Música

La Fiesta del Mercáu de la Flor de La Pola L.lena recibe a trés de los grupos asturianos con más éstiu, Dixebra, Skama la rede, La Col.lá Propinde y Falanoncaduca. El conciertu va celebrase’l sábadu 30 d’abril. Amás va celebrase un alcuentru de bandes de gaites.

El domingu 1, Toli Morilla, Spanta la xente y Brutus Daughiers van tocar dientro de los actos de la mesma celebración l.leniza.

L’Ayuntamientu de Llangréu, en collaboración cola Asociación de vecinos S. Antonio de Ciañu y la Escuela de Música Tradicional del AMPA del Conservatoriu Valle del Nalón organicen la segunda fiesta de primavera que va tener llugar en Ciañu’l próximu domingu 1 de mayu.

La Romería presenta una montonera actos que, dende primer hora de la mañana’l domingu, van llevar folixa y cultura tradicional per tol distritu llangreanu de Ciañu. A les 11:00h va haber Diana floriada con gaita y tambor, desfile de Xigantes y Cabezudos y disparu de morteros. A les 12:00h va acompañase de música tradicional la misa los domingos. Dempués, a les 12:30 van ponese talleres de baille a lo suelto y de xuegos tradicionales pa neños y neñes nos xardinos del parque Rosario Felgueroso de Ciañu. A les 12:50, y dempués de repartir unes llambionaes ente la xente que participe nos xuegos y talleres, va empezar la Sesión Vermú amenizada polos alumnos y alumnes de la Escuela de Música Tradicional “Llangréu” amás de Carlos Ronderos, Justino González, Xuan Nel Expósito y l’agrupación coral José León Delestal “El Carmen”.

N’acabando la sesión, a les 13:30 va tener llugar la segunda edición de Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 18:00h, el parque de Ciañu va acoyer la II ROMERIA DE PRIMAVERA amenizada polos alumnos y alumnes de la Escuela de Música Tradicional “Llangreu” y los sos profesores Anabel Santiago, Chema Fombona, Chus Solis, Hector Braga, Pelayo Fernandez, Pepín de Muñalen y Xose Ramon Navia amás de Carlos Ronderos, Justino González, Xuan Nel Expósito y l’agrupación coral José León Delestal “El Carmen”. Too esto con escenariu llibre y pipa de sidra.

El próximu xueves 28 d’abril a les 20:30 hores el reconocíu grupu de folk gallegu Luar na Lubre presenta’l so discu últimu Solsiticio, editáu por Warner Music, nel Teatru Xovellanos de Xixón y a pocos díes de cumplir 25 años nos escenarios. En “Solsticio” faen referencies a les dos feches nel añu nes que la diferencia de duración ente’l día y la nueche algamen los sos estremos, un momentu de marcáu cultu ancestral en Galicia que la formación llevó a los sos cantares.

Luar Na Lubre escueye Solsticio como nome del so docenu trabayu discográficu. Un títulu cargáu de significáu col que quieren definir un amiestu de músiques tradicionales y raigañu popular gallegu cola nuesa música medieval, de riqueza incomparable. Un compendiu de 15 temes que creen distintos ámbitos ente’l paganismu de les músiques populares y l’acentuada relixosidá de les melodíes medievales. De forma que cantigues del Rei Alfonso X, dedicaes a Santa María, conviven con otres melodíes de calter popular.

Nesti discu la zanfonía, que vuelve formar parte del universu sonoru de Luar Na Lubre, comparte espaciu cola guitarra llétrica y les programaciones, texendo melodíes que nos tresporten dende’l romanticismu hasta’l baille, y recreando elementos poéticos, lleendes y metáfores, qu’emplega’l grupu pa definir la so manera d’entender la música y la vida. Sabiéndose ciudadanos del sieglu XXI, percuerren agora en “Solsticio” vieyes travesíes enmarcaes col grandor del medievu, y los raigaños que conformen les pilastres del pueblu gallegu.

La Xunta pola Defensa de la Llingua Asturiana, en collaboración con Músicos pola Oficialidá, colectivu formáu por artistes de diferentes estilos musicales, vieno acabante como tolos años de sacar un cantar que val como banda sonora del movimientu de reinvindicación llingüística y que se presentó pela mañananel Conceyu Abiertu, na cai La Gascona d’Uviéu. El single d’esti añu, “Nun somos llinguateros” ya pué dende ellí.

Descarga de Nun somos llinguateros

El Cine Ideal de Ciañu va axuntar sobre l’escenariu a la banda interactiva catalana Insershow y a los asturianos Skama la Rede, La Tarrancha y Arma X. Sedrá’l domingu 1 de mayu, a partir de les 20 hores, y entamaos a comuña por FUSOA y el Centru Social La Semiente de L’Entregu. Esta folixa entámase cada añu dende 2003 pa recaldar fondos que sufragen los gastos xeneraos nos conflictos llaborales.

