Música

El Concursu Folk “Cuarto de los Val.les” volvió a coronar a un asturianu como ganador 10 años depués al nomar vencedor al músicu llangreanu Héctor Braga, que da un pasu más na so brillante trayectoria de Concursos de folk y música popular que lleva dende l’año 2000 aupándolu a lo más granible del folk asturianu.

Héctor Braga recibe esti premiu nun momentu importante, ya que s’alcuentra preparando’l que va ser el so prósimu álbum.

Páxina Web d’Héctor Braga

Los escolinos de música tradicional de la Escuela de Música de Mieres van ser esti sábadu dende les 12 na TPA los protagonistes del programa “Nós” que dirixe y presenta’l director d’Asturnews, Próspero Morán, col caberu de los Microconciertos qu’ufrieron a los pás y vecinos de la villa nesti cursu escolar.

Dende va un tiempu, los escolinos de música tradicional ufren microconciertos nos qu’amuesen a pás y otros escolinos los instrumentos qu’adeprenden a tocar y nel caberu d’esto Microconciertos tocó-y la vez a la gaita y la’acurdión.

Los escolinos de Mieres del Camín, más concretamente los de Turón ue participen nos talleres de rock que se vienen desendolcando dende hai unos años, ya foron protagonistes de la emisión d’otru sábadu del espaciu “Nós” qu’emite la TPA.

La Conceyalía de Cultura del Conceyu Mieres entamó hai poco más d’un mes el I Festival de Rock & Guaje, que cuntó cola actuación de los grupos Pingüinos Asesinos, Fracaso Escolar, Doctor Centollu y Los Bichosaurios; formaos por rapazos menores d’edá en talleres de rock y que canten delles canciones n’asturianu. L’actividá tuvo llugar nel Parque del Atenéu de Turón. Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.

El Troféu de Gaites Noega-VII Concursu de Gaita de Xixón llega a la fase final, onde los músicos que superaron les fases previes van competir güei, día 28 y mañana, 29 de xunetu, por ganar el primer gallardón. La organización fixo pública la llista de finalistes nes modalidaes de Gaita Solista Infantil y Adultos, Gaita y Tambor, y Pareyes Instrumentales.

En Gaita Solista Infantil clasificáronse Álvaro Álvarez Fernández y Marcos Chacón Cadenas, y na d’Adultos, Francisco Fernández Álvarez, Araceli Canal Morandeira, Pablo Carrera González y Jorge Suárez Carbajal. Nes pareyes de Gaita y Tambor pasaron a la final Daniel Fernández Rodríguez y Andrés Molinos Suárez; Pablo Carrera González y Estefanía Moro Montequín; y Jorge Suárez Carbajal y Carlos Suárez Carbajal. Nes Pareyes Instrumentales van competir Pablo Carrera González y Héctor Braga Corral.

La Plaza Mayor de Xixón va acoyer esta celebración a partir de les 19 hores. Mañana miércoles 29, celébrase’l certame con otro músicos que tamién se clasificaron nel concursu: Javier Menéndez González y Fabián Fernández Fernández, na categoría de Gaita Solista Infantil, y na d’Adultos, Jesús Fernández González, Hugo López Martínez, Daniel González Fernández y Marco Antonio Guardado del Valle.

La pareya formada por Daniel González Fernández y Marco Antonio Guardado del Valle ye una de les clasificaes en Gaita y Tambor, que va competir con Álvaro García Suárez y Simón San José Lorenzo. En Pareyes Instrumentales llegaron a la final Jesús Fernández González y Lucía Menéndez Rodríguez, que van competir con Daniel González Fernández y Marco Antonio Guardado del Valle.

La Danza de Santa Ana na Plaza de la Merced peslló esti domingu’l Primer Festival Beltaine, depués de que na nueche del sábadu los bretones de Pennou Skoulm precedieran en Les Aceñes a Tejedor nel que foi conciertu cimeru d’esti aconceyamientu de cultura, música y folclor de diez llargos díes d eprogramación.

Tres del conciertu multitudinatiu de Tejedor en les Aceñes, qu’amosó la calidad del gruu de los tres hermanos avilesinos, la xornada del domingu trescurrió ente l’animaciónna cai de los danzantes bretones ya irlandeses y la desfile de los grupos participantes peles cais d’Avilés hasta’l Compluexu de Deportes d’El Quirinal onde tuvo llugar l’espectáculu Llume de Beltaine.

