Música

Los cinco finalistes del concursu de maquetes entamáu pola cadena 40 Principales y l’Institutu Asturianu de la Mocedá van decidir la so eleminatoria el prósimu domingu 3 nun conciertu que va celebrase nel recintu del festival Derrame Rock en Pravia. El xuráu del certame decidió seleccionar como finalistes a los grupos Stro y Mysterio de Xixón, Dogfight d’Uviéu, Pez Payaso de Mieres y Hermitaños del Río de Cangas del Narcea.

El xuráu del concursu de maquetes formábenlu Alberto Toyos y Miguel Angel García- 40 Principales Asturias -, Yolanda Lobo -Productora Musical – y Paula Súarez Fdez- Periodista, embaxo la presidencia de la Directora del Institutu Asturianu de la Mocedá. Los ganadores de la eliminatoria que va entamase el prósimu domingu dientro’l Derrame Rock de Pravia tienen como premiu la grabación d’un CD y una minixira de promoción del so trabayu.

El concursu de maquetes del Principáu ye un de los más clásicos d’Asturies y ta empobináu a solistes o grupos de pop-rock de xente mozo hasta los 35 años y que nunca grabaran enantes nengún discu. La cadena de radiofórmula 40 Principales y l’Institutu Asturianu de la Mocedá son los responsables de la convocatoria d’esti certame pa grupos noveles.

El I Congresu Internacional de la Gaita escomienza esti viernes 24 nel Muséu de la Sidra de Nava y va valir a lo llargo de dos díes como puntu d’alcuentru de gaiteros y especialistes del país y d’otros países como Galicia, Bretaña ya Irlanda. Nél amás del debate de les ponencies del congresu y de les respectives meses redondes, va haber amueses práctiques y en vivo de música tradicional, nes que la gaita va ser l’instrumentu protagonista. La Banda de Gaites “La Raitana” de Nava, que dirixe Flavio de Benito, ye la organizadora d’esti congresu.

La primer xornada del alcuentu va debatir na tarde d’esti viernes 24, dende les 17.00 hores, alrodiu del presente y el futuru de les bandes de gaites d’Asturies y alrodiu de los concursos destinao a esti tipu d’agrupaciones musicales. Nesti primer debate, moderáu pol director del Muséu de la Gaita de Xixón, Alfonso Fernández van intervenir Flavio Rodríguez Benito; Cándido García, director de la Banda de Gaitas Zuncurrundullo de Galicia; Luis Carlos Vecino, espertu n’actividaes turísticu-culturales; Michael Murphy, director de la banda irlandesa Carrigaline Pipe Band; y un representante de la bretona Bagad de la Kevreen-Arlé.

A les 19.30 nel mesmu Muséu la Sidra, va haber una amuesa de gaiteros mayores cola participación de los maestros Luis Montes, Eduardo “El Gaiteru Miyares” y Pepe “El Gaiteru Veriña”. Pela nueche, a les 22.00 hores na Plaza de Manuel Uría entama una nueche folk coles actuaciones del irlandés Michael Murphy, la Banda de Gaites La Raitana, la banda gallega Zuncurrundullo, la Bagad Kevreen-Arlé, La Bandina y Felpeyu.

El sábadu 25 a les 10 de la mañana sigue’l congresu internacional cola presentación y debate de ponencies de los músicos Santi Caleya, Manuel Cordero, Manuel Durán, Gustavo Eguren, Alberto Fernández, Pedro Pangua, Martín Poladura, José Manuel Tejedor, Javier Tejedor, Xuan Rodríguez y Flavio Rodríguez. Pela tarde les bandes de gaites participantes nestes xornaes desfilen peles cais de Nava y a les 20.15 na Plaza Manuel Uría ufierten un conciertu nel “Memorial Jairo García Iglesias”.

