Música

El grupu astur-arxentín Fardaxu foi ún de los grupos ganadores nel “1st Annual Celtic Music Awards for 2005” que se fai nos EEUU y que ta organizáu por The Celtic MP3s Music Magazine, The Irish & Celtic Podcast y el Brobdingnagian Bards. Fardaxu, que ye l’únicu grupu d’Iberoamerica que calificó pal premiu, comparte’l premiu con grupos d’Australia, EEUU y Irlanda.

Hai un mes, Fardaxu foi tamien elexíu pol Irish & Celtic Music Podcast pa integrar el númberu de marzu del mesmu.

El cantautor Toli Morilla en Xixón y la zanfonista Celia n’Avilés protagonicen les cites musicales d’esti xueves primeru d’abril con un marcáu acentu asturianu. “Nueche d’insomniu” y “Coloradina la guinda” son los sos trabayos más recién, que van aprovechar a repasar nos conciertos d’esta nueche.

El cantautor Toli Morilla presenta dientro del calandariu de conciertos del chigre “El Trisquel” de Xixón los temes del so discu “Nueche d’insomniu”, con un recital previstu pa les 21:30h nel local xixonés de la Cai Marqués de San Esteban.

Per otru lláu, el Centru Municipal d’Arte y Esposiciones d’Avilés “L’Arbolón” presenta esti xueves 6 dende les 20:15h de la tarde la obra de la intérprete de zanfona Celia González, que va tocar los temes del so primer discu “Coloradina la Guinda” que tien a la gaita de rabil como protagonista.

La zanfonista Celia González ye abondo conocida poles sos intervenciones en discos d’Hevia, Nuberu, Muyeres o Ramón Prada y presentó nes vacaciones navidiegues el so primer discu en solitariu, ‘Coloradina la guinda’, nel qu’ufre 18 temes interpretaos con gaita de rabil, la mayoría d’ellos cantaos en llingua asturiana.

El festival derrame rock va xuntar n’Agones (Pravia) a dellos de los grupos más nomaos del rock español, con Celtas Cortos entamando’l viernes 30 de xunu los conciertos y Barricada poniendo-y puntu final el sábado 1 de xunetu. Ente los grupos que s’inclúin nel programa alcuéntrese Def con Dos, SFDK, Dark la Eme, The Locos, Barricada, Sinkope, No apto, delinqüentes, estirpe, Hamlet y Dikers.

El Festival Derrame rock entamará nel Recintu Deportivu d’Agones (Pravia) el 29 de Xunu y finará el día unu de xunetu. Tendrá tres escenarios, el Sol Música, el Santo grial y el Derramidea nos que dirán alternando dellos grupos nomaos del rock d’anguaño, ocupando l’escenariu derrameidea Nadira Indra’l 30 de xunu y Mallory Knox el día 1 de xunetu.

Nel escenariu Sol Música ta previsto qu’actúen el Vienres 30 los Celtas Cortos, Def con Dos, SFDK, Dark la Eme, The Locos, Combolinga y Dogfight. Esi mesmu día, nel escenariu Santo Grial, tamién actuarán Helloween, Banda Bassotti, Habeas Corpus, Segismundo Toxicómano, Saurom, Poncho K y Skama la Rede.

El sábado los conciertos nel escenario Sol Música entamarán con Delinqüentes pa siguir con Hamlet, La Excepción, Huecco, Estirpe, Dikkers y Ermitaños del Río. Nel Santo Grial les actuaciones sedrán les de Barricada, Skalariak, Koma, El último ke cierre, Sinkope, Parabellum y No apto.

Páxina oficial del festival

L’hipódromu de Les Mestes, en Xixón, va a acoyer el 18 de xunu un conciertu de Shakira que nun taba previstu inicialmente na xira que la cantante fadrá por España y qu’entama nel Coliseum d’A Coruña el día 16 y tien de finar el 5 de xunetu en Tenerife. Nesta xira, la cantante colombiana presenta’l so nuevu trabayu “Fijación Oral 2”.

Talamente como se recueye na Wikipedia, Shakira Isabel Mebarak Ripoll ye una cantante y compositora colombiana conocía simplemente como Shakira (que quier dicir “Muyer de Gracia” n’árabe).

Shakira nació en Barranquilla, Colombia, el 2 de febreru de 1977 de pá libanés má colombiana. A los 13 años treslladose a vivir a Bogotá y un año dempués asoleyó’l so primer trabayu Magia, pa la disquera Sony. Tamién actuó na telenovela colombiana El Oasis. L’esitu llego-y col álbum Pies descalzos y el so single «Estoy aquí». Dende entós sacó otra media docena de discos y incluso grabó un unplugged pa la MTV.

La banda gallega de blues blancu Reyes del KO actúen esti xueves 30 en Xixón na estrena d’una nueva sala de conciertos nomada Louie Louie Club y van facelo acompañaos darréu polos asturianos Robbie & the Wild Trains. La entrada pa esti conciertu d’inauguración de la sala xixonesa ye de baldre hasta completar l’aforu.

