Música

Según anuncia la productora del grupu, Ámbitu-L’Aguañaz, el discu nuevu de Dixebra, que va llevar por títulu “Amor incendiariu”, va salir a la cai a lo llargo de la primer quincena d’ochobre. Amás, la presentación yá ta confirmada, pal 1 de payares, dientro de los actos de Llanes al Cubo.

“Amor incendiariu” ye’l primer discu d’estudiu de la banda en cuatro años. Dende que sacaren “Ensin novedᔠ(2005), los componentes de Dixebra namás sacaren el discu en directo “N’acción” (2007), onde rexistraben el conciertu que dieren n’El Parche d’Avilés pa celebrar los sos venti años de carrera. Un añu depués aparecía “¡Salú ya Dixebra! Perversiones” (2008), un discu homenaxe onde dellos grupos asturianos versionaben dalgunes de les sos canciones más conocíes.

Los siguidores de Dixebra habrán esperar hasta ochobre pa sentir los ente 12 y 14 temes nuevu, colos que tornen al soníu punk-rock.

El sábadu 19 va entamar una Selmana Cultural Asturiana “La Semanona”, en Mallorca, organizada pol Centru Asturianu na islla. La selmana va incluyir una esxposición, “La cabra tira’l monte” de l’artista asturiana, aficanda en Mallorca, Lin Pola. La inauguración de la mesma y de los actos de la Semana va tener llugar el llunes 14 a les 20.30 hores nel Centru Social Flassaders, asitiáu na cai Ferreria, 8.

El sábadu 19, na Plaza S’Escorxador, van participar con un pasacais los miembros del grupu folclóricu “L’Artusu” de Mieres, será a partir de les 12:30 hores. A la una, celebraráse un concursu d’echadores de sidra, patrocináu por sidra Menéndez, incluyendo una actuación de los gaiteros Xandru Castro y David Muiño

A les 15.30 nueva actuación a cargu de L’Artusu y preba de productos asturianos a precios populares, amás d’un sortéu de viaxes a Asturies.

Piésllase esta primer xornada con actuación de la banda de gaites Añaquinos, a les ocho y cuartu y con DJ Qking, que dende les 10 va pinchar “30 años de música asturiana”: Melendí, Los Ilegales, El Sueño de Morfeo, Los Berrones, Tino Casal, Australian Blonde, Nacho Vegas, Víctor Manuel, Dixebra,Vicente Díaz….

El domingu 20, na mesma plaza, la xornada va entamar con un pasacais de L’Artusu, a media mañana. A la una, va cocinase y servise, una Gran Fabada pa 300 persones con fabes de Grau y compangu d’Embutíos Vallina. La ración (fabada, agua y pan) venderáse a 6 euros hasta fin d’esistencies.

A les nueve, entréguense los premios del sortéu de viaxes a Asturies.

Güei, xueves 3 de setiembte, el Tierra Astur de Cualloto va celebrar la so tradicional espicha con una novedá, una nueche de bailles asturianos, onde tolos asistentes van poder baillar y cantar temes tradicionales, cola ayuda de les pandereteres d’Escarpinos y los músicos del grupu Trebolgu.

La cafetería avilesina “El Cafetón”, asitiada na cai del Sol, celebra esti vienres dende les 22:30 hores d’esti vienres 4 de setiembre, una sesión musical colos instrumentistes folks Alberto Ablanedo, Dolfu R. Fernández y Pepín de Muñalén.

La cervecería La Bodega organiza en Villaviciosa y dientro de les fiestes d’El Portal un alcuentru musical onde van participar 26 grupos y artites de tolos estilos, a lo llargo de seis díes, entamando’l vienres 11 de setiembre.

Pel escenariu, asitiáu na Plaza’l Güevu, van pasar, el vienres: Full Shot Noise, The Attack for the Brains Eaters, Sound of Silence, Tragic Vision, Bonestorm; el sábadu: The Groove Investigators, Truek d’Art, Mamy Carters, Desorden, Kursk y Gedeon; el domingu 13: Ouch, Flaying Padres, Vomitón, Rafa Kas y Verde Canaia; y el llunes 14: Anywhere, The Awake, The Black Panthys Party, Super Eula, Helltrip y Totem; el martes 15; KDM+EPM, K-Nalón, La Tarrancha, Skama la Rede y Gomeru; y pa pesllar, el miércoles 16, una sesión con Dj Bamm, Dj J. Garcia, Dj R. Risco y Dj David Mallada.

La escuela d’esti conceyu del occidente d’Asturies tien abiertu hasta l’11 de setiembre’l plazu pa matriculase nes disciplines de Gaita, Tambor y Folclore, Movimientu, Llinguaxe musical, Pianu, Guitarra, Xiblata travesera, Clarinete, Trompeta, Vigulín y Saxofón.

Les clases van entamar a mediaos de setiembre y la matrícula ha presentase nel área de Cultura del Conceyu ente les 9 y les 14 hores de llunes a vienres y a los martes, mientres que los xueves pue facese tamién de cuatro a seis de la tarde.

L’”Asamblea de Ciudadanos por la Izquierda”, d’Uviéu, denunció que’l gobiernu llocal de Gabino de Lorenzo (PP), va gastar más de 70.000 euros, que s’inclúi nuna modificación presupuestaria del Conceyu por un importe de 680.000 euros.

Miembros d’esta organización recuerden “Como tolos años l’Ayuntamientu d’Uviéu presupuesta una cantidá pa les Fiestes de San Matéu y finalmente aprueba una cantidá mayor, colo que convierte l’alderique presupuestariu nun alderique falsu”.