Pa los organizadores “los numberosos trabayadores (Venturo XXI, Alas, …) que sufren na Cuenca les consecuencies del capitalismu xabaz xustifiquen el cambéu de sede de los conciertos, qu’anguaño amás entámense conxuntamente con un nuevu proyectu que surdió na zona: el Centru Social La Semiente de L’Entregu”.

El públicu de les Cuenques va tener la oportunidá d’esfrutar per primer vegada de la banda interactiva de Barcelona Insershow. Los catalanes yá visitaron otres ediciones de la Folixa en Xixón, y vuelven col so espectáculu de versiones nel que ye’l públicu ye quien decide’l repertoriu.

El cartelu de la novena Folixa Primeru de Mayu inclúi tamién una esbilla de les propuestes musicales más interesantes feches n’Asturies. Ente elles la rima con rabia d’Arma X, la revelación del hip hop asturianu que llega con nuevu discu sol brazu. Dende L’Entregu llega’l reggae/ska de La Tarrancha, que va interpretar en directu les temes del so últimu trabayu, “ö-3-3” (otrestres). Cierra’l cartelu’l rock/ska/punk de Skama la Rede, ganadores de la última edición del Premiu al meyor cantar n’asturianu y tamién del premiu AMAS al meyor discu de rock.

Los conciertos van escomencipiar a les 20 hores del domingu 1 de Mayu nel Cine Ideal de Ciañu. Les entraes antemanaes tienen un preciu de 5 euros, que van ser 7 en taquilla. Dende Xixón flétase un bus al que puede apuntase tolos interesaos n’El Barucu (cai Almacenes), con un preciu de 12 euros qu’inclúi entrada y viaxe de dir y tornar. Hasta la fecha, la Folixa Primeru de Mayu hai axuntada a más de 40 bandes y miles de persones participaron nos ocho primeres ediciones. Ente otres formaciones, Betagarri, San Blas Posse, Habeas Corpus, Dixebra, Lendakaris Muertos o Anabel Santiago yá pasaron pol cartelu d’una de les cites musicales veteranes na primavera asturiana.

Venta d’entraes en: Xixón El Baruku, El Trisquel, Sestaferia; Uviéu Cambalache, Kin Café & Lounge; Llaviana Serinsa Llaviana Informática; Sotrondio La Chez, Casa Josefina; L’Entregu Chigre Concheso, El Chano, La Yenda, Tom Malory, Chigre Florida Ciañu La Folixa; Sama La Industria; y La Felguera B 12, Matteria.

Dende va siete años la Xunta pola Defensa de la Llingua Asturiana en collaboración con Músicos pola Oficialidá, colectivu formáu por artistes de diferentes estilos musicales, saquen un cantar que val como banda sonora del movimientu de reinvindicación llingüística. De mano, la propuesta venía en forma d’un solu cantar pa dir pasando colos años a presentar el tema acompañáu d’otres canciones, en forma de recopilatoriu. D’esta vez, vuelve a ser un tema solu.

Dende’l folk al rock, pasando pel hip-hop, toles propuestes musicales van formando parte de les creaciones que saquen Músicos pola Oficialidá y que nesti añu avérense a los ritmos soul y funky.

El single d’esti añu, “Nun somos llinguateros”, ye otra prueba más, sólida y apalapable, del compromisu de los músicos col movimientu de reivindicación llingüística n’Asturies. La novedá d’esti añu ye que nun se va sacar un discu físicu, sinón que se va colgar de la páxina web de l’asociación: www.exunta.org, pa que tola xente que quiera pueda sentilu y descargalu dende ellí.

La presentación d’esti añu fadráse nel Conceyu Abiertu, cai La Gascona, 12, baxu A, esti miércoles 27 d’abril a les 12:00 hores.

La fiesta de los Güevos Pintos de Sama de Llangréu finó esti llunes col homenaxe que les pareyes de Gaita y Tambor de la Cuenca del Nalón y ficieron al tamborileru Vicente Guerrero. L’actu, qu’axuntó a numberoses persones alrodiu del kiosku la música del Parque Dorado ufrió pieces de baille qu’animaron dellos mozos y moces coles dances del país.

Col soníu de la gaita y el tambor Vicente Guerrero xubió al kioscu de música pa recibir los aplausos del públicu y el reconocimientu de la Sociedá de Festeyos de Santiago. L’homenaxáu, que tien 82 años y vive n’El Apurro, amosó con dos gaiteros el so buen facer al tambor y agradeció con munchu ciñu esti homenaxe de los músicos mozos de la cuenca.