Reyes del KO teníen previsto actuar esti xueves n’otra sala de la villa playa dientro’l ciclu White Boy Blues. La estrena de la nueva sala de conciertos, propiedá de la empresa organizadora d’esti ciclu y del festival Crossroad, tresllada a esti local, asitiáu na Avenida Torcuato Fernández Miranda, nel antigu espaciu de la sala Stone Park, el conciertu, que va convertise tamién na folixa d’estrena del local. Los Robbie & The Wild Trains de Roberto Egocheaga y Rafa Kas van poner el pieslle gayoleru a la fiesta.

El músicu xixonés Nacho Vegas graba estos díes en Cádiz un discu con Enrique Bunbury que podía tar rematáu nunos meses y llanzáu después del veranu. La producción del trabayu ta a cargu d’otru músicu xixonés de veterana trayectoria, Paco Loco y supón nel casu de Bunbury la so vuelta a la escena, tres el so anunciu d’abandonar temporalmente la música.

El cantante aragonés y Nacho Vegas participaron xuntos va unos meses na xira del primeru titulada “Freakshow” y colaboraron en dellos proyectos artísticos. Ésti va ser el so primer discu grabáu mano a mano.

Arriendes de la grabación del discu con Enrique Bunbury, Nacho Vegas acaba de reeditar nel sellu Limbo Starr el so volúmen de relatos “Política de hechos consumados” y trabaya nun discu de romances asturianos con músicos como’l so hermanu Xabel, Fran Gayo y Mónica Vacas (Mus) y Xel Pereda, ente otros.

Los alemanes Helloween encabecen el cartelu del prósimu festival Derrame Rock que va celebrase n’Agones (Pravia) del 29 de xunu al 1 de xunetu y que nesta ocasión ábrese a otros soníos combativos, amás de los del rock duru. Ente los artistes y bandes que van tar presentes na edición númberu 11 del macofestival Amparanoia, Dark la Eme, Hamlet y Skalariak, ente otros.

Grupos míticos de los ochenta y los noventa como Barricada, Celtas Cortos o Def Con Dos van tocar nel Derrame xunto a otros nomes nada desconocíos ente los aficionaos al hardcore y al rock guerrilleru: Parabellum, Habeas Corpus, Delinqüentes, Ermitaños del Río. Los italianos Banda Bassotti repiten esti añu nel festival de Pravia que va tener el so espaciu reflexivu dedicáu al papel de la muyer na música y a la so llucha pola llibertá a lo llargo del tiempu.

La Tonky Blues Band abre esti xueves en Xixón un ciclu dedicáu a esta música intepretada por artistes blancos y que va traer a la ciudá playa otres dos bandes d’esti xéneru d’equí a mediaos d’abril. Al conxuntu lideráu pol madrilanu Tonky de la Peña van siguilu Ñaco Goñi & Malcolm Scarpa Trío el 7 d’abril y Los Reyes del KO el xueves 13.La empresa LTI, organizadora del Crossroad Festival ye la responsable d’esti ciclu que va desarrollase na Sala Albéniz.

La Tonky Blues Band inaugura esti xueves 23 a les 22.00 hores el ciclu nomáu White Boys Blues. El fundador y alma de la banda, Tonky de la Peña creó esti conxuntu en Madrid a principios de los años 80. De magar la banda madrilana vien colaborando con músicos de blues como Carey Bell, Louisiana Red, Charlie Musselwhite o Albert Collins. La Tonky Blues Band fue tamién la banda que acompañó en delles de les sos xires al guitarrista Mick Taylor -antigu componente de los Bluesbreaker de John Mayall primero y después de los Rolling Stones.

El cantador de tonada José Noriega morrió esti xueves 16 en Xixón a los 85 años por mor d’una llarga enfermedá pulmonar. L’intérprete, natural de la parroquia xixonesa de Caldones, taba consideráu una de les últimes voces vives de la dómina clásica de la canción asturiana y formó pareya artística a lo llargo de casi dos décades col míticu gaiteru José Remis Ovalle.

Noriega actuó xunto a Remís per bona parte de los países americanos siguiendo la estela de los emigrantes y dende mediaos de los años cincuenta fue grabando una serie de discos con diverses compañíes, ente elles Emi y Belter. En 1991 y 1993 recibió entrambos homenaxes del mundu de la música tradicional del país. Debío al so estáu de salú taba retiráu de los escenarios cuantayá.

L’entierru de José Noriega ta previstu pa la tarde d’esti viernes 17 nel cementeriu de la so parroquia natal de Caldones, en Xixón.

El norteamericanu Sid Griffin actúa esti xueves 16 en Xixón, dientro del ciclu de conciertos de la Obra Social y Cultural de Caxastur empobináu a les otres músiques. Nacíu en Kentucky (USA) y cabezaleru de la banda The Long Ryders, Griffin ta consideráu una llienda viva del country de raigañu.

La banda na que militó el músicu americanu bien d’años, The Long Ryders, tienen na hestoria del rock contemporánu la consideranza d’ auténticos padrinos del alt-country, referencia esencial de los ritmos con raigañu tradicional que combinaron colos elementos country y punk nos años 80. Después de la ruptura colos Ryders, Griffin escomenzó actuar solu solitario n’acústico y col so actual grupo The Coal Porters. El so discu Land of hope and Crosby (1994) recibiéronlu les publicaciones especializaes internacionales como un de los mejores discos del añu nel so xéneru.

El conciertu de Xixón ta programáu pa les 20.00 na Colexata de San Xuan Bautista y con entrada llibre.