El cantante Toli Morilla lleva esta tarde al Teatru Campoamor d’Uviéu el so espectáculu “Nueche d’insomniu”, una celebración íntima coles voces de la poesía asturiana contemporánea y la música del rockeru piloñetu, que tien algamao una acoyida unánime d’ésitu en toles sos representaciones anteriores. Va ser tamién la primer vez na que la voz del poeta Mánfer de la Llera nun se sume en vivo a les de los otros autores participantes nel espectáculu. En recordanza y homenaxe al poeta de la mina la so voz sí va tar presente nuna grabación que va sonar nel so recuerdu nel escenariu del Campoamor.

Después de les sos representaciones en Xixón, Avilés y Llangréu, l’espectáculu “Nueche d’insomniu” de Toli Morilla tien esta tarde a les 20.30 la so cita col públicu uvieín nel Teatru Campoamor. Morilla pon voz y música a un garrapiellu de poemes d’otros tantos autores contemporáneos en llingua asturiana mientres una narrador va filvanando les solombres y les lluces de la so particular nueche d’insomniu. Poemes de Taresa Lorences, Xulio Vixil, Lourdes Álvarez, Mánfer de la Llera y otros nomes de la nuestra lliteratura algamen nel pulsu y la emocionada voz del cantautor piloñetu una intensidá que tien llegao al corazón del públicu en toles sos anteriores actuaciones. L’espectáculu, dirixíu y empobináu na so parte artística, pol actor Luis Lobato, va tener nesta ocasión una alcordanza especial al que foi ún de los sos más enfotaos integrantes, el poeta Mánfer de la Llera, que va tar presente nuna grabación del poema que da títulu al espectáculu y al discu homónimu de Toli Morilla: “Nueche d’insomniu”. Una nueche nel Campoamor na que s’esperen inda más sorpreses por descubrir ente la velea y l’insomniu d’ún de los montaxe más prestosos de la escena musical asturiana recién.

El conservatoriu municipal de música “Julián Orbón” d’Avilés cumple esti añu venticinco d’esistencia y con nuevos planes de futuru. Esti miércoles 21 la Casa Cultura de la villa fue escenariu d’un conciertu de conmemoranza del aniversariu nel que la orquesta del conservatoriu estrenó una obra del compositor asturianu Juan Carlos Casimiro. Ente los nuevos planes del centru municipal ta el d’entamar un cursu de postgrau d’interpretación musical en colaboración cola Universidá d’Uviéu.

El cursu de postgrau tien previsto escomenzar esti añu n’Avilés y amás de la colaboración cola institución académica asturiana, el conservatoriu municipal va cuntar col apoyu de la Orquesta Sinfónica del Principáu d’Asturies (OSPA). Dende la so fundación en 1980 esti centru docente d’estudios musicales tien desarrollao un importante llabor y ye dende l’añu 2000 conservatoriu de grau mediu y elemental. Ente los sos profesores cuéntense músicos de la OSPA y de “Los Virtuosos de Moscú”. Una de les sos actividaes más destacaes ye la celebración añal de la Selmana de Música Relixosa d’Avilés, coincidiendo cola Selmana Santa. Anguaño el centru imparte enseñanza a unos 244 alumnos y ente les sos aspiraciones ta la d’ampliar la so sé pa dar acoyida a les sos actividaes docentes nun espaciu más afayaízu.

L’auditoriu del Parque Xovellanos de Mieres acueye esti martes 21 a les 20.00 hores una gala d’homenaxe al míticu cantador Juanín. El que fuera la voz más representativa y estimada de la xeneración de los clásicos de la canción asturiana va recibir l’alcordanza de dalgunos de los intérpretes actuales de tonada na so villa natal nun actu públicu nel que la xente de Mieres quier remembrar al Almirante en plena celebración de les sos tradicionales fiestes de San Xuan.

