Música

El vienres 12 a les doce la nueche Dixebra va tocar como pieslle de la “Festa major de La Llagosta”, en Barcelona. El sábadu 13, a les 18:40 hores, tarán presentes nel “Aúpa Lumbreras Rock”, en La Granja-Tobarra (Albacete), consideráu ún de los más importantes del Estáu, ta especializáu en «música de la resistencia».

El domingu 7 de setiembre, a les ocho la tarde, na Casa la Cultura de Grau, el grupu Tuenda, dedicáu a la investigación y rellaboración de la música tradicional asturiana, va actuar presentando’l so segundu discu, asoleyáu apocayá.

Güei, xueves 4 de setiembre, dende les ocho la tarde, el restorán Tierra Astur, de Cualloto, va acoyer un conciertu del grupu de fusión Latin-Va. La formación aborda la fusión del jazz y la música llatina con soníos que recuerden al swing, boleru, cha cha, jazz llatinu, mambu…

El grupu de música folk “Tejedor”, formáu polos hermanos col mesmu apellíu, va tocar esti sábadu que vien, 6 de setiembre, en Pravia y dientro de la programación de les Fiestes del Cristu. L’actuación va ser a les 20:00 hores al llau de la Colexata.

Esti sábadu, 30 d’agostu, a partir de les diez de la nueche nel aparcaderu de la Playa de Ribeseya va celebrase’l “Ribeseya Rock” onde van participar Desakato, Dixebra, Mala Reputación, Skontra y Aprieta’l Kulu.

Güei, llunes 25 y a partir de les once la nueche, la Pista de la Esposición-Les Meanes d’Avilés, va acoyer dientro de les fiestes de San Agustín un conciertu del raperu Dark la Eme, que va presentar el so discu nuevu “Underprau”.

Mario Fueyo, conocíu como Dark la Eme, ye MC, DJ, productor, llocutor y músicu pioneru del hip hop n’Asturies y anguaño director del programa Rapsumo na RPA.

A les ocho la tarde va entamar el conciertu nel Parque del Muelle d’Avilés y dientro de la programación de les fiestes de San Agustín, actuando tamién Vicky Gastelo. Nuberu va tocar cola collaboración d’Elliott Murphy, que va acompañáu por The Normando All Stara. El conciertu forma parte de la xira de depidida que tán faciendo los miembro del grupu Nuberu enantes de la so retirada a finales d’esti añu.

Estos díes llegana a los primeros puntos de venta d’Asturies la caxa que recueye los sones y les imáxenes del homenaxe a Nuberu celebráu en Cangues d’Onís nel IV Xaréu d’ochobre, l’añu pasáu. Con una cuidada presentación, el “Tributu a Nuberu” ufre nel so interior un completísimu material que va prestar lo mesmo a les siguidores qu’asistieron a los actos de Cangues qu’a los munchos almiradores que nun pudieron averase a compartir la que los componentes de Nuberu califiquen como “una nueche inolvidable”. La nueche na que Nuberu anunció la so retirada de los escenarios como grupu.

Nel cd I recuéyense les versiones de temes de Nuberu feches por Mala Reputación, Corquiéu, Vaudí, Merienda de Negros, Carlos Martagón y Tomás (de los Demás), el Che de Cabaños, Ramón Prada Trío y Víctor Manuel. El cd II inclúi l’actuación de Nuberu, les pallabres del poeta y lletrista de Nuberu, Manuel Asur y el tributu especial d’Adolfo Nava y los organizadores del Xaréu d’Ochobre.

La versión n’imáxenes del conciertu ta recoyida nun dvd, nel que s’añaden amás imáxenes de Nuberu dende va trenta años. La entrega complétase con un folletu de 24 páxines a tou color, con testos d’Adolfo Nava, Manuel Asur, Alberto Toyos y Javier Blanco, y semeyes de Fabián Fernández, Javier G. Caso y José M. González Roces.

Amás, y según anunció’l grupu estos díes, la Productora de Programes del Principáu prepara un documental sobre la hestoria del grupu que va emitir la TPA.

Güei, miércoles 20 d’agostu, Avilés acueye la presentación del discu nuevu del grupu del compositor Xaime Arias, “Xaime Arias Trío”. A partir de les nueve y media la nueche, la Plaza d’El Carbayeo va ser el llugar escoyíu pa presentar esti nuevu discu del músicu qu’enantes perteneciere a la formación “Quatro Jazz Quartet”.

La decana de les nuehes celtes asturianes entama la so venticinco edición nel pueblu de Porcía, nel conceyu d’El Franco, el sábadu 30 d’agostu. La Nueche va entamar a les once cola participación de la Banda de Gaites “Trasno”, y los grupos “El Cabazo”, “Cábada”, “Corquiéu”, “Tannahill Weavers” y “Skanda”.

Dende l’añu 1983 l’Asociación Cultural Alameda entama l’últimu sábadu d’agostu esti alcuentru ente’l folk d’Asturies y Galicia.