Música

Esther Fonseca, nominada al premiu por “Negra” al meyor cantar n’asturianu, que se falla esti xueves en Mieres, va tar presentando el so últimu discu el vienres nel Teatru Nuevu de La Felguera a les 20:00 hores. “Viaxe” ye’l nome de la última aventura discográfica de la vocalista de Llangres. El discu trae catrorce cantares compuestos y producíospor Nacho Fonseca, reconocíu músicu de la escena folclórica asturiana, fundador de Xentiquina y pa d’Esther.

El Grupu de música tradicional “La Quintana” entama una esposición d’intrumentos tradicionales asturianos nel IES Xovellanos de Xixón, que ta na Avd. de la Constitución d’esta ciudá.

L’amuesa ta puesta dende va unos díes y va talo hasta’l miércoles día 27 de febreru, pudiendo visitase nel horariu del centru y pela tarde de 17 a 20 hores los martes y miércoles.

La escuela La Quintana convida nun comunicáu “a tol mundu a visitar esta esposición que ye una bona amuesa de los instrumentos usaos na tradición asturiana”, amás “y pa que la visita seya completa”, el grupu ufre una visita guiada entrugando pol miembru del grupu y músicu, Daniel García de la Cuesta, nel mesmu Institutu.

El premiu al meyor cantar, que se fallba ayeri a les 20:00 hores na Casa de Cultura Teodoro Cuesta de Mieres, foi finalmente pa Dulcamara que concurríen al certame cola canción “Nosh”. El restu de finalistes que participaren nel eventu yeren les cantantes Anabel Santiago y Esther Fonseca y les bandes Skanda y Socai System.

Nel xuráu taben nomes bien conocíos de la escena musical como’ director de 40 Principales d’Asturies, Alberto Toyos; el críticu de Radio Langreo, Roberto Pato. Tambien tomaren parte na decisión final, la filóloga Penelope Miranda, la redactora xefa de “La Voz de Asturias”, Marta Barbón y la profesora de musica, Florentina Cuadriello. El Principáu, qu’organiza’l certame, tuvo representáu por Consuelo Vega, directora de Promoción Cultural, qu’exerció de presidenta y María Antonia Pedregal, ¡xefa de la Oficina de Política Llingüística.

Dulce Pontes trai’l so fadu esti vienres al Teatru Xovellanos de Xixón. La cantante portuguesa va presentar, nun recital que ta previstu qu’entame a lers 20:30 hores, les canciones del nuevo discu que ta acabante d’amestar a la so llarga carrera, “O coração tem três portas”. La voz de Pontes ta sofitada en directu polos guitarristes Amadeu Magalhães, Filipe Lucas, Paulo da Costa, y Jose Soares. Completen la formación Oscar Viana, al oboe, el violonchelista y baxista, Davide Zaccaria y Beto Betuk, nes percusiones

Mister Groovy and the Blue Heads, banda andaluza de reciente creción y averada al rock & roll ya’l blues más clásicos, son la nueva propuesta del ciclu “Música sieglu XX” pa esti xueves 21 de febreru en Xixón. El recital va tener llugar nel Centru Cultural Cajastur Colexata San Xuan Bautista de Xixón de magar les 20:00 hores.

Nel branu de 2006 editaron la so primer maqueta y esi mesmu añu saquen lo que ye’l so primer discu, “The Monday Club”, coproducíu pola banda y un esponsor priváu amante del blues. Nesti trabayu despachen cinco temes de collecha propia y seis de les versiones que mas exitu-yos dieron. La banda vendió mil copies del discu en menos de seis meses namái nos conciertos.

El restorán- sidrería Tierra Astur de Cualloto va cellebrar esti xueves una xornada gastronómica alredor d’un platu tipicamente asturianu: l’oriciu. Poniendo l’acompañamientu musical, como tolos xueves, van ter nesta ocasión “La bandina del oriciu frescu”, banda axuntada pa esta ocasión que cunta nes sos files con componentes de Llanzones o Los Chiquitrinos, ente otres formaciones.

“La bandina del oriciu frescu” ye una apuesta pola tradición musical asturiana na que tamiñen tienen cabida dellos estilos dixebraos del folclore astur como son les músiques balcánique, sudamericanes, árabes y tamien el rock y el jazz. Dientro d0esta folixera propuesta rescamplen sobre manera unes lletres bien humorístiques y una puesta n’escena orixinal.

