Música

La Banda de Gaites de Villaviciosa algamó na cabera fase, cellebrada esti domingu, el tercer títulu de meyor banda na Lliga Gallega.La Banda Gaites de Villaviciosa yá ganara nes dos últimes ediciones del certame y nesta ocasión bastó-y con mantener la so ventaxa sobre la segunda banda clasificada, Ledicia de Mos, pa repetir la victoria.

La victoria de la Banda de Gaites de Villaviciosa, nuna final mui reñía, asocede nun momentu nel que la Banda vien denunciando la situación de los sos locales d’ensayu, asitiaos anguaño na planta baxa de les Escueles Graduaes de la Villa, énte la situación d’abandonu y ruina que sofre l’edificiu. Los responsables de la banda vienen esixendo-y al conceyu maliayés que dea solución a estos problemes y énte les igües proponen les escueles d’Amandi. Pola so parte’l teniente alcalde del Ayuntamientu de Villaviciosa, Juan Basilio González, llegó a nomar a los integrantes de la Banda Gaites d’okupes pol usu que vienen faciendo de los locales dende los venti años lleven desenvolviendo la so actividá.

Lourdes Álvarez, Vanessa Gutiérrez, Berta Piñán, Esther Prieto, Taresa Llorences y Berta Piñán son les poetises qu’ufrieron los sos versos pal últimu discu de Joaquín Pixán. Los compositores Jorge Muñiz y Ramón Prada faen los sones qu’acompañarán los poemes interpretaos pola voz del tenor asturianu. El trabayu ensin títulu ye pa Pixán dalgo “imprescindible colo que finar la so actividá dedicando un discu a la música asturiano”
La música compuesta por Jorge Múñiz, compositor de “La marcha nupcial de los Príncipes d’Asturies”, y Ramón Prada, compositor de “La Noche Celta” y “Veinte canciones de amor y un poema desesperado”, ente otres obres cuntaron cola collaboración del gaiteru José Angel Hevia.
El discu, colos poemes de seis de les poetises más destacaes de la lliteratura asturiana interpretaes por Joaquín Pixán, asoleyárase en xineru.

L’autor de “La Capitana” presentará’l so discu “Canciones de Xixón” na mítica llibería xixonesa el día 8 d’agostu a les 20,00 hores. El nuevu discu de Rubiera tien diez cortes de nueva creación asina como dos versiones nueves de “La Capitana” y “La sardinera de Xixón”.
Esti últimu discu de Carlos Rubiera axúntase a una bona colección de trabayos musicales dende que en 1978 publicara “Les campanes de l’aldea”.

Pa más información sobre’l nuevu trabayu de Carlos Rubiera: Carlos Rubiera vuelve a los sos oríxenes con Canciones de Xixón
Carlos Rubiera presenta un nuevu discu con ‘Canciones de Xixón’

El xueves 27 de xunetu’l festival Intercélticu d’Avilés va dedicar el día a Ígor Medio y a Carlos Redondo, fallecíos n’accidente de tráficu la última nueche de San Xuan.
Los actos d’homenaxe fadránse n’Uviéu dende les 18,30 hores. Una representación de los músicos y bandes del festival avilesín entamarán un desfile dende la ilesia de San Xuan el Real hasta la Casa Conceyu, au se-yos fadrá una recepción oficial.
Darréu, 20,00 hores y na plaza de la Catedral, entamará una amuesa de Folclor Atlánticu cola participación de la banda de gaites escocesa “City of New Castle Pipe Band” y la bretona “Kevrenn Brest San Mark”, au tamién actuarán «Scoil Rince Cualan», d’Irlanda; «Jiggy Thistles», d’Escocia; «Dawnswyr Gwerin Pen-y-Fai», de Gales, y «Danserien Ar Vro Breizh», de Bretaña.
Dende les once de la nueche entamará’l primer Festival Intercélticu d’Uviéu onde van tocar los grupos asturianos “DRD”, “Los Gatos del Fornu”, la Banda de Gaites “Xiranda” y “Dulcamara”.

El VII Concursu Folk “Cuartu los

Val.les”entamará’l vienres 28 a les 23,00 coles actuaciones d¡Alberto Jambrina y Pablo Madrid, Cada y Llangrés. El sábadu 28 y dende les 17,00 Alberto Jambrina y Pablo Madrid ufrirán un conciertu didácticu sobre la música y los vezos en Zamora”.
A les 22,00 llegará’l momentu del concursu cola participación de los grupos finalistes que nesta vegada son Aulaga Folk, Extremadura; A Cadeira Coixa, Aragon; Toques do Caramulo, Portugal; KoRRoNTZi, Euskadi y Alvaro Costas & Hot Band.
El xuráu d’esti concursu compónse por dalgunos de los más reconocíos críticos de la escena folk peninsular, tando ente los presentes xente como Iñaki Peña del programa de Radio Nacional de España “Trábede”, Pedro Melguizo del Festival Etnosur de Jaen ente otros.

