Música

Trabayu discretu, priváu y continuu. Los integrantes del grupu Llan de Cubel, pioneru de la música folk asturiana, trabayen dende xineru nuna base de datos na qu’incorporen pieces tradicionales en formatu mp3 col envís d’empezar a grabar pa fin d’añu el so prósimu trabayu. La banda, qu’anueche actuó na Plaza Mayor de Xixón, tien previsto embarcase en setiembre prósimu nuna xira d’once díes per Estaos Xuníos.

La recuperación de repertoriu tradicional a la que Llan de Cubel -y dedica gran parte del so llabor en 2004 cuayó yá nel rescate de rareces como grabaciones realizaes en 1939 en California, o emisiones de la cadena pública británica BBC, y complétase col repasu que los músicos tán faciendo de los sos propios discos editaos en vinilu, según precisa’l percusionista de la banda, Fonsu Mielgo.

Amás, los miembros de Llan de Cubel revisen cancioneros alternativos al d’Eduardo Martínez Torner y analicen grabaciones de pieces tradicionales que-yos faen llegar los sos siguidores, nuna xera que’l propiu Mielgo califica de “trabayu que nun se ve y que naide nun paga” y que tien por únicu oxetivu el de parir un discu “en condiciones, porque ye mui difícil facer bonos discos”.

Acordies con esa declaración de principios, la veterana banda pixueta nun tien priesa en presentar un cd nuevu nel mercáu depués del so últimu trabayu -‘Un tiempu meyor’, asoleyáu a finales de 1999 coincidiendo col 15 aniversariu’l grupu-, y plantégase culminar la grabación del que va ser el so sestu discu a lo llargo de 2005.

“Nin vivimos d’esto, nin tenemos un contratu por añu con una discográfica”, argumenta Mielgo, pa quien pretender subsistir esclusivamente gracies a la música obliga a llevar “una vida de marineru, o peor” y ye daqué al algame de mui pocos grupos y artistes.

Pesie a ello, Llan de Cubel descansará tol mes d’agostu y embarcaráse darréu nuna xira per Estaos Xuníos que va llevar a la banda asturiana por escenarios de Chicago a Cincinnati ente’l 16 y el 27 de setiembre prósimu, un ‘tour’ que taba previstu pal mes de xunu pero qu’entós foi pospuestu.

El grupu pixuetu arrincó anueche los aplausos de miles de persones aconceyaes na Plaza Mayor de Xixón, nuna potente actuación que se peslló ente bailles de los espectadores y qu’obligó a los músicos a volver por dos vegaes al escenariu pa ufrir tres bises.

Web oficial de Llan de Cubel

Tres décades de crónica musical d’Asturies. El cantautor xixonés Carlos Rubiera, protagonista’l Surdimientu y autor de composiciones dende 1974, asoleya un llibru-cd nel que recopila tola so obra musical espardida nos últimos trenta años y que sal a la cai impregnáu de l’alcordanza del malográu gaiteru Manolo Quirós, collaciu de Rubiera y fallecíu en 2001.

Productu de tres años de plantegamientu y ellaboración, ‘Carlos Rubiera: 30 años’ publícase en fórmula d’autoedición col sellu discográficu ‘La Capitana’, depués que’l veteranu músicu xixonés decidiera xestionar los sos propios discos énte esperiencies poco satisfactories con cases editores convencionales.

Con dalgunes d’elles hubo negociar Rubiera la recuperación de los temes que grabó nes últimes tres décades, y que lu afitaron como ún de los pioneros de la canción d’autor n’asturianu. El nuevu llibru-discu llega nun momentu nel que’l cantautor llevaba casi una década ensin asoleyar nengún trabayu, ausencia rota cola publicación de ‘Viaxe al silenciu’, qu’incluyó una versión n’asturianu del ‘Viaxe a Ítaca’ del catalán Lluís Llach.

