Música

L’Academia de les Artes y les Ciencies de la Música asoleyó yá la llista completa de los finalistes en toles categoríes (28 en total) de los XV Premios de la Música. Na establecida pal premiu a la Meyor Canción n’Asturianu, los nomianos son Corquiéu, col tema «I&C» (del discu Suaña), Brandal, con «Chueve» (del discu Na fonte La Canalina) y Anabel Santiago, con «Agora» (del discu Agora). Los académicos van votar agora a los sos favoritos, faciéndose la gala d’entrega’l próximu 18 de mayu nel Teatru Arteria Coliseum de Madrid.

Dende la creación de la categoría de llingua asturiana ganaron el premiu Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008), Esther Fonseca con «Negra» (2009) y Dixebra con «Cantar de la redención» (2010).

TVE y l’equipu que dirixe a Lucía Pérez, la so representante pa Eurovisión 2011, van facer cambios nel so tema “Que me quiten lo bailao”, p’adaptala al estilu de la cantante gallega, introduciendo instrumentación folk, amás de tornar delles frases al gallegu, llingua na que Pérez grabó’l so discu últimu.

La representante de TVE en Düsseldorf ha falar tovía cola canal estatal y col compositor pero gustaría-y da-y “un toque más averáu a la cultura gallega”.

Ente les idees aportaes pol equipu de la cantante gallega pa la promoción del cantar, ta’l visitar los centros gallegos espardíos per Europa.

Nun alcuentru con llectores del portal de RTVE, la cantante dixo que “Dempués de 50 años participando, “yá ye’l momentu de cantar nuna de les otres llingües que tenemos nel nuesu país”, anque reconoció que “nun sé si la final lo fadremos, entá ye mui pronto”. Amás va grabase una versión integra n’inglés y probablemente, ya independientemente de que se cante n’Eurovisión con delles frases en gallegu, una versión completa en gallegu.

El grupu candasín Skama la Rede resultó ganador col cantar Condenáu, na gala del Premiu al Meyor Cantar celebrada esti sábadu en Mieres, onde competía con Skama la Rede, Falanoncaduca, Verdasca, Corquiéu y Blima. El grupu va representar a Asturies nel festival Liet International, la Eurovisión de les llingües minoritaries. La gala presentáronla Esther Fonseca, cantante y presentadora, y Xune Elipe, cantante de Dixebra y conductor del programa musical Rockmería de la RPA.

Dempués de les actuaciones de los grupos finalistes y del grupu Xera, ganador del añu pasáu, llegaron les pallabres del xuráu y les autoridaes.

L’alcalde de Mieres, Luis María García, mostróse encantáu de recibir la gala nel so conceyu, mientres que Consuelo Vega, directora xeneral de política llingüística dixo que tolos asturianos tamoa d’alcuerdu nel “apegu a la nuesa cultura” y recordó que se publicaron 31 discos n’asturianu y gallego-asturianu “prueba de la bona salú de la industria musical asturiana”.

Al recoyer el premiu, Míguel Fernandi, d’Skama la Rede, bromeó sobre l’amuletu que-y dio un amigu y gracies al que, dixo, “ganamos el Premiu” Agradeció’l premiu “a toles persones que trabayaron, trabayen y van siguir trabayando pa que la nuesa llingua seya oficial”.

Skama súmase asina al llistáu de ganadores d’esti premiu, formáu por Toli Morilla, Herbamora, Alfredo González y Xera.

Mapi Quintana & Marco Martínez van facer un homenaxe a Ella Fitzgerald y Joe Pass na primer Selmana de Jazz de La Pola L.lena. L’actuación va ser nel Teatru Vital Aza, esti vienres 18 de febreru, de magar les ocho y media y por 3 euros.

