Música

El Teatru Xovellanos axunta lo meyor del gospel mundial nun Festival que cada añu llega a la ciudá de Xixón nel mes d’avientu. Les meyores voces del panorama actual del xéneru danse cita pa esbillar una llista interminable de clásicos bien conocíos, pero tamién pa nueves fórmules, como la que propón Joshua Nelson, alma mater de la denomada Kosher-Gospel Music, un fundíu de xéneros que toma dende la tradición musical xudía del klezmer pasando pol Soul y el Rhythm & Blues. El festivla entama’l miércoles 15 y termina’l 18 d’avientu.

El programa entama’l miércoles a les ocho y media la tarde nel Teatru Xovellanos de Xixón con Los Spirit of New Orleans Gospel Choir, un grupu que tien los sos oríxenes nos mundialmente conocíos JOYFUL! (Soul-Gospel y Rhythm & Blues). Nos sos empiezos, el grupu formaba parte de la sección de coros de los Joyful pero, tres numberoses actuaciones en festivales y conciertos pelos Estaos Xuníos y Europa, convirtiéronlos nuna formación permanente y autónoma. Caracterizaos pol so escelente gospel tradicional, fueron incorporando a les sos files cantantes y músicos profesionales de la Zona de Nueva Orleans hasta convertise nun referente mundial d’esti xéneru. Spirit of New Orleans Gospel Choir realiza de cutio xires añales per Europa que compaxina con actuaciones en festivales como Monterrei o’l Jazz and Heritage de Nueva Orleans. Ente los artistes qu’acompañaron atópense dende Bryan Adams a Earth Wind and Fire, pasando pola diva del blues Marva Wright o la banda de pop alemán PUR. El so repertoriu inclúi clásicos que son pura hestoria: Glory, Glory, Hallelujah, Oh Happy Day, Stand By Me, Amazing Grace, Down By the Riverside…

Yá’l vienres, a la mesma hora, van tocar The Mississippi Mass Choir, fundáu en 1988 por Frank Williams (miembru de los llexendarios Jackson Southernaires), The Mississippi Mass Choir ye unu de los coros de gospel más famosos, premiaos y con mayor proyección internacional. Col so primer discu The Mississippi Mass Choir Live (1989) asitiáronse nos Númberu 1 de les llistes Gospel de Billboard y Cash Box, mientres el grupu yera votáu Coru del Añu y Meyor Nuevu Artista del Añu na Xunta Añal James Cleveland de New Orleans. Esi mesmu añu recibíen cuatro premio nos Stellar Awards y dellos galardones en diverses categoríes nos Pemios Soul Train Music. A partir d’ende, los premios asoceden a los discos y viceversa: God Gets The Glory (1990) grabáu en directu énte unes 8.000 persones y ye nuevu Númbeur 1 en Billboard; It Remains To Be Seen (1993) foi otru atayante Númberu 1 y vendió más de mediu millón d’exemplares. Premiaos col Grammy al Meyor Coru de Gospel en 1997, los sos últimos discos son: I´ll See You in the Rapture (1998) y Enmanuel (1999).

El festival remata’l sábadu 18 d’avientu a les 20:30 hores con Joshua Nelson (“soi negru y xudíu, y por eso la peor velea del Ku Klux Kan”, diz de sí mesmu) xubé per primer vegada a un escenariu pa rindir tributu a la grande ente les grandes: Mahalia Jackson. Pioneru de la denomada Kosher-Gospel Music (un fundíu de xéneros que toma dende la tradición musical xudía del Klezmer pasando pel soul y el Rhythm&Blues), Nelson grabó’l so primer discu a los 13 años, una xoya titulada How I Got Over de la que llegó a vender 1.150.000 copies. Joshua Nelson, un increíble fenómenu sobre l’escenariu, actuó n’estadios, teatros, sinagogues ya ilesies, y la llista de nomes colos que collaboró o grabó ye, cenciellamente, impresionante: Aretha Franklin, Wynton Marsalis, Billy Preston, Albertina Wallker, Vanessa Bell Armstrong, The Barret Sisters, Hezekiah Walker…

Trés díes pa esfrutar n’Asturies, de la meyor música gospel del estáu, nun festival que va pasu ente pasu afitándose na axenda cultural xixonesa.

