame

El panorama folk asturianu gana una nueva banda. Los seis integrantes del grupu ayerán Tarañu suben al tren de la música moza tradicional y saquen a la cai ‘Al xeitu de nenyuri’, el so primer discu, editáu pola casa L’Aguañaz y acabante grabar nos estudios Tutu de Corvera baxo la producción musical de Sergio Rodríguez.

Según avanzó la propia discográfica, los exemplares finales del trabayu llegarán a Asturies nos prósimos díes y permitirán poner a la venta el discu -que fai el númberu 40 editáu por L’Aguañaz- al rodiu’l 12 de xunetu.

‘Al xeitu de nenyuri’ ta formáu por trece temes, de los que toos sacante tres son instrumentales y nos que la banda ayerana fai un repás de los sones tradicionales d’Asturies en clave de respetu a los esquemes y melodíes habituales nel folk. La composición propia marca bona parte de los temes, n’amiestu con pieces populares.

La discográfica independiente L’Aguañaz, qu’en marzu pasáu cumplió once años de vida y promoción de la música fecha n’Asturies, saca al mercáu el primer cd de Tarañu pocos díes depués de presentar el tercer trabayu discográficu d’otru grupu patrocináu pola editora, Skanda, autodefiníu como banda de folk-fusión y abiertu a una bayurosa influyencia sonora que recueye elementos del rock, el pop y el funk.

Nesti nuevu discu, tituláu ‘Sangre d’ochobre’, Skanda inclúi diez cortes nos que la voz va ganando presencia respecto a trabayos anteriores y que s’apoyen en collaboraciones d’altor como la del gaiteru irllandés John McSherry.

Puru ‘revival’ sesenteru fabricáu por espertos. La banda neoyorquina Chesterfield Kings, referente internacional del garaxe rock sicodélicu y entamada en 1979 por un periodista especializáu en música de los años sesenta y un apasionáu de los instrumentos d’esa dómina, presenta’l so directu en Xixón depués de cinco años d’ausencia nos escenarios españoles.

El grupu norteamericanu llega a Asturies pa xirar el so últimu trabayu, ‘Mindbending Sounds of…’, en cuya grabación participaron, ente otros músicos, los guitarristes Jorma Kaukonen (Jefferson Airplane) y Little Steven, habitual de Bruce Springsteen.

El conciertu empezará a les 21,30 na Sala Albéniz y les llocalidaes tán a la venta nos establecimientos xixoneses LouieLouie Café, Paradiso y Folixa; en Turly Records d’Uviéu y nes estremaes tiendes discográfiques Tipo d’Asturies, a un preciu reducíu de 15 euros na compra anticipada. En taquilla, les entraes costarán 18 euros.

Creada col envís de da-y puxu al resurdimientu de temes de los años sesenta, la banda Chesterfield Kings plantegóse dende l’empiezu homenaxear cola so música a grupos como New York Dolls, Muddy Waters o los Rolling Stones. De la primer formación, continúen nel conxuntu Greg Prevost (voz, harmónica y guitarra) y Andy Babiuk (baxista), agora acompañaos na batería por Mike Boise y na primer guitarra por Paul Marabito.

Web oficial de la banda

L’Ayuntamientu de Corvera cellebrará un Plenu monográficu nes prósimes dos selmanes pa debatir el futuru de la escuela municipal de música, cuyu proyectu de privatización desató les protestes de pas, profesores y alumnos. L’alcalde del conceyu, Luis Moro, garantizó ayeri los puestos de trabayu de los docentes, el manteminientu del númberu d’estudiantes y la preservación de la calidá del centru nel cursu prósimu.

Magar d’esi compromisu verbal, espresáu nel últimu Plenu ordinariu antes de les vacaciones de veranu, el rexidor municipal amosó les sos duldes sobro la llegalidá del orixe de la escuela porque, aseguró, nun esistió resolución municipal dala qu’afite la creación del centru, ya intentó calmar los ánimos d’un cientu de profesores, pas y alumnos qu’acudieron al Plenu pa protestar pol posible pieslle de la escuela, que según l’Ayuntamientu provoca unes perdes de más de 90.000 euros al añu.

