Música

El grupu de folk-fusión de Pola L.lena, La Col.la Propinde, presenta esti vienres 29 de xineru, el que ye el so tercer trabayu discográficu, “A teyavana”. La cita va ser na FNAC de Parque Principáu, en Siero, de magar les ocho la tarde. Nel actu, el grupu va dar un conciertín nel que podrán sentise per primera vegada en direutu dellos temes de “a teyavana”, el so discu nuevu que ta acabante d’asoleyar Algamar Producciones.

“A teyavana” ye un discu con 12 temes onde se combinen los de reellaboración tradicional y los de composición propia del grupu. Amás, nesta ocasión, cuenta cola collaboración d’Esther Fonseca, que pon voz al cantar “2417”.

“A teyavana” grabóse nos estudios TUTU ente mayu y setiembre, cola producción de Sergio Rodríguez y Ánxel González.

Ente la biografía de La Col.lá Propinde, destaca’l premiu al Meyor Cantar n’asturianu nel añu 2003 por “l’emigrante”. Amás, nel añu 2009 fueron banda sonora de la serie de Antena3 “Doctor Mateo”.

Mañana sábadu va celebrase la gala “Xixón fala n’asturianu” qu’entamó a celebrase con calter añal en 2009 p’amosar la música y l’humor n’asturianu. Nesta ocasión van participar Dixebra, Ismael Tomás Montes, Rafa Lorenzo, Baxucoste teatru, Toño Caamaño y el tríu formáu por Gabino Antuña, Manolo Peñayos y Chus Pedro.

La gala va celebrase nel Teatru Xovellanos, recién remociáu, mañana sábadu 30 de xineru, dende les ocho la tarde, y la entrada ye de baldre, recoyendao enantes invitación na mesma taquilla del Teatru.

“Conceyo de Cantares” ye’l títulu del discu, producíu dende la Oficina de Coordinación Cultural y Llingüística de la comarca occidental asturiana, en collaboración cola Conseyería de Cultura y Turismu d’Asturies. Nel trabayu recuéyense doce cantares ensin más denomación común que’l fechu de que tean cantaos en gallego-asturianu.

Nel discu atópense estilos estremaos, con temes yá espublizaos ya inéditos, de grupos y solistes que van dende’l pop al rock, pasando pel folk, y pelos cantares tradicionales.

Ente los músicos y grupos que formen el discu tán Francisco del Camín de Rozadas, Bacotexo, Herbamora, Elisa, Mestura, Mezá, Diaño Burlón, Cádaba, Tuenda, Hermaos del Herbaseca, Igor Medio y Lisardo Prieto, y Elena Mera Alonso, cuntando con otros collaboradores, como Marisa López Diz, Carmen Trevías, Xosé Miguel Suárez Fernández, Tapia;Ricardo Saavedra Fernández-Combarro, Iván Iglesias Fernández, Cazarón; o Miguel R. Monteavaro, aparte d’un bon númberu de collaboradores, como Xosé Antón Fernández, Ambás, Servando Fernández Méndez o Nacho Pérez González.

El discu asoléyase n’edición billingüe en gallego-asturianu ya inglés, grabando y masterizando en Tutu estudios de Corvera, Estudios d’Ángel Berdiales y los estudios de Manuel Viña, editáu col sellu Tierra Discos, de Cuideiru, repartiráse de baldre nel territoriu del Parque Hestórico del Navia y nel restu del territoriu asturianu y del estáu español.

Los conceyos Bual, Cuaña, Eilao, El Franco, Grandas de Salime, Navia, Pezós, Tapia y Villayón tán incluyíos dientro del Parque Hestóricu del Navia.

La cantante Mapi Quintana, recién nominada a los Premios de la Música, va tocar xunto a Marco Martínez Trío esti vienres, a partir de les doce la nueche nel Swing Jazz, d’Uviéu. El sábadu va repetir actuación, a la mesma hora y nel mesmu llugar.

Los intérpretes d’estos conciertos van ser: Mapi Quintana (voz), Marco Martínez (guitarra), Horacio García (contrabaxu) y Jaime Moraga (batería).

Yá se conocen los cuatro y definitivos finalistes que van optar al premiu al Meyor Cantar n’Asturianu, qu’entama l’Academia de les Artes y les Ciencies de la Música dientro de los sos XIV Premios de la Música. Los miembros de la SGAE van poder votar hasta’l 14 de febreru pa escoyer al representante que va recoyer el premiu nuna gala en Madrid a primeros de marzu, anque’l resultáu va sabese enantes, el 17 de febreru.