La Banda de Música de Corvera anunció yá l’añu pasáu la celebración de los sos primeros 25 años cola grabación d’un DVD nel que van incluyir clásicos del pop y el rock asturianu y mundial. Ente los artistes escoyíos U2, Dire Straits, Amy Winehouse y Michael Jackson. Amás de temes d’El Último de la Fila, Radio Futura, Nuberu, Mecano o Franco Battiato. Esti sábadu van poder sentise estos temes nun conciertu únicu que va celebrase na sala 3 de los Cines Box de ParqueAstur a les 17 hores.

La música escoyóse al traviés del repartu d’un cuestionariu ente los ciudadanos de Corvera y axunta un total de 25 temes, qu’escoyeron a la fin un xuráu formáu por Alberto Toyos, Aurelio Arxel, Xune Elipe, Rafael Balbuena y David Serna.

Les igües de los temes tán a cargu d’Adolfo Camilo Díaz y Dark la Eme, ente otros.

Ente los participantes nesti conciertu van tar, amás de la Banda de Música de Corvera, la Banda de Gaites Nerbia, Chus Gutiérrez, Anabel Santiago, Chus Pedro, Xune Elipe y Xulio Antidio. Adolfo Camilo Díaz ye l’impulsor d’esta iniciativa denomada «La música que lleves adientro»

Esti xueves, 9 d’avientu, la bandina de música tradicional asturiana “De mandilín” actúa a les nueve y media la nueche na sidrería Tierra Astur de Cualloto. El grupu ta formáu por xente veterano nel folk del país que collaboren o trabayen en delles agrupaciones d’esi carácter y escueles de música: Pablo Pumarada al tambor y percusiones varies, David Varela al curdión y guitarra, Pedro P. Sanjurjo a la gaita, xiblates y gaita rabil y Dani García de la Cuesta al vigulín.

El Chigre La Casa Posafuelles acueye esti vienres, de magar les diez de la nueche, un conciertu del grupu Vallarna, que dende la so formación en 2007 en Valladolid, vienen tocando temes castellanos y cántabros, espublizando apocayá’l discu “km. 90”.

El grupu ta formáu por Javier Román, el Niñu, rabelista y vigulinista de Reinosa; Arturo Rodríguez, dulzaineru de Palencia; Jesús Enrique, Chuchi, unu de los más serios referentes de la guitarra acústica en Castiella y Carlos Martín Aires guitarrista y bouzoukista.

Gonzali Producciones tien la intención d’estrenar, na segunda metada d’esti mes d’avientu, dos nuevos llargometraxes que tán a piques d’acabar el so doblaxe al asturianu. Trátase d’El tercer home, de Carol Reed, y del clásicu del cine d’animación Los viaxes de Gulliver, dirixíu por Dave Fleischer.

El tercer home (The Third Man) ye una película del Reinu Uníu dirixida por Carol Reed, escrita por Graham Greene y protagonizada por Joseph Cotten y Orson Welles. Ta considerada la meyor obra fílmica británica de la historia.

Los interiores rodáronse nos London Films Studios, de Shepperton (Inglaterra), y los esteriores n’Austria. El tercer home recibió’l Gran Premiu del Festival de Cannes y l’Óscar a la meyor fotografía en blanco y negro, na persona de Robert Krasker. La banda sonora, firmada por Anton Karas, ye una de les más famoses de tolos tiempos. Memorables son tamién diverses escenes de Viena, como la de la noria xigante del Prater o la persecución nes cloaques d’esta ciudá. La primera aparición d’Orson Welles (el movimientu d’una llámpara enseña a Harry Lime énte’l sosprendíu rostru de Joseph Cotten) ta considerada como la meyor presentación d’un personaxe na historia del cine. El planu secuencia del final tamién se considera como’l meyor de la historia.

Los viaxes de Gulliver (Gulliver’s Travels) foi el primer llargumetraxe d’animación producíu polos Estudios Paramount, y que tamién foi’l primer film d’esti xéneru que nun taba venceyáu a los Estudios Disney.

La película dirixóla Dave Fleischer y producióla’l so hermanu Max Fleischer, dos piones del cine animáu que nos años cuarenta fueron mui populares polos sos curtiometraxes de Superman. Los guionistes Dan Gordon, Cal Howard, Tedd Pierce, Edmond Seward y Izzy Sparber encargáronse de treslladar a la gran pantalla una parte de la novela de Jonathan Swif, centrada na aventura de Gulliver nel país de Lilliput.

