Música

El grupu d’orixe asturianu más nomáu del añu, el Sueño de Morfeo, foi na nuechi del llunes 25 l’atracción cimera de les fiestes de Santiagu en Sama, nun conciertu discretu qu’entamó a les doce la nuechi d’una xornada na que’l chornu foi protagonista.

El grupu foi aplaudíu pela mocedá que siguió dende los primeros compases el conciertu, entamó con “Somos aire”, amuesando dalgunos probemes de soníu, y continuó darréu con “Esta soy yo”. L’apaición nel repertoriu de “Nunca volverá” nel tercer llugar dexó bien a les clares que’l conciertu diba ser comercial y que’l marketing prima nos plantegamientos d’esti grupu que ye exemplu de cómo la industria musical aprovecha cuanto se-y pon por delantre (y muncho más si son composiciones pop afayadices y comerciales como ye’l casu) pa saca-y tol xugu nel menor plazu de tiempu posible.

Los tiempos de Xema queden ya lloñe, anque dacuandu s’agüeyen en presencies cimeres como les de la flauta penrriba inclusu de la voz de la cimera atracción del tríu.

Van Morrison comparte esta nueche escenariu colos asturianos Tejedor na Plaza de Toros de Xixón. L’irlandés vien a presentar el so nuevu discu “Magic Time”, un trabayu nel que vuelve beber de les fontes tradicionales de la música celta ensin perder les sos esencies de cantante de rithm’n’blues. El conciertu ye parte de la xira europea del músicu de Belfast y vien a entamase nel contestu de les actividaes paraleles a los Xuegos Náuticos Intercélticos que se celebren estos díes na villa playa. La presencia nel escenariu, precediento a Morrison, de los avilesinos Tejedor, va añadir un atractivu especial a esta ocasión pa ver nuna mesma nueche a dos propuestes tan estremaes de música con raigañu tradicional y al empar xunìes polos filos comunes de los sones celtes.

Una banda de seis músicos van acompañar al Lleón de Belfast nesti conciertu onde la contención y la elegancia de la puesta n’escena de Morrison nun van dexar de llau la parte más espansiva de los sos temes nuevos y vieyos.

El cantante irlandés preséntase en Xixón col so últimu trabayu discográficu “Magic Time” y una banda compuesta por Matthew Holland, a la trompeta; Martin Winning: saxo y flauta; David Hayes al

baxu; Robert Ruggiero, a les percusiones; John Edwards, a la guitarra; y Mark Jordan, a los teclaos; amás del saxo, la guitarra y l’armónica cola que Van Morrison va interpretar les canciones del so nuevu discu y a repasar los temes clásicos del so repertoriu.

La disposición del aforu na Plaza de Toros, con una parte de sielles n’arena (a 45 euros) y otra nes grades (30 euros), barrunta un conciertu tranquilu nel que se va amosar el Morrison más íntimu y cercanu. Una ocasión única pa contemplar en vivo a esa llienda viva de la música contemporánea, xunta la que nun han sonar estraños los ritmos tradicionales de los teloneros Tejedor, a los que xune al irlandés unos filos comunes al través de los máxicos pasadizos de la música celta.

Tres composiciones del músicu Benito Lauret encargaes especialmente pa la ocasión y escrites pa intepretales una orquesta sinfónica con una gaita como instrumentu solista van estrenase esti miércoles 27 nel Xardín Botánicu de Xixón como conciertu de pieslle de los Cursos Magistralia pa músicos mozos. José Manuel Tejedor ye’l gaiteru escoyíu pa interpretar estes pieces compuestes por Lauret, un músicu vinculáu a Asturies de cuantayá desque dirixó nos sos primeros tiempos a la OSPA.

El títulu de les obres de Benito Lauret ye “Tres melodíes asturianes” y na segunda parte del conciertu los alumnos de los cursos van interpretar tamién “El carnaval de los animales” de Camille Saint-Saënsobra, una obra a la que se-y amesta un testo encargáu por Magistralia al monologuista Luis Piedrahita y que va ser narráu por Emilio Aragón, y el “Ballet Parade” de Eric Satie. La orquesta va tar dirixida pol profesor d’orquesta de los cursos y asesor musical de Magistralia Joaquín Valdeón.

