Música

Esti sábadu 3 de septiembre, a les ocho y media la tarde, el grupu astur-arxentín ‘Enfadados’ va ofrecer un conciertu na Fnac de Parque Principáu nel que va presentar les sos novedoses composiciones en formatu power-pop.

El grupu ta formáu por Pablo Lato (baxu y composición principal) y Emilio Gutierrez (a los teclaos), que l’añu pasáu decidieron xuntase cola idea de facer una serie de canciones en formatu power-pop, que contaren histories urbanes y personales. Nesti tiempu que lleven tocando xuntos, tienen compuestes unes trenta canciones de cara a la preparación d’un futuru primer discu.

‘Enfadados’ va poco qu’acaba de terminar una minixira per Asturies, que culminó’l pasáu 31 de xunetu en Xixón con una actuación na que tocaron xunto a ‘Super Ratones’.

Anabel Santiago y el grupu Xera son la representación asturiana nel prósimu XXI Festival Internacional de Música Folk de Getxo. La cantante xixonesa y los trubiecos van compartir escenariu en Las Arenas (Bizcaia) con músicos como l’hindú Malkit Singh, la irlandesa Sharon Shanon o la Boban Markovic Orkestar.

Anabel Santiago actúa esti xueves 1, acompañada de l’Asturiana Mining Company. Xera, pel so llau, va tener la ocasión de dar a conocer el so repertoriu al públicu vascu el viernes 2.

El Festival de Getxo ye una de les principales atopaes de la música folk del País Vascu y nesta ventiún edición xunta Anabel Santiago, Xera, Sharon Shannon, Malkit Singh, van tar presentes grupos como los británicos Blue Horses, los brasileiros Oldeum o los vascos Oskorri que presenten el so espectáculu Doctor Do Re Mi.

El Festival Internacional de Música Folk de Getxo va celebrase ente los díes 1 al 4 de setiembre en Las Arenas.

Festival Internacional de Música Folk de Getxo

Soto d’Ayer va acoyer un añu más la celebración de la so tradicional Nueche Celta. La cita ye esti sábadu 3 y el cartelu del festival vien encabezáu pola banda irlandesa Lunasa y los asturianos Llan de Cubel. Tarañu y Eskanda completen el programa del festival.

La Nueche Celta de Soto va ufiertar la posibilidá de ver en directo a Lunasa, un de los grupos más interesantes del nuevu folk irlandés y al que nun ye fácil atopar de xira peles nuestres tierres. La veteranía sabia de Llan de Cubel, xunta’l soníu frescu y folixeru de los ayeranos Tarañu y Eskanda, complementen un cartelu que nun va dexar descontentos a toos siguidores de la escena folkie.

Un mercáu celta, deportes tradicionales, talleres de baile y un conciertu didácticu van arrodiar la celebración d’esti festival organizáu pola estaya de Cultura y Mocedá del Conceyu d’Ayer.

Luis y Santiago Auserón van ser los encargaos de sustituir a Enrique Bunbury nel conciertu programáu pa la nueche del rock nes fiestes de San Mateu. Bunbury anunció ayeri la disolución d’’El huracán Ambulante’, la banda cola que lleva tocando nos últimos años, y la cancelación de la xira a partir del 27 d’agosto por causes debíes al cansanciu del artista.

Nel so puestu van actuar los hermanos Auserón col espectáculu basáu nel so últimu discu, ‘Las malas lenguas’. Xunta ellos, el resto de grupos que taben previstos pa la nueche del 12 de setiembre: Babylon Chat, Hotel Blues y Amon Ra.

