Música

Güei, vienres 6 de xunu, a les nueve la nueche, el Centru Polivalente “La Baragaña” de Candás, va recibir un conciertu del Coru Mineru de Turón. Nel recital van poder sentise temes como “La esclava”de Masvernet, “Boga, boga” de J. Guridi y temes asturianos como “Axuntábense” de S. Domingo, “Mocina dame un besín” d’A. de la Fuente y “La fiesta na aldea” d’Eduardo Martínez Torner.

El Coru Mineru entamó la so hestoria nel añu 36 y retomóla tres la guerra nos años cincuenta. Dende entos convirtióse nunu de los coros que más tienen viaxao pel mundiu cola música asturiana al llombu.

El grupu folck formáu por, ente otros, Santi Caleya, Merce Santos y David Varela, que se popularizó nos últimos años pol tema “Na caleya”, ta a piques de sacar un nuevu trabayu discográficu, “Trece”, que va asoleyar el sellu asturianu Ámbitu/L’Aguañaz. La páxina d’esta discográfica tien yá un tema pa descargar de baldre.

El célebre grupu de rock asturianu, que l’añu pasáu cumpliere venti años y que nos últimos meses vio nel mercáu “Salú ya dixebra”, un discu homenaxe d’otres bandes, ta acabante de ser escoyíu como representante d’Asturies nel prestixosu “Liet-Lavtut”, un festival de la canción llingües minoritaries entamáu pola Liet Foundation que se celebra Laponia y que ye l’equivalente a Eurovisión pa les llingües minorizaes. Esta va ser la primer participación asturiana na hestoria del festival.

La cita va ser el 18 d’ochobre que vien y n’ella van participar como tolos años vascos, catalanes, escoceses, frisones y una bayurosa representación de grupos que tienen nuna llingua minoritaria la so forma d’espresión.

La organización del festival cuerre a cargu de Sweblul, asociación que representa a les cinco minoríes llingüístiques sueques. La escoyeta de los participantes faila un comité especializáu y el ganador final escuéyelu un xuráu formáu por representantes de distintes llingües minoritaries, esistiendo tamién un premiu otorgáu por votación popular.

Les televisiones d’Escocia, País Vascu, Frisia o Cataluña, ente otres, retresmitieron la gala final d’esti certame, ¿fadrálo tamién la TPA esti añu?.

Xune Elipe, llíder de Dixebra va falar mañana a la una la tarde na Cadena Ser de Xixón (96.5 FM) y dientro del espaciu “Falando d’Asturies”, dirixíu por Inaciu Galán. Será entós cuando desvele delles cuestiones más de la participación de la so banda nesti festival internacional.

Páxina del festival

Esti miércoles 4 de xunu a les 12.00 hores, nel Muséu Etnográficu del Oriente d’Asturies en Porrúa, nel conceyu de Llanes, ca velebrase un alcuentru musical con Xentiquina y Seliquín abiertu al públciu interesáu.

Güei, martes 3 de xunu, a les 18:00 hores, el Conservatoriu Profesional de Música de Xixón organiza, en collaboración col Centru Municipal Integráu de La Calzada, un conciertu a cargu de los alumnos de clarinete dirixíu pola profesora de clarinete del conservatoriu, Ana Mª Pérez Martínez.

Hasta’l xueves 31 de xunetu, a les 14.00 hores, pueden presentase inscripciones pal III Concursu de Baille Asturianu por pareyes de Xixón. El departamentu de Festeyos del Teatru Xovellanos de Xixón cola collaboración de Marina Fernández Hinojal, directora de Coros y Dances del Real Grupu de Cultura Covadonga, tien convocáu esti premiu que va celebrase ente’l vienres 29 d’agostu y el domingu 31 d’agostu del 2008.

Los interesaos en participar nesti VI Concursu xixonés nel que se va fallar el troféu de Gaites Noega podrán facelo nel Departamentu de Festeyos del Teatru Xovellanos de Xixón o al través de l’Asociación Cultural Banda de Gaites Noega, convocantes d’esta sesta edición que se va celebrar nel “Tendayu”, del Pueblu d’Asturies de Xixón. La fase eliminatoria d’esti concursu va producise los díes 15 y 16 de xunetu y la final, na Plaza Mayor dientro de los actos de la programación braniega.

Nesta sesta edición podrán presentase participanetes nes modalidaes de solista, en categoríes infantil y adultos, pareyes de gaita y tambor y pareyes instrumentales de música asturiana.