Los cursos d’orquesta Magistralia lleven celebrándose dende 2000 en XiXón embaxo’l patrociniu del Ayuntamientu de XiXón, el Principáu y el Banco herrero. Esta actividá de la Fundación Magistralia tá considerada como la iniciativa educativa más importante que se desarrolla a nivel estatal. Xunto al trabayu d’ orquesta, los alumnos y alumnes de Magistralia 2005 realicen un intensu trabayu de cámara que medró esti añu cola introducción d’ la especialidá de gaita, adelantrándose así Magistralia al anunciu de la presencia de la gaita nos planes d’estudiu de los conservatorios de la nuestra comunidá.

Nos cursos Magistralia 2005 participen 80 xóvenes instrumentistes, d’entee 12 y 20 años, procedentes de tol estáu.

El Crossroad Festival echó andar ayer colos radiales calientes y con sabor a vieyu xenuínu rock’n’roll de los barceloneses King Wolf & The Hound Dogs. Un bon empiezu pa preparar la salida al escenariu de la estrella de la nueche Willie DeVille nuna primer xornada del macro xixonés que tuvo menos públicu del esperáu. L’americanu nun defraudó a los dos mil o tres mil amigos de los sones auténticos que lu esperaben y dende la so entrada ente les solombres, como si realmente pasara per ellí y el so primer saludu col sombreru al respetable, derrochó a lo llargo d’una intensa actuación elegancia y sobriedá a mamplén. Un soníu curiáu hasta l’últimu decibeliu y una interpretación impecable robraron el pasu de la primer estrella del festival qu’al pesar de la so xenerosidá nes tables cásique supo a poco.

Con un daqué de retrasu sobre l’horariu previstu el Crossroad Festival echó a rodar con una de les meyores bandes de rock’n’roll del panorama barcelonés, King Wolf & The Hound Dogs, que dende les sos primeres canciones supieron atraer alrodiu l’escenariu central del recintu de Cabueñes al públicu que s’esperdigaba peles barres de bar con una cerveza, gusmiando pelos tenderetes del mercaín o visitando la carpa solidaria de la ONG ACCEM. Al pesar del papelón de ser los que rompíen el xelu, los catalanes amosaron una complicidá col públicu y una amuesa de bon pañu que se supo agradecer.

La banda de Willie DeVille entró en danza a les once y media, escamplando’l terrén pa l’aparición de la estrella con una introducción suxerente y de resonancies limpies na que paecía condensase lo que diba ser la sesión posterior col home del sombreru negru. DeVille sumóse a la banda como una solombra más, ensin estridencies, afayándose al llau del contrabaxista y enllenando de sópitu l’escenariu cola so presencia sobria, serena: l’home de negru que paecía venir d’una fiesta

con señes de dobletazu y perdispuestu a entamar otra fiesta pa los que taben esperándolu como invitáu.

Inda digan lo que digan los eternos aguarones que disfruten dinamitando estrelles, l’americanu amosó a lo llargo de la so actuación que la suya nin ta en declive nin va en picao sinón que sigue llogrando tresmitir en directo, cola mesma sabeduría que nes sos grabaciones n’estudiu, una maxa escura y enllena de recovecos que lleva al qu’entra nel so círculu envolvente a un tiempu nel que la música yera una aventura íntima ente’l bruxu que la invocaba cola so palabra bien midida y el que se dexaba fechizar per ella.

Un empiezu de luxu pa un festival que dende la so primer edición en 2003 vien medrando hasta llegar a la qu’echó a rodar ayer con un cartelu de nivel considerable. Y una vez más énte una ufierta tan atractiva y económicamente asequible (precios de saldu nos abonos y nes entraes por un día en comparanza cola mayoría de los macrofestivales de veranu del restu l’estáu)la sensación tristayosa de comprebar que n’Asturies la xente nun sabe apreciar lo que tien más cerca. El fomentu d’una cultura del “equí too grandono y de baldre” y la babayería énte los esfuerzos de los que son de casa abulten bien calaes nesi nós dispersu que nun algama la categoría de públicu, a la manera na qu’esiste en comunidaes como el País Vascu, Cataluña o Madrid. El datu de qu’alrodiu un 70 por cientu de los abonos del Crossroad Festival apecháronlu xente de fuera d’Asturies da media idea de lo poco qu’equí s’estima lo que se fai dende l’enfotu y el llabor d’unos pocos idealistes de la iniciativa privada n’eventos culturales.