Como autor lliterariu, Carlos Rubiera algamó en 1980 el premiu ‘Juan Uría Ríu’ d’Ensayu cola obra ‘La cultura asturiana, presente y perspectives’, y asoleyó na década siguiente cerca d’una decena de títulos de narrativa y poesía.

“Difícil de repetir”. Casi 20.000 persones siguieron a pie de cai el VIII Festival Intercélticu d’Avilés, qu’ayeri echó’l pieslle a la meyor edición hasta’l momentu, según los organizadores del certame, y piensa yá n’entamar dalguna cellebración especial pa conmemorar el so décimu aniversariu. L’Ayuntamientu renueva l’apoyu al festival, pendiente agora d’un pactu cola Sociedá Xeneral d’Autores y Editores pa pagar drechos d’autor por difusión musical.

En total, foron once díes de folixa articulaos al rodiu d’un cientu d’actos y siguíos por una media diaria de 2.000 persones los fines de selmana y d’unos mil asistentes nes xornaes llaborables, de llunes a vienres. Cifres que n’opinión de Juan Casas, presidente d’Esbardu -asociación qu’entama el festival-, demuestren a les clares que’l certame avilesín ye “imparable” y tien una continuidá “indiscutible”.

Lo que nun va resultar fácil, precisa Casas, ye la planificación de la prósima edición en meyores términos que la que ta acabante rematar, “porque difícilmente se podrá repetir un festival d’esta envergadura”. Na confección del programa del añu qu’entra, l’Ayuntamientu mantendrá el so sofitu plenu al eventu, depués que’l conceyal delegáu de Cultura, Juan José Fernández, -yos asegurara a los organizadores que “esto sólo ye’l principiu”, n’alusión al saltu cualitativu que l’Intercélticu dio na so VIII edición.

Magar de tou esi optimismu, nel otru llau de la moneda acusbia entá la Sociedá d’Autores. Depués d’evitar ‘in extremis’ la suspensión cautelar de gran parte de los conciertos del festival al algamar un alcuerdu a la puerta’l xulgáu, organizadores y miembros de la SXAE volverán aconceyar en setiembre pa concretar qué pieces de les interpretaes nos recitales d’esta edición xeneren drechos d’autor y cuáles non.

Nesti sen, un inspector de la Sociedá Xeneral d’Autores y Editores fizo un siguimientu a los conciertos del Intercélticu col envís de tomar nota de les interpretaciones susceptibles d’obligar a los organizadores a pagar una tasa. Miembros d’Esbardu discutirán cola SXAE el porcentaxe final nuna reunión qu’inda nun tien fecha esacta pero qu’en tou casu va cellebrase de sutaque pase’l veranu.

La Sociedá d’Autores retira la demanda contra l’Intercélticu y negociará un cobru a la baxa

Esbardu, Gatos del Fornu, Muyeres, Ramón Prada y Chus Pedro Suárez. Esi ye l’orde col que los grupos y solistes integrantes de la delegación asturiana nel Festival Intercélticu de Lorient 2004 saldrán a escena nel certame bretón, qu’arranca el prósimu vienres y va prollongase hasta’l 8 d’agostu. La espedición saldrá d’Asturies na nueche’l xueves.

La delegación d’unviaos asturianos ultima los preparativos del viaxe, cuyu trayectu de vuelta ta previstu pal mesmu día qu’acaba el festival y que llevará a Lorient a los encargaos de mantener altu’l pabellón un añu depués que’l certame se dedicare espresamente a Asturies. Nesta edición, el protagonista sedrá L’Acadie, una rexón canadiense que cellebra los 400 años de la so fundación.

El grupu de baille Esbardu estrenará la representación activa d’Asturies nun espectáculu de dancies previstu pa primer hora de la tarde’l sábadu 31 de xunetu, nel cabaret del certame. El relevu garrarálu la banda uvieína de folk Gatos del Fornu, protagonista d’un conciertu el 2 d’agostu xunta los galegos Os Enxebres de Cacheiras y de nueu enriba les tables el 3 y el 4 d’agostu, en sendos recitales nel Palaciu de Congresos y nel denomináu ‘Espaciu festival’.

