Música

El Muséu de la tonada sedrá una realidá si pue financiase con fondos mineros. L’alcalde de Mieres, Luis María García, y el director xeneral de Promoción Cultural del Principáu, Carlos Madera, afitaron esta mañana la intención d’Ayuntamientu y Principáu d’esperar incluso a “un segundu Plan del Carbón” -l’actual vence en 2005- que sufrague la puesta en marcha y el funcionamientu del equipamientu cultural.

A les alministraciones llocal y autonómica preocúpa-yos la inversión inicial necesaria pa echar a andar el muséu, pero tamién los recursos económicos que’l futurible espaciu cultural requier pa funcionar baxo una “xestión sostenible”, especialmente al tratase, en pallabres de Carlos Madera, d’un equipamientu que “tien muncho d’intanxible”.

Por esa razón, y pesie a que l’alcalde de Mieres sorrayó que “nun renunciamos al proyectu”, l’apertura del Muséu de la tonada podría postergase tovía más allá de 2005, si nun prospera la petición del Ayuntamientu pa desviar hacia l’equipamientu una partida de los fondos mineros aprobada en principiu pal Muséu Etnográficu de Gallegos, y el Consistoriu demanda la inclusión del Muséu de la tonada na llista de proyectos sufragaos con perres d’un nuevu Plan de la Minería.

Premios de la tonada

Luis María García, Carlos Madera y la conceyala de Cultura de Mieres, Beatriz González Prieto, presentaron güei el XVIII Memorial de Tonada ‘Silvino Argüelles’, un festival que va cellebrase’l prósimu vienres na villa minera cola participación de los diez meyores intérpretes de canción asturiana, a los güeyos del xuráu del certame: Sergio Agüeros, Liliana Castañón, José Manuel Collado, Mari Luz Cristóbal, Rosario González, José Manuel Robledo, Bibiana Sánchez, María Sánchez, Anabel Santiago y Jorge Tuya.

Caún d’ellos interpretará dos cantares nel festival, que va desendolcase nel Parque Xovellanos y que tamién distinguió a Alberto Varillas como’l meyor gaiteru de tonada del añu 2004.

Sotu d’Ayer apuesta pola plurinacionalidá. Los bretones Kornog, los gallegos Pepe Vaamonde Grupo y les bandes asturianes N’Arba y Tarañu integren el cartel de la popular nueche celta ayerana, que se cellebra el prósimu 4 de setiembre y cuyu entornu quier meyorar l’Ayuntamientu cola meyora de los accesos al prau Llerón, escenariu’l certame.

Nesti sen, técnicos del Consistoriu ayerán trabayen yá na reforma de les entraes al recintu col envís de facilitar l’accesu tanto a los vehículos como a los peatones, en previsión de que se repita la masiva afluencia de públicu d’años anteriores y seya necesaria una afayadiza organización de la circulación qu’evite incidentes.

Según asoleya la páxina web del telecentru d’Ayer, el conciertu de les cuatro bandes programaes tará precedíu, dende les 17 hores, por un mercáu celta, xuegos tradicionales, un conciertu didácticu de música tradicional y una esposición sobro esi mesmu asuntu, con amuesa d’instrumentos. Amás de too ello, la compañía teatral Nun Tris realizará un espectáculu máxicu d’ambiente célticu al rodiu la medianueche.

La nueche de Sotu d’Ayer, que se vien cellebrando dende 1996 con participación de primeres figures de la música folk, ye una de les cites céltiques más veteranes d’Asturies. Pa facilitar l’asistencia de públicu al certame, l’Ayuntamientu d’Ayer habilitará un serviciu especial d’autobuses que circularán ente les 5 y les 7 de la mañana dende Soto hacia dambos estremos de la cuenca’l ríu Ayer: Felechosa y Mieres.

Folixa en Porcía

Previamente a que la nueche de Sotu pieslle’l calendariu habitual de festivales célticos n’Asturies, la llocalidá de Porcía, nel conceyu d’El Franco, acoyerá esti fin de selmana la so Noite Celta, na que tienen previsto actuar, ente otros artistes, les bandes Llangres y Tejedor. L’Ayuntamientu d’El Franco debatió na so última sesión plenaria estraordinaria, el pasáu 18 d’agostu, una propuesta pa declarar la folixa de Porcía como “Fiesta d’Interés Turísticu Rexonal”.