Inda asina los asistentes al conciertu de Willie DeVille, como de xuro los que van poder disfrutar esti viernes de El Vez, Blues Explosion, Blaster, Presidents of The USA; el sábadu de la primer actuación nesti estáu de la reinona madre del rock’n’roll, Little Richard, nel que va ser ún de los sos últimos conciertos posibles n’Europa, y de propina a Los Lobos; la despidida y pieslle del domingu col Elvis mexicanu otra vuelta y los divertidísimos y espíricos Superratones arxentinos, ensin dulda van saber apreciar el trabayu y el riesgu económicu entamáu polos organizadores d’esti festival que se consolida na so tercera edición como’l más importante d’Asturies y con un listón difícil de sobrepasar. Pero de tristes y tristures ta’l mundu enllenu. Que los munchos o pocos que saben apreciar el rock’n’roll de raigaños xenuinos disfruten estos cuatro díes de folixa encesa y si la respuesta a la fin nun ye la esperada, que’l brinde del poeta Manuel Asur: golvamos a entamar valga d’estímulu a los organizadores del festival xixonés pa que l’añu que vien el listón seya más altu. Y d’equí al domingu abonda folixa bona queda.

Willie DeVille abre esta nueche col so rock’n’roll de raigaños mesturaos y la so elegancia estravagante el Crossroad Festival de Xixón. Na primer xornada del festival, como sesión de calentamientu enantes de recibir al músicu americanu nel escenariu van antecedelu King Wolf & de The Hound Dogs y pa rematar la primer nueche, tres los bises de DeVille, van actuar los asturianos Robbie & The Wild Trains, un combu montáu con músicos como Jaime Belaustegui, Rafa Kas y Juan Toraño. Escomiencen asina cuatro díes cargaos ya intensos de puru rock’n’roll.

La organización del Crossroad Festival dio a conocer los preparativos y les instalaciones nes que se va desenvolver l’atopada nes camperes qu’arrodien la Universidá Llaboral de Xixón, un recintu de 30.000 metros cuadraos nel que s’espera recibir a unos quince mil espectadores nos cuatro díes de duración del eventu. Un presupuestu de 800.000 mil euros y el cartelu más ambiciosu de la inda breve hestoria del festival son les cartes coles que los organizadores esperen ver consolidáu un alcuentru colos soníos más xenuinos del rock’n’roll que ya tien fechu el so sitiu ente los macroconciertos de veranu que se celebren en tol estáu.

Dos escenarios nos que se van desplegar 200.000 vatios de lluz y 50.000 de soníu y la presencia de dalgunes de les estrelles más señeres del rock americanu son l’apuesta cola que’l Crossroad quier algamar esti añu el so altor como festival de nivel

internacional. Tres una primera edición que nun cubrió les espectatives puestes polos organizadores nel proyectu, al pesar de la calidá de los artistes en cartelu y una segunda na que se consiguió triplicar el númberu d’asistentes, a la tercera, espérase que seya la vencida. Little Richard, The Blasters, The Blues Explosion, Willie Deville, Los Lobos y Presidents of The Usa y once bandes más ufiertaes a un de los precios más asequibles del panorama estatal de macrofestivales ye l’enfotu col que la organización nagua por llograr el so oxetivu pa siguir faciendo medrar el so proyectu en prósimes ediciones.

Después de dos ediciones entamaes na Plaza de Toros, esti añu el Crossroad Festival afaya una nueva ubicación nes camperes de la Universidá Llaboral, 2.225 metros cuadraos de carpes, un recintu arrodiáu por mediu kilómetru de valles, una zona d’acampada, mercadillu y un espaciu pa la reflexón y la solidaridá: “Altravesando fronteres” tresnáu en colaboración cola ONG d’ayuda a los inmigrantes y refuxaos ACCEM, dos escenarios pa evitar los minutos d’espera ente actuación y actuación, son otros datos que faen ver les dimensiones de la tercera edición del festival. Pa la xente que quiera dir y volver del recintu de Cabueñes ensin mediu de tresporte propiu o dexando’l coche nel garaxe, la empresa EMTUSA tien preparáu un dispositivu especial de llinies d’autobuses hasta la medianueche y darréu con servicios especiales coincidentes col fin de les actuaciones.

