Música

El grupu folc “La bandina’l Tombo” va tocar güei llunes, dende les once la nueche, na sidrería “El Oventense”, asitiada na cai San Xuan 6, d’Uviéu.

La formación recrea la música que tocaben les bandines o orquestines qu’a últimos del sieglu XIX y primeros del XX andaben peles romeríes asturianes coles sos pieces de baille onde se xuntaben los ritmos más tradicionales colos que llegaron más modernamente; y ta compuesta por Carlos Tejerina (contrabaxu), Dolfu Fernández (vigulín), Marga Lorences (curdión) y Pepín de Muñalén (xiblata).

El músicu tradiciona Tomás de la Güeria 1923-2008) va recibir un homenaxe póstumu cola presentación del CD doble col so repertoriu de curdión de botonera editáu pol Muséu del Pueblu d’Asturies esti domingu, 4 d’ochobre, de magar les 19 hores nel Auditoriu de la Casa Cultura de Mieres del Camín.

Nel mesmu va cuntase cola participación de músicos de Tejedor, Felpeyu, Tuenda, La Bandina, Anabel Santiago, La Curuxa, Herbamora, Gatos del Fornu, Verdasca, Patriband Folk ORL.Lestra y la presentación de Xosé Ambás.

La Escuela de Música Tradicional de Llangréu, y respondiendo a “munches solicitues de padres de neños d’ente 3 y 6 años p’apuntase a los cursos de gaita, zanfona, asturianá, etc,” entama un cursu d’entamu a la música adaptáu a estes edaes prepráu pol espertu en xuegos tradicionales Carlos Suari.

El cursu d’averamientu activu a la cultura asturianaempobínase a neñes y neños pequeños que quieran “dir conociendo poco a poco los elementos fundamentales de la nuesa tradición d’una forma activa”. El cursu quier ser una ponte colos demás cursos de la escuela, “un sumatoriu de talleres selmanales mui divertíos onde vamos dir enseñando los aspectos más xenerales del xuegu, la llingua, la indumentaria, los oficios, la música…” too ello en clave infantil.

Amás, los participantes van tener la oportunidá de visitar los cursos de “los mayores”, pa d’esa manera, familiarizase con tolo que’l día de mañana pueden llegar a deprender. P’apuntase ha llamase al teléfonu 985 67 71 13.

Carlos Suari, profesor d’esti cursu, llicencióse en ciencies de l’actividá física y del deporte en 2006 y continuó la so formación universitaria en ciencies de la educación y n’antropoloxía social y cultural. Perteneció a la primer y única xeneración de monitores y árbitros de deportes tradicionales na correspondiente federación onde tamién exerció como docente. Autor y coautor de dellos llibros y artículos nesta materia, participa de contino n’actividaes d’investigación, formación y divulgación del xuegu tradicional. Dientro de la RTPA dirixe dos programes selmanales nos que la motricidá tradicional ye prioridá.: ¡Acuto! y Al aldu: A galmiaes.

El cantautor xixonés Carlos Rubiera, va dar un conciertu güei xueves nel Centru Municipal Integráu Pumarín-Xixón Sur, onde va presentar temes del so discu “Asturianaes”. Va ser a partir de les siete y media y nél van poder sentise adaptaciones de temes tradicionales de la tonada y composiciones propies escrites pol autor pa esti discu, nel que collaboraron importantes músicos como Hevia, Mari Luz Pontón o Xuacu Amieva.

El músicu xixonés ye ún de los hestóricos miembros del llamáu Nueu Canciu Astur, que entamó a garrar puxu nos primeros años de la transición, a mou d’otros movimientos asemeyaos que se dieron n’otres nacionalidaes del estáu, como la Nova Canço Catalana. Tamién formó parte de la organización Conceyu Bable en Xixón, dende la qu’empezó a trabayar pola recuperación llingüística del asturianu.

L’Arribada va celebrar güei tolos sos actos nel patiu del Vieyu Institutu Xovellanos de Xixón. A les cinco va presentase’l llibru “Les habitaciones vacies” de Ramón Lluís Bande. Media hora más tarde l’Academia de la Llingua Asturiana, na persona de Pablo Xuan Manzano, va falar de les sos activadaes y publicaciones nel 2009, presentando darréu, cola presencia del autor, dos obres lliteraries de Pablo Rodríguez Medina asoleyaes pola ALLA.

