Música

El profesor de tambor Manuel Durán García presentó ayeri “El Tambor Asturianu”, un manual didácticu sobre los “usos, rudimentos y patrones” pa tocar el tambor tradicional asturianu. La obra ta editada pola Asociación de Mayestros de Música Tradicional Asturiana”.
L’autor presentó’l llibru xunto a la conceyala uvieína d’educación, Concepción García Álvarez y por José M. Fernández, Director de la Escuela Municipal de Música y Danza Tradicional del Ayuntamientu d’Uviéu.
Fernando Gutiérrez, calificó esti llibru como’l “primer métodu de tambor d’Asturies” y comentó qu’esti ye un “momentu históricu pa la música tradicional del país”.
Manuel Durán, autor de la obra señaló que’l manual tán “plasmaes les sos esperiencies y el so conocimientu” sobre l’usu del tambor adicional asturianu. La obra ta empobinada a alumnos que tean deprendiendo a tocar el tambor y componse d’una parte histórica, una serie d’exercicios ya información sobre paisanos que toquen o tocaron el tambor asturianu.
Durán toca esti instrumentu dende hai 23 años, acompañando a bien de grupos anque en 1996 entama’l so trabayu docente y con esti llibru quier que l’alumnu “nun solo se forme de manera mecánica sinon que pueda ser un bon tambor tradicional”.
La conceyala d’Educación destacó que l’Ayuntamientu d’Uviéu ta “faciendo un esfuerzu pa resucitar los nuesos raigaños dende la enseñanza y la difusión del folclor”. Concepción García comentó que pa mantener les nueses tradiciones, ye afayadizo que “s’enseñen a los neños” porque sinon tendríen “data de caducidá”, poro esta “guía didáctica supón educación y calidá na mesma”. Pa finalizar, Fernado Gutiérrez comentó qu’esta obra, amás d’utilizase na Escuela Municipal de Música y Danza Tradicional d’Uviéu, emplégase n’otres munches escueles d’Asturies como en Llanera, Tapia o Xixón. nesti sen, la obra tamién se podrá alcontrar nes llibreríes

El VII Concursu de Gaiteros y Gaiteres Mozos de Bimenes abre’l so plaxu d’inscripción, que finará’l día 24 de payaes.
El concursu, empobináu a menores de 18 años, fadráse en dos fases, semifinal y final. Na primer de les fases, que se fadrá’l día 2 d’avientu nel polideportivu de Santuyano los y les participantes habrán escoyer dos sones d’un repertoriu seleccionáu, y na final, que se fadrá’l 3 d’avientu tamién en Santuyano, los y les seleccionaos amás d’escoyer dos sones d’esa llista podrán tocar un tema llibre.
L’asistencia a la preselección y a la final ye llibre y de baldre.

El 44º Festival Internacional de Cine de Xixón inclúi na so programación musical un conciertu que va axuntar sobre l’escenariu a Quique González, Pereza, Xoel López (Deluxe) ya Iván Ferreiro, con dellos cantantes arxentinos de renome.
El conciertu fradráse’l 30 de payares a les 22 hores na Feria de Muestres, cellebrándose por mor del estrenu del llargumetraxe “Y todo lo demás también”, d’Antonio Galeano y Sofía Martínez, nel que se recueyen les esperiencies vivíes polos músicos mentaos durante’l proyectu “La oratorio Ñ”
El Festival xixonés va incluir tamién l’actuación de MC5, mítica banda nacida en 1965 en Detroit, protagonista na edición de 2003 d’un documental que repasaba la so trayectoria musical y la so vida personal. Ente les demás actividaes musicales que tien previstes el Festival inxértense les de LFO, Derrick May, Cristian Vogel y Rinoceröse nuna nueche de música electrónico. La programación pesllará con Speak Low, grupu español inspiráu nes bandes de jazz soul de los años 60, nel que l’órganu Hammond tien un protagonismu especial

Los dos integrantes del grupu “Solas” presenten, dende les 20,00 hores del xueves 26 d’ochobre na Colexata de San Xuan Bautista, el so nuevu trabayu dientro d’El Ciclu de Música del siglo XX de la Caxa. El curdión y la voz del grupu irlandés-americanu axunten fuerces por primera vegada como duu y entamen una aventura xuntos cola salida del so trabayu “Serenade”.
L’orixe de “Solas” remóntase a 1996 y, dende entós, ye una de les agrupaciones de referencia pa los y les aficionaes a la música folk de tou’l mundu; con esta banda los dos músicos actuaron nos festivales de música celta más importantes del mundu.
McAuley y Horan lleven al oyente al través d’un viaxe de vieyos cantares tradicionales con igües nueves, versiones contemporanies y nuevos temes. Son dos de los meyores músicos del panorama folk irlandés que se desmarquen de la llinia qu’hasta agora siguieren pero ensin escaecer el so propiu estilu que tantu éxitu-yos proporcionó.

