Música

Esti sábadu 16 de mayo, a les 20,30 hores, nel Auditorio das Quintas del Conceyu d’El Franco, na Caridá, va entregase’l XVIII “Premio Xeira de Narracióis Curtias” al autor franquín Iván Iglesias, Cazarón, pol relatu entituláu “El Maño” con un conciertu del grupu Bacotexo, que l’añu pasáu editara’l primer discu en gallego-asturiano.

Esta ye la principal novedá del actu d’entrega, d’entrada llibre: l’actuación del grupu tapiegu Bacotexo que presenta asina otra vuelta na zona’l so primer discu “A máquina del tempo”.

El grupu ta formáu por Marcos Nogueiro, Daniel García y Ricardo Saavedra (estos dos últimos, ex-Babilon Chat), los dos primeros son de Tapia y l’últimu de Bual.

El grupu ñació movíu pol interés “d’atopar novas sonoridades al xénero del rock col uso esclusivo da fala eonaviega”, referiéndose, según los miembros del grupu “metafóricamente a un viaxe imaxinario hacia outros espacios temporales, reales ou ficticios, unde lo esencial é el conocemento emocional a través das esperiencias evocadas, suxeridas ou esfarelladas en narracióis”.

Los miembros de Bacotexo compuxeron 12 temes pa esti primer CD, ente les que tán “Vamos a queimar el cielo”, “As de corazóis”, “Vazamar”, “Submarín nuclear” o “Cancióis de revolución”. Trés d’elles puen sentise nel so myspace.

Spanta la Xente presenta’l so primer discu esti sábadu 16 de mayu, a partir de les 20 hores, nel Teatru Vital Aza de La Pola, en conceyu de L.lena, embaxo’l títulu de “Fíos d’esta tierra”. Son doce temes, mayoritariamente de composición propia, con lletres que falen de la hestoria d’Asturies o l’actualidá, con referencies a la emigración, el trabayu na mina. Musicalmente muévese nun estilu claramente folk-rock, cola combinación d’instrumentos eléctricos y acústicos.

D’ente les collaboraciones rexistraes nel discu destaca la del cantante Chus Pedro, que tamién ye’l productor executivu col so sellu discográficu La Mula Torda.

Spanta la Xente naciera en La Pola (L.lena) nel 2006 y tien yá abondo tocao pola escena asturiana.

La sidrería Tierra Astur de Cualloto, acueye esti xueves 14 de mayu, a partir de les 22 hores, una actuación del grupu Zapica, dientro la so programación añal de conciertos.

Zapica ñació l’añu pasáu col enfotu de trabayar colos cantares tradicionales asturianos y ye una formación compuesta por músicos con abondos años d’esperiencia na escena folk del país.

El cantautor Toli Morilla, ún de los representates más esitosos de la música asturiana d’anguaño, ta acabante sacar al mercáu “Diez cantares de Bob Dylan n’asturianu”, un trabayu que define como «dalgo natural» pola influencia que siempre tuvo’l músicu norteamericanu nel so llabor compositivu.

Nel discu apaecen temes como «Sara» o «Knockin’ on heaven’s door», con dellos cambios autorizaos pola discográfica de Dylan.

Toli Morilla asoleyare hasta agora cinco discos, dellos en castellán, con temes n’asturianu, y otros defechu n’asturianu: “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

El compositor y músicu madrilanu Antonio Vega fallecía esti día a los 51 años por mor d’una neumonía, consecuencia del delicáu estáu de salú qu’arrastraba dende va cuantayá.

El músicu, que llevaba dellos díes ingresáu nel hospital madrilanu Puerta de Hierro, entamó la so carrera en 1980 al frente de Nacha Pop y diez años más tarde anició una trayectoria en solitariou.

En 1978 formó la banda Nacha Pop que provení d’otra banda, Uhu-Helicopter, na que militaba’l so primu Nacho. En 1980, Nacha Pop editaĺ so discu de presentación y en 1988 el grupu separtaríase definitivamente y tras esto Antonio comenzaría su carrera como solista.

El Salón d’Actos del Centru Municipal Integráu Pumarín-Xixón Sur va acoyer un recital entamáu pol Conceyu de Xixón n’andecha cola Asociación d’Intérpretes de la Canción Asturiana (A.I.C.A.). N’esta sesión nueva van cantar Rogelio Suárez Menéndez y Fernando García Nuño, y va poner la música, el gaiteru Hugo Noval. Ta prevista tamién l’actuacion del grupu de teatru Rosario Trabanco. La entrada ye de baldre.

La xuntanza de cultura tradicional gallega y asturiana que dende hai unos años se celebra con la pandereta como motivu principal va tener nel conceyu de Santu Adrianu’l próximu fin de selmana la so fecha. L’Alcuentru de Pandereta Gallega y Asturiana aporta a la so séptima edición esti 6 de mayu.

la principal actividá del alcuentru van ser los conciertos d’un grupu asturianu de pandereta y otru gallegu. Dende Galicia van participar Veña que vai!, dende O Morrazo, mientres que pela parte asturiana van tar Les Pandereteres de Nerbia.

Dientro de la programación estable de conciertos qu’entama la sidrería Tierra Astur de Cualloto, el xueves 30 d’abril dende les 21:00 hores van actuar Duerna, un cuartetu que xurdiera’l branu pasáu y que nun se califica como un grupu folk propiamente dichu nin una bandina tradicional sinon como una propuesta a mediu camín ente les dos formes de presentación grupal.

El grupu emplega gaita, tambor, bombu, guitarra y harmónica, ufriendo un repertoriu que llama al baille con ritmos de muñeira, xotes, saltones, sones, rumbes, pasodobles, tangos y habaneres, al qu’axunten tamién dalguna composición propia. Los integrantes de Duerna son Andrés Martínez, Estefanía Moro, Pedrín y Pablo Carrera, toos ellos músicos de la Cuenca del Nalón.

El conceyu de Xixón acueye esta tarde delles actuaciones d’interpretes d’asturianada, dientro del yá tradicional circuitu “Asturianada nos centros municipales”. Los recitales tán organizaos pola Fundación Municipal de Cultura en collaboración cola Asociación d’Interpretes de la Canción Asturiana.

La primer de les actuaciones va celebrase a les siete la tarde nel Centru Municipal de Contrueces y va cuntar cola participación de Juan Robledo Iglesias, Silvia Suárez García y Manuel Roces Roces, tocando la gaita Rubén Rodríguez Martínez y presentando l’espectáculu José Luis Fernández Trubia.

Media hora más tarde, nel Atenéu de La Calzada l’actividá va tar al cargu de los cantantes Jorge Tuya Rivas, Luís Estrada Fernández y Mª Luz Cristobal Caunedo y el gaiteru Óscar Fernández González, presentando l’actividá Julio César Baragaño.

La Sala Acapulco del Casinu d’Asturies, asitiáu na Cuesta Begoña, en Xixón, va acoyer güei xueves, un conciertu del cantante arxentín Coti. Nel recital, que va entamar a les diez de la nueche, va presentar los temes del so discu últimu, “Malditas canciones”.