Música

Nuna collaboración ente la Selmana de Folclor de Xixón y los Festivales de L.luarca y de Villaviciosa, estos últimos van acoyer los díes 24 y 25 de xunetu repectivamente, les actuaciones de dellos grupos.

En L.luarca van actuar los sirios “Abdullah Bittar” y el “Grupu Folclóricu Nacional Arfan”, mientres qu’en Villaviciosa van actuar estos últimos amás del grupu chilenu “Millauque”.

El Conceyu Colunga convoca otra edición d’esti premiu nes categoríes infantil y adultu. Nesta categoría el premiu ye una gaita artesana pal primeru, 150 € pal segundu y 100 pal terceru. La inscripción ta abierta dica’l 31 de xunetu.

Bases completes del concursu

Del 25 al 26 de xunetu la villa de Candás va acoyer el XII Festival de bandes de gaites Villa de Candás, qu’esti añu va cuntar cola participación, amás de la Banda anfitriona, de la Banda de Gaitas Xinzo de Limia (Ourense), la Bagad An Hanternoz (Bretaña), La Reina’l Truebanu, Kevrenn an Arvorig y la Bandina d’escolinos de la Banda De Gaites Candás.

El Programa d’esti XII Festival de Bandes de Gaites Villa de Candás, entama’l vienres 25 a les 19.30h con un Pasucáis peles cais de la villa de les bandes de gaites: • Banda de Gaites “Xinzo de Limia” • “Kevrenn an Arvorig” • “Bagad An Hanternoz” Dol de Bretagne • Banda Gaites “La Reina’l Truébanu”

A les 22.30 otru Pasucáis peles cais de la villa de cuntará con toles bandes de gaites participantes nesta edición del Festival y tendrá una posterior actuación na plaza El Cueto con esti horariu: – 00.00h: Folixa Gaitera coles Bandes Participantes, Fest noz (Folixa tradicional bretona) na plaza El Cueto y actuación de la “Bandina la Curuxa” Crepes de baldre, queimada, y delles sorpreses.

El Sábadu 25 el programa entamará pela mañana: – 13.30h: Pasucáis y conciertos peles cais de la villa de les bandes de gaites: • “Kevrenn an Arvorig” • Banda Gaites “Xinzo de Limia” • Banda Gaites “La Reina’l Truébanu” – 19.30h: Pasucáis y conciertos peles cais de la villa de les bandes de gaites: • “Bagad An Hanternoz” Dol de Bretagne • Banda Gaites “La Reina’l Truébanu” • “Kevrenn an Arvorig” – 23.15h: Desfile de toles bandes participantes nel XII Festival de Bandes de Gaites Villa de Candás hasta’l Parque Les Conserveres – 23.45h: XII Festival de Bandes de Gaites Villa de Candás nel parque Les Conserveres.

Dempués del Festival va celebrase un desfile hasta la plaza El Cueto de les bandes participantes nel festival, onde actuará la “Bandina la Curuxa” ente otres coses.

La Bagad An Hanternoz (Bretaña): Procedente de Dol de Bretagne, mui cerca de Normandía y del Mont Saint Michel, esti “bagad” fundóse en 1961 siendo asina ún de los más veteranos de Bretaña. Ye la primer vez que ta n’Asturies y llega tres algamar mui bonos resultaos nos campeonatos bretones d’esti últimu añu. Kevin Colas ye’l so director.

< p>Banda Gaites La Reina’l Truébanu (Asturies): Naz ente medies l’añu 1996 afitándose pal añu 1997.Ta formada por músicos de los conceyos de Bual, Cuaña, Navia, Samartín d’Ozcos, Valdés y Vegadeo, teniendo en común el mesmu profesor: Luis Feito Cano. Como parte de les celebraciones del so décimu aniversariu participó na edición del añu 2008 del Desfile del Día de San Patricio, na ciudá de Nueva York.

Kevrenn an Arvorig (Bretaña) Esti “bagad” intercomunitariu vien del centru del departamentu bretón de Finisterre y yá ta algamando la doble nacionalidá asturbretona depués de dellos años acompañándonos y desfilando per Candás como pela so segunda casa. Tamién recorrió otros munchos llugares d’Europa acarriando la música bretona pa Irlanda, País de Gales, Escocia y Galicia baxo la dirección de Stephane Riou.

