Música

Los xueves musicales colos que la sidrería Tierra Astur ameniza la velada a los sos clientes cada selmana van cuntar nesta ocasión col concursu d’Amiestu, grupu que bebe de la tradición musical celta tantu d’Asturies como d’otres rexones. Amiestu ye una banda qu’axunta a músicos como Mento Hevia, al bodhran; Nancy Quintáns de la Prida, col violín; Dany Álvarez Mora, nes flautes y la gaita; Juan Povedano na flauta y Jose Frances, col bouzouki y la voz solista.

El discu Alebrix, d’Ernesto Paredano y David Menéndez, con lletres de la poeta Esther García, estrena myspace. Un llugar nel que pueden sentise dellos cantares y conocer más información del discu.

Ernesto Paredano musicalizó pa esti discu poemes de la escritora valdesana Esther García. N’ opinión del críticu musical Cosme Marina, “les canciones d’Ernesto Paredano son perguapes, cercanes, envueltes en brumosos acentos llíricos Nelles nun hai espaciu pa la indiferencia.

Emociona’l poéticu tanxir de María Esther García, la melancolía y la bruma de los sos versos que se criben dende el balancéu sobriu del asturianu, especialmente fermosos dende’l burbús na intimidá del versu que yá ye música y que llueu lo ye más dende la especialmente acertada composición d’Ernesto nun cruz de caminos y referencies nos que les voces de los artistes se funden nuna mirada única de temblor asique señardosu, qu’ escapa en silenciu, ensin malapenes danos cuenta”.

David Menéndez ye una de les voces mayores del cantu asturianu y español. De manera pautada ta construyendo una carrera importante nos grandes teatros. Non por ello perdió les sos referencies y la so gran voz de barítonu fúndese con plasticidá ablucante nesti sustancial discursu poéticu y musical.

La música de Ernesto Paredano fluyi unes veces torrencial, otres pausada en lentos meandros, siempre con garra y especiales aciertos espresivos que la voz del barítonu asturianu va esgranando con posada cadencia, como “una gota d’agua con ritmo melancolicu”. Too ello envuelto nun horizonte nel que’l crepúsculu y l’alborecer casique se funden nun tiempu concretu, íntimu, de cercana y suxerente fermosura”. El día 26 d’avientu, la voz de David envuelta nes notes del pianu d’ Ernesto, sonará con maestría n’ Avilés nesti conciertu, un actu nel que se derrochará llirismu y emoción.

Myspace (páxina personal) del discu Alebrix

“Los conciertos del Museu” ye’l ciclu musical que vien organizando periodicamente la Fundación Municipal de Cultura del Ayuntamientu de Xixón nel Museu Casa Natal de Xovellanos y esti vienres va cuntar cola participación de los músicos del Artemis Trío. El conciertu va entamar a les siete y media la tarde.

Artemis Trio ye un grupu d’intrerpretes clásiques nel que militen la violinista Laura López, la flautista Yolanda Uriz y la violonchelista Gemma Llorens. El so repertoriu ta compuestu principalmente de temes barrocos y clásicos.

La XIII edición de la Folixa na Primavera, la fiesta del Arcu Atlánticu, llega güei a Mieres con bandes folk bien célebres, gastronomía asturiana y sidra. El xefe d’informativos de la Televisión Autonómica d’Asturies va ser l’encargáu de da-y llectura al pregón güei vienres a les 20:00 hores, nel Parque Xovellanos de la villa del Camín.

A esa mesma hora van espichase delles pipes de sidra de baldre y namás cola condición de mercar el vasu conmemorativu de la Folixa del 2008. Más tarde, p’hacia les once la nueche, l’Auditoriu del Parque Xovellanos va recibir al grupu asturianu La Bandina, que va presentar los temes del so discu nuevu “13”, el primeru dende l’ésitu del tema “Mexé na caleya”.

A la una de la mañana va ser el turnu pal grupu británicu Michael McGoldrick Band, que lidera’l famosu maestru de la flauta irlandesa, que va echar el pieslle a la nueche.

El sábadu 19 d’abril ye la segunda xornada y les actividaes ábrense a les trés y media la tarde nel Salón d’Actos de la Casa la Cultura col Concursu de gaiteros. Yá de nueche, a les 23:00 hores, nel Parque Xovellanos, el grupu asturianu Felpeyu va abrir la última nueche de conciertos col so nuevu discu “Canteros”.

