Música

El sellu autoxestionáu Xunca Records entama la II edición del Conciertu Rude Gaita. Tres les bones sensaciones del I Rude Gaita, cellebráu en Xixón n’Avientu del 2007 en collaboración col Centru Social Sestaferia, Xunca Records llánzase agora a entamar en solitariu esta segunda edición del éxitosu conciertu mencionáu.

Nel II Rude Gaita, que tendrá llugar el prósimu sábadu 31 de Xineru, a partir de les 19:30 h. nel CSOA La ReFLEXón (Avda. Príncipe d’Asturies, 19, La Calzada, Xixón), cuntaremos cola participación de los grupos Fala Non Caduca, Skama la Rede y Talco.

Los primeros en saltar al escenariu sedrán Fala Non Caduca, grupu mozu que fae una música qu’ellos mesmos definen como mecigayu son, y cuyos componentes repártense ente La Pola L.lena, Uviéu y Xixón/Leioa. Dempués d’un 2008 nel que casi nun pararon de dar conciertos per tola xeografía asturiana, amás de Llión y Cantabria, entamen esti 2009 col mesmu puxu o incluso más col que terminaron l’añu pasáu, yá qu’en poques selmanes saldrá a la cai una maqueta autoxestionada del grupu, con 6 temes, que llevará’l títulu de “En llingua afilada”.

A continuación, y pa siguir animando l’ambiente, saldrá a escena Skama la Rede, ún de los grupos veteranos del panorama musical n’asturianu. El grupu ska-rock del Cabu Peñes faerá un altu nel camín na grabación del su prósimu discu pa participar nesti II Rude Gaita, y dempués d’ésti y otru conciertu na Casa Sindical de Xixón pal mes qu’entra, volverán a parar na cellebración de conciertos pa centrase nel prósimu discu de nueu.

Y pa finar, el tercer platu fuerte de la tarde-nuechi. Llegaos dende Marghera, n’Italia, el grupu de ska-punk-patchanka Talco. Sedrá la segunda vez que toquen n’Asturies, dambes de la mano de Xunca Records, y nesta ocasión vendrán pa presentar el su nueu discu “Talco 09”, una edición de Maldito Records qu’axunta los sus dos últimos trabayos, “Combat circus” y “Mazel Tov”, dientru d’una xira mundial que los va llevar a países tan diversos como Catalunya, Croacia, Alemania o México.

Talco entama como banda de ska-punk, y col pasu’l tiempu consolida un estilu propiu que mece los ritmos patchanka típicos de Mano Negra col punk o el ska, la inclinación pola música balcánica y kletzmer, y que tién siempres presente a los cantautores italianos, padrimoniu perimportante pa la banda, sobre too polo que concierne a les lletres.

El preciu de les entraes pa esti conciertu sedrá de 6 € anticipada y 8 € en taquilla, pudiendo mercase les entraes anticipaes nos siguientes puntos:

Candás: La Gueta La Pola L.lena: Cinema Rock Bar y Hamburguesería El Boquéu Uviéu: Cecchini y Casa Posafuelles Xixón: Baruku, Folixa Rock Bar (Cimavilla), Folixa Sound Club (Náuticu), CS Sestaferia y Xarana Rock Bar.

La FNAC, asitiada nel centru comercial Parque Principáu, en Siero, va acoyer esti sábadu 24 de xineru a les siete la tarde la presentación del so nuevu trabayu “Camin d’Arcana”.

El grupu asturianu de folk melódicu Gueta na Fonte ta dirixíu pol músicu Mento Hevia y llega con esti al so segundu trabayu dempués del discu “Como agua de mayu”.

La programación de la Rede Rexonal de Teatros de la Conseyería de Cultura, Turismu y Artesanía de la Xunta de Comunidaes presenta esti sábadu 24 un conciertu del gaiteru asturianu Hevia nel Gran Teatro de Manzanares, na provincia de Ciudá Real.

El conciertu va celebrase a les ocho la nueche y nél va presentar los temes del so discu últimu, “Obsession”, el que munchos consideren el so discu más “chill out”, qu’amás contién el tema central de la pèlícula “Luz de domingo”, de José Luis Garci, na que José Ángel Hevia apaez como actor nun pequeñu papel.

Hevia esportó la música popular fuera de les fronteres d’Asturies y del estáu, vendiendo hasta’l momentu más de dos millones y mediu de discos en tol mundu y consiguiendo gallardones como Discos d’Oru y Platinouen llugares tan estremaos como Italia, Hungría, Bélxica, Dinamarca o Nueva Zelanda, ente otros.

La serie “Doctor Mateo”, que se rueda en Llastres (Colunga) y na que participen actores de tol estáu, como Gonzalo de Castro y Natalia Verbeke, xunto con dalgunos asturianos bien conocíos como Lluis Antón González, amás de la collaboración como estres de munchos llastrinos, va tener tamién música fecha n’Asturies.