El Festival Intercélticu de Lorient (An Oriant), el más prestixosu de los que tienen llugar cada añu, va recibir al grupu de la diáspora asturiana Ta Fechu. La llocalidá bretona va recibir al grupu, formáu por descendientes d’asturianos y chilenos, los díes 6 y 9 d’agostu, tocando’l 6 nel escenariu más grande del festival, l’Espace Marine, a les 22 hores, y compartiendo escenariu con Hevia, que saldrá darréu.

El día 9 van tocar nel Espace Bretagne a la mesma hora. Darréu, van treslladase a Asturies, onde tán pesllando tovía cites musicales a lo llargo de tol país.

Entrevista del grupu n’Asturnews

La Xunta pola Defensa de la Llingua Asturiana, na so estaya de mocedá, Xunta Moza, presentó esti xueves 14 d’abril el XXIII Conciertu pola Oficialidá, ún de los actos más importantes nel movimientu de la reivindicación llingüística del asturianu.

Esti conciertu, nel que participen, añu tres añu, los grupos más representativos del panorama musical asturianu va celebrase na Feria Muestres de Xixón, nel Pabellón de les Naciones, el prósimu sábadu 16 d’abril, a partir de les 19:00 la tarde. Con ocho hores ininterrumpíes de música en directo, gracies a la presencia de dos escenarios, que van alternar l’orde de los grupos, esti ye ún de los actos más importantes dientro del panorama sociocultural asturianu.

Esti conciertu tan espectacular, al qu’acuden miles de persones, pue facese gracies al trabayu desinteresáu de músicos y organizadores, collaborando tola sociedá civil asturiana, incluyendo los medios de comunicación como Asturnews.

Nesta edición van participar estos grupos: Blima, Llangres, La Bandina, Toli Morilla, Misiva, K-Nalón, La Col.la Propinde y La Tarrancha.

El conciertu complétase col single que Músicos pola Oficialidá publica en collaboración cola Xunta Pola Defensa de la Llingua Asturiana y que sirve como banda sonora del movimientu de reivindicación llingüística. Músicos pola Oficialidá ta formao por artistes d’estilos diferentes que dende los últimos seis años vienen editando anualmente un cantar que val como sofitu a la reivindicación llingüística del asturianu.

Dende la Xunta pola Defensa de la Llingua Asturiana, como tolos años, naguase por qu’esti seya l’últimu añu que tengan qu’organizar esti conciertu reivindicativu y, que pal añu que vien “podamos celebrar, por fin, el primer Conciertu de la Oficialidá de la Llingua Asturiana. La Xunta pola Defensa de la Llingua Asturiana va siguir lluchando porque’l Gobiernu asturianu sienta les voces que dende la comunidá internacional tán llamando a adoptar midíes urxentes pa invertir esta situación de perda idiomática. Dende la Xunta nun se pue otro que llamentar la escepcionalidá de la situación del patrimoniu llingüísticu asturianu y la sordera institucional que carez l’acomodada clase política asturiana”.

La banda de gaites ‘Güestia’ apurre esti sábadu, a les 19,30 hores nel teatru Vital Aza, los premios ‘Güestia’ de L.lena col que se reconoz el sofitu y espardimientu a la música y tradiciones asturianes de persones ya instituciones.

Anguaño, los galardonaos son los músicos Xosé Antón Fernández ‘Ambás’, y Carmen Prieto, vecina del conceyu. Nel casu de ‘Ambás’, apúrrese-y esta reconocencia pola so vinculación al conceyu, al traviés del cancioneru vencíu del so Arquivu de Tradición Oral, con cantares que recoyó pola xeografía l.leniza. ‘Ambás’, amás de músicu, ye investigador etnomusicólogo d’Asturies. Foi l’encargáu de realizar los dos discos que dende’l Serviciu de Normalización Llingüistica de L.lena editó, cola recoyida de tradición oral del conceyu.

Carmen Prieto, pela so parte, tamién realiza un importante llabor na escoyeta y espardimientu de la música tradicional del conceyu de L.lena. Realizó una tesis doctoral (nota Cum lauden) sol títulu Música de Tradición Oral nel Conceyu de L.lena’, un trabayu d’investigación galardonáu en múltiples ocasiones y que “recueye la tradición oral del conceyu, editáu pol Muséu del Pueblu de Asturies y el Conceyu de L.lena. Tamién foi pregonera de L.lena nel añu 2008.

L’añu pasáu, estos premios recayeron nel músicu y profesor Gabino Antuña, componente del grupu Nuberu, y El Centru Asturianu Cuadonga de Vitoria. Nel actu del sábadu tamién van tar presentes l’alcalde de L.lena, Ramón Argüelles, y el conceyal de Cultura, David Suárez.