Como detalle llamativu de l’acoyida que puede tener el festival la organización desveló qu’ente’l 70 y el 80 por cientu de los abonos vendíos fuéronlo fuera d’Asturies, en llugares tan estremaos como Ceuta, Canaries o Ibiza, amás de les piticiones feches dende fuera l’estáu en países como Francia, Finlandia, Reinu Uníu, Alemaña, México, Arxentina o Estaos Uníos.

Ente los detalles anecdóticos, la solicitud fecha per una de les bandes participantes nel eventu los Stepbrothers de Mari Marikonda que pidieron nel capítulu de desixencies técniques del so contratu la presencia nel cátering de fabada y chorizu a la sidra, añadiendo un rotundu: “si nun hai fabada, nun hai rocking”.

El programa ábrenlu esti xueves 21 de xunetu King Wolfe & de Hound Dogs pa facer boca enantes de que la estrella del primer día salga a escena: Willie Deville y una sesión de pieslle a cargu de los asturianos Robbie and The Wild Trains (Roberto Egocheaga, Rafa Kas, Jaime Belaustegui, Chus Naves y Juan Toraño). El viernes 21 ye’l turnu de El Vez, The Blues Explosion, The Blasters y The Presidents of The USA. Little Richard y Los Lobos caltienen el cartelu del sábadu 22 y el domingu folixa de despidida con dos referencies de luxu del rock latinu: el doblete del Elvis mexicanu y los arxentinos Superratones. En xunto, cuatro díes pa disfrutar de los ritmos más xenuinos del rock’n’roll, el swing, el folklor universal del sieglu XX, qu’inda sigue escalcañando cadriles y sueños en 2005, va facelo en Xixón dende’l 21 al 24 de xunetu na tercera edición del Crossroad más ambiciosu.

Nacho Vegas, acompañáu de la so banda Las Esferas Invisibles, actúa esta nueche nel escenariu del Espigón de Fomentu de Xixón, dientro’l ciclu d’actuaciones de baldre organizaes pola Autoridá Portuaria embaxo’l títulu “A ver la ballena”. La cita ye a les 22.30, la mesma hora na que va salir al escenariu nel recintu del Crossroad en Cabueñes, Willie DeVille, seguramente pa públicos bien distintos. Los siguidores de Vegas van poder ver al músicu xixonés nuna de les poques actuaciones nes que l’azar lu dexa tocar na so ciudá. Los temes del so últimu discu “Desaparezca aquí”(Limbo, 2005) y otres canciones del so repertoriu van sonar esta nueche ente los cais del puertu vieyu de Xixón.

Nacho Vegas actúa dientro’l ciclu “A ver la ballena”, entamáu por unos programadores d’actividaes culturales singulares como ye l’Autoridá Portuaria de Xixón, qu’organiza esti ciclu de veranu por segunda ocasión. Teatru y música en vivu son les ufiertes d’esta edición que se vien celebrando dende principios de xunetu. Mañana va ser el locutor Jesús Ordovás el que tea nel escenariu de Fomento realizando en directu el so programa “Diario Pop”. Los prósimos n’actuar a lo llargo d’esti mes y d’agostu nel apartáu musical van ser Chico y Chica, Astrud, Maga, Souvenir y Vacaciones. Darréu coincidiendo cola celebración del festival Euroyeyé, Giant Sand, una banda participante nesti eventu va tar tamién tocando nel Espigón.

El IX Festival Intercélticu d’Avilés quier ser el que consolide esta atopada cultural de los finisterres atlánticos. Alrodiu de mil participantes, ente artistes y deportistes, ciento venticuatro actividaes programaes, una docena de bandes y conxuntos de danza de Galicia, Bretaña, Irlanda, Gales y Escocia, trece bandes de gaites asturianes y siete grupos folk del país, cantantes de tonada, gaiteros, monologuistes, son delles de les ufiertes d’un cartelu encabezáu pol gaiteru Carlos Nuñez nesta edición dedicada a Galicia. La fiesta escomienza esti vienres 22 y va convertir Avilés na capital del mundu celta a lo llargo de diez díes nel festival folk más importante del calandariu asturianu.