Nel mes de xunu, los hermanos Auserón entamaron una xira basada nes versiones de los clásicos del rock que recopilen nel so últimu discu, ‘Las malas lenguas’. Trátase de canciones especiales, ‘hits’ de dominiu públicu y temes de cultu, referencies fundamentales na historia de la música popular de la era electrica, dende’l ‘blues’ y los oríxenes del rock&roll, hasta la esperimentación de los 70. Otis, Marvin, Eddie Cochran, Presley, Chuch Berry, Dylan, Neil Young, la Velvet, Bowie, Iggy Pop, Eno y Robert Wyatt estarán representaos, ente otros, xunto colos Kinks, los Beatles y los Rolling Stones. Eso sí, nel so espectáculu, amás de canciones como Love in vain, Hard to handle o Street fightin’ man, nunca falten dalgunos de los temes más conocíos de ‘Radio Futura’, como ‘Escuela de calor’ o ‘Annabel Lee’.

El grupu avilesín ‘Tejedor’ fairá un repasu de los sos diez años d’esistencia nel conciertu que va dar la nueche del Día d’Asturies en Pravia. Xunta los hermanos Jose Manuel, Javier y Eva Tejedor van tocar músicos de la talla del gaiteru Carlos Núñez, Oreka Tx y l’escoces Phil Cunningham.

Pravia celebra les sos fiestes locales ente los díes 2 y 8 de setiembre, axuntando tamien los festeyos propios del Día d’Asturies. A parte de los hermanos Tejedor, Victor Manuel y Ana Belen van tocar el día 7 na plaza del Conde Guadalorce de la villa, con cantantes como Anabel Santigo nel espectáculu homenaxe al compositor asturianu Eduardo Martínez Torner.

Amás de la música, Pravia va ofrecer a los visitantes un mercáu astur, una feria de productos asturianos, representaciones teatrales y el XLIII Descensu del ríu Narcea na so celebración del Día d’Asturies.

La cantante de tonada Anabel Santiago tien previsto participar el prósimu xueves, día 1 de setiembre, nel conciertu de la Terraza del Mundu, el prestixosu Festival Internacional de Folk de Getxo, faciendo una amuesa de les sos últimes canciones. Anabel va compartir cartel con estrelles internacionales de la talla de Boban Markovic, Sharon Shannon, Oskorri y Malkit Singh.

Pero enantes de viaxar a la ciudá vasca, la cantante va actuar esti vienres dientro del cartel del VI Festival de Música Folk + o – Celta de Baíña, acompañada pola Asturiana Mining Company.

Con motivu de les fiestes de San Bartolome de Baíña, mañana va tener llugar esti festival nel que, amás d’Anabel, actuarán otros grupos asturianos, como colos históricos Nuberu, La Bandina y La Col.lá Propinde.

Los xueves musicales programaos na sidrería Tierra Astur de Cualloto van siguir celebrándose nel mes de setiembre. Dalgunos de los grupos más mozos de la escena folk asturiana, y otros artistes de llarga trayectoria, van desfilar pel escenariu de l’antigua Fábrica del Águila, convertida anguañu en llagar-restaurán. Deua Dubra, Rafa Lorenzo, Citriquinos y Hector Braga van facelo’l mes qu’entra, mentes que mañana van tocar les pandereteres de Nerbia.

Los primeros n’actuar, el prósimu 1 de setiembre, son la formación llavianesa Deua Dubra, que van repasar dalgunos de los temes del so discu ‘El soyáu de Mardana’ xunta otres pieces del repertoriu que preparen pal segundu discu.

Rafael Lorenzo ye ún de los cantautores más conocíos del movimientu denomináu ‘Nueu Canciu Astur’. Con una llarga trayectoria tres d’el, el so llabor, podría dicise qu’etnográficu, llevólu a recopilar y editar varies vaqueiraes, como les que recueye nel so últimu trabayu ‘Pabirún-pabirún’, y que va interpretar el xueves 15 de setiembre.

Citriquinos, una de les bandes más heteroxenees del panorama musical asturianu d’anguañu, va ser la siguiente n’actuar, el xueves 22. Mezcles de ritmos d’orixenes estremaos y lletres cargaes d’ironía, faen d’ellos una sorprendente y orixinal formación de la que s’espera’l primer discu.