Banda Gaites Xinzo de Limia (Galicia): A lo llargo los caberos años, la banda Xinzo De Limia tien participao nun refileru acontecimientos y festivales en Galicia y n’otros llugares como Asturies, Portugal, Francia, Italia y India. Foi campeona de la Liga Galega de Bandes de Gaites en delles categoríes y llega esta edición con una imaxe renovada dafechu. Ta dirixida por Fernando Dopico.

Banda Gaites Candás (Asturies): Dende 1990 vien realizando’l so llabor de promoción y espardimientu de la cultura y música tradicionales d’Asturies. Nos caberos años tien llevao’l nome del so pueblu, Candás, a llugares tan estremaos como Bretaña, Irlanda, Italia, Portugal, Argentina y Uruguay onde los sos conciertos algamaron gran repercusión ente públicu y prensa. Tien previsto actuar esti añu en Bretaña y Palestina. El so director ye Velu Muñiz.

Esti martes, a las ocho la tardi, nel auditoriu Príncipe Felipe de Oviedo celebrarase un espectáculu que va aconceyar a dellos de los más nomáos intérpretes ente los gaiteros del mundu, depués de celebrar ayeri uu coloquiu. La Fundación Príncipe de Asturias organiza estos alcuentros nos que participen Fred Morrison, Jarlath Henderson, Juraj Dufeck, Anxo Lorenzo y Xuacu Amieva y la Bagad de Lann-Bihoué de Lorient, en Bretaña.

Nel trescursu del II Festival Maliayu de Bandes de Gaites celebrose esti añu un homenaxe al “Gaiteru desconocíu” que glosó’l periodista y escritor Lluis Portal y que tuvo representáu na pareya que formaben el antigüu gaiteru de la Banda de Villaviciosa Celestino Gancedo García y l’octogenariu tamboriteru Severino.

Los dos músicos intervinieron na metá del Festival de Bandes de Gaites ya interpretaron un pasucáis enantes de que Lluis Portal ficiera alcordanza de los munchos gaiteros qu’enllenen la historia de La Villa en particular y d’Asturies en xeneral.

Por segundu añu consecutivu, l’orbayu foi protagonista del festival Maliayu de Bandes de Gaites, qu’esti añu si pudo ufrir al numberosu públicu aconceyáu na Plaza’l Güevu de La Villa les actuaciones de la Banda de Gaites de Villaviciosa, organizadora del Festival, xunta les Bandes “Pedro Soler” de Lorca y Castro Bergidum de Ponferrada y la Bagad de Lann-Bihoué.

El festival entamó con un pasucáis a les 8 de la tardi que llevó a les bandes participantes hasta la Plaza’l Güevu. Los participantes esti añu nel Festival foron la Banda de Gaitas Pedro Soler (Lorca), la dBanda de Gaitas Castro Bergidum (Ponferrada. la Banda de Gaites Villaviciosa – El gaitero y la Bagad de Lann-Bihoué (Lorient).

El festival taba organizáu pola banda gaites de la Villa, y yera la segunda vegada que se facía nestes feches y col formatu actual, cuntando cola collaboración de Sidra el Gaitero, l’Ayuntamientu de Villaviciosa, Caxastur , la Conseyería de Cultura y Turismu y col sofitu incondicional de Hosteleros y Comerciantes del conceyu.

El Festival entamó nel Güevu cola Banda de Gaitas Pedro Soler a la que siguió la Banda de Gaitas Castro Bergidum, pa dar pasu darréu al homenaxe al “Gaiteru desconocíu”, a toos aquellos homes y muyeres que nos dexaron en herencia la música asturiana como máxima expresión diferenciadora del pueblu asturianu.

Nesti homenaxe, entró nel escenariu tocando una pareya, formada por un tamboriteru, Severino, de 80 años y l’antigüu gaiteru de la Banda de Villaviciosa Celestino Gancedo García. A continuación, l’escritor y periodista Lluis Portal dio llectura del “textu Homenaxe” pa dar pasu depués a l’actuación del gaiteru eslovacu Juraj Dufek. La Banda de Gaites Villaviciosa con una actuación na qu’ufrió un mix d’Allariz y Aires de Pontevedra, amás del “Set del Campeonatu 2007”, dexó a les clares el por qué de les sosdos victories de la Liga Galega de Bandas en 2005 y 2006 y el subcampeonatu del añu pasáu.