L’asociación Esbardu, organizadora del festival presentó ayer oficialmente’l programa de la novena edición de l’atopada, una folixa cola que quieren despertar el corazón de la ciudá d’Avilés pa que les sos cais vibren col pasu de músicos, danzarinos, cómicos nuna gran parada que va durar prácticamente los diez díes del festival. En total ciento venti cuatro actos programaos pa la edición na que’l festival avilesín va consolidase como referencia indispensable de les atopaes intercéltiques.

Una esposición sobre arte prerrománicu, otra sobre la casería asturiana y l’amuesa “Galicia en suaños” van poder contemplase mientres la celebración del festival, nel qu’amás de les actuaciones musicales y de grupos de baile, van entamase eshibiciones de deportes y xuegos tradicionales, teatru, monólogos, un concursu d’escanciadores de sidra y una degustación de gastronomía gallega.

El programa de la IX edición del Festival Intercélticu d’Avilés escomienza’l prósimu vienres 22 de xunetu con diverses

actividaes como’l concursu d’escanciadores y xuegos tradicionales. Na parte musical, a les 19.15 hai un homenaxe al cincuentenariu de Torner por parte del cuartetu del mesmu nome. A les 20.00 actúen en diversos sitios de la villa Jiggy Thistles, la City of Newcastle Pipe Band (Escocia), Esmerald Revellers (Irlanda), la banda Sant-Ewan Bubri y D. Ar Vro Pourlet (Bretaña). A les 20.30 estes bandes de gaites van actuar na plaza Carlos Lobo y pela nueche a les 23.00 nel mesmu llugar entama un homenaxe a los gaiteros asturianos cola presencia del Gaiteru Veriña, Mari Luz Cristobal Caunedo, Ciquitrinos y Xera.

A lo llargo de los díes siguientes y hasta’l domingu 31 de xunetu pelos escenarios del festival van pasar grupos como Felpeyu, los gallegos Carlos Nuñez, Avalón, Fia na roca, los galeses Mabon, los asturianos d’Arxentina Fardaxu y Folixa o Xuacu Amieva. Una edición cola que l’Intercélticu d’Avilés busca les sos propies señes d’identidá como festival multicultural de los paises atlánticos y nel que va afitase como l’atopada de música y cultura tradicional más importante del veranu asturianu.

Más información

Daniel Barenboim, Premiu Príncipe d’Asturies de la Concordia 2002, va dirixir la Orquesta West-Eastern Divan nel “Conciertu pola Paz-Homenaxe a Edward Said”, que se celebrará’l prósimu 31 de xunetu, a les 20,00 hores nel Auditoriu Príncipe Felipe d’Uvieu, y que s’engloba dientro de los actos conmemorativos del XXV Aniversariu de los Premios Príncipe d’Asturies. La Fundación va poner a disposición del públicu entraes de baldre. El programa del conciertu ta compuestu pola Obertura de la Ópera Abu Asan, de Carl Maria von Weber; la Sinfonía Concertante en Mi bemol mayor KV 297b, de Mozart y la Sinfonía nº 1 de Mahler.

Daniel Barenboim (Buenos Aires, 1942) fue galardonáu xunta Edward Said col Premiu Príncipe d’Asturies de la Concordia en 2002 porque, según dicía l’acta del Xuráu, “con independencia de la so destacada proyección artística y intelectual, faen una xenerosa y encomiable tarea a favor de la convivencia y de la paz, simbolizada na collaboración de xóvenes músicos que, superando antagonismos históricos, fomenta’l diálogu y la reflexón”.

La Orquesta West-Eastern Divan, creada en 1999 por iniciativa de Daniel Barenboim y Edward Said, ye un taller pa xóvenes músicos procedentes de diversos países, como Israel, Palestina, Líbano, Siria, Xordania, Exiptu y España. Combina l’estudiu y el perfeccionamientu musical col conocimientu y la mutua comprensión ente pueblos, trescendiendo d’esta manera la dimensión puramente musical pa erixise en foru de diálogu y reflexón, nel que tienen cabida les inquietúes de los xóvenes artistas qu’algún día van participar nel futuru cultural y políticu de los sos respectivos países d’orixe.