L’últimu de los conciertos del mes de setiembre cuerre a cargu del bandurrieru Hector Braga, miembru de Llangres. Esti músicu que yá l’añu pasáu sacare’l discu ‘Encoplando. Cantares y sones tradicionales de bandurria asturiana’, recupera nel so repertoriu canciones que taben practicamente olvidaes. El 29 de setiembre fadrá memoria d’elles na sidrería de Cualloto, completando asina’l ciclu de conciertos preparaos pa esti mes.

El grupu uvieín El Sueño de Morfeo inaugura n’Avilés esta nueche a les 22.00 el ciclu de conciertos de baldre de les fiestes de San Agustín. Escomiencen asina una de les folixes más populares del final del calendariu veraniegu n’Asturies.

L’actuación del grupu de pop-folk va celebrase nel parque del Quirinal. como los demás conciertos del programa de San Agustín. Les prósimes cites son esti viernes 26 con Macaco y el sábadu 27, nel Día Grande, de les fiestes, Miguel Bosé que presenta n’Avilés el so últimu discu “Velvetina”.

Cuarenta y seis grupos y artistes asturianos van participar n’Axenda Musical d’Asturies, una iniciativa de la Conseyería de Cultura que va llevar per trenta y cinco conceyos les propuestes creatives del folk, el rock, la canción d’autor y los acordes clásicos del nuestru país. En total tán programaos cien conciertos hasta fin d’añu.

La iniciativa de Cultura presentóse ayer na sé de la Conseyería. El director xeneral de Promoción Cultural y Política Llingüística, Carlos Madera, afirmó que’l proyectu quier “esparder la nuestra música per tola xeografía asturiana” y ufiertar una amuesa significativa de la diversidá d’esti panorama. Madera tamién destacó que ye la primer vez que s’entama un proyectu d’estes característiques nel nuestru país.

El ciclu escomenzó el pasáu 20 d’agostu cola actuación de Xuacu Amieva en Casu y va rematar el prósimu 30 d’avientu con un conciertu de Rosa María Lobo n’Ayer. Toles tendencies y xéneros de la música asturiana actual tán presentes nel ciclu que va cuntar con nomes tan variaos como los de La Bandina’l Tombu, Dixebra, Toli Morilla, Vázquez del Fresno, Chus Pedro, Pipo Prendes, Tejedor, Tina Gutiérrez, Jerónimo Granda, Michael Lee Wolfe, Llan de Cubel o Gueta na Fonte.

Les prósimes actuaciones de l’Axenda Musical d’Asturies van ser el grupu Brecha, el 26 d’agostu; Jerónimo Granda el 27 d’agostu en Gozón y el 29 en Bimenes; y La Bandina’l Tombu, el 27 d’agostu en Cabrales.

Montserrat Caballé nun va da-y vida a Bianca, la fía furtiada del rei Pelayu, nel estrenu en Xixón de la Ópera de Saverio Mercadante que tien al primer monarca asturianu como protagonista. Circunstancies personales de la diva catalana esclúinla a la fin p’actuar nesta obra rescatada del olvidu pol músicu Mariano Rivas.

Los responsables del Teatru Xovellanos, productor del montaxe de “Pelagio” comunicaron que la soprano ucraniana Tatiana Anisimova podía ser la sustituta de la Caballé si prosperen les negociaciones entamaes pa la so participación na ópera del compositor italianu Saverio Mercadante. El tenor Carlos Álvarez sigue siendo l’encargáu de da-y vida a Pelayu y Alejandro Roy a Abdel Aor, gobernador musulmán de Xixón.

La obra “Pelagio”, escaecida dende’l so estrenu en 1880 en Nápoles, va representase nel Teatru Xovellanos el prósimu 9 de setiembre dientro de los actos de conmemoranza de la reapertura del coliséu xixonés.