Música

Esti xueves 26 d’agostu, a les 21:30 hores, la Plaza José Caveda y Nava de Villaviciosa acoyía un espectáculu que baxo’l nome de Nueche de la Gaita fizo un percorríu pola historia del intrumentu asturianu de la mano de la Banda de Gaites de la Villa.

La Banda de Gaites de Villaviciosa-El Gaitero y dllos músicos invitaos ufiertaron una actuación conxunta de lluz y soníu cola que describieron la historia de la gaita asturiana dende’l so orixe nel sieglu XIII, dientro la programción de branu de la Fundación José Cardín.

Na desplicación práctica del procesu evolutivu e la gaita y de les formaciones musicales nes que ta presente participaron Gaiteros solistes, pareyes de gaita y tambor, bandines con acordión y bombu y la Banda de Gaites Villaviciosa El Gaitero, que l’añu que vien va a cumplir los 25 años d’existencia.

Nel pectáuculu participaron amás Héctor Braga,qu’interpreto una tonada acompañada por elli mesmu a la gaita, Daniel Álvarez, Pablo González y Orestes Barbachan.

Una nueva edición de la nueche celta decana d’ente les asturianes torna, esti sábadu 28 al campo da Alameda de Porcía (El Franco). El festival folk, ún de los más nomaos y prestixosos de tolos rellacionaos cola música folk del arcu atlánticu, axunta un añu más, a partir de les 11 la nueche, na islla fluvial de l’Alameda a los incondicionales del folk que cada añu lleguen dende 1983.

Pa esta edición va cuntase cola presencia de la banda del prestixosu curdionista irlandés David Munelly. La David Munnelly Band fadrá sonar per primer vegada los sos acordes nel campo da Alameda. Los asturianos Felpeyu  y DRD, el grupu llocal Cádaba  y la banda de gaites naviega La Reina del Truébano, completarán el cartelu de la XXVII Noite Celta de Porcía. Como en toles ediciones, xunto a la meyor música folk del país y del mundu, va poder esfrutase de les sardines a la plancha que cada añu pon la organización del festival a disposición de tolos asistentes.

El miércoles 25 d’agostu Kausikan Rajeshkumar va tocar nel Centru de Cultura Antiguu Institutu a les 20.00 hores. Dos díes más tarde, el vienres 27, va celebrase’l Conciertu de Nuevos Solistes Internacionales, tamién nel Centru de Cultura Antiguu Institutu y a la mesma hora. Dambos conciertos van ser d’entrada gratuita hasta completar aforu.

El grupu de folk-rock La Col.lá Propinde va actuar esti xueves 26 d’agostu, a les 21:30 hores, na sidrería Tierra Astur de Cualloto, pa presentar otra vuelta so últimu trabayu discográficu “A teyavana” que ya llevaren por dellos llugares d’Asturies y presentaren tamién esti mes d’agostu nel festival Intercélticu de Lorient.

“A teyavana” grabóse nos estudios TUTU ente mayu y setiembre, cola producción de Sergio Rodríguez y Ánxel González. “A teyavana” ye un discu con 12 temes onde se combinen los de reellaboración tradicional y los de composición propia del grupu. A más, n’esta ocasión, cuenta cola collaboración de Esther Fonseca, que pon voz al cantar “2417”.

Presentación del discu de La Col.la Propinde

Dientro de los actos del Festival Internacional de Pianu van celebrase cuatro exhibiciones pianístiques que, sol títulu de “Ciclu de Nuevos Solistes Internacionales”, van poder esfrutase nel Centru Integráu de Pumarín Xixón-Sur dende güei, 24 d’agostu y hasta’l 27 d’esti mesmu mes, n’horariu de 19:30 hores.

El Mercáu Tradicional de Porrúa llevó esta fin de selmana al públicu hasta esti llugar de Llanes, hasta convertir esti caberu añu nún de los más exitosos del primer Mercáu que se ficiere n’Asturies y que se convirtiere en modelu imitáu per tol país.

El buen tiempu fizo que la convocatoria en Porrúa brillare esti añu, con una programación d’actuaciones centrada en música tradicional, cola banda de gaites Llacín como animador principal d’un Mercáu nel que nun faltaba artesanía, ecoloxía, mitoloxía y cultura tradicional de toa mena.

L’empiezu de la xornada cabera del Festival Xixón 5º40’ treslládase hasta’l Santuariu de Contrueces, onde a les 11 va actuar el Grupu folclóricu El Xolgoriu. De 12 a 14 hores, n’El Náutico, van facese xuegos y deportes tradicionales asturianos, cola ayuda de la Escuela de xuegos y deportes tradicionales 6 Conceyos. A la una, La Plazuela San Miguel acueye l’actuación del Grupu folclóricu Flor de Xaranzaina. A les cinco entama’l desfile de bandes de gaites participantes nel X Festival Internacional Villa de Xixón, durando hasta les siete y media, percorriendo’l Muro dende El Piles al Campu Valdés.

Participen la Banda de gaites Villa de Xixón, Banda de gaites Zucurrundullo, Torphichen and Bathgate Pipe Band, Banda de gaites Magüeta Infantil, Bagad Ploudiern y Banda de gaites Entienza. A les diez y media celébrase nel escenariu de La Plaza Mayor, l’espectáuclu “Yá suena la gaita”.