Los cantadores José Manuel Collado, Jorge Tuya, Mª del Rosario González, José Manuel Robledo y María Sánchez (La Pastorina del Cares), van xuntase nel escenariu del auditoriu del Parque Xovellanos a participar nel homenaxe a Juanín de Mieres. Xunta ellos, acompañándolos, el gaiteru Óscar Fernandez. L’Ochote La Unión, dirixíu por Juan Rionda, grupos de baile tradicional y la Banda de Gaites Villa de Mieres van tar tamién nesta gala de recordanza al mitu de la canción asturiana.

Les fiestes de San Xuan de Mieres, unes de les más tradicionales y populares d’Asturies, ufierten esti añu un programa bien diversu y bayurosu n’actividaes. Amás de la imprescindible cita cola foguera y la danza prima na nueche del 23, y de los conciertos de Jarabe de Palo, esti viernes 17 y de Carmén París, el sábadu 18,la villa del Camín acueye nes mesmes feches entrambos eventos dedicaos a la música electrónico y a la cultura hip-hop.

El II Festival de Graffiti, Hip Hop y Breakdance “Mina d’Ases” celébrase esti viernes 17 y el sábadu 18 nel recintu del grupu escolar Aniceto Sala. Grafiteros, pinchas, músicos y breakdanzarines de tol estáu xunténse en Mieres en dos díes de sesiones intenses dedicaes a les espresiones más vives d’esta cultura que tien calao abondo na mocedá urbano de les cuenques. La nómina de grafiteros fórmenla:Poli 124, Kraser, Ocean (Cartagena)Mosh, Wue, Etor (Kritical Worx Cru. Uviéu), Boa Mistura (Madrid), Pastron 7, Desfase (Madrid), Mot, Dam, Onak (Karton Networkers. Lugones)Palos, 777, Ki2, Kans (Mieres),Sufre, Star2, Birtone, Warlock (Arrea 51. Uviéu y XiXón), Zudi, Sacke, Romwel, Hek (Barcelona),Wip, Cetl22 (Canarias), Logan, Sil (Sevilla), Taem54, Wep, Smol, BRK192, Chema (Madrid),Ruso y cerdos (Jaen) y Sex (Granada).

Ente los músicos y cantantes de Hip Hop van tar CTS, Modus Vivendi, Johny De la Fuente, La Perdición, Son de Rima, Hip-O´Thesis, Rap por decreto, Milan City, Doce por Ciento, Al pie de la letra, 13 Palabras, Logic, Null Handicap (Asturies); Frodo, Rodas y Camaleón, Antonio Martillo y Sanfrutos Dos Santos (Madrid); Deza 7ma Raza (Venezuela) y Del Kaukaso(Jaen). Nel apartáu de Dj’s participen en “Mina d’Ases”: Frodo, Smol Noize, Gunter, Nesto Rock.

La plaza del Requexu va acoyer al empar, los mesmos díes, el festival de música electrónico Requexu Sounds, cola participación de pinchas como Helios Amor (Koniek),Playmobil a.k.a. djvoo, Karman, Alonso Varela, Dark la eMe y Dj Terente.

La organización del Crossroad Festival va colaborar cola asociación d’ayuda al refuxáu y al inmigrante ACCEM-España dientro’l proyectu Altravesando Fronteres. La presentación del macroconciertu y de la so colaboración con ACCEM va facese esti xueves 16 nel Círculu de Belles Artes de Madrid, coincidiendo cola data del Día Mundial del Refuxáu. El proyectu Altravesando Fronteres ye una de les actividaes programaes pa esta tercera edición del festival xixonés y quier ser un espaciu onde música y solidaridá se fundan pa remembrar que ye posible un mundu ensin llendes.

La presentación en Madrid de l’andecha ente’l Crossroad y l’asociación d’acoyida al inmigrante y refuxáu, ACCEM, va cuntar cola presencia de los actores Malena Alterio, Alejandro Botto y Ernesto Arango,y nella van intervenir la directora xeneral de la ONG Julia Fernández Quintanilla y el responsable del festival Kike Louie.El prósimu llunes va facese la presentación d’esti proyectu na Fundación de Servicios Sociales de Xixón.