El Festival de Lorient va tornar en 2007 a les feches tradicionales de celebración, del primer al segundu fin de selmana d’agostu, depués de pasar pola dificultá de convocar a los aficionaos a la música celta de toa Europa nos caberos díes de xunetu y los primeros d’agostu en 2006.

Nesti añu de 2006, el Festival de Lorient tuvo d’enfrentase a unes feches enforma complicaes palos aficionaos, al entamar el festival el 28 de xunetu y prolongase hasta’l 6 d’agostu, colo que la xente interesao n’acudir al Festival hebo de coyer vacaciones nesos díes de dos meses distintos. La organización asumió la posibilidá de qu’amenorgare’l númberu de visitantes pa nun coincidir con feches importantes pala música celta notros países d’Europa, pero esti añu algámase dafechu tornar a les feches históriques del FIL (Festival Interceltique de Lorient).

Cada añu, el Festival dedícase a un país celta, correspondiéndo-y la edición de 2007 a Escocia, lo que garantiza un programa bien intensu y de calidá.

Sitiu oficial del Festival de Lorient

Dende’l 27 al 29 d’ochobre la villa de Llanes cellebra la Folixa del tardíu. Llanes al cubo ye una iniciativa del Ayuntamientu de Llanes asentada nos obxetivos de promover la cultura asturiana nel mundu d’anguaño y amuesar la ufierta cultural del conceyu llaniscu demientres la seronda.

Los conteníos de les xornaes de Llanes al cubo van dende la presentación de lliteratura, teatru, proyección de curtios cinematográficos, actividaes deportives o la música que se convierte na protagonista de les nueches de la villa del oriente asturianu.
Una de les señes d’identidá de Llanes al cubo ye’l renome de les actuaciones musicales, nes que la música folk ye la protagonista. Ente’l vienres y el sábadu grupos de la calidá de La Bottine Souriante, Berrogüeto, The Mike McGoldrick Band o Solas ente los grupos foriatos asina como Llangrés o Niundes, ente los grupos asturianos. La nueche del domingu reserva un espaciu pa la música pop onde rescampla la presencia del cantautor uvieín Pablo Moro.
La nueche del 27 d’ochobre entama cola actuación del grupu montañés Luétiga que va dar pasu Llangres, Berrogüeto y The Michael McGoldrick Band. Llangres foi un de los grupos que representaron a Asturies na última edición del Festival de Lorient y tien dos trabayos discográficos asoleyaos. Berrogüetto ye un de los grupos más destacaos del folk gallegu, vien de presentar el so trabayu 10.0. Y pa finar el primer conciertu l’actuación del xiblateru de Lunasa o Capercaille Michael cGoldrick cola so banda onde participen destacaos músicos de la escena celta mundial.
La nueche del sábadu 28 entama col grupu asturianu Niundes, qu’acaben d’espublizar el so trabayu “Enxamás ye pa siempres” que van dar pasu al grupu del Quebec “La Bottine Souriante”, que desenvuelve un de los meyores directos del folk internacional. Pa finar la nueche’l grupu de folk irlandés Solas que colos sos 8 discos asoleyaos conformen otra de les grandes bandes de la música celta euroamericana.
La nueche del domingu empobinase a la música pop na que destaca la presencia del uvieín Pablo Moro nel que presentará los cantares del so primer trabayu “Emepetreses”. Xunto al uvieín tocarán La Fuga de Torrelavega y Iván Ferreiro, que fuere durante quince años llider de Los Piratas
Pa más información podéis consultar el sitiu web oficial de Llanes al Cubo

Xosé Ambás, Dolfu R. Fernández y Diago Pangua presenten el discu “Musica tradicional d’Allande”. Esti trabayu discográficu recueye les tradiciones musicales d’un de los conceyos más grandes d’Asturies