Esi mesmu miércoles 4 d’agostu, el collectivu Muyeres participará nun espectáculu de música relixosa na ilesia de San Lluis, na viéspora l’estrenu del que’l delegáu del Intercélticu n’Asturies, Lisardo Lombardía, considera’l ‘platu fuerte’ de la representación asturiana: L’estrenu de la composición ‘Kelthiké’, concebida espresamente pal festival con gran presencia’l repertoriu vocal tradicional.

El 6 d’agostu, vienres, sedrá’l turnu de Chus Pedro Suárez, qu’actuará acompañáu de Muyeres nel Grand Theatre, mientres qu’Esbardu volverá cobrar protagonismu nes dos últimes xornaes del certame. Completen la delegación asturiana unviada a Lorient les bandes de gaites de Candás y La Reina’l Truébano.

Stray Cats pon la espuela a dos xornaes de conciertos abiertos de rock en Xixón. El II Festival Crossroad, nel que participen doce bandes y que güei cellebra’l so segundu recital collectivu, culmina mañana 72 hores de música con una folixa pa los titulares d’abonos na sala El Jardín na que tocarán dos de los participantes nel festival, Ray Gelato y Nervous Eaters.

Depués d’una primer xornada seguida anueche por miles de persones na plaza de toros d’El Bibio, coles actuaciones de Buddy Guy, Kings of Leon, The Meows, Hi-Risers, Hayseed Dixie y Ray Gelato, el Crossroad tien fixada pa güei la intervención de Stray Cats, que pesllarán una nueche de rock na qu’intervendrán Trash Tornados, The Come Ons, Laika and The Cosmonauts, The Dempseys y Nervous Eaters.

Amás, esta última banda y el saxofonista Ray Gelato ufrirán un conciertu de despidida mañana, na sala El Jardín, na que sedrá la folixa d’espuela del festival y a la que podrán acceder los titulares d’abonos hasta completar l’aforu del recintu.

Como novedá respecto a l’anterior edición, el Festival Crossroad alluga nel interior de la plaza de toros de Xixón un mercáu integráu por diez puestos nos que tán a la venta ropa, discos y productos de coleccionismu referíos a les bandes participantes.

Dixebra da un nuevu pasu alantre p’hacia la so mayoría d’edá. La banda avilesina de rock, que l’añu prósimu cumple 18 años d’esistencia, entaína’l llabor de composición pa grabar nos estudios Tutu de Corvera el so discu númberu ocho. El grupu prevé asoleyar antes qu’acabe 2004 un cd integráu por al rodiu d’una quincena de nuevos temes con incursiones nel ska, el reggae y el funky.

Lloñe de concebir el veranu como época de descansu, los miembros de la veterana banda de rock n’asturianu plantéguense intensificar no que queda de xunetu y nel prósimu mes d’agostu el procesu d’esbilla de bases musicales, lletres ya igües de los temes que-y darán forma al so octavu discu. Nesti sen, el grupu cuenta yá con más de venti ‘debuxos’ de canciones de les qu’a partir d’agora habrá empezar a descartar dalgunes.

Esi embrión del que va ser el nuevu trabayu d’estudiu de Dixebra, depués de la publicación de ‘Sube la marea’ na primavera de 2002 y del asoleyamientu del discu-llibru recopilatoriu ‘Cróniques d’un pueblu’ n’avientu pasáu, inclúi no musical una bayura de soníos xunificaos pola contundencia, con estructures y melodíes que van del puru rock and roll al ska, el reggae y el funky.