A entrugues de los afectaos pola futurible privatización del centru municipal, pronunciaes nel obligáu turnu de ruegos y preguntes del Plenu, Moro (Unión Social y Progresista de Corvera) eludió abrir un alderique estensu sobro’l futuru de la escuela y aplazólu pal Plenu estraordinariu, qu’habrá cellebrase antes del 15 de xunetu.

Edificios protexíos

Amás de tar nel centru de les protestes de la comunidá de la escuela de música -cuyos métodos y “agresividá” refugó l’alcalde-, el conceyal de Cultura, Luis Solares (PP), ocupa un llugar destacáu na llista d’asuntos pendientes de la Plataforma pola Defensa del Patrimoniu Cultural de Corvera: Los sos responsables esperen ser convocaos a una xuntanza alcordada verbalmente col edil pa perfilar los catálogos urbanísticos que van determinar el grau de protección de les edificaciones del conceyu, qu’ultima l’asoleyamientu del Plan Xeneral d’Ordenación Urbana (PXOU).

La plataforma pidi-y amás al titular de Cultura que l’Ayuntamientu igüe dos llavaderos tradicionales allugaos xunta’l Palaciu de Solís y nel camín de Sama Riba.

Los siguidores del rock and roll podrán cellebrar con Ray Gelato y Nervous Eaters el final del Festival Crossroad 2004. Dambes bandes, participantes nel certame previstu pa últimos de xunetu en Xixón, pondrán-y música a una folixa na sala Parque’l Piles que sedrá la espuela del festival y a la que podrán acceder los titulares d’abonos hasta completar l’aforu.

El conciertu estra tendrá llugar na nueche’l domingu 25 de xunetu, final del fin de selmana nel que va cellebrase la segunda edición del Crossroad, y ta concebíu como una folixa de despedida pal públicu que previamente asista a les dos xornaes de conciertos rockeros na plaza toros d’El Bibio.

Como avance del so ‘desembarcu’ en Xixón, el festival tará presente na XVII edición de la Selmana Negra, ente’l 9 y el 18 de xunetu, con una carpa propia que va acoyer actuaciones diaries y una esposición d’oxetos rellacionaos cola música. L’establecimientu repartirá ente los sos veceros 5.000 copies d’un cd promocional qu’inclúi una pista de caún de los doce grupos programaos pal festival, amás d’un tema de Royal Crown Revue, que ta acabante rematar la xira de presentación del Crossroad por siete ciudaes españoles.

Como midida adicional de promoción de la segunda edición del Crossroad Festival, los sos organizadores sortearán ente los espectadores que merquen el so abonu antes del 15 de xunetu una guitarra Fender Stratocaster firmada pol intérprete de blues Buddy Guy y réplica de la qu’emplega nos sos conciertos.

Cuatro años de trabayu p’asoleyar en 200 páxines una hestoria del arpa plena d’elementos inéditos. L’investigador y músicu xixonés Daniel García de la Cuesta presenta güei el so llibru ‘Harpa y la so presencia n’Asturies’, un testu billingüe n’asturianu y castellán, apoyáu en 400 semeyes, que reivindica l’alcordanza d’un instrumentu escaecíu y espulsáu de la Catedral d’Uviéu nel sieglu XVIII darréu de la entrada nel templu de los dos muérganos de vientu.

Nesa dómina, asoleya la investigación de Daniel García, esistíen n’Asturies decenes d’harpistes vinculaos esencialmente a la liturxa relixosa, pero tamién participantes nos intermedios de representaciones populares de comedies en ‘corralas’ y capaces de provocar la so espulsión de la orquesta catedralicia, como ocurrió a lo menos nun casu, por increpar al altu la lleva a les xerarquíes católiques por motivos salariales en plena procesión del Corpus Christi.

