Música

Delorean van subir güei a medianueche al escenariu de la Sala Albeniz de Xixón dientro del programa de conciertos que tan complementando’l Festival Internacional de Cine de Xixón durante estos díes. Delorean, amás d’un fámosu bólidu de película, ye una banda de Zarautz que xerminó na prolífica escena hardcore del País Vascu y que dió en tirar pola interpretación d’una suerte de punk mui influenciáu pola nueva ola y la música ellectrónica.

“Into the Plateau” ye’l trabayu discogrñáficu, últimu y cuartu na so carrera, que defenderán nel escenariu xixones. Esti discu ye como s’encarguen de definir dende B-Core: la so cada de discos, ” una suite dance, nuna perfecta armonía ente los beats d’inspiración ochentera, les oscures atmósferes de guitarra y la siempre presente actitú post-punk”

Tangu y milonga son dellos estilos que cultiva’l músicu ya historiador de la materia Juan Carlos Cáceres. Esti musicólogu espertu nos sones del Ríu de la Plata, tanto de la oriella arxentina como de la uruguaya, actua esti miercoles 28 de payares nel Centru Cultural Cajastur San Francisco. El recital ta enmarcáu dientro del ciclu d’actuaciones que organiza la entidá financiera embaxo’l nome “Música del Sieglu XX” y va entamar, como davezu, a les 20:00 hores.

Caceres repasa amás sones como’l candombe y la murga, una de les formes del tango. Tres d’esta actuación el músicu va treslladase a Xixón pa, mañana xueves 29 de payares tamiñen a les 20:00, zarrar el pasu por Asturies con un conciertu nel escenariu de la Colexata San Xuan Bautista.

El pianista dominicanu Michel Camilo, un de los meyores músicos del so país y de la escena internacional, ufre esta nueche a les 20:00 hores nel Teatru Xovellanos de Xixón, el segundu recital nel so pasu por Asturies. La primer cita tuvo llugar ayeri llunes 26 de payares nel Auditoriu Príncipe Felipe d’Uvieu. Ente’l repertoriu que va interpretar Camilo destaquen “Balcánicas” de Juan Manuel Ruiz, “Raphsody in Blue” y “An American in Paris” de George Gershwin. ya’l “Conciertu pa pianu y orquesta” del propiu pianista domincanu.

Acompañando al solista tará la Orquesta Sinfónica del Principáu d’Asturies (OSPA), embaxo la dirección de Maximiliano Valdes. Carauterística cimera del arte de Michel Camilo ye la mestura que fai ente’l jazz y los sones caribeños.

Nacho Vegas y Christina Rosenvinge ufren esti martes un conciertu pa presentar el discu “Verano fatal” dientro del programa de conciertos del Festival Internacional de Cine de Xixón. Como teloneru va actuar el ganador de la última edición del Concursu de Maquetes de los 40 Principales, Pablo Valdes. “Verano fatal”, va ser presentáu polos dos artistes en formatu acústicu. Soanrán guitarres acústiques y pianu y van tar acompañados por dos músicos más a los teclaos y les percusiones.

Xuan Bello, prolíficu escritor asturienu natural de Paniceiros, va participar esta selmana nuna llectura poetica de la so obra na Universidá Pública de Nueva York (martes 27) y nuna mesa redonda n’Albuquerque (xueves 29) pa falar sobre “Narrativas contracorriente”, invitáu pol Institutu Cervantes.

L’autor ta a puntu d’espublizar lo que va ser la so nueva obra tres “Al dios del llugar” que llevará por títulu “La hestoria tapecida”, llibru que Publicaciones Ámbitu y Mondadori editarán n’asturianu y na torna al castellanu.

Camín de cantares va dedicar el programa d’esti sábadu 24 de payares (13:00 hors) a la música tradicional del occidente asturianu. El Conceyu de Santiso d’Abres, concretamente la so capital O Chao va ser l’escenariu del programa pa descubrir dellos de los cancios populares de la zona de manes de la familia de A casa do Piñeiro. Esti matrimoniu va cantar romances y cancios de baille y repasarán la historia de la Bandina “Os Típicos” de Santiso, de la que’l home yera’l gaiteru.

La violinista y gaitera Kathryn Tickell inglesa visita güei los escenarios asturianos pa ufrir lo que va ser so primer conciertu n’asturies presentando’l so nuevu discu, “Instrumental”. La cita ye nel Auditoriu de la Casa Cultura d’Aviles a partir de les 20:30 hores con entraes al preciu de 10 euros. Dempues d’esti conciertu l’artista actuará en Bilbao el prósimu día 25 de payares nel Palaciu Euskalduna de Bilbao.

Kathryn Tickell ye la principal embaxadora del condáu ingles de Northumberland y cunta con catorce grabaciones discográfiques nel mercáu y abondes collaboraciones con artistes del panorama folk y pop. Tickell ye una de les principales interpretes de la gaita de Northumbria, instrumentu que garró per primer vagada a los 9 años, y del violín al estilu de la isla de Shetland.

Kate McGarry: una de les voces mas fresques ya innovadores de la escena de jazz d’anguaño llega esta nueche al Centru Cultural Cajastur Colexata San Xuan Bautista de Xixón a les 20:00 hores pa ufrir el segundu de los recitales que dará n’Asturies tre el d’ayeri n’Uviñeu. La visita de Kate McGarry ta enxerta nel ciclu d’actuaciones “Música del sieglu XX”.

Kate Mcgarry estremez el jazz clásico con influencies de la música folk, celta, brasileña e india, sones colos que la vocalista americana llogra encadarmar un dircursu propiu dientro del panorama jazzísticu contemporaneu.

Güei 21 de payares, a les nueve la nueche, va celebrase nel chigre “El Cafeton” d’Avilés, asitiáu na Cai del Sol, una tertulia sobre Música Tradicional Asturiana a la que yá confirmaron la so asistencia Chus Pedro, del grupu Nuberu, Xosé Antón Ambás, presentador del programa Camín de Cantares de la TPA y los músicos Jose Manuel Tejedor y Xuacu Amieva.

Tolos grupos y solistes interesaos en presentase a la decimoprimer edición del certame musical Pop-Rock Villa de Mieres van poder facelo unviendo los sos trabayos hasta’l prósimu sábadu 24 de payares. Estes maquetes pasarán dempues una criba al cargu del xuráu que’escoyerá cinco grupos o solistes finalistes. Estos cinco ganadores van tener la oportunidá d’actuar el 15 d’avuentu nun conciertu a cellebrar nel parque Jovellanos de Mieres.

Según anuncio la responsable de mocedá del Ayuntamientu de Mieres, Nuria González, el premiu pal grupu ganador ye de 2.150 euros. Al mesmu tiempu reconoció que l’oxetivu d’esti festival ye dar oportunidaes a la xente nueva que ta escomenzando nel mundiu de la música y fizo un llamamientu a tolos grupos y solistes a presentase al certame.

Nel concursu namás van poder participar grupos y xente en solitario con una media d’edá no mayor a 35 años, que nun hayan firmao contratu discográficu dalgú y que cunten con cancios propios nel so repertoriu. Amás nun pueden haber ganao el festival en ocasiones anteriores.