A les 18:30 va presentase la torna al asturianu de “Mal de llingües”, de Jesús Tuson, espublizada por Araz ediciones. A les 19 hores va facese un recital de Fernando Menéndez, presentándose a les ocho, un actu d’alcordanza alredor de la revista ‘Astor’ y la Lliga Celta d’Asturies. La xornada piésllase a les ocho y media con un conciertín de “La esquina”.

El grupu “EntreQuatre”, conformáu por músicos asturianos de Llangréu, ta nomináu a un Grammy. La formación, un cuartetu de guitarra clásica, ta nominada por “Cuatro simetrías”, del compositor cubanu Orlando Jacinto García.

El grupu ñació en 2004 y dende entós vien tocando per sudamérica y los Estaos Xuníos. Anguaño van tocar en Nicaragua y Colombia y tán preparando la edición d’un discu que va recoyer lo que foi l’espectáculu “Tierras juntas”, que vinieron dando estos meses d’atrás per dellos escenarios xunto al Cuarteto Latinoamericano.

Güei martes, a les cinco la tarde, l’Arribada va celebrar nel Vieyu Institutu Xovellanos de Xixón, un homenaxe al músicu Antonio Medio. Un actu col que la “vagamar lliteraria” llega al so ecuador na edición más llarga de les celebraes hasta anguaño.

L’actu d’alcordanza de Medio va celebrase nel mesmu nel Patiu del Vieyu Institutu onde tán espuestos 14 paneles que cuenten la vida del barítonu de la voz de fierro, nomatu col que conocíen a esti xixonés que morrió en 1977. Foi creador de la Compañía d’Arte Asturianu, ún de los intentos más serios de profesionalización na historia del teatru costumista asturianu y colos meyores resultaos estéticos d’esti estilu.

Medio debutó como cantante de zarzuela en Zamora un 17 de setiembre de 1938 y nun paró d’actuar n’escenarios de tol Estáu y d’América. Tamién grabó bien de discos de zarzuela y punxo voz, xunto a Matías Prats padre, al discu Andalucía y Asturias, basáu na obra de Teodoro Cuesta y Diego Terrero y espublizáu polos Amigos del Bable, a entamos de los años setenta.

Programa completu de l’Arribada

El sábadu 26 va tener llugar en Mieres el XXIII Memorial y VII Concursu Silvino Argüelles de la música asturiana, un concursu que premia a los 10 meyores cantantes y meyor gaiteru acompañante de tonada del añu. Los ganadores d’esta edición actuarán na gala cola que se rinde homenaxe a la figura de Silvino Argüelles, al que se recuerda como una de les voces más prestixoses de la canción asturiana.

Uviéu va celebrar la cabera edición de los Alcuentros de Trebolgu dientro de les actividaes de les fiestes de San Mateo. Nel cartelu apaecen la bandina La Curuxa y Dixebra, amás de la Banda de Gaites ciudá d’Uviéu. Tolos conciertos van entamar a les 21:30 hores na Plaza la Catedral.

L’Asociación Cultural Trebolgu, que tien decidío dexar d’organizar los alcuentros tres esta edición, dempués de los problemes puestos pol Ayuntamientu pa celebrala n’otres feches, yá previstes, lo qu’evitó que faltare a la cita Fred Morrison.

Güei, llunes 14, el cantautor Rafa Lorenzo va presentar na Plaza del Güevu de Villaviciosa, el conciertu-espectáculu “Voi pa la braña”, que ta basáu nel folk vaqueiru, entreteníu y danzarín con testos recitaos del Padre Galo y de la recién fallecida Nené Losada «faciendo al empar homenaxe a la xuglaresa de les brañes Rogelia Gallo La vaquera».

Nel conciertu, que se celebra dientro de les actividaes de les Fiestes del Portal, van poder sentise dellos de los temes del que va ser el discu nuevu del autor de trabayos como “Sou Vaqueiru” (2003) y “Pabirun, pabirun” (2005).