Música

Los “eurofans” tienen abiertu na páxina web Eurovisión-Spain.com un procesu estraoficial d’escoyeta de candidatos pa dir al festival d’Eurovisión en representación de TVE. Ente los 106 propuestos na primer parte de la “Elección interna 2010” taben los asturianos Dixebra y Hevia,amás del grupu Vetusta Morla, pasando namás estos dos últimos a la seminifinal, onde tán representaos cincuenta artistes y grupos. Ente ellos hai nomes tan comerciales como David Bisbal, Enrique Iglesias, Malú o Marta Sánchez, pero tamién otros artistes de la escena folk, como los gallegos Carlos Núñez y Luar na Lubre.

Esti procesu busca facer un llistáu de los artistes preferíos polos fans inscritos na web que lu convoca, col envís “d’animar a los artistes del llistáu a presentar les sos candidatures al Festival d’Eurovisión y a TVE a convidalos a participar del procesu d’escoyeta”.

Los cincuenta artistes que queden agora na escoyeta van dir siendo eliminaos en tandes de cinco, según el menor apoyu popular, quedando diez na final. El ganador va anunciase’l 21 de payares y Hevia podría facese con esti títulu honoríficu de “preferíu de los eurofans”. Daqué que de xuru nun diba molestar al gaiteru maliayu, pues a finales de 2007 declaró que “taría encantáu de dir a Eurovisión y amosar la música del norte en toa Europa”.

Per eses feches Hevia dixo tamién que’l Festival d’Eurovisión “ye yá un iconu na vida de la mio xeneración. Dende neñu seguí en familia les actuaciones de los grupos y la emocionante puntuación por países. Son munchos los recuerdos que s’axunten alredor d’esti eventu”. Quiciabes por ello los eurofans ven con ciñu la posibilidá de que’Hevia vaiga al Festival, pal que yá en 2007 dixo tener “bones idees en tornu a un tema”, alvirtiendo amás que sí diba sedría “pa ganar con propuesta mui mui impactante”.

L’añu pasáu la vencedora d’esta escoyeta foi Mónica Naranjo con 2.042 votos, siguida por artistes como Chenoa, Mirela, La 5ª Estación, La oreja de Van Gogh, Marta Sánchez, Diana Navarro, Merche, Rosa y Amaral.

Llistáu completu d’artistes pre-escoyíos

El miércoles 27 d’ochobre a les 20:00 hores la Orquesta de Cámara de Berlín, so la dirección de la violinista Katrin Scholz, va ufiertar un conciertu nel Xovellanos, en collaboración cola Sociedá Filarmónica de Xixón. Amás de la dirección ya interpretación como vigulín solista de Katrin Sholz, el conciertu va cuntar la presencia de la sopranu Trine Wilsberg y la mezzo Rahel Insermaur, nun programa que consta de cinco partes, d’autores como Purcell, Vivaldi, Bach o Händel.

La Orquesta de Cámara de Berlín ye una de les orquestes más tradicionales de la capital alemana. El conxuntu, güei formáu mayoritariamente por mozos músicos, caltuvo y consolidó la so posición a lo llargo de más de seis décades y destacó a nivel internacional gracies a xires per Italia, Francia, Gran Bretaña, Xapón, India, L’Arxentina, EEXX o Canadá.

Fundóse en 1945. En collaboración col so primer director artísticu, Helmut Koch, dende’l principiu goció d’una gran reconocencia. Nos años 50′ y 60′ la orquesta llogró diverses distinciones como’l Gran Prix du Disque y el Premiu del Discu de Xapón por “Juditha Triumphans” de Vivaldi, “L’Orfeo” de Monteverdi y “Betulia liberata” de Mozart, amás del Premiu Goethe de la ciudá de Berlín pol so escelente llabor de representación de la ciudá nel estranxeru.

Nos últimos años la Orquesta de Cámara de Berlín collaboró con el directores artísticos Katrin Scholz, Michael Sanderling y Michael Erxleben, colos que realizó delles grabaciones pa Berlin Classics/edel.

Esti vienres, 22 d’ochobre, de magar les 9 la nueche, la sala The Class, asitiada na avenida Torcuato Fernández Miranda de Xixón, acueye un conciertu multiple organizáu por Vida Ilegal Producciones. Na cita van actuar Potato, grupu d’ska-reggae de Gasteiz; el grupu asturvascu de reggae Freedom Fighters y la formación folk-ska asturiana Skama la Rede.

El conciertu pue esfrutase con una entrada de 6 euros n’anticipao y 10 nel llugar del conciertu. Les entraes véndense nel propiu llocal, na Llibrería Paradiso y nel Baruku, en Xixón. N’Uviéu pueden mercase na tienda L’Arcu la Vieya.

Más información sobre’l conciertu

“Caltener” ye’l títulu del discu nuevu de la banda de gaites Fonte Fuécara, que se presenta esti sábadu, 23 d’ochobre, na Escuela de Música Tradicional de Llanera y de magar les siete y media la tarde. Nel actu va participar, amás de la banda, el flauteru bretón Jean-Michel Veillon, que collabora nel discu, y Xel Pereda.

Nel discu, el cuartu de la banda dende’l so ñacimientu en 1979, ta más averáu al folk de lo habitual nes bandes de gaites, participen músicos como Lisardo Prieto, Héctor Braga, Sergio Rodríguez, Chus Pedro o Rubén Bada.

Toli Morilla lleva los cantares de Bob Dylan al Tierra Astur de Cualloto esti xueves día 21 d’ochobre dientro de los conciertos-espicha d’esti establecimientu.