L’homenaxe a Ella Fitzgerald y Joe Pass faise al traviés de los cuatro grabaciones d’estudiu que dambos ficieron ente 1973 y 1986 pal sellu Pablo. El calter íntimu y delicáu d’esta formación, amás de les improvisaciones de scat y el conceutu de guitarra a solu, destaquen al pie de la compenetración ente dambos artistes, yá que Mapi Quintana y Marco Martínez pretenden recordar a dos de los sos maestros.

Los artistes que van competir por esti gallardón, convocáu pola Conseyería de Cultura d’Asturies, van ser Skama la Rede con «Condenáu», Falanoncaduca con «Sele sound system», Verdasca con «Entre ríos y entre soutos», Corquiéu con «Alma valera» y Blima con «Señaldá». La gala d’entrega va facese nel Auditoriu Teodoro Cuesta de la Casa la Cultura de Mieres esti sábadu, 19 de febreru. Unu d’ellos va representar a Asturies nel festival Liet Lavlut Internacional.

El Premiu al Meyor Cantar, pa obres n’asturianu y gallego-asturianu, instituyóse nel añu 2007 pola Conseyería de Cultura y Turismu col oxetivu de promocionar y favorecer la creación musical orixinal nos idiomes propios d’Asturies. Los ganadores de les ediciones anteriores fueron «Azul y gris» (Toli Morilla), «Nosh» (Herbamora), «La nada y tu» (Alfredo González) y «Tierra» (Xera).

Un conciertu acústicu de Toli Morila va celebrase’l xueves 17 de febreru a les siete y media la tarde, nel CMI Atenéu La Calzada de Xixón. Nél va tocar los temes de la so carrera, “nun puntu d’intersección ideal ente’l rock acústicu, el cantar d’autor y el folk”.

L’actuación forma parte d’un ciclu col quwe se quier “averar a los barrios de la ciudá una interesante ufierta musical entamada en ciclos especializaos”.

La Plaza’l Carbayéu d’Avilés acueye esti miércoles 16 de febreru, ente les 22:30 y 23:30 hores, un conciertu de Mapi Quintana & Marco Martínez, qu’homenaxeen a Ella Fitzgerald y Joe Pass. El vienres van tar en L.lena.

L’homenaxe a Ella Fitzgerald y Joe Pass faise al traviés de los cuatro grabaciones d’estudiu que dambos ficieron ente 1973 y 1986 pal sellu Pablo. El calter íntimu y delicáu d’esta formación, amás de les improvisaciones de scat y el conceutu de guitarra a solu, destaquen al pie de la compenetración ente dambos artistes, yá que Mapi Quintana y Marco Martínez pretenden recordar a dos de los sos maestros.

Julio Ramos cantautor en castellán y n’asturianu dende la dómina del Nueu Canciu Astur, llega al CMI Pumarín “Xixón-Sur”. L’actuación va facese’l llunes 14 de febreru, a les 19:30 hores y supón “un viaxe al traviés del tiempu con cantares d’autor como filu conductor”.

L’actuación forma parte d’un ciclu col quwe se quier “averar a los barrios de la ciudá una interesante ufierta musical entamada en ciclos especializaos”.

El Conceyu de Xixón organiza un conciertu de Travados Dúos nel CMI d’El Llano. L’actuación forma parte d’un ciclu col quwe se quier “averar a los barrios de la ciudá una interesante ufierta musical entamada en ciclos especializaos”.

L’actuación va entamar a les siete la tarde d’esti xueves, 10 de febreru.

Esti miércoles 9 de febreru, a les 19:30 hores, el Salón d’Actos del Centru Municipal Integráu Atenéu La Calzada de Xixón acueye una sesión nueva del ciclu dedicáu a l’asturianada, cola participación de Rogelio Suárez Menéndez y Carmen Camporro Palicio, acompañaos a la gaita por Valentín Fuente Álvarez.

Amás, va el monólogu va tener el so espaciu de la mano de José Manuel Reguero El Maestru.

L’actividá entámenla a comuña’l Conceyu de Xixón y l’Asociación d’Intérpretes de la Canción Asturiana (AICA).