Per esi puntu pasa’l camín lliterariu entamáu por García de la Cuesta, que calcula en poco más d’una decena les arpes esistentes anguaño n’Asturies y qu’imparte clases d’esi instrumentu na Escuela de Música Tradicional ‘La Quintana’, en Xixón. Pero, somorguiáu na investigación, García viose a sigo mesmu reculando hasta l’antiguu Exiptu, dómina na que, asegura, atopó abondes claves de la etimoloxía, la hestoria y l’usu relixosu del arpa.

En mou talu retrocedió nel tiempu y s’afitó cientos d’hores énte l’ordenador el músicu xixonés, rellata, que la fechura’l llibru qu’agora sal a la lluz valió-y p’articular una completa cosmovisión a partir d’un instrumentu que contó con músicos especializaos n’Asturies a lo menos ente los años 1572 y 1933, y que resurdió nel arcu atlánticu -d’onde ye orixinariu- al rodiu de 1980, nel contestu de los grupos de música folk qu’esploraben los soníos llamaos celtes.

Coincidiendo cola salida al mercáu del llibru, editáu pola Asociación Retueyu n’andecha con La Quintana y a la venta a un preciu de 18 euros, Daniel García presentará la so obra a partir de les 20 hores de güei nel Antiguu Institutu Xovellanos de Xixón, qu’a lo llargo de tol fin de selmana acoyerá amás una esposición d’harpes céltiques y un cursu intensivu pa intérpretes del instrumentu a cargu del músicu gallegu Xavier Gómez. Mayestru y alumnos ufrirán un conciertu el sábadu a partir de les 20 hores.

Artículu sintéticu sobro l’arpa céltica n’Asturies

L’Alcaldía de Corvera d’Asturies, rexida por Luis Belarmino Moro (Unión Social y Progresista de Corvera), consuma’l so divorciu con técnicos y asociaciones culturales del conceyu. Tres d’amenorgar l’antaño multitudinaria foguera de Tresona y llevala a un pasu de la desapaición, l’equipu de gobiernu recibe agora dures crítiques énte la so decisión de pesllar la escuela municipal de música alegando razones económiques y enfréntase a una campaña de movilizaciones lliderada por profesores y pas del centru.

El pieslle del equipamientu municipal, que dexará nel paru a los doce docentes de la escuela -con contratu en vigor inda hasta’l prósimu 6 d’agostu-, suma un episodiu más nun procesu qu’asociaciones y profesionales califiquen de “xenocidiu cultural” y cuyu penúltimu capítulu foi l’envís de suprimir la foguera de San Xuan en Tresona, mantenida a última hora énte la recoyida de miles de firmes contraries a la desapaición, pero con un cartel y un montaxe sensiblemente menores al d’años anteriores.

Representantes de los profesores de la escuela de música aprovecharon precisamente anteanueche la cellebración de l’amenorgada foguera pa clamar dende l’escenariu contra l’alcalde, Luis Moro, y p’anunciar una campaña de movilizaciones que tien el so primer pasu nun atropamientu de firmes contra’l pieslle’l centru municipal.

El públicu congregáu xunta l’embalse de Tresona respondió con una pitada xeneral al llamáu a la pública reprobación a Moro que fizo un voceru de los profesores, y la nueche acabó cola apaición d’una pintada insultante al conceyal de Cultura, Luis Solares (PP), nel esterior del ximnasiu de la so propiedá, llueu qu’un gaiteru lu persiguiera varies hores pol recintu de la fiesta interpretando pieces al so llau en seña de protesta pola so connivencia nel pieslle de la escuela.

L’Asociación de Pas y Mas del centru, en collaboración col profesoráu, asegura que les protestes dirán n’aumentu al entender que los problemes de liquidez del Conceyu nun puen iguase “pesllando tolos servicios municipales deficitarios” y entrúguense “qué ye la cultura pal nuesu conceyal culturista”, n’alusión a la vinculación de Solares al mundu del ximnasiu.

L’Ayuntamientu de Corvera, rexíu por Luis Moro como frutu de les elecciones municipales de mayu de 2003, argumenta que la escuela municipal de música dexa nes arques llocales unes perdes añales superiores a los 90.000 euros, “por más cultura que suponga”.