Dende güei 24 de xunetu’l Grupu de Baille Tradicional San Félix entama una xira d’actuaciones per Italia, Eslovenia y Hungría. Nesti últimu páis va participar nel EUROFOLK de la ciudá de Marcali, na fastera del llagu Balatón. El Grupu de Baille Tradicional San Félix vien desendolcando dende l’añu 1983 el llabor de recuperar los bailles, dances, traxes y cantares de la fastera d’El Cabu Peñes. Llabor que depués amuesa nes sos actuaciones coles que yá percorrieron dellos países europeos. Amás, nel mes d’agostu entama’l II Alcuentru cola Cultura Asturiana pal que va asoleyar el segundu númberu de la revista El Cuirno, que recueye trabayos d’investigación y lliterarios que tienen como nuedu cimeru la fastera de Peñes

L’himnu d’Asturies foi creáu en 1929 por un cubanu, fiu d’un asturianu y una cubana, nomáu Ignacio Rodríguez, quien dende mozu tomó como nome artísticu’l d’Ignacio Piñeiro. Anguaño ta consideráu en Cuba como un de los tres músicos y compositores del país caribeñu. Nelson Fernández, presidente de la sociedá asturiana Círculo Salense de La Habana, nuna entrevista reveló datos d’extraordinariu interés sobro esti acontecimientu que se remonta al año 1929, cuando Ignacio Piñeiro entamó una visita de trabayu a España al frente del “Septeto Nacional Igancio Piñeiro” pa participar col so conxuntu musical na Expo de Sevilla.
Piñeiro aprovechó la ocasión pa tratar de localizar al so padre asturianu quien, dos años enantes, volviere p’Asturies. Nun lu pudo alcontrar porque yá morriere. N’honor al so padre y n’homenaxe a la patria querida, el compositor cubanu creo’l cantar -a ritmo de son- “Asturies, patria querida”, que foi grabada y rexistrada en Madrid esi añu. El cantar foi un son (encuadrada na actual salsa ensin que tenga nada que ver con ella) que los españoles y, específicamente los asturianos escuchaben pero nun sabíen baillar, como pasa en Cuba.
El cantar estrenóse en Santander y nun foi mui difundíu na islla Tamién compuso y grabó en Madrid’l tema musical “Suavecito”, que ye un de los cantares más representativos del floclor y la historia musical cubana de tolos tiempos. Según Fernández, quien tamién ye presidente de la Comisión de Culñtura de la Federación d’Asociaciones Asturies de Cuba, el cantar-son, “ASturies, patria querida”, foi mutando hasta l’himnu que ye anguaño, cantada por tolos asturianos n’actividaes festives, sociales y toda mena.
“Entovía se conserven munches frases y estrofes del cantar orixinal, pero nunca tuvi duldes de que ye la mesma, anque l’himnu d’anguaño coles lletres cambiaes a fuerza d’interpretase n’actividaes festives pol pueblu y la emigración asturiana, afayándoles a los sos intereses hasta convertiles nun himnu fuerte y vigorosu”, aseguró Fernandez .
Fernández conoció’l fechu por una referencia realizada nun periódico del Principáu años atrás y, dende entós, trató d’encauzar la investigación. Pa ello faló con Antonio Trevín, Francisco Javier García Valledor, Carlos Madera, Luis Miguel Fernández Romero y Rafael Palacios, y otros dirixentes políticos asturianos hasta algamar que n’esti año 2006 Fernando de la Puente, investigador y escritor asturiano, tomara les riendas sobre l’orixen del himnu astur y buscara nes fuentes citaes por Fernández tres una llarga investigación en Cuba que lu llevó a charrar con el musicólogo cubano Elio Orovio y otros importantes investigadores musicales, asina como a buscar nel Archivu Nacional y nel Archivu de la Música, onde Ignacio Piñeiro tamién rexistró ‘Asturies, Patria querida’.
La matriz orixinal de la canción alcuéntrase n’Alemaña, onde fueron a parar durante la Guerra Civil española. Nel próximu Congresu de la Emigración, n’agostu próximo, Fernando de la Puente expondrá a los participantes los resultaos de la investigación realizada.

Candás cellebra’l so X Festival de Bandes de Gaites esta fin de selmana, nel que van participar 9 bandes de gaites, énte les que van tar la Banda de Gaites de Candás y La Bandina, amás d’éstes participarán nel festival les bandes que vienen darréu Villa de Xixón, Xácara, La Reina’l Truebanu, Xinzo de Limia, Cea, Bagad Saint Mark de Brest, Newcastle Pipeband. El festival entamará’l vienres 21 coles bandes asturianes faciendo un pasucais per Candás, que se va volver a facer el sábadu.

El 30 de xunetu, na estación d’esquí de Cabeza de Manzaneda (Lugo), fadráse la final d’esta perimportante competición de bandes de gaites. La Banda Gaites de Villaviciosa yá ganara nes dos últimes ediciones del certame, nesta ocasión con mantener la so ventaxa sobre la segunda banda clasificada, Ledicia de Mos, sedría abondo como pa repetir la victoria.
La Banda de Gaites de Villaviciosa vien denunciando la situación de los sos locales d’ensayu, asitiaos anguaño na planta baxa de les Escueles Graduaes de la Villa, énte la situación d’abandonu y ruina que sofre l’edificiu. Los responsables de la banda vienen esixendo-y al conceyu maliayés que dea solución a estos problemes y énte les igües proponen les escueles d’Amandi. Pola so parte’l teniente alcalde del Ayuntamientu de Villaviciosa, Juan Basilio González, llegó a nomar a los integrantes de la Banda Gaites d’okupes pol usu que vienen faciendo de los locales dende los venti años lleven desenvolviendo la so actividá.