Música

El Teatru Xovellanos ta acabante anuncialo. El cantautor Quique González va tar nel Festival de la Pallabra de Xixón presentando’l so discu últimu “Daiquiri Blues”, va ser el 4 de febreru de 2010 y les entraes salen mañana a les 12 a la venta, nes taquilles del Teatru Xovellanos, na so web y TiquExpress de CaxAstur.

Nel conciertu van participar, amás de Quique González, Jacob Reguilon al baxu; Toni Jurado a la bateria; Julian Maeso col hammond y los teclados; y David Soler coles guitarres.

Web de Quique González

La Delegación d’Asturies en Madrid va inaugurar güei, xueves 3 d’avientu, la esposición “Nuberu, 30 años ¡yá llovió!”, que percuerre la vida artística de Chus Pedro y Manolo Peñayos, componentes del grupu homenaxeáu dempués de más de 30 años de carrera.

A la inauguración va acudir Chus Pedro, qu’interpretará dellos de los temes que popularizaron nos setenta y ochenta, y que anguaño son auténticos himnos pa munchos asturianos.

La esposición organízala la Fundación Nuberu y el Gobiernu d’Asturies, y va poder vese de martes a sábadu, de 11 a 14 y de 17 a 20:30 hores, sacantes los festivos y domingos, cuando va tar abierta d’11 a 14.

La sede del Gobiernu d’Asturies en Madrid ta na cai Santa Cruz de Marcenado 2.

El Conseyu pola Normalización (CPN) entrega cada añu un premiu que quier “afalar a tolos músicos asturianos a qu’empleguen la llingua asturiana nes sos composiciones y da-y por ello mayor difusión y presencia social nos medios de comunicación al nuesu perguapu idioma”. Na edición de 2009, la ganadora, acabante facese público’l resultáu, ye Esther Fonseca, vocalista en solitariu y del grupu Llangres, pol tema “Díes d’abril”, del so discu últimu.

La cantante premiada apaez nel añu 2002 nel panorama musical asturianu col discu “Agua” nel qu’axunta la balada céltica y les nueves músiques. Nun yera ésta la primer esperiencia musical nin discográfica d’esta cantante. Entamó como integrante de los grupos de música pa neños Seliquín y Xentiquina, asina como solista nel discu Xaranzaina.

N’avientu de 2007 presenta, con una actuación, el so últimu discu: Viaxe, discu que da a conocese durante tol añu 2008. La vocalista del grupu folk Llangres acompáñase pa esti viaxe de músicos de sonadía reconocida pa interpretar catorce canciones compuestes pol so padre, Nacho Fonseca, fundador del grupu infantil Xentiquina. El discu ta autoproducíu, grabóse nel estudiu Musifactor de Piedrasblancas y la producción corrió a cargu de Nacho Fonseca y d’Emilio Huerta, que tamién foi responsable de la dirección artística, de les igües musicales y teclaos. El restu la banda taba formada pol guitarrista Javier Monje, el percusionista Juanjo Díaz, l’harpista Yago Prado, el flautista Manuel Fonseca y el vigulineru Peter Bulla. Otres collaboraciones del discu tuvieron a cargu de Daniel Álvarez (gaita), Ramón González (saxu, tecláu), Tamara Rodríguez (cellu) y Tina Cuadriello (curdión).

Queixúmenes de la braña (Brenga Astur), La semeya (Avientu), La xana (Corquiéu), L’emigrante (La col.lá Propinde), Andolina (Tejedor), Ná me prestaría más (Pedro Pereira), Añada amorosa (Anabel Santiago), Marea negra (Carlos Rubiera) y Ruxe´l ríu (Herbamora), son les canciones ganadores dende 1999 hasta agora, resultáu de votaciones per Internet, añu nel qu’entamaron los Premios CPN.

El llocal “ La Calleja La Ciega” d’Uviéu, va acoyer el xueves a les once la nueche un conciertu pa reinvindicar esta causa, nel mesmu van participar Bueno, The Perloras, Edu Vázquez y el grupu Muñeco Vudú.

El xueves, a les ocho, el llugar escoyíu va ser el chigre “La Antigua Estación”, y nél va cuntase con Pablo Valdés, MyStereo y Mamy Carter.

L’hestóricu grupu infantil “Xentiquina”, formáu por neños y neñes de la escuela pública de Lieres y dirixíu pol maestru Nacho Fonseca, ta acabante facer llegar a les tiendes una entrega nueva del so llabor. El discu, “El sapu y la lluna”, asoléyalu la compañía L’Aguañaz y contién doce cantares, que tienen como novedá más sobresaliente la inclusión d’instrumentación real y non solo sintetizaos, como hasta agora.

Los músicos que participen nel trabayu son Rubén Bada (vigulín), Eladio Díaz (saxu), Roberto Tana (batería) o Sergio Rodriguez (baxu y guitarra), y les lletres y sones son del so director, Nacho Fonseca, miembru de l’ALLA y dende’l sábadu de la Fundación Caveda y Nava.