Con eses blimes, el grupu quier teyer un discu ‘cocináu’ con calma nel estudiu que rexenta’l so habitual técnicu de soníu, Sergio Rodríguez, y estudia dalgún tipu de collaboración del productor vascu Kaki Arkarazo -en cuyu estudiu guipuzcoanu grabó Dixebra ‘Sube la marea’- que podría cincar al procesu final de mezcles.

L’Intercélticu d’Avilés calca l’acelerador. La VIII edición del festival aporta güei al so ecuador y afronta’l so últimu tramu colos güeyos puestos nel gran desfile de delegaciones previstu pal vienres y les nueches céltiques que protagonizarán, tamién el fin de selmana, Llan de Cubel, N’Arba y Lúnasa. Nes sos primeres cinco xornaes, l’Intercélticu desendolcóse con notable ésitu de públicu.

El programa’l festival pa güei, miércoles, debuxa un día que pesllará’l grupu Triba na plaza de Carlos Lobo, depués d’una amuesa de xuegos populares a les 17 hores y un taller de baille bretón a les 19,30. Pa mañana, xueves, fíxase una nueche de música de gaita de los estremaos países que participen nel certame, pero l’españíu final llegará a partir del vienres.

A les 18,30 hores d’esa xornada -a lo llargo de la cual allugaráse un mercáu d’artesanía astur na plaza’l Parche- arrancará’l gran desfile de les delegaciones céltiques, con salida de la cai José Cueto y recorríu pola plaza La Mercé, cai Pedro Menéndez, plaza Pedro Menéndez, cai La Muralla y cai La Cámara, hasta aportar a la plaza l’Ayuntamientu.

Ellí, a partir de les 19,15, sonarán les gaites de los países participantes, amosaránse les dances de les estremaes naciones y entamará un conciertu del grupu pixuetu Llan de Cubel. El sábadu, l’actuación de Lúnasa y N’Arba pesllará les nueches celtes del VIII Festival Intercélticu, cuyu final pondrálu na tarde’l llunes l’espectáculu de baille ‘Spirit of the dance’.

Web de l’Asociación d’Amigos del Intercélticu

El veteranu ‘bluesman’ británicu John Mayall, pioneru nel puxu’l blues inglés a finales de los años sesenta y reconocíu poles sos innovaciones nesi soníu nos setenta, abre güei el Festival de Jazz d’Uviéu, qu’acoyerá l’actuación de 24 bandes y solistes y qu’espardirá los sos conciertos pol teatru Campoamor, el patiu hestóricu de la Universidá y la sala Tribeca.

El recital qu’a partir de les 20,30 hores d’esta tarde protagoniza John Mayall xunta The Bluesbreakers sedrá’l primeru de los grandes conciertos del festival previstos pa esta selmana nel Campoamor, y que tendrán continuidá mañana, martes, con Rundy Brecker-Bill Evans y la Soulbop Band. El miércoles actuará el Black Heritage Choir de Mississippi, mientres que’l xueves sedrá’l turnu d’Isaac Turienzo y Fisk Jubilee Singers, y el vienres ta fixáu el conciertu d’Art Ensemble of Chicago.

Amás d’eses actuaciones, a les que se pue acceder con entraes singulares de 12 euros o con un abonu conxuntu pa los cinco conciertos que ta a la venta a un preciu de 45 euros, el blues, el gospel y el jazz tendrán presencia nel patiu del edificiu hestóricu de la Universidá -John Falcone Quartet y Chastang Trío el martes, Albert Sanz y Robert Stillman el miércoles- y na sala Tribeca, con un conciertu diariu a partir de la 1 de la madrugada.

El conceyal delegáu de Cultura y primer teniente d’alcalde d’Uviéu, Alfonso Román López, espresó na presentación del certame, el pasáu 8 de xunetu, la voluntá municipal de que’l festival tenga continuidá n’años posteriores y acceda al circuitu de grandes cites de jazz xunta certames de la talla de los festivales de Vitoria y San Sebastián.