El cantautor asturianu va ufrir un conciertu colos temes que componen el so últimu trabayu discoráficu, dedicáu a facer versión de “Diez canciones de Bob Dylan n’asturianu”.

Nel discu apaecen temes como «Sara» o «Knockin’ on heaven’s door», con dellos cambios autorizaos pola discográfica de Dylan.

Toli Morilla asoleyare hasta agora cinco discos, dellos en castellán, con temes n’asturianu, y otros defechu n’asturianu: “Entropía” (2006), “Nueche d’insomniu: L’espectáculu” (2005), “Nueche d’insomniu” (2004), “Entre el barro y las preguntas” (2003) y “Nunca des la espalda” (1998).

Güei, vienres 15 d’ochobre, a les 19:30 hores, entama esti ciclu del Conceyu de Xixón, dedicáu al músicu de Felpeyu fináu en tráxiques circunstancies. Nel primer conciertu van tocar Dolfu Fernández (vigulín), Borja Baragaño (xiblata), Alberto Ablanedo (buzuki) y Alberto Abad (bodran). La entrada ye de baldre.

Ún de los nomes más prestixosos de la música folk d’anguaño, Héctor Braga, acaba d’espublizar el so tercer discu “Caminos del mundu”, un trabayu grabáu y producíu n’Asturies y distribuyíu por Algamar producciones. Nel discu axunta la so voz, l’harpa, la zanfona, la gaita, el vigulín, el chelu y la música d’otres escenes, como’l pop o’l jazz.

Braga ye tituláu superior en Violonchelu y Etnomusicoloxía, dominando más d’una docena d’instrumentos clásicos y tradicionales. Estrenó obres sinfóniques y trabaya tamién como productor discográficu. Tien colaborao amás con grupos y artistes como Anabel Santiago, Skanda, Hevia, Tejedor, Toli Morilla o la Orquesta Sinfónica d’Asturies, ente otros munchos.

Merca temes sueltos del discu de Braga

El DMR 2010 va celebrase el 16 y 17 d’ochobre en Xixón. La xornada primera va desenrrollase nel Llar L’Ayalga, de magar les siete la tarde, cola poyección del documental “Ochobre 34, memories d’un país”, producíu por Darréu. De siguío va celebrase una charra titulada “Ochobre 34-37” a cargu d’Antón Martínez, hestoriador. Zárrasa’l primer día d’actos con un Alcuentru Internacionalista con delegaciones d’Aragón, Canaries, Cantabria, Euskal Herría, Països Catalans, una espicha y música del país. El sábadu los actos treslládense al Pueblu d’Asturies dende les 11:30 hores.

Pela mañana van facese xuegos tradicionales, tornando, pa la xinta, al Llar L’Ayalga. A les siete la tarde na Plaza Mayor del conceyu va homenaxease “los/es revolucionarios/es asturianos/es”, zarrándo’l DMR el IX Conciertu “Asturies nun escaez”, que se celebra esti añu nel Pabellón d’Asturies na Feria de Muestres de Xixón, de magar les nueve.

Nel conciertu van actuar Gatillazo, KOP, Escuela de Odio ya IRA HxC. El preciu ye de 16 euros anticipada y 18 nel día l’actuación. Pueden mercase en Mieres, nel Cafe La Habana; Llaviana: Cervecería Bulldog; Sotrondio: La Chez; L’Entregu: Café La Yenda, Tom Malory; Ciañu: La Folixa; Sama: Imprenta La Fueya, Cervecería Sheffield; La Felguera: Planta 14, Tom Malory, El Bulevar, Vieja Escuela;Noreña: Llar d’Andecha, Los Riegos; Siero: El Diañu, Juda; Villaviciosa: La Bodega II, Uviéu: Llibrería Paraxuga, Cervecería Noise, L’Arcu la Vieya; Xixón: El Baruku, La Nueva Caleya; L.lena: Ca’Toos; y Ribeseya: Chigre’l Corquiéu.

Esti xueves 11 de febreru, a partir de les 21:30 hores, la sidrería Tierra Astur de Cualloto va ufrir un nuevu conciertu de los xueves cola bandina Les Comadres qu’actúa precisamente na xornada que-y da nome y entama les celebraciones del Antroxu nesta Sidrería.

Los componentes d’esta formación vienen de llugares ya influencies musicales bien estremaes que van del folk a la música clasica, el jazz o’l rock. La bandina Les Comadres son un grupu de musicos que s’axunten pa esta ocasión y que na so mayoría pertenecen a otres formaciones más estables como son Los Ciquitrinos o los Llanzones.

El grupu I.R.A. (Insurgentes Revolucionarios Asturianos) fízose col primer premiu de “Sones de Revolución”, que tuvo llugar na sala I-Pop d’Uviéu, el pasáu 2 d’ochobre. El premiu convócase con motivu de la celebración del Día de la Mocedá Revolucionario 2010, nel qu’esti añu, per primer vegada, la organización independentista de mocedá Darréu, entamó un conciertu-concursu cola fin de promocionar a los grupos mozos asturianos y escoyer al cuartu grupu que tocará na IX edición del “Asturies Nun Escaez”.

El grupu va participar nel conciertu xunto Gatillazo, KOP y Escuela de Odio, que se celebra a lo llargo d’esti mes.

Amás d’I.R.A. participaron nel concursu Brigada, Wanye y Vinagre de Sidra. El xuráu tuvo compuestu por músicos de diferentes formaciones y miembros de Darréu.