La banda de ska-fusión va actuar solo nestes navidaes hasta’l branu de 2010, añu nel que van asoleyar el so primer discu d’estudiu.

Munchos podrían pensar que dende’l so caberu conciertu n’agostu de 2009 los componentes de Falanoncaduca taben corriendo la pandorga. Pero esto sigún acaben asoleyar esti martes nun comunicáu de prensa, nun ye asina: “Nos últimos meses falanoncaduca alcuéntrense fuera de los escenarios trabayando nel llocal d’ensayu no que va ser el so primer discu d’estudiu y qu’asoleyará nel 2010.

Ensin nome confirmáu tovía, el primer trabayu discográficu de Falanoncaduca va asoleyar na segunda metada del 2010 con un total d’ente 10 y 15 cantares. Nél recoyerán vieyes composiciones de les interpretaes nel so directu y nuevos cantares inéditos que tan cocinándose nel llocal d’ensayu. Amás van cuntar con delles collaboraciones musicales.

Musicalmente siguen apostando sobremanera pol so estilu autodefiniu como’l Mecigayu Son. Una mezclocanza de soníos que, teniendo’l ska folixeru como puntu referencia, améstase a otres influencies estremaes como son el surfing, punk-rock, funk, rapmetal o’l folk mestizu.”

Al rodiu’l directu

L’ultimu conciertu que dieron estos rapazos de La Pola L.lena, Uviéu y Xixón foi el 28 d’agostu de 2009: “sirvió de fin de xira del grupu y a los más de 30 conciertos daos en casi dos años enriba los escenarios. Nesa emotiva actuación tamién tuvo llugar la despidida temporal de Carlos Casado, collaciu y saxu del grupu, que coló a Polonia por mor de los sos estudios.

Al parón de l’actividá musical y la reflexón sobre’l camín del grupu púnxose-y puntu final va unos meses. Falanoncaduca va siguir ensin pisar los escenarios hasta’l branu de 2010, dando solo unos conciertos especiales nestes navidaes. Sicasí, el trabayu nel llocal d’ensayu, les ganes y el puxu puesto nel so futuru primer discu acompaña a la banda nesta nueva etapa”.

Güei, martes 1 d’avientu, a les 19:30 hores, van celebrase delles actuaciones centraes na tonada, con Juan Robledo Iglesias y Mercedes Canal Meana, acompañaos a la gaita por Alfonso Fernández Álvarez; complétase l’espectáculu col monologuista Avelino Álvarez, Velino’l Rilu. L’actu entámalu la Fundación Municipal de Cultura, Educación y Universidá Popular del Conceyu de Xixón, en collaboración cola Asociación d’Intérpretes de la Canción Asturiana (AICA).

El sellu musical “Algamar” sigue medrando, esta vegada apostando por dos grupos de trayectoria contrastada: Sambre y La Tarrancha. De los qu’agora, na so web, pueden sentise los primeros temes.

Sambre va pau ente pasu consolidandose dientru’l mundiu rock-folk d’Asturies. “Na Solombra” ye’l títulu de so primer discu que yá s’entama a poder atopar nes tiendes habituales. Sambre descata polos sos sonidos puros y la so actitú enriba l’escenariu.

D’otra mano , La Tarrancha, col so soníu mecigaya-fusión, ye un grupu veteranu nos escenarios festivos asturianos. Dempués de siete años de vida, llegó’l momentu de grabar el so primer discu de llarga duración. Ska, fusión, reggae, funk, rock, folk, vientos… una mecigaya de soníos nos escenarios que nun dexarán que naide quede nel so asientu ensin blincar y baillar. El discu tará a finales de mes nes tiendes.

Siente equí unos adelentos de los discos de Sambre y de La Tarrancha

La Fundación Municipal de Cultura, Educación y Universidá Popular del Conceyu de Xixón, en collaboración cola Asociación d’Intérpretes de la Canción Asturiana (AICA) ufre güei xueves un espectáculu de tonada a partir de les 19:30 hores cola actuación de Noelia de Dios Fernández y Armando Quintes Ordieles, acompañaos a la gaita por Natalia Fernández Vázquez, amás d’una representación de teatru costumista a cargu del Grupu de Teatru Rosario Trabanco.

Les actuaciones tán dientro del yá célebre ciclu xixonés “L’asturianada nos Centros Municipales”.

L’asociación xuvenil “Mezá” organiza la segunda edición d’estes xornaes culturales na Casa da Cultura del conceyu de Bual, que van durar hasta’l 5 d’avientu. La primer fecha correspuende a la charra de los hestoriadores Esperanza Martín y Fernando R. del Cueto titulada “El trabayo d’arqueólogo nel occidente d’Asturias”, que va celebrase a les seis. Darréu, a les ocho la tarde, va celebrase un conciertu del cantautor Alfredo González.

La segunda fecha va cuntar cola presencia de Xosé Antón Fernández Ambás y Guillerme Ignacio Costa titulada “A tradición oral en Asturias y Galiza: culturas ermás” y el conciertu de Mezá.