Yá suena la gaita: Cien años de Remis Ovalle

Esti añu cúmplese’l centenariu del gaiteru José Remis Ovalle. Trátase de la figura más reconocida n’Asturies nel ámbitu de la gaita y el nuesu gaiteru más internacional, yá que actuó en 14 países, grabando les sos primeres pieces en 1960 en Bonos Aires.

A partir de 1964 los sos ésitos engrándense coles composiciones que realiza pa la so nuera, la cantante de tonada María Rosa Quero, La Pastorina. Por too ello, llevar a cabu un espectáculu actual a partir del so repertoriu, sol títulu de ¡Yá suena la gaita!, significa reconocer la vitalidá d’esti repertoriu y l’importancia que sigue teniendo pa los músicos asturianos del presente.

A una amplia representación d’estos instrumentistes actuales, van xunise nel escenariu los miembros de la Banda Gaites Noega y la mesma Rosa María Quero, pa ufiertar un espectáculu que ponga al día la so música y que pueda faer cimblar con ella a les nueves xeneraciones.

El Xixón 5º40’ llega a la so xornada penúltima esti sábadu. A les doce, n’El Náutico, toca la Banda de gaites Bagad Ploudiem, de Bretaña. Mientres, nel Paséu de Begoña va ser el turnu de la Banda de gaites Torphichen and Bathgate Pipe Band, d’Escocia. La Plazuela San Miguel acueye actuación tamién al meudía, nesti casu de la Banda de Gaites Infantil Villa de Xixón “Magüeta”.

Una hora más tarde, n’El Náutico van sonar les gaites gallegues de la Banda de Gaitas Entienza, mientres nel Paséu de Begoña va poder esfrutase de la Banda de gaites Villa de Xixón. Tamién a la mesma hora, pero na Plazuela San Miguel, actuación de la Banda de Gaites Zucurrundullo, de procedencia gallega.

De 19:00 a 21:00 hores, nos Xardinos de la Reina, xuegos y deportes tradicionales asturianos, coordinaos pola Tertulia Cultural El Garrapiellu. Nel Paséu de Begoña toca mientres Lleiba, y a les 19:30 hores, na Plaza d’Italia, el Grupu folclóricu Xiringüelu. A les diez de la nueche la Plaza Mayor acueye la semifinal del X Festival Internacional de Gaites Villa de Xixón.

El llunes termina’l FIDO. El sábadu y el domingu son los díes más intensos del Festival Intecélticu d’Occidente, que se celebra en Tapia. El sábadu a les doce entamen estes dos xornaes con ambientación caleyera de la Banda de gaites del concello de Verea, un taller de pandereta a la una, y una amuesa musical de la banda de gaita Soto Rei, a la una.

Yá de tarde, a les 19:30, cursu de percusión nel auditoriu de la Casa de Cultura, pa darréu siguir con un cursu de curdión impartíu por un prestixosu músicu tradicional. Pieslla la nueche The Sweet Scottish Night, dando un desansu a la tradicional ‘Noite Máxica’ pa sosprender a los visitantes.

El domingu terminen actividaes como’l mercáu y el propiu FIDO, que celebra a les doce una alborada, con salida del puertu de Tapia y actuación de toles bandes frente al homenaxe al pescador, na escampada del muelle. Tres l’actuación conxunta da empiezu un pasacais pel centru de la villa hasta la ilesia. Ellí, les bandes actúen a lo llargo de la celebración eclesiástica. La escelente acústica de la ilesia parroquial de San Esteban contribúi a faer más especial esta misa folclórica.

A les 13:45 va producise la recepción oficial per parte de la Corporación municipal a toles bandes participantes nesta décimu cuarta edición de Fido. L’actu va tener llugar nel salón de plenos del Conceyu.

L’últimu taller de la fin de selmana, dedicáu al vigulín, va dalu Palomo Trigas, nel auditoriu de la Casa de Cultura, dende les ocho la tarde.

A les 23 hores, conciertu al cargu de los grupos ‘The Urban Folk Quartet’ (UK) y Milenta 3 (Asturies).

El Xixón 5º40’ recibe güei vienres actuaciones de bandes y grupos d’estos trés países atrlánticos, destacando nel programa la formación escocesa Wolfstone. Amás, siguen peles cais de Xixón, el I Alcuentru de Cerveces del Mundu y el Mercáu Tradicional Asturianu, de 11 a 21 hores, en Cimavilla y Campu Valdés.

A les siete y media n’El Náutico va actuar la Torphichen and Bathgate Pipe Band, d’Escocia. A la mesma hora, en La Plazuela San Miguel va tar la Banda de Gaitas Zucurrundullo, de Galicia. Mientres, na Plaza d’Italia, van tar los bretones de la banda de gaites Bagad Ploudiern. La nueche va pesllase col espectáculu del grupu escocés Wolfstone.

Wolfstone

Cola edición de Terra Firma Wolfstone edita unu de los meyores discos de la so carrera, qu’atesora una calidá de soníu enorme y una producción artística bien acertada atopando nos sos riegos dalgunes de les grandes pieces del grupu y munches de les virtúes que-y otorguen la categoría de gran grupu: una base rítmica colosal, duelos a cuatro manos ente Stevie Saint a les gaites escoceses y Duncan Chisholm al violín de los que quiten la respiración, amás de bien bonos cantares.