El grupu de L.lena “La Col.lá Propinde” ye’l creador de dellos temes de la serie que va estrenase ceo na cadena estatal.

La serie cunta la hestoria d’un médicu que dexa Nueva York pa treslladase a un pequeñu pueblu costeru, Llastres, que na serie va llamase “San Martín del Sella”.

El Centru okupa “La ReFLEXón” celebra esti sábadu una xornada de solidaridá y con confraternización convocada pol Fondu xUnitariu de Solidarida Obrera d’Asturies. L’actu central del día va ser un conciertu nel que van participar: Hechos contra el Decoro, Desechos, y Aarma X, MC de los yá estintos Stoned Atmosphere.

La entrada, cola que se pue asistir inclúi la participación nun sortéu de material de Sestaferia y Picu Rabicu, y tien un preciu de 5 euros en venta anticipada y 8 na puerta. Los beneficios van destinase “a paliar económicamente los casos represivos que se vienen sucediendo nos últimos tiempos”, según afirmen dende FxUSOA.

El pasáu llunes 5 de xineru tuvo llugar la presentación ya inauguración pública de www.fnast.net, mediu de comunicación dixital de la escena musical alternativa asturiana.

Basáu nuna filosofía de sofitu a los grupos de música minoritarios, de defensa de la llibre cultura y difusión musical y espresándose en llingua asturiana, fnast.net surde col enfotu de rellenar les grandes carencies informatives sobre la escena musical asturiana esistentes anguañu n’Asturies, daqué que afecta direutamente a los músicos y aficionaos que sufren un silenciu mediáticu mayoritariu.

Puxando siempre por informar del panorama musical asturianu ayenu a los grandes ámbitos comerciales, fnast.net musicalmente ye un mediu plural, que ufiertará noticies de los diferentes estilos musicales que se trabayen nesta tierra, naguando asina por abrise a campos y públicos estremaos.

En formatu web, pero xugando con elementos audiovisuales y con otros más carauterísticos de la prensa escrita, fnast.net nagua por actualizar diariamente les noticies y l’axenda de conciertos d’Asturies. Pero ehí nun se queda la llabor d’esti mediu de comunicación y ye que mensualmente ufiertaránse reportaxes musicales y d’actualidá social, entrevistes, una columna d’opinión o reseñes de les novedaes discográfiques, ente otres coses.

Esti mediu de comunicación tien como antecedente’l fancín “Fechu n’Asturies”, publicación escrita que, nacida nel añu 2007, dio lluz a tres números diferentes y que, ante les posibilidaes que les nueves tecnoloxíes ufierten, da el saltu al formatu dixital.

Señalar tamién qu’esti proyeutu ta formáu por un equipu de redaición, mayoritariamente de xente mozo, y collaboraores ente los que figuren dalgunes persones relacionaes cola escena musical d’Asturies.

Dirección de la nueva web

Ciquitrinos y Gastos del Fornu van facer esti añu una xira conxunta pa presentar los sos nuevos trabayos, ‘Faciendo l’indio’ y ‘Na Cai’ respeutivamente, sigún dieron anuncia nuna rueda prensa celebrada nel salón d’actos del Real Institutu d’Estudios Asturianos (Ridea), que presentó l’actual director del Festival Intercélitu de Lorient, l’asturianu Lisardo Lombardía.

Los grupos camienten entamar la xira nos caberos díes de xineru per tola xeografía asturiana, pa depués dir a tocar a Galicia, Castiella o la capital española.

El Xardín Botánicu de Xixón organiza esti domingu, 4 de xineru, a partir de les 12:30 hores y dientro del ciclu “La viesca animada”, una sesión cola presencia de l’harpa y del investigador y músicu tradicional Dani García de la Cuesta, autor del llibru “L’Harpa y la so presencia n’Asturies”.

Na actividá, qu’organiza’l periodista y divulgador Pachi Poncela va apurrise información sobre l’instrumentu y la so etimoloxía, simbolismos, desendolque históricu… y otres cuestiones d’interés.

Esti vienres 2 de xineru La Bandina va facer la presentación nel Teatru Filarmónica d’Uviéu del so últimu discu, “13”, conciertu nel que van contar con una bona riestra de collaboradores que grabaron nel discu, entamando por Alicia Álvarez (Pauline en la playa), que punxo voz y lletra al “Valse Coxu”, y Xosé Ambás, que foi la voz na danza “Nun vas sola”. Xunta ellos tará tamién un curdionista pernomáu, Alain Pennec, y Pascal Guingo, campeón bretón de bombarda y gaita bretona, Jean Michel Mahevas director de gaites de la banda Locoal Mendon, y Eric Quémerè y Joël le Guillant, gaiteros de la banda Kevrenn Alré.