El director del festival, Kike Louie y el responsable de producción, Suso Valeiras, van aprovechar la presentación en Madrid pa dar a conocer a los medios de comunicación del estáu les principales característiques d’esta nueva edición, encabezada por artistes como Little Richard, Willy DeVille, El Vez

, Los Lobos o Presidents of the USA. El festival celébrase del 21 al 24 de xunetu nos Campos de la Universidá Llaboral de Xixón.

El proyectu nel que colabora el Crossroad con ACCEM: ‘Altravesando Fronteres’ ye una actividá de sensibilización social sobre’l mundu de los refuxaos y los inmigrantes que van tener presencia virtual nel recintu del macroconciertu nuna carpa de 300 m2 onde se recrea’l viaxe de la migración y la fuxida del persiguíu. Va ser un viaxe amosáu al través d’esposiciones, fotografía, proyecciones de cortometraxes y montaxes interactivos. ‘Altravesando Fronteres’ está promovío por Accem, que cuenta cola colaboración y el sofitu d’otres entidaes como la Dirección Xeneral d’Integración de los Inmigrantes, ACNUR, Médicos sin Fronteras, UXT- Asturies y la conceyalía de Servicios Sociales del Ayuntamientu de Xixón.

Crossroad Festival de Xixón

La organización de la Selmana Negra de Xixón fizo públicu’l cartelu de los conciertos de baldre que van animar les nueches nel escenariu central del eventu. En total van ser nueve actuaciones con una ufierta de xéneros y estilos musicales bien diversa, apta pa toa clase de públicos. Los españoles Sexy Sadie, la fanfarria xitano-rumana Ciocarla o la cantadora asturiana Annabel Santiago son dellos de los nomes del cartelu.

La serie de conciertos va abrila el viernes 8 de xunetu la Big Band Jazz Terrassa, dirixida por John Dubuclet, un músicu que tocó con Duke Ellington, Tito Puente y Michel Camilo. El sábadu 9 ye la cantautora madrilana Olga Román, segunda voz de Sabina nos sos directos, la que va tar nel escenariu central. Los australianos Royal Crown Revue actúen el domingu 10 y el llunes 11 ye’l turnu d’Annabel Santiago, cola so banda actual, l’Asturiana Mining Company de Michael Lee Wolfe.

Charmaine Neville, un cuartetu de Nueva Orleans, lideráu pola fía d’Art Neville tien la so cita el martes 12 de xunetu y la nueche siguiente, el 13 va ser la oportunidá de ver n’acción a la Fanfarria Ciocarla, un combu de xitanos rumanos que mecigayen estilos y ritmos del folklor zíngaru al jazz, pasando pola música de cabaret. Otros xitanos, estos d’estrarradiu ibéricu: “La excepción” son los encargaos de llevar los sos requiebros hip-hop na nueche del xueves 14. Van cerrar los conciertos Muchachito na nueche del viernes y el sábadu 16 Sexy Sadie.

Los americanos Texas Terri Bomb, una de les bandes más fresques y esplosives del rock con raigaños nel espíritu del punk y el garaxe de finales de los setenta, train la so xira europea ‘Dirty Action 2005’ hasta Xixón. La cita ye a les 21.30 na sala Stone Park nun conciertu nel que van acompañar a los d’Austin los tamién americanos The Mansons, una banda ecléctica ú les hubiere que beben en diverses fontes:garaxe, rockabilly, country rock.

Texas Terri Bomb tán per Europa na xira promocional del so últimu discu “Your lips…my ass”,producíu por Jack Douglas (Aerosmith, John Lennon, Cheap Trick, Alice Cooper Patti Smith) y nel que colaboren, ente otros Wayne Kramer (MC5), Marc Diamond (Dwarves/Motochrist), Dave Teague (Dickies) y Ryan Roxie (Alice Cooper).