Dende Tolivia, al mundu. El grupu Los Berrones esporta la so singular concepción del ‘agro rock’ a Ibiza, la islla que ta considerada la patria de los soníos tecno depués de ser pionera na cellebración de fiestes ‘rave’ a finales de los años ochenta. La banda, que ta acabante grabar en Xixón un directu recopilatoriu, actuará’l prósimu sábadu nel conciertu central de les fiestes patronales de Sant Agustí.

El veteranu grupu, autor del primer gran ésitu del pop-rock en llingua asturiana -‘Nun yes tú’- y en funcionamientu dende hai una década, saldrá a escena na Plaza Mayor de Sant Agustí teloneáu poles bandes ibicenques Liorna y Pota Lait, cultivadora esta segunda d’un soníu asemeyáu al que practiquen los de Tolivia y acoyíu tamién a la etiqueta ‘patentada’ por Los Berrones, l’agro-rock’.

Diez años depués d’entrar con fuercia nel panorama musical asturianu, el grupu lideráu por Ramón y Tante Blanco y Olegario Méndez esperimenta un notable resurdimientu, con una decena de conciertos na temporada de veranu y la cellebración d’un multitudinariu recital en Xixón, el pasáu 10 d’agostu, del que saldrán un dvd y un doble cd colos temes más populares de la banda.

Si se cumplen les previsiones del grupu, el nuevu discu -que fai el númberu siete nos trabayos de llarga duración de Los Berrones- tará nel mercáu na prósima seronda. La banda de Tolivia saltó a la fama en 1988 depués de quedar finalista nel concursu de maquetes de Radio Asturias correspondiente a esi añu, y en 1989 asoleyó’l so primer discu, ‘Voi dicítelo’, al que siguieron otros cinco álbumes, l’últimu d’ellos ‘República independiente de Tolivia’, editáu a finales de 2003.

Web oficial de Los Berrones

El Gobiernu autonómicu reconoz el Festival Intercélticu d’Avilés como’l principal nel so xéneru. El certame entamáu pola asociación Esbardu, que na so última edición aconceyó a unes 20.000 persones, recibirá dos tercios de les perres que’l Principáu destina a sufragar festivales intercélticos. Los otros dos certames d’esti tipu que resultarán subvencionaos son los Alcuentros de Trebolgu y l’Intercélticu d’Occidente.

Asina, la salú económica’l festival avilesín, cuya VIII edición desendolcóse ente’l 16 y el 26 de xunetu pasáu con notable ésitu de públicu y baxo la güeyada de la Sociedá Xeneral d’Autores y Editores -que reclama’l pagu de drechos d’autor-, veráse beneficiada polos 19.000 euros que la conseyería de Cultura decidió empobinar al certame. Una cantidá enforma mayor que los 9.000 euros destinaos al Intercélticu d’Occidente y los 2.000 colos que se financiarán los Alcuentros Tradicionales de Trebolgu, que se cellebren n’Uviéu.

Amás de recoyer eses tres ayudes, el Boletín Oficial del Principáu d’Asturies (BOPA) publicó na so edición del pasáu sábadu la denegación d’once peticiones de subvención pa eventos rellacionaos cola música celta, ente ellos la Foguera de San Xuan de Llugones, el Festival de Bandes de Gaites de Candás, la Xermandía Celta de Corvera y l’Intercélticu de Gozón.

Nel mesmu númberu pero n’estremáu apartáu, el BOPA informó de la concesión d’ayudes económiques p’actividaes consideraes de “interés regional”, ente les que destaquen el Premiu Internacional de Cuentos de L.lena, el Concursu d’Asturianaes d’Amieva, la Selmana de Teatru de La Pola Siero, el certame Art Nalón y la Selmana de Música Antigua de Xixón.

Publicación de la midida nel BOPA

Depués de tocar el vienres 13 en Xixón, dientru del programa “Arte en la Calle” Stormy Mondays (Jorge, Ricardo, Mario, Danny y el nuevu baxista del grupu, Rafa) tien anunciada pa finales d’esti mes d’Agostu una xira por Italia con Elliott Murphy que va poer siguise como davezu na paxina web del grupu, nun prestosu diariu de ruta.