Los cantares escoyíos son “11 de mayu»” de Mapi Quintana; “Cantar de la redención” de Dixebra; “El canciu’l mineru”d’Spanta la Xente; y “Ye lo que nos pasa” de los Músicos pola Oficialidá.

L’añu pasáu la meyor canción n’asturianu foi “Negra”, interpretada por Esther Fonseca y con lletra de Nacho Fonseca, mentes que nel 2008 el gallardón foi pa los hermanos Tejedor cola pieza “Seique non”, de la que son autores Javier Tejedor y Ruma Barbero.

El gaiteru Xuacu Amieva va ufiertar esta selmana trés conciertos de calter didácticu, entamando güei, martes 26, a partir de les ocho la tarde, nel Centru Cultural Caxastur d’Uviéu, el vienres 29 (20:00 hores) nel Pabellón Caxastur del Recintu Ferial Luis Adaro de Xixón, y el sábadu 30 de xineru (20:00 hores) nel Centru Cultural Caxastur de Mieres. Toos ellos son con entrada llibre y gratuíta hasta completar l’aforu.

Güei, vienres 22 de xineru, a les 21:00 hores, el Teatru Filarmónica d’Uviéu, va acoyer la presentación del discu nuevu de Pablo Moro, “Pequeños placeres domésticos”. Esti cantautor punxo na cai nel mes d’ochobre pasáu’l so discu nuevu, que fai’l numberu tres, depués d’emepetreses (2005) y Smoking Point(2007).

El discu que va poder sentise güei inclúi catorce temes compuestos por él musical y lletrísticamente. Caracterízase pol so estilu particular a mediu camín ente’l pop, el rock y la canción d’autor, con temática basada nes esperiencies personales y nos sentimientos.

La Sociedá Xeneral d’Autores (SGAE) quier subastar la marca del Intercélticu d’Avilés pa recuperar parte de los 50.000 euros que-y debía l’Asociación Esbardu pola organización del Intercélticu d’Avilés ensin pagar drechos d’autor. La marca fuera embargada hai dos años, pero Esbardu pudo seguir emplegándola igual l’añu pasáu nel Festival al pagar los derechos del Festival 2009 por adelantao.

El conflictu qu’entamara en 2005 cuando la SGAE denunció l’impago por parte de Esbardu, l’asociación qu’organizaba esti festival Intercélticu d’Aviés, del canon del 10% de los beneficios qu’impón la llei de Propiedá Intelectual sigue cuelebreando ensin fin. Esbardu quier seguir organizando esti añu’l Festival y tien dicho que sgún los sos asesores xurídicos pue facelo si paga’l 10 por cientu los beneficios del Festival por adelantao. Pero la SGAE quier que se-y paguen los 25.000 euros que queden por pagar de la deuda orixinal de 50.000 y depués de que s’embargara la marca

El Xulgáu de lo mercantil númberu 1 d’Uviéu dictó sentencia definitiva’l 3 de febreru de 2009, condenando a Esbardu a pagar non sólo la deuda cola SGAE, que xubia a unos 20.000 euros, sinon tamién les costas de los diferentes xuicios. En total, unos 50.000 euros que depués del embargu de la marca y de delles subvenciones amenorgó hasta quedar alrodiu los 25.000 euros.

El grupu xixonés de folk Felpeyu va tocar esti vienres 22, nun de los festivales más prestixosos del ámbitu célticu. Glasgow (Escocia) va acoyer hasta’l día 31 d’esti mes esti festival nel que la banda asturiana va compartir cartelu con otres formaciones, como los irlandeses de The Chieftains o los escoceses Wolfstone.

Felpeyu ye una de les referencies cimeres na música asturiana, fundáu en 1991, tien espublizaos cinco discos, l’últimu titúlase “Canteros” (Tierra Discos) y ye del añu 2008.

La Fundación Caxa Rural d’Asturies y el periódicu La Nueva España tán acabante espublizar una esbilla de 99 cantares populares asturianos, escoyíos por Sara Illana Arias ya Ismael Arias.

Cada tema apaez cola so partitura, lletra y comentariu corresponiente. Recuéyense dances primes, dances, asturianaes, añaes, vaqueiraes, saltones, fandangos, jotes, boleros, xiringoses, xirandiyes, xirandiyes asturianes, pasudobles, habaneres y valses.

Podemos atopar nél temes perconocíos como: «Villaviciosa hermosa», «El xiringüelu», «Gozoniega», «Dicen que van a poner», «La mariñana», «Campanines de mio aldea», «A mi me gusta la gaita», «Chalaneru», «El tranvía de Xixón», «Carretera d’Avilés», «Que m’escurez», «Asturies, patria querida»…