Música

La cantante de tonada Anabel Santiago va tocar güei, llunes 26 de xunetu, a les ocho la tarde, en Lluanco (Gozón). El conciertu ye de baldre y nél van poder sentise los temes del so discu nuevu, “Agora”, qu’acaba presentase nel Xardín Botánicu de Xixón.

Dempués de la fin del Festival Intercélticu d’Avilés, organizáu por Esbardu, va celebrase, a partir d’esti sábadu 24 de xunetu, la segunda edición del intercélticu municipal, conocíu como Beltaine. Conciertos, charres, esposiciones y una montonera d’actividaes que van poder esfrutase nes cais d’Avilés hasta l’1 d’agostu.

Ente los grupos asturianos presentes nel Beltaine van tar Tejedor, Felpeyu o Corquiéu, los irlandeses Lúnasa, la gallega Susana Seivane y dende Portugal, Galandun-Galandaina. Amás, nel Carbayedo o Sabugo van acytuar bandes de rock asturianes como Tronco, The Paperbacks, Capitán Cavernícola Blues Band, Morrigans y Crudo.

Porgrama completu d’actividaes

El “Mecigayu Son” de Falanoncaduca va aportar esti domingu 25 de xunetu a la Plazuela San Miguel de Xixón. Nun conciertu enmarcáu dientro’l ciclu cultural “Arte na Cai”, la banda asturiana va poner enriba les tables el so eclécticu soníu. Nesta actuación, gratuita y con hora d’empiezu a les 19.00, el grupu va aprovechar p’adelantar dalgunos temes de “Tiempu de povisa”, el discu debú que Falanoncaduca entra a grabar el próximu 16 d’agostu.

Formada en 2007, Falanoncaduca ye una banda nacida de la unión de dellos músicos mozos de L.lena, Uviéu y Xixón. Autodefinen el so estilu como “Mecigayu Son”, una mestura de soníos que van del rock a los ritmos llatinos, ensin escaecer el ska o’l folk astur. Cola reivindicación siempre presente nes sos lletres, editaron en 2009 la maqueta “En llingua afilada” y yá tienen pisao abondos escenarios de dientro y fuera d’Asturies.

Pero esti nun ye l’únicu conciertu del branu pa Falanoncaduca. Esti 25 de xunetu Falanoncaduca pieslla’l mes en Xixón tres actuar en La Pola L.lena o nel destacáu festival vascu Mendebala Jaialdia, pero siguen los conciertos n’agostu. El 7 y 14 d’agostu los “XXVIII Cursos de Branu de l’Academia de la Llingua Asturiana” en Cangas de Narcea y la “Nueche Astur-Romana” de Carabanzo van tener a esta moza banda so’l escenariu llevando’l so folixeru directu.

Información del grupu

Esti sábadu, 24 de xunetu, a partir de les ocho y media la tarde, el Teatru Xovellanos de Xixón, ufre l’espectáculu “Memoria de un esclavo” con cantares instrumentales del Perú, México, Caribe y África, embaxo la dirección d’Eduardo Egüez, unu de los grandes especialistes del laúd y de la guitarra barroca, y alma mater d’Emsemble La Chimera: un grupu de música antigua que basa les sos creaciones nun amiestu de conceptos y músiques de distintes dómines. Asina, con gran naturalidá y una resultancia impresionante, Emsemble La Chimera recurre al tangu, los madrigales, sones, habaneres, les tonaes…Tres composiciones como Bonos Enrites Madrigal y Tonos y Tonaes, presenten agora la so última obra: “Memoria de un esclavuo”. La hestoria recrea al traviés d’un viaxe oníricu’l pasáu, los raigaños africanos de los habitantes del Caribe. Iván, un mozu antillanu, ye’l viaxeru” qu’al traviés de los suaños enraigonaos nuna memoria colectiva y ancestral, va realcontrar los orixes del so pueblu negru: salea colos sos antepasaos, naufraga, sobrevive, llega, ye esclavu, llibérase, canta, bailla, col blancu, col negru, entemezse, enraigónase… Va y vuelve nel espaciu y nel tiempu cola rapidez que solo consiente la maxa de los suaños.