El Beltaine aporta esta fin de selmana a los sos caberos díes con Tejedor y Pennou Skoulm como protagonistes cimeros por mor del conciertu que van ufrir na nueche d’esti sábadu, depués de que Pepe Vaamonde y la gaita gallega ficieran protagonista a la música tradicional otra vuelta el vienres nel Festival.

L’actuación de Vaamonde, tres del éxitu de públicu qu’algamaren los Gaiteros de Lisboa sobre’l mesmu escenariu una hora enantes, foi ensin dubies la comunión colamúsica tradicional, depués de los ritmos de fusión lisboetas y d’una xornada tan intensa como afayadiza.

Esti sábadu, amás de les actuaciones cimeres de Tejedor y los míticos bretones de Pennou Skoulm van ufrise una amuesa y competición de deportes tradicionales ente los asturianos de la Peña 6 Conceyos y los vizcainos de Herri Kirol en la Pista la Esposición en Les Meanes y un conciertu didáuticu de los asturianos Mestura a partir de les siete en les Aceñes.

La otra cita importante de la xornada va ser la del Grupu Vezos y la so amuesa musical de los Ramos del oriente na Plaza de Cammposagrado.

Dende fai unes selmanes, el Gaiteru Chus Solís vien preparando un nuevu espaciu na rede sobre la gaita: l’espaciu ye un potpourri ente blog y web pa facer dalgo que sella un poucu más estáticu en cuantu conteníos a modu de presentación del só trabayu.

Nesti blogue alcuentrense dellos apartaos, munchos entá en construcción, que diran medrando pouco a pouco, amestando seiciones como un apartáu pa la venta y reparación de gaites de segunda mano, un archivu de partitures, otru de mp3, etc…

Gaita Asturiana, nuevu blogue de Chus Solís

Escontra’l Raigañu amosó tradición celta y cristianismu na Ilesia Nueva de Sabugo esti xueves con un conciertu nel que ficieron un percorríu musical pola relixosidá del puelu asturianu, que tien unos cantares relixosos pa cada dómina, seya pa cantalos na ilesia mesma o pa echalos cola familia, mentanto que trabaya o cuando se divierte baillando.

El conciertu entamó col “cantar d’ánimes” que’l pueblu fai na Festividá de Tolos Santos el primeru d’avientu. Al escurecerín, un grupu percuerre les cais del llugar y cancia de casa en casa pidiendo llimosna pa les almes que, según la creyencia cristiana, han pasar un tiempu nel purgatoriu por mor de los sos pecaos enantes de dir pal cielu.

Tres d’esta representación que serví d’introducción, Escontra interpretó los villancicos “uérmite, fíu del alma” y “Toca’l Rubil, Pericu”. Los villancicos son los cantares d’esta dómina, venceyaos cola nacencia del Salvador. Tienen munchu puxu popular y caltiense y cántase inda güei una bona partida d’ellos per Asturies toa.

El conciertu incluyía tamién ente otres composiciones el “Enrame” de Parres, amuesa destacada del vezu de “enramar” o engalanar les fontes con ramos de lloréu, per San Xuan, acompañándose de voces de muyer y de panderos.

El conciertu dedicáu a la rlixosidá completóse con una segunda parte coral al cargu del grupu Galés Caerddyd.

Yá va pa la decimotercer edición del Festival de Bandes de Gaites de Candás, qu’entama la Banda Gaites de Candás y patrocinen el Conceyu de Carreño y el Teatru Prendes. Asina, el vienres y el sábadu, xunto coles asturianes y gallegues, van concentrase la formación escocesa «Badenoch & Strathspey Pipe Band», de Spey Valley – dende les Highlands, y l’afamada «Bagad Roñsed Mor» (Lokoal-Mendon), que yá tien cuatro títulos de campeona de toa Bretaña.

Galicia va tar representada por «Vilar de Barrio-Sarreaus», que cuenta col títulu de la Liga Galega de Bandas y premios de percusión.

Asturies va tener la so representación na formación local, dirixida por Velu Muñiz, y pola Banda Gaites de Castrillón «L’Alborecer».

Dende les siete la tarde d’esti vienres 24 los conciertos van celebrase na plaza La Baragaña y nel paseín de les bandes van actuar les mentaes formaciones foriates.

El programa ye’l que vien darréu:

Vienres 24 de xunetu

19:00. Conciertos en La Baragaña y paseín de les bandes Badenoch And Strathspey Pipeband y Bagad Ronsed-Mor.

23:00. Pasacáis de les bandes participantes nel XIII Festival peles cais de la Villa.