. El monográficu va cuntar con delles pieces inédites frutu del trabayu de campu d’Ambás nesti conceyu del occidente asturianu. La presentación en directu del trabayu entama’l 28 d’ochobre en Morea y va siguir el 31 d’ochobre nel Chigre La Casa Posafuelles d’Uviéu y el 10 de payares nel Muséu Casa Natal de Xovellanos de Xixón.
Xosé “Ambás” – voz – ye un reconocíu cantante y un recopilador entusiasta de nuesa tradición. Tien una llarga experiencia nel mundu de la música, participando en grupos como N’Arba o Tuenda y collaborando habitualmente en gran cantidá de proyeutos. Dolfu R. Fernández – vigulinos, nyckelharpa y voz – ye un vigulineru dedicáu al vigulín tradicional y a la recuperación d’esa parte de la tradición asturiana amás d’adautala al momentu actual. Lleva tocando en grandes escenarios dende los 15 años, y agora toca en La Bandina’l Tombo y en DRD. Diego Pangua – flautes – ye un gaiteru de renombre y un flautista de la nueva xeneración de músicos *sobradamente preparaos.* Proyeutos en solitariu asina como en grupos como Felpeyu y DRD acrediten el so labor. Próximamente presentarán esti trabayu nos siguientes eventos, toos de calter gratuitu.

• IX Muestra de Música Tradicional,Ciclu “Tocando pelos pueblos” en Morea (Co. Ayer) el próximu día 28 d’Ochobre nel Auditoriu “CINE CARMEN” a les 20:00h.
• Chigre La Casa Posafuelles, el próximu día 31 d’Ochobre en c/ La Cuesta la Vega, 10 d’Uviéu a les 22:30h.
• Los Conciertos del Museo, Ciclu “Folk de cámara” el próximu día 10 de Payares nel Muséu Casa Natal de Xovellanos de Xixón a les 19.30h.

Tres del exitu del so debut producíu por KC Porter, Huecco vuelve con una edición especial con un DVD que tien el conciertu del Viña Rock 2006, un documental, videoclips y un making of de la grabación del so discu. Huecco, que dexó atrás la estela de Sugarless pa definise como ún de los artistes con más futuru nel panorama estatal, va falar del so discu y ufiertar un showcase acústicu nel Fórum de la Fnac de Parque Principado, el próximu xueves 19 d’ochobre a partir de les siete la tarde.

El primer grupu de hip-hop esperimental asturianu, Lego my ego, va presentar esti miercoles día 11 a les ocho la tarde na Fnac de Parque Principado, el primer disco de so que lleva por títulu ‘Ritmos suaves, sonidos gordos’, espublizáu por Three-point Records y distruyíu por K-Industrias. Ganadores del premiu ‘Propuesta más arriesgada’ nel Bilborock 2004, Lego my ego tien collaborao con grupos como Stoned Atmosphere o Manta Ray, de los que metieron nesti discu’l remix del so cantar ‘Don’t push me’.

Lego my ego nació como dúu en 2002, uniendose a Ra y a 40oz al añu siguiente Manuel Scattini y l’añu pasáu Hector Sandoval. Abarcando un ampliu abanicu d’influencies musicales derivaes de la ellectrónica, el hip-hop o’l rock, en directu cuenten cola collaboración del colectivu FiumFoto.

Montevideo vuelve celebrar l’ ‘Encuentru Uruguayu de Música Celta’, na so cuarta edición, pal que convoca a los principales esponentes del xeneru a nivel local, contando esti añu amás con invitaos especiales de la República arxentina. L’alcuentru que va tener llugar los díes 6, 7 y 8 d’ochobre ta organizáu en collaboración col Centru Asturianu-Casa d’Asturies del Uruguay que participa cola so Banda de Gaites Güestia.

En tres nueches siguíes van xubir a escena artistes de diferentes estilos que van representar a toles naciones celtes que marcaron presencia nel Uruguay. El públicu asistente na Sala Alfredo Zitarrosa de la ciudá de Montevideo va poder esfrutar de música tradicional asturiana, gallega, escoesa, irlandesa y galesa, xunto a música folk y fusión celta.

La Banda de Gaites Asturiana Güestia del Centru Asturianu-Casa d’Asturies del Uruguay va presentase’l sábadu 7 d’ochobre a les diez de la nueche compartiendo escenariu con Any Adrover (de l’Arxentina), Los Casal (fusión celta) y Montegal (música Folk de Galicia).