Esti vienres 30 de mayu, a partir de les 20:00 hores, nel Forum Fnac de Parque Principáu, presentaráse’l nuevu discu Felpeyu, “Canteros” co que’l grupu de folk quier ganar una mayor profundidá na so propuesta musical. El discu ya foi presentáu esta primavera n’Uviéu con un conciertu nel Auditoriu Príncipe Felipe.

La Xunta pola Defensa de la Llingua Asturiana ta acabante asoleyar un discu compactu por mor de la celebración del XX Conciertu pola Oficialidá nel que s’inclúi un corte de caún de los grupos que participaron nel conciertu y amás, un cantar inéditu fechu pa la ocasión pol colectivu Músicos pola Oficialidá.

Garra la Palabra ye pa la Xunta “una nueva demostración del compromisu del mundu de la música asturiana cola reivindicación llingüística y la llucha pola oficialidá”, que vien sumase a les esperiencies anteriores nesti tarrén de la Xunta pola Defensa de la Llingua Asturiana: El doble CD compilatoriu “L’Asturianu Vive, la Llucha Sigue”, asoleyáu nel 2000; y los singles “Fala!”, “Oficiaidá, Un Pasu Alantre” y “Arguyosu”, asoleyaos ente 2005 y 2007.

Garra la Palabra contién los cantares: 1.- Garra la palabra. MÚSICOS POLA OFICIALIDÁ (Música: Sergio Rodríguez – Lletra: Vito Álvarez, Aique García y Xune Elipe). XX CONCIERTU POLA OFICIALIDÁ. 2.- Mañena. DRD (por xentileza de Fono Astur). 3.- La casa gris. LLAN DE CUBEL (por xentileza de Fono Astur). 4.- Chalaneru. NUBERU (por xentileza de Fono Astur). 5.- Xota la punta. TEJEDOR (por xentileza de Tejedor). 6.- La taza. LA BANDINA (por xentileza de Fono Astur). 7.- Suena’l camín. LA COL.LÁ PROPINDE (por xentileza d’Ámbitu/L’Aguañaz). 8.- Trasmerana. XERA (por xentileza de Xera, baxo llicencia Creative Commons). 9.- Térmica, termicae. SKANDA (por xentileza d’Ámbitu/L’Aguañaz). 10.- ¡A cabruñar!. LOS BERRONES (por xentileza de Santo Grial Producciones). 11.- Esto ye Asturies. CHALANERU SOUND SYSTEM (por xentileza d’Ámbitu/L’Aguañaz). 12.- Facer el camín. K-NALÓN (por xentileza de K-Nalón). 13.- Nun ye tarde. SKAMA LA REDE (por xentileza d’Ámbitu/L’Aguañaz). 14.- Ochobre’l 34. GOMERU (por xentileza de Gomeru). 15.- La danza. DIXEBRA (por xentileza d’Ámbitu/L’Aguañaz).

La Xunta pola Defensa de la Llingua Asturiana quixo agradecer “la collaboración solidaria de tolos grupos y compañíes discográfiques que fixeron posible qu’esti discu saliere alantre”.

Los interesaos nel productu van poder mercalu nos llocales de la Xunta pola Defensa de la Llingua Asturiana y tamién, nos próximos díes, en llocales y negocios de toa Asturies. Tamién pue consiguise contactando cola Xunta nel corréu info@exunta.org o nel teléfonu 985 229 553.

L’Iztulbalzeta Gaztetxea va entamar un añu más la “Folixa Asturiarra”, un alcuentru ente los movimientos nacionaliegos d’Asturies y el País Vascu. La edición d’esti añu va ser el 7 de xunu y nel conciertu que va celebrase van participar los grupos asturianos Skama la Rede, Chalaneru Sound System y K-Nalón.

La xornada vascoasturiana va entamar a les doce y media la mañana, cuando la delegación asturiana va ser recibida n’Erromo, onde los anfitriones vascos van facer un actu de bienllegada. Darréu, a la una la tarde, va entamar un “gaitapoteo” dende’l Gaztetxe y a les trés y nedua ka tarde va ser el momentu pa una xinta popular.

La tarde va protagonizala, a les seis, un pasacais con gaiteros que van percorrer les cais d’Erromo pa dempués, a les 20 hores, asistir a la “Preba de Sidra” que se celebrá enantes del actu central del alcuentru, el conciertu nel que participen los trés grupos asturianos yá citaos.