El grupu asturianu, ún de los que más y meyor vien faciendo un apueste nidiu pola música de llibre distribución y que vien ufriendo dende hai tiempu los sos cancios n’Internet, fai compaña davezu al cantautor americanu y a la so banda en munchos conciertos, depués d’entamar la collaboración nuna visita de Murphy a Uviéu.

Elliott Murphy ye amás enforma conocíu na hestoria de la música pop asturiana por protagonizar na década de los ochenta el que fuera’l primer gran conciertu gratuitu entamáu por un Ayuntamientu con una estrella de calter internacional, nuna programación del Ayuntamientu de Llangréu nel Parque Nuevu de La Felguera. Naquel conciertu qu’abriría la dómina de los conciertos municipales gratuitos n’Asturies, Elliott Murphy presentóse énte’l públicu asturianu con un significativu “Asturies, qué guapina yes”, que deprendiere una hora antes mentanto tomaba sidra colos organizadores del conciertu peles cais de Llangréu.

Polo que cinca a l’actividá de Stormy Mondays nel restu’l branu, tres de los componentes del grupu Jorge Mario y Danny tamién participen en ‘Beat Fevers’, un grupu de versiones de blues, soul y rock and roll nel que tamién toquen Ángel Parada y Javi Méndez y que mañana, xueves, va ufrir un conciertu a les 21,30 hores en Ca Beleño, n’Uviéu. Y como Stormy Mondays, tamién tienen previstos dellos conciertos como’l qu’ufrirán de teloneros del mesmu Elliott Murphy nel Albergue de Piedrafita de Jaca (Huesca) esti sábadu 21 d’agostu a les nueve y media la nueche.

Páxina web del grupu Stormy Mondays

La música de pianu espárdese per Xixón. La quinta edición del Festival ‘New Millenium’, qu’aconceyará na ciudá a relevantes pianistes hasta’l 28 d’agostu, echa a andar güei con un recital del virtuosu rusu Boris Slutsky, formáu en Moscú y Nueva York y caderalgu nel Conservatoriu de Música Peabody. Los intérpretes Jenny Lin, Monica Yuki Ohuchi y Sarah Rhee participarán tamién nel festival.

El conciertu col que Slutsky -solista d’éxitu en Noruega, Sudáfrica, Rusia, Colombia y Brasil, ente otros países- inagurará el ‘New Millenium’, concebíu pa pianu y orquesta, cellebraráse a partir de les 20,30 hores de güei nel Teatru Xovellanos, y sedrá’l primeru d’una llista d’ocho recitales públicos nel marcu’l festival.

El vienres 20, los alumnos que participen nes clases maxistrales del certame ufrirán un conciertu nel Centru de Cultura Antiguu Institutu, mientres que’l sábadu 21 d’agostu sedrá la solista Jenny Lin quien actuará na Colexata San Xuan Bautista.

El ‘New Millenium’ retomará l’actividá el martes 24 con un nuevu recital d’alumnos, y la recta final del certame tará encadarmada por sucesives actuaciones de Jenny Lin -esta vegada acompañada d’orquesta-, Monica Yuki Ohuchi, Sarah Rhee y el conxuntu Kaleidos, que pesllará’l festival con un conciertu’l sábadu 28 d’agostu nel Xardín Botánicu de Xixón.

Un total de trenta bandes de gaites y asociaciones folclóriques repartiránse los 90.152 euros colos que la Conseyería d’Educación y Ciencia quier alitar la enseñanza de música y baille tradicional en 2004. Según una resolución publicada güei nel Boletín Oficial del Principáu d’Asturies (BOPA), l’Executivu autonómicu gastará toles perres de les que disponía na convocatoria y desestima la solicitú de la Banda de Gaites ‘Mieres del Camín’ por tar presentada fuera de plazu.

Otres ocho bandes de gaites recibirán les ayudes económiques que solicitaben: les de Candás, ‘Villa de Xixón’, ‘Noega’, Ribesella, ‘Villa d’Avilés’, ‘Llariegu’, ‘Villa y Condáu de Noreña’ y ‘Rei Aureliu’, con subvenciones qu’oscilen ente los mil y los cuatro mil euros, siempre pa gastos formalizaos nel exerciciu en cursu.