El director arxentín Daniel Barenboim va ufiertar un conciertu pola paz y d’homenaxe al escritor palestín Edward Said cola Orquesta West-Eastern Divan nel Auditoriu d’Uviéu. La nueche del prósimu 31 de xunetu ye la fecha escoyida pa esti conciertu que forma parte de los actos programaos pola Fundación Príncipe d’Asturies pa remembrar el venticincu aniversariu de la creación de los premios que lleven el so nome. Baremboim xunta’l desapaecíu Edward Said recibieron el Príncipe d’Asturies de la Concordia en 2002. Entrambos colaboraron nel proyectu de la Orquesta West-Eastern Divan, un sitiu d’alcuentru pa mozos de diversos países: Israel, Palestina, Siria, Xordania, Exipto, etc., más alló de cualquier llende relixosa o étnica.

El programa del conciertu que va entamase’l 31 de xunetu a les 20.00 hores nel Auditoriu d’Uviéu ta compuestu pola Obertura de la Ópera Abu Asan, de Carl Maria von Weber; la Sinfonía Concertante en Mi bemol mayor KV 297b, de Mozart y la Sinfonía nº 1 de Mahler.

Daniel Barenboim (Bonos Aires, 1942) recibió con Edward Said el Premiu Príncipe d’Asturies de la Concordia en 2002 porque, según recoyó l’acta del xuráu: “con independencia de la so destacada proyección artística ya intelectual, realicen una xenerosa y emponderable xera a favor de la convivencia y de la paz, simbolizada na colaboración de xóvenes músicos que, superando antagonismos históricos, fomenta el diálogu y la reflexón”.

La Orquesta West-Eastern Divan, creada en 1999 por iniciativa de Daniel Barenboim y Edward Said, ye un taller pa músicos procedentes de diversos países, como Israel, Palestina, Líbano, Siria, Xordania, Exipto y España. Combina l’estudiu y el perfeccionamientu musical col conocimientu y la mutua comprensión ente pueblos, trescendiendo d’estamiente la dimensión puramente musical pa erixirse n’alcuentru nel que tienen cabida les inquietúes de los xóvenes artistes que van participar dalgún día nel futuru cultural y políticu de los sos respectivos países d’orixen.

El primer taller dirixéronlu Daniel Barenboim y Edward Said, acompañaos de Yo-Yo Ma, miembros de la Staatskapelle de Berlín, la Filarmónica de Berlín y la Orquesta Sinfónica de Chicago. Tres les dos primeres temporaes en Weimar y la tercera en Chicago, onde Barenboim ye director musical de la Orquesta Sinfónica, el taller del West-Eastern Divan estableció la so sé en Sevilla col apoyu de la Fundación Tres Culturas del Mediterráneo. El West Eastern Divan reún en cada nueva edición a un promediu d’ochenta participantes, artistes en formación elexíos tres un llaboriosu procesu de selección con más de mil audiciones. El taller desarróllase a lo llargo de varies selmanes, col oxetivu final d’interpretar públicamente dellos conciertos, como los que ya se celebraron enantes n’Estaos Uníos, España y Alemania (2002), Reinu Uníu, Francia, Alemania y Marruecos (2003) y España, Reinu Uníu y Suiza (2004).

El sellu astur-madrilanu Astro Discos y el portal holandés Youmakemusic.com algamaron un alcuerdu de colaboración pa facilitar de manera recíproca l’accesu a los sos catálogos musicales. Destamiente los álbumes d’Astro van poder distribuíse en toa Europa y al empar el sellu va disponder de manera esclusiva de la distribución del catálogu del portal holandés en tol estáu.

En virtú del alcuerdu, tol catálogu d’Astro va tar a la venta en soporte tradicional y MP3 en toa Europa.Recíprocamente, una selección de títulos de varios sellos europeos representaos por You Make Music van tar a la venta de forma esclusiva en www.astrodiscos.com pa España y América. L’alcuerdu va valir pa traer al públicu español trabayos de bandes como This Beautiful Mess, Brown Feather Sparrow, The Spirit That Guide Us o At The Close Of Every Day.

Al empar, Astro aprovecha l’alcuerdu con You Make Music pa importar el EP If You Spoke To Me y las ediciones en CD y vinilo azul de 10” de Zalig zijn de armen van geest, primer llargu del grupu, que ya tán disponibles al través del sellu astur-madrilanu. Les dos primeres muestres del pop neblinosu de Minco Eggersman y Axel Kabboord, xunto a The Sylja Symphony, segundu llargu del grupu, qu’Astro ya editara el pasáu inviernu, son otros de los álbumes que van distribuíse gracies a esti alcuerdu.