TEXAS TERRI BOMB

ye puru rock del 77. La formación punk escomenzó en Austin (Texas) pero bien lluego treslladóse a Hollywood. Xiraron pelos Estados Uníos y Europa en múltiples ocasiones, y les sos canciones apaecen en diverses películes. La credibilidá del grupu ente los aficionados álzalu a lo que podía ser una lleenda de la escena underground internacional. La voz de Texas Terri ye duce, pero ella tien amás la dureza propio del punk rock. Ta comparada con artistes como Iggy Pop, Mick Jagger o Steven Tyler.

The Mansons, los teloneros de Texas Terri, son una banda de garaxe qu’ apuesta por adientrar n’otros estilos, como’l blues, el rockabilly, el punk o mesmo el country. Poques bandes pueden presumir de semeyante variedá y los Masons fáenlo arguyosos. Agora vienen a presentar el so nuevu discu: “Youngblood” y amosanos qu’en directo son un auténticu torbolín.

Un xuráu formáu por especialistes en tonada y profesionales de los medios informativos escoyó esti fin de selmana en Mieres a los que consideren les diez meyores voces de la canción asturiana del últimu añu. Munchos de los nomes coinciden colos de la llista del añu pasáu y son indiscutibles ya ente espertos y aficionaos como una amuesa significativa de que l’asturianada ta viviendo anguaño la so segunda edá d’oru. Los cantadores escoyíos van actuar xuntos en Mieres en Setiembre nuna cita cola tonada que va tener un añu más cartelu de luxu.

La canción asturiana vive un momentu únicu anguaño en cuantes calidá y personalidá de les sos voces más significatives. Cantadores de diverses xeneraciones, ente les que vienen pisando fuerte les más moces, conviven anguaño nel panorama musical asturianu y tenten amosar col so trabayu nos escenarios o estampáu en discos, que la tonada ye un xéneru vivu y con toles cartes pa siguir siéndolo nun futuru si a la calidá de los artistes se-y xunta un marcu de promoción y apoyu necesarios pa que l’asturianada tenga un sitiu importante ente les músiques del sieglu XXI. Esi ye’l sentimientu xeneralizáu ente especialistes y aficionaos al xéneru musical asturianu por escelencia. Un comité de venticinco persones, espertos en tonada y profesionales de los medios de comunicación, aconceyóse en Mieres pa ellaborar la so llista de les diez meyores voces del añu.

Pa los especialistes reuníos en Mieres el top de los cantadores con más calidá del añu lleva los nomes de Liliana Castañón, José Manuel Collado, Mari Luz Cristóbal Caunedo, El Che de Cabaños, Rosario González, Urbano Prieto, Annabel Santiago, Rogelio Suárez, Ismael Tomás y Jorge Tuya. Dellos nomes d’esta llista coinciden colos escoyíos l’añu pasáu y la razón, según manifestaben miembros del xuráu, nun ye otra que la de consideralos nomes imprescindibles en cualaquier nómina de los meyores cantadores actuales.El meyor gaiteru del añu como acompañante de tonada, foi, pal conceyu d’espertos, el maestru Vicente Prado “El Pravianu”.

El xuráu, presidíu pola maestra y mitu viviente de la tonada, Diamantina Rodríguez, formábenlu venticinco miembros, ente ellos el profesor de musicoloxía de la Universidá d’Uviéu José Antonio Gómez, los periodistes José Luis Argüelles y Saúl Fernández de “La Nueva España”, Miguel Fernández de “La Voz de Asturias”, José Caicolla de “El Comercio”, Inaciu Iglesias, editor de “Les Noticies”, Fernando Ornosa de “Asturies.com” y Pablo Antón Marín Estrada de “Asturnews”, ente otros.

L’aconceyamientu d’espertos entamóse dientro les Xornaes d’Estudiu de la Tonada de Mieres y tuvo la so amuesa práctica nel conciertu d’homenaxe a Torner que se celebró nel Parque Xovellanos de la villa del Camín, con participación de la cantadora Annabel Santiago y músicos como Alberto Varillas y Michael Lee Wolfe.