Música

Güei, a les siete y media la tarde nel Muséu de la Casa Natal Xovellanos van participar los componentes del Trío Artemis, formáu por Laura López al vigulín, Yolanda Ruiz a la xiblata y Gemma Llorens al violoncello.

El centru municipal Pumarin “Gijón Sur” acueye esti llunes 17 de marzu una nueva xornada del programa “L’asturianada nos centros municipales” organizada pola Asociación d’Interpretes de la Canción Asturiana. Dende les 19:30 hores van pasar pol centru xixones Mª Luz Cristobal Caunedo y Blanca Carballo Agüeria, el grupu de teatru La Cruz de Ceares ya’l gaiteru Hugo Noval Garcia. La presentación del festival va tar al cargu de Fernando Ruiz Fernández .

Güei vienres, a les siete y media la tarde y con entrada de baldre, torna a la Casa Natal de Xovellanos, asitiada nel barriu xixonés de Cimavilla, los “conciertos del Muséu”, una iniciativa que quier afalar los conciertos de cámara na villa de Xovellanos y que nesta ocasión axunta a un griegu, el pianista Stefanos Spanopoulos y una valenciana, la xiblatera Gemma Corrales.

El dúu de xiblata y pianu que van interpretar va incluyir obres de Eldin Burton, Maurice Ravel, Salvador Brotons, Francis Poulenc y André Jolivet. L’actu ta organizáu poles Mocedaes Musicales de Xixón y cunta col apoyu del Conceyu de Xixón y del Ministeriu de Cultura.

Tuenda, grupo del que forma parte’l popular Xose Ambás xunto colos músicos Elias García y Pepín de Muñalen van tocar esti vienres 14 de febreru en Llugones. El conciertu va cellebrase a les 21:30 hores nel pub La Gatera (C/Leopoldo Lugones) precisamente nel día que se cellebra San Patriciu n’Irlanda. El repertoriu d’esta banda, per otra parte formada por músicos perconocíos de la escana folk asturiana, bebe direutamente de los archivos recopilaos nel trabayu d’investigación d’Ambás, que rescampla ultimamente nel programa Camín de Cantares.

Audiovisual Theorem, sellu asturianu especializáu en producciones musicales y de videu nel terren de la ellectrónica y lo esperimental, ta acabante se sacar a la cai’l primer trabayu del productor Hector Sandoval, más conocíu como Komatsu. Esti discu, col que la plataforma, amesta la so decima referencia al catálogu, ye un bon exemplu, en pallabres de los propios responsables del sellu, d’ambient dixital y ellectrónica sedosa que s’espeya en bandes señeres como Autechre o Boards of Canadá.

Web del sellu

Skanda. una de les bandes más actives del folk asturianu y finalistes nel premiu al meyor cantar, van tocar esti sábadu na localidá de Meruxo (Cenera) a les 20:00 hores dientro de la xira que los va llevar per toa Asturies y delles ciudaes del restu l’estáu. Skanda van ufiertar, ente otres del so repertoriu, les canciones de “El cuartu”, lo que ye la so última referencia discográfica que grabaren ente febreru y marzu del añu pasáu.

El baxista Cherles Mack, un de los instrumentistes más solicitaos de la escena blues americana, va tar tocando esti sábadu 15 de marzu nel centru cultural Cajastur de Mieres (C/Jerónimo Ibrán). El conciertu, que pertenez a la serie d’actuaciones qu’organiza la entidá financiera col ciclu “Música del sieglu XX”, ye de baldre y va entamar de magar les 20:00 hores. Ye una bona ocasión pa siguir de cerca a un músicu que tien collaborao nos sos 20 años de carrera con bandes de rap como Cypress Hill, nomes notables del blues como Otis Rush o Lucky Peterson y numberoses formaciones de jazz.

Esti xueves 13 de marzu, a les 20:00 hores, nel Teatru Filarmónica d’Uviéu, el cantautor Paco Ibáñez va dar un conciertu por cuenta del IV Congresu Internacional José A. Goytisolo, “Asturies ente versos”, qu’entama l’Aula José Agustín Goytisolo de la Universidá Autónoma de Barcelona.

Güei, xueves 13 de marzu, a les ocho la tarde, la Sala Principal del Auditoriu Príncipe Felipe d’Uviéu va acoyer un conciertu de “La Kremerata Báltica”, un recital que ta dientro del ciclu “Grandes Conciertos del Auditoriu” y nel que van interpretar “Siete últimes pallabres de Cristu na cruz”, de J. Haydn, col solista Gidon Kremer al vigulín.

Folk, pero de raigón norteamericanu, ye lo que propón la banda Pine Leaf Boys pal que se quiera acercar pol Auditoriu de la Casa la Cultura “Teodoro Cuesta” de Mieres na nueche d’esti miercoles. Los músicos de Loiusiana van abordar el so repertoriu de magar les 20:00 hores nun conciertu que a buen seguru va ser un buen exemplu de lo qu’ufre la nuevoa música folk americana. Pine Leaf Boys remociquen la rica tradición musical de Nueva Orleans con influencies actuales nel so últimu trabayu editeu l’añu pasáu, “Les Blues de Musicien”