La Sociedá Uviedina de Festexos celebra esti sábadu nes cais de L’Antiguo, y a partir de les once y media la mañana, l’actuación de les bandes de gaites “La Llaguna del Torollu” y el grupu de baille “Xuno” de San Cloyo. L’actividá va durar hasta les 14:30 hores.

Esti xueves, 22 de xunetu, escomencipia la trixésima edición del Concursu del CanciónAsturiana, que se va celebrar nel Pueblu d’Asturies, na so fase eliminatoria, los díes 22, 23 y 24 de xunetu a les 19:00 hores. Les semifinales del concursu van celebrase los díes 27, 30 y 31 de xunetu na Plaza Mayor de Xixón, a les 18:45 hores.

Les finales van facese demientres los díes 2 y 3 d’agostu, a les 18:45 hores, y 4 d’agostu a les 19:30 hores na Plaza Mayor. Teniendo llugar la entrega de premios, nel mesmu llugar, el domingu 8 d’agostu a les 12:00 hores.

El gaiteru asturianu Hevia va ser l’encargáu de dar entamu a esti festival folk estremeñu que va pesllar la banda escocesa Wolfstone. La cita cola música d’Hevia va ser el 19 d’agostu. Nel restu de les xornaes va cuntase cola música tradicional estremeña, nos instrumentos de los grupos y artistes del llugar, rematando les xornaes, el 21 d’agostu.

Hevia va tocar temes del so discu últimu “Obsesión” y ésito de la trayectoria, con siete discos al llombu y dellos millones de copies vendíes en tol mundu. El gaiteru asturianu ye amás un importante fabricante de gaites y dende l’añu pasáu, miembru d’honor de l’Academia de la Llingua Asturiana.

Ayeri entamó en Xixón esti festival, que llega a la so edición trece con ocho díes de duración y una completa programación de conciertos n’estremaos escenarios de la ciudá, amás d’una interesante esposición d’instrumentos antiguos de Portugal y d’otros llugares. A esto suman dellos cursos y talleres nos que participen músicos especialistes. Esta edición, dicen los organizadores, “va amosar la realidá: crisis, cambéu climáticu, catástrofes humanitaries, terrorismu, guerres…”.

Y ye que la mayoría de los conciertos del festival van siguir esa temática aciaga y qué meyor imaxe que “El Caballero y la Muerte”, pintáu por Pedro Camprobín en 1670 o’l focete del arcanu XIII de los antiguos Taróes pa representar la treceava edición del Festival de Música Antigua de Xixón.

Programa completu

L’Asociación Cultural San Roque de Lliberdón, convoca esta nueva edición del Premiu “Gaiteru Lliberdón”, que tendrá llugar na Plaza Chile de la llocalidá a les 19.30 hores del vienres, 6 d’agostu.

Al concursu, que tien abiertu plazu d’inscripción hasta’l 26 de xunetu, pueden presentase toles persones, en dos categoríes, hasta los 14 años y mayores de 14 años. El primer premiu d’adultos consiste nuna gaita asturiana fechaa artesanalmente nel Taller de Miguel Alonso Cachafeiro (de Colunga). El segundu son 150 y el terceru, 100 euros.

Consulta les bases

El grupu Los Berrones ta acabante xubir a la rede un cantar tituláu Lletra “Villa Maravilla”, “dedicáu al pueblu de Tiuya, a los mineros del Candín y, por supuestu, al guah.e”, el xugador asturianu del Barça. Grabóse na Selmana Santa de 2010 nos estudios ACME de Miranda (Avilés), cola participación del periodista deportivu Manfredo Álvarez faciendo los coros y cantando’l gol qu’apaez nel cantar.

Villa Maravilla

Ye buena ocasión, vamos recordar