Educación dio-y amás el vistu bonu a les peticiones cursaes poles asociaciones folclóriques ‘Valle del Nalón’, ‘Los Xustos’, ‘La Guareña’, ‘Nalgañu’, ‘Marino Tapiega’, ‘Xaréu d’ochobre’, ‘Esbardu’, ‘La madreña’, ‘Reua’, ‘Cántara’, ‘El Ventolín’, ‘La Folixa’, ‘El Cabazo’, ‘Principado’, ‘Retueyu’, ‘La Clave’, ‘Los Yerbatos’, ‘El Llacín’y ‘Avante Cuideiru’. Estos dos últimos collectivos recibieron les ayudes de mayor cuantía, 6.686 euros cada una.

La Conseyería d’Educación y Ciencia entamó les subvenciones n’abril pasáu escluyendo de la convocatoria a entidaes cuyu envís principal seya’l meru funcionamientu d’una banda de gaites, un grupu de baille o un coru, anque faigan amás investigación folclórica. Los destinatarios precisos de les ayudes yeren entidaes o collectivos de calter sociucultural y ensin ánimu de lucru, llegalmente constituyíos, que seyan titulares d’Escueles de Música y Dancia Tradicional Asturiana.

Ente los requisitos fundamentales que’l Principáu estableció pa conceder les ayudes, Educación esixía-yos a los solicitantes que cuenten polo menos con tres profesores, qu’ufierten llinguaxe musical y qu’impartan les sos enseñances en llocales afayadizos.

Promulgación de la midida nel BOPA

Pura folixa toliviana. El grupu de pop-rock n’asturianu Los Berrones somorguióse anueche nuna multitudinaria fiesta na playa de Poniente, en Xixón, énte miles de persones qu’alitaron un conciertu con puntos álxidos nos temes más vieyos de la banda de Tolivia. Asturnews úfre-yos a los sos llectores un audio cola interpretación de ‘La de Sindo el cabreru’. El recital, del que saldrá un cd-dvd na prósima seronda, repartió irónica estopa ente George Bush, la farándula televisiva, la clase política y los programadores de Festeyos del Ayuntamientu d’Uviéu.

Con un soníu bien encadarmáu y la voz de Ramón Blanco lluciendo poderosu el so inesplotáu potencial pa interpretar tonada, Los Berrones arrancaron la so actuación con puntualidá y bones maneres, dando-y fuerte a un tambor secundáu dende les primeres files por un garrapiellu d’incondicionales de Tolivia que, garabatu y pancarta en mano, dieron-y calor al conciertu d’entamu a fin y recordaron cuál foi la base social primixenia del grupu.

Pa cuando sonó’l primer gran ésitu de los primeros álbumes de la banda -los más populares-, ‘Chacho’, columnes de públicu siguíen aportando a Poniente procedentes del centru urbanu. Nunca nun se viera na playa xixonesa multitú tala dende’l conciertu que Manu Chao ufrió en setiembre’l 2001 en conmemoración del Día d’Asturies, pero la gratuidá del espectáculu fizo que l’asistencia masiva nun equivaliera a desatada llocura collectiva.

Eso, y la heteroxeneidá’l públicu, porque ellí había de too: Paisanos d’avanzada edá cellebrando les presentaciones de Tante Blanco, families de tres xeneraciones improvisando ‘congas’ n’espaciu reducíu, quinceañeros gratamente sorprendíos, ‘punkies’ de cresta crecío y ‘neopunkies’ capaces de siguir los temes de los de Tolivia a ritmu de ‘pogo’. Y una mayoría discreta, claro.

Solventes na execución y apoyaos na batería y les primeres guitarres por músicos de gran altor técnicu, Los Berrones nun se recataron al dedica-y una canción al “señor hijo de puta presidente Bush”, parodiaron a Paul McCartney na presentación d’otru tema -lléase con acentu británicu: “esta no es la primera vez que la tocamos”- y acabaron confesando que diben “facer algo serio, a ver si nos contraten n’Uviéu”.