Los animadores emplegaron la técnica del rotoscoped en determinaes escenes, aportando un notable realismu al film, que tien una estupenda calidá d’animación y un bon tratamientu del collor. Na estaya musical ye destacable la banda sonora de Victor Young y que-y valieren a la película dos nominaciones a los Oscar a Meyor banda sonora y Meyor canción orixinal (pol tema “Faithful Forever”).

Pa estos doblaxes Gonzali Producciones cunta cola participación d’actores asturianos. Al igual que se ficiera nel casu de La nueche de los muertos vivientes, esti versionáu fíxose ensin subvención nenguna.

El grupu de folk lletrónicu Xera, recién llegáu del Festival Liet Internacional, celebráu esti añu en Bretaña, toca esti vienres nel auditoriu de Caxastur en Mieres a les ocho la tarde. Esti conciertu ta dientro del Ciclu de Conciertos Música del Sieglu XX qu’organiza la caxa asturiana pelos sos centros culturales.

A les seis y media d’esti martes, 30 de payares, el Salón d’Actos del CMI d’El Coto, en Xixón, va acoyer una sesión nueva del ciclu dedicáu a l’asturianada y organizáu pol Conceyu de Xixón en collaboración cola Asociación d’Intérpretes de la Canción Asturiana (AICA). Nesta ocasión van cantar María José García Álvarez y Serafín González González, acompañaos a la gaita por Moisés Martínez López. Marcelino Díaz Losada va echar dellos monólogos tradicionales.

Esti sábadu pasáu celebrábase na llocalidá bretona d’An Oriant el Festival de Llingües Minorizaes Liet-Internacional, que cuntaba cola presencia del grupu asturianu Xera. El so cantar “Tierra” quedó en segundu llugar, per detrás del grupu d’Islles Feroes “Orka”, que con “Rumdardrongurin” consiguió’l favor del xuráu, llevando’l premiu del públicu los friulanos “Resistence in Dub”.

El grupu asturianu fízose col 27% de los votos del públicu, que podíen votar al traviés d’interné. Dende la llocalidá bretona, los miembros del grupu mostráronse “encantaos” cola participación nel Festival y dieron les gracies “por tol sofitu de la xente que mos quier y que siente y apoya que tol esfuerciu merez la pena”.

Asturies lleva trés años participando nel Festival Liet International, cola presencia de Dixebra, Alfredo González y Xera, y tendrá una oportunidá más pa facese cola victoria’l 19 de payares del 2011 nel Teatru Giovanni d’Udine, n’Italia. En 2012 ta previsto que’l festival se celebre n’Asturies.

Entrevista con Miguel Ánxel, miembru de Xera

Esti domingu, 28 de payares, a partir de les 22:30 hores, el programa Sones de la TPA, va retresmitir el conciertu grabáu’l pasáu sábadu 30 d’ochobre nel auditoriu municipal “As Quintes” d’A Caridá (El Franco), con grupos participantes nel discu “Conceyo de cantares”, editáu dende la Oficina de Coordinación Cultural y Llingüística del Parque Hestóricu del Navia con cantares en gallego-asturianu.

El conciertu ta presentáu pol músicu y folclorista Xosé Antón Fernández, “Ambás”; y la periodista y presentadora de la TPA Sonia Fidalgo. Nél actuaron los grupos Mestura, de Grandas de Salime; Cádaba d’A Caridá; Bacotexo, de Tapia; Mezá, de Bual y Tuenda, d’Uviéu.

Esti sábadu 27, celébrase’l Festival de Llingües Minorizaes Liet-Internacional, qu’esti añu llega a la llocalidá bretona d’An Oriant. Nesta VII edición Asturies va tar representada pol grupu Xera, que ganó esti añu’l Premiu al Meyor Cantar. La emisora radio sele va emitir la gala y un especial, de magar les seis de la tarde. Pela so parte, la RPA va emitir la gala colos comentarios d’Ismael Arias. Les imáxenes van poder siguise pel A8, segunda canal de la TPA, de magar les ocho y media.

La emisora Radio Sele va treslladar a Ana Moro, Dany Vallina, Felix Lillo y Carlos Pulgar hasta’l Festival, mientres Mely Fernández y Xuanxo Mariño, van tar dende los estudios centrales d’Uviéu.

Enantes de la conexión en directu, Sele tien programáu un especial dedicáu al proyectu Xera, grabáu na so casa de S. Andres, onde’l grupu falará de cómo se prepararon pa viaxar a tierres bretones.

Entrevista con Miguel Ánxel, miembru de Xera