El puntu final púnxolu la Bagad de Lann-Bihoué (Lornet, Bretaña) que dió un bon espectáculu na so llinia habitual.

El grupu folk Los Gatos del Fornu nun pudo actuar por mor de la lluvia que cayere que torgó por motivos de seguridá l’actuación del grupu.

Esta fin de selmana entamó la XII edición del Festival Intercélticu d’Avilés qu’esti añu va desendolcase hasta’l 27 de xunetu nel Palaciu de Valdecarzana y que va cuntar con representantes de cásique tolos países celtes, como d’Escocia que van venir “Culter & Distric P.B.”, los gaiteros Fred Morrison y Stuart Cassels, “Red Hot Chilli Pipers”, y “Tannahill Weavers”; d’Irlanda tarán “Beoga” y “Clasac Irish Dancers”; de Gales l’agrupación de danza “Dawnswyr Tawerin” y de Bretaña van venir la “Bagad Lann Bihoué”, “Merzhin” y “Korriganed Panvrid”.

Entamando por Asturies que va ufrir la principal representación nel Festival, los asturianos van poer disfrutar n’Avilés con Anabel Santiago & Mikel Lee Wolf, “Andolina”, la bandina “La Curuxa”, la banda de gaites Villa de Avilés, la banda de gaites de La Villa, el club colombófilu avilesín, el club La Peonza, el club náutico de Luanco, Dúo Astur, “Esbardu”, “Escontra´l Raigañu”, “Falanoncaduca!”, la cantante de tonada Marisa Valle Roso, “Xaréu d´ochobre”, Rubén Alba y “Pleamar”.

D’Escocia van venir a Avilés la banda de gaites “Culter & Distric P.B.”, el gaiteru solista Fred Morrison, el grupu de folk progresivu «Red Hot Chilli Pipers», el gaiteru Stuart Cassels y “Tannahill Weavers”. D’Irlanda tarán el grupo de folk “Beoga”, de xira por España y l’agrupación de danza tradicional “Clasac Irish Dancers”.

De Gales actuará l’agrupación de danza “Dawnswyr Tawerin”. Y de Bretaña van venir la banda de gaites “Bagad Lann Bihoué”, el grupu de rock celta “Merzhin” y l’agrupación de danza tradicional “Korriganed Panvrid”.

Pa finar, inclúinse nel programa dende Galicia la banda de gaites “Charamuscas” y el grupu de danza tradicional “Inquedanzas”.

La Banda Gaites Llacín acaba de sacar a la lluz el so segundu discu, Xideces, que va presentase esti sábadu 19 nun conciertu que va desendolcase nuna Nueche Folk que tendrá llugar en Porrua (lanes) dende les 22 hores y que va cuntar cola participación de Tuenda, Felpeyu y Corquieu.

Esti segundu trabayu ye una bultable evolución nel camín qu’entamara na primer entrega de la banda fai yá seis años, y que naquellos díes sorprendiera con una fusión de soníos más afayadizos pa grupos folk y la que davezu toquen les bandes de gaites. En tou casu, aquel anicu discográficu que foi Tornallás resultó ser una rabasera d’aire frescu pal panorama musical asturianu.