La música d’etiqueta asturiana viaxa a Francia ya Italia. La Banda de gaites Llacín, de Llanes, cuela mañana con destín a tierres gales pa participar nel 81 Festival de Cornouaille y coincidirá na carretera col grupu folk ribesellán Corquiéu, que’l martes prósimu abre una xira de siete díes pel norte d’Italia con conciertos previstos en Xénova, Verona, Bergamo y Vicenza.

Nel casu de la formación gaitera, cuyos integrantes yá tienen preparáu l’equipaxe, la banda Llacín participará nel gran desfile que pieslla’l Festival de Cornouaille, na llocalidá de Quimper, exerciendo la representación d’Asturies xunta otres sesenta bandes y agrupaciones d’estremaos países celtes nuna marcha que sedrá retransmitida en directu por Internet na mañana’l domingu 25 de xunetu, última xornada’l festival.

L’eventu musical algama esti añu la so edición númberu 81 ya inclúi nel so programa amueses de gastronomía, deporte, baille y música tradicionales, con un cartel nel que figuren, ente otros, los grupos y solistes Alan Stivell, Johnny Clegg, Skolvan y Le Bagad Kemper.

Pol so llau, Corquiéu, que mañana actúa nel festival folk de Liébana, en Cantabria, tien un calendariu de conciertos confirmaos del miércoles al domingu de la prósima selmana nes llocalidaes italianes d’Arenzano, Motorio Veronese, Bergamo y Arzignano. A la espera de grabar el so segundu discu, que prevén editar a partir de setiembre, Corquiéu participará a finales d’agostu nuna xira per Austria, y tien confirmáu un conciertu n’Holanda pal mes de payares.

Web oficial de Corquiéu

Avilés, capital del mundu celta. El VIII Festival Intercélticu de la villa arranca baxo l’atenta güeyada de la Sociedá Xeneral d’Autores y Editores (SXAE), que supervisará cada espectáculu musical del certame pa negociar depués colos organizadores el cobru de tases de drechos d’autor. Leilía, DRD, Tejedor, Tarañu y Deua Dubra protagonicen los conciertos previstos hasta’l domingu.

Depués d’algamar ayeri un alcuerdu ‘in extremis’ cola Sociedá d’Autores qu’evita la suspensión de los principales recitales del festival, l’Intercélticu esparde a partir de les 20,45 hores poles cais avilesines les bandes y grupos participantes nel certame, que van participar nuna presentación oficial na plaza de Carlos Lobo.

Un conciertu nesi mesmu llugar de les gallegues Leilía y los asturianos DRD, a les 23,15, estrenará la llarga serie de recitales previstos nel festival, cuya primer tarde inclúi una amuesa de xuegos tradicionales na plaza’l Parche a les 18 siguida d’una espicha, una actuación del cuartetu Torner a les 20 hores y cuatro intervenciones folclóriques simultánees a les 20,30: La Banda de gaites Ciudá d’Edimburgo en Les Meanes, la Nolan School of Irish Dance n’El Carbayeo, los galeses Danswyr Gwerin Pen-Y-Fai en Rivero y los bretones Kerlenn Pondi na plaza’l Carbayu.

L’actu central previstu pal sábadu ye un homenaxe a gaiteros asturianos conducíu polos hermanos Tejedor, a les 23,30 hores en Carlos Lobo, nuna xornada na que’l festival tresllada parte de les sos actuaciones al conceyu vecín de Castrillón y que tamién va acoyer deportes tradicionales na plaza’l Parche y la intervención de los ganadores del concursu de tonada.

El programa pal domingu, que pesllarán les bandes folk asturianes Tarañu y Deua Dubra tamién en Carlos Lobo, inclúi una amuesa de folclor pa neños a les 19,15 y les actuaciones de los bretones Bagad y Cercle Celtique Kerlenn Pondi y los galeses Dawnswyr Gweryn Pen-y-fai.

La Sociedá d’Autores retira la demanda contra l’Intercélticu y negociará un cobru a la baxa