00:00-1:00. Actuación en La Baragaña de les bandes participantes.

1:00. Na plaza El Cueto, barraca y actuación de La Curuxa y de miembros de les bandes participantes.

Sábadu 25 de xunetu

13:00. Conciertos en El Muelle y en La Baragaña de la Banda Gaites Vilar de Barrio-Sarreaus y Strathspey Pipeband.

19:00. Conciertos en La Baragaña y El Muelle de Bagad Ronsed-Mor y Banda Gaites Castrillón L´Alborcer.

23:00. XIII Festival de Bandes de Gaites Villa de Candás nel Parque Les Conserveres.

1:00. Na plaza El Cueto, barraca y actuación de La Curuxa y de miembros de les bandes participantes.

El conciertu d’esti sábadu va ser un conciertu de rock alternativu al mou de los noventa, con bases rítmiques, samplers y referencies sonores de películes acompañaes de proyeiciones a cargu d’Alejandro Camblor.

El grupu ta formáu por Carlos Felipe Valdés (baxu y voz), Daniel García(guitarra y coros), Willy Lorenzo (guitarra y voz) y Jason Martínez (batería).

Mamy Carter fórmase en Mieres en 1993. El so conciertu en Villaviciosa,entamáu pol área de cultura del conceyu, ye parte de la so vuelta a los escenarios tres d’una trayectoria brillante nel rock de los 90.

Anguaño’l grupu ta preparando temes nuevos nel so vieyu local d’ensayu siguiendo cola so virtú de movese n’estremaos terrenos estilísticos que llenden al norte con Sugar, al sur con Pavement, al este con Guided by Voices y al oeste cola llibertá de nun quedar etiquetaos n’etiquetes fates.

N’agostu de 1994 grabaron la so primer maqueta producida por Carlos Redondo y al añu depués queden semifinalistes del II Concursu de Rock Universitariu “Indivasion”. En Setiembre del mesmu añu vuelven al estudiu pa grabar la so segunda maqueta, otra vuelta con Carlos Redondo y con cuatro temes: “Helen”, “Wake Up”, “Telephone Call” y “Shake”. Con esta maqueta preséntense al primer concursu de Radio Kras/Pronorte, xunto con más de sesenta grupos, y acaben ganándolu.

En xineru de 1996 opten al II Concursu Imaginarock de Cadena 100 y queden finalistes y ganadores de la fase rexonal. En marzu de 1996 compiten nel III Concursu Nacional de Rock Universitariu y Otres Alternatives “Oviedo Múltiple” y resulten ganadores d’ente más de doscientos grupos. Esi mesmu branu participen nos Festivales Rock’on’Pilas (Granada), Pop-Zoblanco (Cordoba), Festimad (Madrid), Mantecada-Rock (Astorga) y Centollo Rock Festival (Asturias).

En xineru de 1997 entren nel estudiu pa grabar el so primer trabayu, el mini CD “Bikini”, con Subterfuge Records, producíu por Carlos Redondo y que presenten nel festival “Oviedo Múltiple 97”, nel qu’amás consiguen el premiu Superventolín 97 al Grupu Revelación.

El Beltaine supera esti día l’ecuador con un conciertu coral na Ilesia Nueva de Sabugo y les actuaciones de La Bandina y los escoceses Lau en Les Aceñes. El grupu d’El Franco Cadaba Folk peslló la nueche del miercoles nel Festival Beltaine d’Aviles nuna nueche asturiana na que tamién participaron les Pandereteres de Fitoria.

Nel progama d’esti xueves del Beltaine avilesín destaca’l conciertu que va tener llugar en Les Aceñes a les 23 hores con La Bandina, lliderada por Santi Caleya, como platu principal xunta los escoceses de Lau. Esti grupu, compuesto por Aidan O’Rourke al violín, Kris Drever a la voz y guitarra y Martin Green al curdión, entamó n’Edimburgo en 2006 con estos veteranos músicos que ya pasaron por grupos como Blazin Fiddles, John RaeŽs Celtic Feet o The Unusual Suspects.

Munchu enantes, a les 20 hores hai dos alternatives bien interesantes pa publicos estremaos: na lPlaza Hermanos Orbón (Les Aceñes) ufrese un Conciertu didáuticu sobre La MUyr na Música Tradicional Asturiana, al cargu de l’asociación Batulax, y na Ilesia Nueva de Sabugo va entamar un cuartu d’hora depués un conciertu coral cola Asociación Escontra’l Raigañu y el grupu aerdydd de Gales.