En Xideces apréciase un pasu alantre más naquel sen qu’entós yá se diba barruntando. Podemos dicir que tamos énte un discu “glocal”, términu que fai referencia a la mestura de lo llocal colo global, vamos, un espeyu del mundu de güei nel que vivimos. Son 11 temes nos que la música tradicional asturiana, les músiques del Arcu Atlánticu, les composiciones propies, versiones d’otros grupos d’Asturies, y inclusu dalgún blizcu a dalguna banda sonora del cine, entemécense p’algamar un resultáu final orixinal y un estilu fácil de reconocer como de la Banda Gaites Llacín. Son nesti orden : Llanes, Tannahill, L’andarina, Viodo, Xideces, Easy Club, De Cimavilla a Somió, La h.oguera, La panadera, Mansorrou y Tonaes. Sobresal nesti discu la participación de collaboradores, qu’arriendes de grandes nomes de la música llariega, son tamién bonos collacios de la banda. Cola so andecha, súmense a esti proyeutu instrumentos que nun avecen a tar nes grabaciones de bandes de gaites. L’elencu de músicos ye bayurosu: Dani Álvarez (flauta travesera), David Mateos “Puru” (bodhram), Diego Pangua (flauta travesera), Dolfu R. Fernández (vigulín octaváu y nikel arp), Fernando Oyagüez (bouzouki), Horacio A. García (contrabaxu), Isidro Suárez (flauta travesera), Jonathan Ward (guitarra acústica), Juan Carlos Cabo “Cabín” (baxu), Lisardo Prieto (vigulín), Marta Elola (voz y pandereta), Merce Santos (zanfona), Miguel Herrero (metales), Pablo Valdés (guitarra acústica), Paul Balmori (bouzouki), Pepín de Muñalén (flauta travesera), Ramón González (vigulín), Roberto Suárez “Rigu”(gaita), Roberto Tana (batería), Roberto Tárano (low whistle), Rubén Álvarez (guitarra acústica y llétrica), Rubén Bada (bouzouki), Sergio Rodríguez (baxu y programaciones), Xosé Antón Ambás (voz), Xuan Nel Expósito (curdión diatónicu). Xideces ye una pallabra de la xíriga, la fala de los teyeros del conceyu Llanes, que tién el significáu de “les coses buenes, les coses guapes, les coses prestoses, l’amor…”, en definitiva, les coses que paguen la pena na vida. Como bonos viaxeros que teníen que dexar atrás munches coses cada vegada que colaben lloñe de casa y como bonos conocedores del preciu que tenía ganase’l sustentu, los teyeros sabíen de lo que falaben. Esti discu intenta ser un llugar d’alcuentru de bonos momentos vivíos pola banda nos últimos años en conciertos, folixes, viaxes a otres tierres y diferentes festivales, y tamién de dalgunes canciones escuchaes per discos que nun intre o otru significaren daqué especial pa la banda.Esa ye la razón del títulu. Los viaxes tantu físicos como los imaginarios que se puedan facer al oír un discu d’otra formación musical, son una parte importante de cualuquier músicu, en realidá de caulaquier persona. Signifiquen dir atropando nueves esperiencies, que siguen siendo la de toles ciencias. Nel casu de la Banda Gaites Llacín valieren pa ganar esa experiencia y sobre too, pa medrar como persones, como colectivu, enriqueciéndose de los conceutos musicales d’otros llugares y cultures más o menos llonxanes anque non por ello ayenes, difundiendo la propia cultura asturiana naquelles tierres y compartiendo momentos impagables colos músicos d’Asturies, pa comprobar qu’a la fin somos parte d’una gran familia espardida con una pasión común: la música. L’oxetivu de Xideces ye trasmitir esi espíritu a quien quiera escuchalu.

Esti vienres 11 de xunetu, a partir de les 22:00 hores, nel Anfiteatru del Fuexu de Cangas, Rafa Lorenzo va presentar en directo’l so conciertu-espectáculu “Primos hermanos”, nuna actuación na que tamién va dase llectura a poemes n’alcordanza del poeta Federico García Lorca y del teatru universitariu La Barraca.

Rafa Lorenzo va tar acompañáu de los músicos Nati Gonzalez (voz y percusión vaquera), Marcos Maoxu (pianu y teclaos), Rafito Lorenzo (baxu eléctricu y guitarres), Jorge Camareli (percusiones) y Ramón Morán (saxo sopranu y teclaos.

Güei, xueves 10 de xunetu, entama en Colunga la XIII edición de los Alcuentros cola Cultura Tradicional d’Asturies qu’entama l’Ayuntamientu al traviés de la estaya de Cultura y a comuña col Gobiernu d’Asturies y Caxastur. La primer xornada va tar dedicada a la tonada y titúlase “I Requexu de la Tonada”, y que va estendese tamién al vienres y sábadu.

A les 12.00 hores, va entamar esta xornada colos “Cancios de Chigre” de Lorena Corripio (de Carrandi-Colunga) y Anabel Santiago (de Casu), acompañaes polos gaiteros Vicente Prado “El Pravianu” (de Llugones) ya Iñaki Sánchez (d’Uviéu).

Yá’l vienres, a les 20.30 hores, la Sala Loreto de Colunga va acoyer el conciertu de Carlos Rubiera y Mari Luz Cristóbal, acompañaos pol pianu de Gabino Antuña y el violonchelo d’Ignacio Alonso.

El llunes 14, zarráu’l “I Requexu de la Tonada”, los Alcuentros van volver con talleres de teatru, conciertos y Mercáu Tradicional hasta’l día 25.