Antes d’esto cabero, llegara’l puntu culminante’l conciertu cola sucesión de ‘La de Sindo el cabreru’ y el más que popular ‘Nun yes tú’. Gran siguimientu popular y coru masivu. Nun foi tan cellebráu un amiestu de varios temes del primer discu de la banda -‘La del borrín’, ‘Pasamos del porru’, ‘Tiénesme apolmonáu’- y hebio qu’esperar al final pa que ‘La de les vacaciones’, interludiu ‘samberu’ incluyíu, prendiera otra vuelta l’ánimu del personal con alusiones al futbolista xixonés Luis Enrique, por aquello de ‘Tengo que dir a catar/Qatar’.

A lo cabero, llanzamientu de bollos preñaos dende l’escenariu y escanciáu de culinos, demostración de cómo una madreña pue emplegase na manzorga pa tocar la guitarra y toos contentos. Y un discu llistu pa ser mezcláu y editáu, claro, depués de dos hores y cuartu de conciertu y más de venti temes interpretaos.

Los Berrones prevén aconceyar a miles de persones na grabación del so primer discu en directu

La música aporta a los cursos de veranu de L’Academia de la Llingua. El grupu Tuenda y un garrapiellu de músicos convidaos ufren esta nueche na sala Fénix de Santantolín d’Ibias, llocalidá onde la entidá académica desencolca hasta’l vienres la so ufierta formativa veraniega, un conciertu entamáu pola Xunta pola Defensa de la Llingua Asturiana.

El recital comenzará a les 22 hores y quier sorrayar la iniciativa estival de L’Academia, qu’esti añu aconceya na Escuela-hogar de Santantolín a más de 150 alumnos interesaos n’acceder o afondar en conocimientos llingüísticos y culturales sobro Asturies.

Con ocasión del conciertu, cuyos organizadores conciben como una folixa abierta a los profesores y estudiantes de los cursos, la Xunta allugará una mesa informativa con cartafueyos y otros materiales editaos pola propia entidá de defensa llingüística y pol Conceyu Abiertu pola Oficialidá.

Delles cámares fixes, un ‘travelling’ enfrente l’escenariu, dos cámares de siguimientu n’escena y una más en grúa, cordinaes nuna xunidá móvil de realización. D’esi soporte técnicu saldrán les imáxenes del dvd que Los Berrones editarán a partir del conciertu qu’esta nueche ufren en Xixón, nel que la banda de Tolivia prevé aconceyar a miles de siguidores y llama a “armala mui gorda”.

Nesos elocuentes términos se pronuncia’l baxista del grupu, Olegario Méndez, na páxina web oficial de la banda, onde precisa que’l repertoriu de güei viaxará de los temes más antiguos a los d’edición más reciente y va incluyir amás canciones non habituales nel directu del grupu y “dalguna sorpresa”.

Del recital qu’esta nueche entamará a les 23 hores na playa de Poniente, dientro’l programa festivu de la Selmana Grande xixonesa, saldrá un doble discu recopilatoriu que Los Berrones esperen sacar a la venta na seronda prósima y cuya grabación d’audio tará a cargu de Daniel Sevillano, ún de los principales productores de rock n’Asturies.

Según precisa la casa discográfica del grupu de Tolivia, Santo Grial, la empresa encargada de rexistrar el conciertu en video ye Emedia-PTI, ellaboradora del dvd del 20 aniversariu de Ilegales, grabaciones nel festival Derrame Rock y videoclips de los grupos Jacky Trap y Fe de Ratas, amás de los propios Berrones.

Autores de ‘Nun yes tú’, el primer gran ésitu del pop-rock en llingua asturiana, y pioneros na difusión d’un peculiar soníu col asturianu como base, Los Berrones saltaron a la fama en 1988 depués de quedar finalistes nel concursu de maquetes de Radio Asturias correspondiente a esi añu, y en 1989 asoleyaron el so primer discu, ‘Voi dicítelo’. El grupu de Tolivia acumula hasta agora seis trabayos de llarga duración, l’últimu d’ellos ‘República Independiente de Tolivia’, editáu a finales de 2003.

Adelantu n’Asturnews de la noticia de la grabación del directu