La formación de La Bandina componenla anguaño Merce Santos (Zanfona) Santi Caleya (Gaita Asturiana, Saxo Sopranu) Toño Gomez (Trombón, Bombardino) Agustin Lara (Trompeta, Fliscornu) Juanjo Diaz (Tambor Asturianu, Caxón, Percusiones) Pablo Pumarada (Bodhram, Darbouka, Congues) Pedro Claro (Baxu) y David Varela (Curdión Diatónicu, Voz). El conciertu, entamará a les 20 hores y tien un preciu de 6 €, na venta anticipada nel teatru Campoamor.

Esti sábadu 27 d’avientu, la banda Gaites Llacín tuvo na Gala que se celebró en Mieres nel Auditoriu Teodoro Cuesta per aciu de la entrega de los Premios de la Crítica musical asturiana, qu’ufrió en directo la TPA y la RPA, onde foi racompensáu el trabayu desendolcáu nel segundu CD de la banda llanisca tituláu Xideces, escoyíu pol xuráu “Meyor Discu Folk del Añu”, nun eventu nel que tamién tuvieren premiu otres figures y grupos del mundo musical asturianu de la talla de Ramón Prada, Tuenda, Llangres, Héctor Braga…, caún nes sos categoríes.

Recoyeren el galardón los miembros de la formación musical, con unes pallabres d’agradecimientu de Vítor Carbajal nel so nome y nel de Nuria Tarodo como directores de la mesma y de Lisardo Prieto como productor del discu, pa col xuráu de la Crítica, a los qu’integren la banda y a la bultable aportación de la bayura de colaboradores y al equipu técnicu nel resultáu final del trabayu.

El discu XIDECES ye un proyeutu qu’aportó a bon puertu gracies a la ilusión, sofitu y enfotu de munchos: arriendes de los componentes de la propia banda, tanto los Estudios TUTU de Corvera onde entamó la grabación na primavera de 2007,como l’Ayuntamientu de Llanes y el colectivu formáu pola Asociación Cultural y Etnográfica Llacín, implicáronse nesta aventura dafechu dende l’aniciu. Pero no que cinca a lo musical, nótase’l talentu del elencu de colaboradores de primer orden qu’apaecen en Xideces: Dani Álvarez (flauta travesera), Moisés Suárez(guitarra), David Mateos “Puru” (bodhram), Diego Pangua (flauta travesera), Dolfu R. Fernandez (vigulín octaváu y nikel arp), Fernando Oyagüez (bouzouki), Horacio A. García (contrabaxu), Isidro Suárez (flauta travesera), Jonathan Ward (guitarra acústica), Juan Carlos Cabo “Cabín” (baxu), Lisardo Prieto (vigulín), Marta Elola(voz y pandereta), Merce Santos (zanfona), Miguel Herrero (sec. metales), Pablo Valdés (guitarra acústica), Paul Balmori (bouzouki), Pepín de Muñalén (flauta travesera), Ramón González (vigulín), Roberto Suárez “Rigu” (gaita), Roberto Tana (batería), Roberto Tárano (low whistle), Ruben Álvarez (guitarra acústica y llétrica), Rubén Bada (bouzouki), Sergio Rodríguez (baxu y programaciones), Xosé Antón Ambás (voz) y Xuan Nel Expósito (curdión diatónicu).

El discu garra’l nome d’una de les pieces compuestes por Vítor Carbajal, y xunto con ella, alcuéntrense otros temes nos que l’espíritu de fusión del soníu de banda gaites col folk reconozse abondo nun viaxe que va dende la tradición de la tonada asturiana (Lloraba una cabraliega, En la gaita traigo Asturias,…) y de los bailles, dances y ofrendes tradicionales (Trillu, Ramu Vibañu, La h.oguera,…) a delles igües de temes irlandeses o bretones.

Frutu d’esti álbum, la Banda Gaites Llacín entamó a presentar un espectáculo en vivo nel que dexando a un llau pa la ocasión el traxe tradicional asturianu, xuben a escena como una formación musical más, pa ensin dexar de ser una banda gaites, acompañase de músicos de grupos como Felpeyu, Tuenda, Corquiéu, Niundes, Blima, Vaudi, Danzaina, D’Escarpinos (baille), arriendes de xente como Tejedor o dellos componentes de la Bagad Kemper, la llaureada banda bretona cola qu’hai una gran amistanza dende fai años.

L’espectáculu XIDECES yá foi presentáu con una bona acoyida del públicu en Porrúa nel mes de xunetu pasáu, nel Festival Internacional de Folk de Getxo, y nel Festival Llanes al Cubu, onde la banda aprovechó pa grabar un DVD en vivo que va presentase nunos meses pa propmocionalu dientro y fuera d’Asturies.

El Premiu al Meyor Discu Folk del Añu súmase a otros reconocimientos recibíos pola Banda Gaites Llacín, como’l “Best Overall Band” de 2007, que la coronó como campeona del St. Patrick’s Day Festival de Dublín.