Música

El 19 de Mayu va entamar el plazu pa matriculase nos distintos cursos que va ufrir la Escuela de Música Tradicional d’Uvieu pal períodu 2008-2009. Les matriculaciones puen facese hasta’l 20 de xunu y los cursos van tocar materies como gaita, tambor, baile tradicional, acordeon diatonico, rabel, zanfona, tonada, investigacion folclorica, preescolar y baille infantil.

Les clases van dase nos distintos centros munipales del conceyu. Asina va haber cursinos nos centros de Les Campes, La Corredoria, Pumarin, Ciudá Naranco, Trubia , Otero ya’l Carlos Tartiere.

Tol procesu de formalización de la matrícula pue facese nes oficines de la escuela, nos baxos del campu de fútbol Carlos Tartiere, n’horariu de 10:00 a 13:00 y de 16:00 a 19:00 hores. Los despachos de la escuela tan abiertos de llunes a vienres y la entrada a los mesmos faise pela puerta cero del campu.

Esti vienres a les 20:00 hores el públicu mierense va tenber una nueva oportunidá de disfrutar cola música en direutu de los Ciquitrinos, formación alllumada nel añu 2000 cola intención de mantener viva la tradición de les orquestines de fiesta asturianes. La cita ye nel Centru Cultural de Cajastur na cai Jerónimo Ibrán de la capital mierense.

Ciquitrinos faen honor a l so nome nos conciertos, inquietos, ruidosos, amigos de la folixa, y asina lo vienen demostrando en festivales como l’Intercelticu d’Aviles, l’Intercelticu de Tapia y los Alcuentros de Trebolgu n’Uvieu.

La banda ta formada por: Ruben Arias, gaita y voz; Indalecio Santos, clarinete; Xuan Nel Expósito, acurdión diatónicu; Marcos Díaz, baxu; Juan Piedra, trompeta; Baldomero Gutierrez, saxu; Antón Barquero, percusión Ruma Barbero, tamien na percusión.

Un total de 91 bandes, procedentes del tol estáu, unviaron les sos maquetes al Concursu Appel Pop que convocó la Conceyalía de Deportes y Xuventú del Ayuntamientu de Villaviciosa. D’ente los participantes van salir cinco finalistes, que van actuar en direutu en Villaviciosa, el 21 de xunxu naa Fiesta de la Música. El ganador va tener la oportunidá de facer un discu cola grabación y edición de mano de la Conceyalía.

Esti concursu ñació, al abellugu del festival del mesmu nome, col oxetivu de fomentar l’actividad musical ente los grupos que tovía nun tengan contratu discográficu y que nunca asoseleyaren nengún trabayu discográficu.

Rafa Lorenzo va ser el protagonista de la nueche del xueves na sidrería Tierra Astur nuna nueva edición de los conciertos d’artistes asturiano colos que los hosteleros completen la so ufierta de los xueves. Lorenzo va atacar en directu les caciones del so últimu trabayu discográficu, “Primos Hermanos”, nel qu’homenaxea al poeta Federico García Lorca al travies de seis poemes musicaos del autor y otros seis d’autoría propia.

El Festival Intercelticu de Lorient cellebra esti añu, del 1 al 10 d’agostu, la edición númberu 38 con una importante representación asturiana de la mano de bandes como Ciquitrinos, les pandereteres de Dulcamara, Escontra y les bandes de gaites de Corvera y La Reina del Truebano. Amás el festival que dirixe Lisandro Lombardía va cuntar cola presencia de nomes consagraos de la musica celta como Lorena Mc Kennit, Moving Hearts o The Chieftains o grupos averaos a la escena como Celtas Cortos, Idir o Les Balkaniks.

Amás y como ye tradición, los asistentes al festival, l’eventu más importante d’esti tipu en tol Arcu Atlánticu, van tener ocasión de disfrutar d’un buen piñu d’actividaes complementaries, exposiciones, conferencies, alcuantros de lliterarura, esibiciones cinematográfiques, escursiones ya inclusive un partíu de rugby nel que vaa tomar parte una seleición del País de Gales. Precisamente Gales ye’l país al que va dir dedicada esta edición númberu 39 del FIL, socediendo asina a Escocia.

Web del Festival

El pueblu de Caliao, nel conceyu de Casu, vuelve a acoyer otru añu más l’Alcuentru de Bandurrieros qu’entama l’Asociación de Folclor Tradicional La Quintana. La fecha ye’l próximu 3 de mayu y la edición d’anguaño ta dedicada al bandurrieru Cefero Traviesas, vecín de Caliao que morrió en 1995.

Verdasca, Ciquitrinos y Blima van tar actuando esti vienres nel Teatru Filarmónica d’Uvieu con motivu de la cellebración a V Ascensión Folk, dende les 20:00 hores. Esti festival ta enmarcáu dientro de les cellebraciones que fai l’ayuntamientu de la ciudá con motivu de la Feria l’Ascensión.

Verdasca ye, seguramente, una de les formaciones de folk más xóvenes de la escena asturiana y tamien una de les más prometedores. Na so carta de presentación ta por exemplu, l’algamar el segundu puestu nel prestixosu “Cidrerie du Terroir” del Festival de Lorient. Chiquitrinos ye una formación que ñació nel añu 98 de la xuntanza de xente procedente del folk, del rock y el jazz. Blima, pela so parte, faen de la esperimentación col folk una de les sos señes d’identidá más notables.

El vienres 2 de Mayu van continuar los actos de cellebración del festival músical Viadiago Rock nel Centro cultural de Vidiago (Llanes) coles actuaciones de les bandes asturianes Dixebra, Spitting Rage, Sinestesia y A.I Band, amás de Dolor, de Cantabria; Incertidumbre, de Guadalajara y Bajo Clero de Madrid. El festival ye na bolera de Vidiago.

Otramanera a les 20:00 hores, va cellebrase en Xixón la VI Folixa del 1 de mayu na Sala Albeniz coles actuaciones de Gomeru, Falanoncaduca, Innershow y Betagarri. Les entraes tan a la venta a los precios de 12 y 14 euros (anticipada y en taquilla). Los beneficios van revertir nos imputaos de Cangues.

Les pandereteres de Dulcamara, Corquieu y Tuenda van ser les bandes encargaes de pone-y el ramu a la quinta edición del festival Ascensión Folk, que se cellebra’l vienres ya’l sábadu n’Uvieu con motivu de la Feria l’Ascención. El conciertu va entamar el sábadu a les 20:00 hores nel Teatru Filarmónica. Enantes, na sesión de vienres van pasar pol escenariu del teatru, Chiquitrinos, Verdasca y Blima.

Dulcamara, con “¡Sali, l.luna!” na cai como un de los discos revelación de los últimos años na escena folk asturiana, remociquen el repertoriu tradicional de música pa pandereta. Tuenda, con Xose Ambás aportando’l so trabayu de recuperación musical, xunto colos músicos Elias García y Pepín de Muñalen (Llan de Cubel y La bandina’l tombo) ye otra de les propuestes con más puxanza del folk actual. Los ribeseyanos de Corquieu, pela so parte, vienen collechando bones crítiques dende qu’asoleyaron “Salia” en 2005.

Los Buges, banda señera na escena independiente asturiana de los noventa, vuelva a casa p’actuar esti sábadu na Casa la Cultura de Mieres, a les 20:00 hores. Habituales de los escenarios asturianos y estatatales y con esperiencia n’otres bandes, el grupu mierense va dar, de xuru, una bona ración del garage-punk col qu’aportaron al panorama musical asturianu va más de diez años.