La Casa la Cultura Teodoro Cuesta de Mieres va acoyer esti xueves 21 de febreru la gala d’entrega de premios al Meyor Cantar en Llingua Asturiana de 2008. Esti añu opten al galardón les canciones, “Nosh” de Dulcamara, “Poema inacabáu” d’Anabel Santiago, “Negra” d’Esther Fonseca, “Soncai” de Soncai System, y “Na mio barca” de Skanda. Durante la ceremonia van actuar esto artistes y tamien la banda Nuberu, lo que va ser una de les sos últimes cites col públicu asturianu enantes de la retirada.

El premiu ta dotáu con 1000 euros pal ganador y una escultura orixinal de l’artista María Xesús Rodríguez. La canción ganadora va ser editada y promocionada pol Gobiernu del Principáu d’Asturies.

“Gaudeamus Igitur” ye l’himnu col que la mayor parte de les universidaes europees musiquen los sos actos institucionales más solemnes. Agora, la Universidá d’Uvieu, como institución perteneciente al espaciu educativu europeu, editó un discu nel que suenen diez versiones d’esta composición al cargu d’un elencu d’artistes asturianos formáu por: Jorge Explosion, Muni, Paco Loco, el grupu Koniek, Dark la eMe, Nacho Vegas, Xel Pereda, Xuacu Amieva, Ramón Prada, la banda Manta Ray, Toli Morilla y el Coru Universitariu d’Uvieu.

El pretestu pa sacar esta edición especial de “Gaudeamus Igitur” ye, como vien siendo costumbre esti añu, la cellebración del cuatrocientos aniversariu de vida de la Universidá d’Uvieu. El tema versioneáu ye un cantar d’estudiantes del que se desconoz l’autor pero que yá se cantaba nes universidaes alemanes a mediaos del sieglu XVIII.

Música de Cine. Esti ye’l nome del prósimu conciertu que va ufrir Cajastur dientro de la nueva tenporada del ciclu “Música del sieglu XX” esti miercoles 20 de febreru a les 20:00 hores nel centru cultural que la entidá financiera asturiana tien n’Uvieu. La propuesta va correr al cargu de los músicos Luis Delgado, Cuco Perez y Diego Galán, que van abordar temes de Morricone, Manzini y Nino Rota ente otros clásicos musicales del setimu arte.

Luis Delgado ye un de los multinstrumentistes más afamaos del estáu. Toca los teclaos, la zanfona, la guitarra, o el laúd ente otros instrumentos y haz poco algamó’l premiu MAX pola partitura “”Un enemigo del pueblo” dirixida por Gerardo Vera. L’acordionista y teclista Cuco Perez formó parte de “La Musgaña”, “Radio Tarifa” y “Celtas Cortos” y ye un compositor mui solicitáu. Diego Galaz ye un de los referentes del violín contemporáneu amás d’un músicu d’estudiu de gran prestixu.

Blimea festeya hasta’l 22 de febreru un programa d’actividaes culturales nel que rescampla’l conciertu de música ayandesa que van dar el vienres, Xose Ambás, Diego Pangua y Dolfu R. Fernández. Esta Selmana Cultural ta organizada pola Asociación de Vecinos de Blimea y tamien incluí delles charres y conferencies, teatru y una cená d’hermandá.

Nel apartáu de conferencies van participar; la profesora d’Historia del Arte de la Universidá d’Uvieu Pilar García Cuetos, falando sobre les cruces de los Ánxeles y de la Victoria (el 19) y la Dra Estrella Miguelez, del Centru de Salú de Sotrondio-Blimea, va falar sobre la vacuna del cáncanu d’úteru (el 20). El llunes tuvo llugar una charra de Marcelino García Noriega, pediatra, sobre adolescencia.

El grupo Refaxu van representar, el xueves 21 de febreru a les 19:30 nel centru social de la localidá, la obra de teatru “El adiós de la quintana”. Dempues, a les 21:00 hores va tener llugar el conciertu de música ayandesa y la cena d’hermandá nun restorán del pueblu.