El grupu irlandés Dervish, formación yá veterana, con ocho discos y la participación, ente otros festivales, l’añu pasáu n’Eurovisión.

El domingu 20 va tar dedicada a la música na cai, con una alborada a les 11:00 hores a cargu del grupu folclóricu Prau Llerón. A les 13:00 hores va celebrase’l festival “Enguedeyu na Cai”, con grupos de baille y música p’animar al baille tradicional per Mieres: Xorrecer, Ruxidera, L’Artusu y Prau Llerón, y musicos de la Escuela de Música Tradicional del Conceyu de Mieres.

Escuela de Odio, una de les bandes más afitaes na escen hardcore de la rexón, van tar presentando “Quien siembra miseria recoge la cólera”, el so cuartu y últimu trabayu discográficu, na sala Tribeca d’Uvieu. El conciertu ye esti vienres 18 d’abril a les 20:00 hores y tamien va cuntar cola participación de Mercyless y Fall Down Empire. La banda, formada en La Felguera en 1993, ta formada por Pirri, nes voces, Fonso y Marki, nes guitarres y Michel na batería.

Rubén García Martín va estrenar a lo llargo de los próximos delles obres musicales, ente les que tán dos adaptaciones de poemes de los poetes asturianos Xuan Bello y Antón García.

La obra “Los tres impostores” pa grupu instrumental, con xiblata, clarinete, saxu altu, percusión, pianu, vigulín, viola y violonchelu va interpretase en Salamanca’l 29 de abril. La obra ta basada nun poema de Xuan Bello y va tar interpretada pol taller de música contemporánea del Conservatoriu Superior de Salamanca.

El poema “Douru”, d’Antón García, adaptóse pa coru mistu y octetu de solistes. La obra va facese en Naarden, el 16 de mayu, y n’Amsterdam, el 17 de mayu. Interpretadantada pol Coru Francis Poulenc y Naardens Kamerorkest.

Felpeyu va presentar un nuevu trabayu discográficu n’Uvieu. “Canteros” ye’l nome del discu de la banda asturiana y l’escenariu que va acoyer la puesta de llargu del cd va ser el Teatru Filarmónica d’Uvieu. La cita ta programada pal 12 d’abril a les 20:00 hores con entraes al preciu de cinco euros. La banda afonda nesta nueva entrega nel so llabor de reellaboración del sustratu musical asturianu pa crear un resultáu pesrsonal, a mediu camín ente la tradición y lo actual. La banda ye una de les formaciones dereferencia de la música asturiana, dende l’añu 1991 nel que entamaren la so carrera.

El ciclu “Música del sieglu XX” va dar la oportunidá a tolos mierense que quieran acercase al Centru Cultural Cajastur de la localidá minera, na cai Jerónimo Ibrán, de difrutar coles evoluciones en direutu del cantante y pienista estáuxunidense Jonah Smith. La cita col americanu ye esti vienres 11 d’abril a les ocha la tarde.

Johan Smith, col pianu y la so voz entemez les bases del jazz contemporáneu cola influecia del folclor norteaamericanu y la música rock. Acompañando al músicu va tar una bande clásica con guitarres, baxu y bateria formada por David Soler, Andy Stack, Ben Rubin y Marko Djordjevic.

Stormy Mondays van tocar nel programa de radio “Tresfusión”, que dirixe Santi Alcanda en Radio 3. La banda d’Uvieu van tocar dos canciones del so repertoriu en formatu acústicu y man mantener una entrevista en directu. La emisión de “Tresfusión” entama esti xueves 10 d’abril a les once la nueche. Otramanera, el llider y guitarrista de la banda Jorge Otero, va tar tocando col cantautor estáuxunidense Wille Nile na so xira por España

El tríu del pianista Bruce Barth va ufrir el prósimu de los conciertos del ciclu “Jazz nel Centru” qu’acueye’l Centru de Cultura Antiguu Institutu de Xixón. La cita ye’l miercoles a les 20:00 hores y na mesma, los aficionaos al xeneru van tener la oportunidá de contemplar l’actuación d’un músicu qu’axunta como naide una visión moderna del jazz col respetu a los mayestros clásicos como Thelonious Monk. Completa’l tríu, un apartáu rítmicu con Doug Weiss encargándose del contrabaxu y Clarence Penn de les baquetes.