Música

La música de L.lena ta d’estrenu. La formación “Spanta la Xente” va presentar güei, xueves 25 de xunu, a partir de les nueve y media la nueche el so primer trabayu discográficu “Fíos d’esta tierra”. El conciertu va celebrase na Sidrería Tierra Astur de Cualloto.

“Spanta la Xente” ta conformáu por xente mozo que s’axuntó en 2006 y que faen música ente’l pop, el folk y el rock. Chus Pedro (ex-Nuberu) ye’l productor executivu col so sellu discográficu La Mula Torda y ún de los collaboradores del discu.

El grupu asturianu “Skama la Rede”, va presentar esti sábadu 27 de xunu nun conciertu na Playa de Xibares, en Lluanco, y acompañaos del grupu de Villaviciosa “Flying Padres”, la so formación nueva, cola que van grabar a finales d’esti añu’l so tercer discu.

La nueva formación d’Skama la Rede compónenla Míguel Fernandi, que sigue como voz del grupu, Edu Fernández y David Suárez “Xua”, na guitarra y nos coros, Fonsu Sánchez al baxu, José Ángel Rodríguez “Llou” de batería, Fer Ortiz a la trompeta y Xandru Vega a la gaita.

Pal conciertu, ALSA va poner autobuses curuxa dende Lluanco y Xixón.

El Conceyu Bimenes tien abiertu, hasta güei, llunes 22 de xunu, el plazu p’apuntase al “X Concursu de Gaiteros y Gaiteres Mozos”, nel que puen participar rapaces d’hasta 21 años d’edá. Les feches de cellebración son el 27 de xunu (semifinal) y el 4 de xunetu (final). Más información nel teléfonu 985700367.

Güei, martes 23 de xunu, a partir de les siete y media la tarde, el Centru Municipal Integráu Pumarín-Xixón Sur va acoyer l’espectáculu “Floréu de canción asturiana”, protagonizáu polos músicos Mento Hevia (al pianu llétricu) y Xuacu la Miranda (a la gaita y como vocalista).

Nel espectáculu del dúu axunten cantatres tradicionales y populares asturianes y tamién dalguna pieza instrumental, ufiertando adaptaciones de pieces como «Carretera de Cualloto», «Soi de Llangréu», «Al pasar pel puertu», «Cabraliega», «Rumba d’Ibias», «Tienes casa y tienes horru» o «Xota de L.leitariegos».

El programa de celebración de la Fiesta de la Música en Villaviciosa acueye esti vienres 19 de xunu a les 21 hores nel Teatru Riera l’actuación de Fred Morrison, consideráu por munchos el meyor gaiteru del mundu y visitante davezu de les fiestes folk asturianes.

La entrada ye de baldre hasta completar l’aforu.

Güei xueves, 18 de xunu, a partir de les seis de la tarde, el cantautor Alfredo Gonzalez va ufiertar una actuación colos cantares de “La nada y tu”, el so discu últimu, onde apaecen poemes musicaos d’autores como Xandru Fernández, Pablo Texón, Antón García o Vanessa Gutiérrez. FNAC asítiase nel centru comercial Parque Principáu.

Esti sábadu que vien, día 20 de xunu, va tener llugar nel llagar de lolina de Nava la primer Folixa de la Música, organizada pol serviciu de Mocedá de la Comarca la Sidra y cola collaboración de Caxastur, el conceyu de Nava y l’asociación Ruiu Nora, nel marcu de les cellebraciones de San Xuan y del Día Internacional de la Música.

Como remate del cursu acabante de terminar, primero de too van actuar, Angel Black y Sumisión, dos moces formaciones compuestes por alumnos de la Escuela de Música de Nava. Depués va poder disfrutase del prestosu rock de Losone, con influencies del rock alternativu americanu y inglés, dende los Pixis a Radiohead o’l grunge, y cola orixinalidá d’amestar una violinista a la so formación clásica de Banda de rock.

El soníu hiphop más actual va ser el protagonista nel escenariu mientres l’actuación de En mayúscular, colectivu sierense qu’axunta a miembros de formaciones anteriores como Adictos sin remedio, Cuatro Ases o Algo serio. Zarra’l cartelu’l grupu d’indie-pop Cömic, formáu por es-miembros de Mister Fiction, banda qu’a finales de los noventa goció de ciertu protagonismu na escena cola edición del so EP homónimu de debú y del LP “El País de los Muñecos”. Grupos yá clásicos de la escena indie estatal como Los planetas, Niños Mutantes o Los piratas, xunto con referentes del rock alternativu foráneu, son les influencies más destacaes na música d’esti grupu uviéin

La Conceyalía de Cultura Lleonesa de la ciudá de Lleón entama güei miércoles a partir de les nueve la nueche’l III Festival Celta Internacional Reinu de Llión “col envís de dare continuidá al festival que yá tuviera dúas ediciones más n’años anteriores”. El festival que va desenrollase na Plaza Don Gutierre, xunto al palaciu col mismu nome, va cuntar con grupos musicales de dellos países celtes.

Güei miércoles a partir de les 21,00 hores van actuar Awen Magic Land, de Bretaña. Mañana xueves, a la mesma hora va ser el momentu de Gandalf, de Lleón.

El vienres a les nueche la nueche va actuar Gatos del Fornu, representando a Asturies y el sábadu a les diez, Beoga, d’Irlanda.

El domingu a les 21,00 hores va pesllase’l Festival col escocés Fred Morrison.

Yá se conocen delles de les feches nes que va actuar Dixebra esta branu. La primer cita va ser el 20 de xunu nel Parque L’Oeste d’Uviéu nos Alcuentros de Trebolgu, onde tamién van tar la bandina La Curuxa y el gaiteru escocés Fred Morrison.

Dempués de dellos años ensin tocar ellí, Dixebra va llegar esti mes a la foguera de San Xuan de Trasona. Amás van tar, tamién nel mes de xunu, nel “Castrillón Solidariu”, el vienres 26.

Esti sábadu, trece de xunu, entama una charla-alerique sobre l’Asturianada, un complementu pa l’asignatura de tonada y pal taller d’acompañamientu de tonada del Conservatoriu de Llangréu, pero que según los organizadores “ye perinteresante pa toles persones que quieran conocer meyor esti xéneru asturianu”.

Ismael Arias ye escritor y productor musical. Tien escritos una montonera d’artículos dedicaos a l’Asturianada y a los cantadores de la mesma amás d’un llibru d’ensayu sobre’l tema, espublizáu nel 1998 “L’Asturianada” .

El Conservatoriu Profesional de música “Valle del Nalón” organiza esta actividá d’entrada llibre hasta enllenar l’aforu.