L’actuación d’Isabel Pantoja nin foi debatida nin aprobada pola “Sociedá Uviedina de Festexos’’, siempres según la formación esquierdista.

El grupu folk “Xera” tien yá nel mercáu, el so segundu discu, tituláu Tierra. Nel mesmu continúen la so llinia musical de davezu, axuntando voz ya instrumentos nuevos, en temes nueves, sacantes una adaptación del tema popular “Xilguerín Parleru”, y un cachín d’una Cantiga d’Alfonso X nel cantar tituláu “Natura”. Nel discu collabora Lluis Xabel Álvarez, escritor y filósofu asturianu.

El trabayu va presentase, coles sos nueve pistes, el día 23 de setiembre nel Teatru de la Llaboral de Xixón.

Los temes tán asoleyaos embaxo llicencia Creative Commons pola editorial Glayíu. Colo que puden descargase y usase de baldre.

Descarga’l discu de Xera

Entamaes pol Ensame Cultural Sonastur y FNAST.NET, van celebrase del 25 al 29 d’agostu les primeres “Xornaes de la Música Alternativa Asturiana”, eventu “lúdicu-cultural que va xirar alrodiu de delles escenes musicales alternatives asturianes”. Les Xornaes van cuntar coles ponencies y les actuaciones de dellos de los protagonistes de los estilos musicales representaos que van del Hiphop al Hardcore, ensin escaecer el Rock n’asturianu.

Nesta primer edición, “na que nomes como los de Fran Carrio (Arma X), Pirri (Escuela de Odio) o Xune Elipe (Dixebra) van falar xunto a otros tan destacaos nes meses reondes participatives que va haber p’aldericar y reflexonar sobre’l surdimientu y evolución de caún d’estos estilos musicales n’Asturies”, tamién sedrá protagonista la SGAE.

El sábadu 22 d’agostu, penúltimu día del Festival, mercáu y música de La Quintana per Cimavilla dende les 11 la mañana. A les siete y media, na Plaza de la casa Los Nava, nuevu monólogu astur por Silvino y a les 20:00 na Plaza la Corrada, Teatru asturianu Nun Tris representa “La vixigona nun tien remediu”.

A les 12:00 el IX Festival internacional de gaites Villa de Xixón va acoyer actuaciones na Plazuela, cola Banda de Gaites Infantil Villa de Xixón; nel Paséu Begoña, con Inveraray and district Pipe Band (Escocia); n’El Náutico, cola Banda de Gaites Xinzo de Limia (Ourense); y a les 13:00 hores, na Plazuela, la Banda de Gaites Robaleira (A Coruña); nel Paséu Begoña, la Banda de Gaites Villa de Xixón y n’El Náutico, toquen Bagad Pagan (Bretaña)

A les doce y acutándola primero nes oficines de turismu, pue facese una visita guiada al Muséu del Pueblu d´Asturies. Mientres na Tarima de la Plaza Mayor habrá Bailles y dances del Oriente d´Asturies por Vezos Astures y n’El Llavaderu (Cimavilla), otra vegada, Menú popular Irlandés.

A les siete, actuaciones Plaza del 6 d’agostu, y nos Xardinos de la Reina, xuegos y deportes tradicionales con El Garrapiellu.

A les 20:00 hores na Tarima de la Plaza Mayor va celebrase un desfile de traxes tradicionales pola agrupación La Corexa. A les 21:30, el IX Festival de bandes de gaites Villa de Xixón va trayer la Banda de Gaites Villa de Xixón, Inveraray and district Pipe Band (Escocia), Banda de Gaites Robaleira (A Coruña), Bagad Pagan (Bretaña), Banda de Gaites Xinzo de Limia (Ourense), Banda de Gaites de Villaviciosa y la Banda de Gaites Infantil Villa de Xixón.

A les 22:00 hores nel Escenariu central Poniente van pesllar el día La Col.la Propinde (Asturies), Kila (Irlanda) y La Bandina (Asturies). A la una y media, nel Dompedro, Folixa Celta.

El domingu, a les 07:35 en La Escalerona de la playa de San Llorienzo, va facese una ceremonia del son del Océanu Celta. Y tol día en Cimavilla, Mercáu popular asturianu. A les 20:00, na Plaza la Corrada, nuevu monólogu astur Carlos Alba “El Pola”.

A les 12:00 visita guiada al Muséu del Pueblu d´Asturies (Acutándola primero nes oficines de turismu). Y a les 12:00 n’El Nautico xuegos y deportes tradicionales a cargu del grupu 6 Conceyos.

A la una y media actuaciones polos escenarios: El Campu Valdés, Froles Novas (Galiza); Plaza del 6 d’agosto, Los Xustos (Asturies); El Náutico, Xanzaina (Asturies) y nos Xardinos de la Reina, Danserien Kerne (Bretaña) Las danzas de Cornouaille, Cercle celtique Bleunioù Lann an Aven de Riec sur Bélon.

De una a trés, n’El Llavaderu (Cimavilla), Menú popular Irlandés. Y a les 17:00 hores, gran desfile de tolos grupos y desfile de les Bandes de gaites del IX Festival Villa de Xixón, dende la ponte d’El Piles hasta’l Palaciu Valdes.

El festival va pesllase en Poniente, a les diez, con Dixebra y The Real Mkenzies (Canadá- Escocia). A les doce y media nel Dompedro, Folixa Celta con Sambre (Asturies).