Música

Coincidiendo cola fin del grupu infantil Xentiquina, dempués de más de 25 años d’actividá musical, el grupu va ser protagonista d’un doble cedé y DVD. Pablo A. Quiroga Prendes va dirixir un documental sobre la hestoria del grupu, que va editase xunto a un discu nel que 24 grupos de la escena asturiana van facer un homenaxe y reconocimientu a la trayectoria musical de Seliquín y Xentiquina, versionando los sos temes. Tuenda, Tejedor, Skama la Rede, Soncai, Los Berrones, Llangres, Mala Reputación o Anabel Santiago, tán ente los collaboradores d’esti trabayu.

Nacho Fonseca: “Xentiquina dexa un material bayurosu pa contribuyir a la normalización social del asturianu dende la escuela”

Hasta’l 20 de xunu ta abiertu’l plazu d’esta convocatoria que busca la ellaboración d’una bolsa de trabayu pa la provisión de puestos de trabayu por personal interín na categoría de Monitor de Música tradicional (Grupu C, Subgrupu C2) a efectos de suplir places vacantes o sustitución transitoria de los titulares de les places.

La bolsa de trabayu va algamar la provisión de les especialidaes de Monitor d’Aerófonu de llingüeta doble de la tradición asturiana y conxuntu tradicional asturianu,. Monitor de tonada, Monitor de curdión diatónicu y Monitor de percusión tradicional asturiana.

http://www.asturias.es/bopa/2011/05/31/2011-10453.pdf

El cantautor xixonés Toli Morilla presentó apocayá na FNAC, de Siero, la segunda edición del so esitosu trabayu “Diez cantares de Bob Dylan n’asturianu”. Ye una edición ampliada con dos cantares más que se descartaron na primer tirada del discu, la yá clásica “Huracány” y l’adaptación de “Knockin’ on heaven’s door”, col títulu asturianu de “Toco les puertes del cielu”.

El célebre grupu asturianu “Xentiquina”, dirixíu dende va venticinco años pol maestru, músicu y miembru de l’Academia de la Llingua Asturiana, Nacho Fonseca, diz adiós pa siempres el próximu xueves 30 de xunu nel Auditoriu Príncipe Felipe d’Uviéu. El grupu infantil ñació baxo’l nome de Seliquín nun colexu de Porrúa, siguiendo darréu nel destín de Fonseca nel colexu de Lieres (Siero) y hasta agora. La prexubilación del so creador significa tamién agora la fin del grupu.

La actuación cabera va cuntar con munches sorpreses. Nun espectáculu de dos hores de duración, la formación de Lieres va cuntar con actuaciones de grupos y amigos versionando a Xentiquina, y munches más sorpreses “que fadrán qu’esi día seya inolvidable pa los neños, y pa toa esa xente qu’algún día tamién fueron neños, y disfrutaron cola música de Xentiquina”.

La entrada al actu va ser llibre y de baldre hasta enllenar l’aforu.

Macadamia ye un grupu de recién formación formáu por Pablo Souto (baxu), José Mayordomo (guitarra llétrica), Kiko Flores (saxo), Marcos G. Alonso (curdión) y Oti Méndez (voz); tando a la batería Miguel Herrero, productor musical del discu.

El primer discu d’esta formación asoleyáu apocayá atópase ente’l folk, el jazz y el funk, pero ensin perder la conexón colos soníos de la tierra, dalgo que nun quieren desdexar nesti trabayu de nome homónimu publicáu por Discos L’Aguañaz/Ámbitu.

Hasta’l 27 de xunu ta abiertu’l plazu pa inscribise na Escuela de Música Tradicional Asturiana “Manolo Quirós”, onde s’imparten clases de gaita, curdión diatónicu, canción asturianu, baille tradicional, bandurria, investigación, zanfonía, iniciación, baille infantil y tambor.

Les clases van impartirse n’Oteru, Pumarín, Les Campes, La Corredoria, Trubia, Ciudá Naranco, Nuevu Tartiere. El plazu de matrícula ta abiertu hasta’l 27 de xunu y la matriculación pue facese nel Estadiu Carlos Tartiere (Puerta 0) de llunes a vienres de 10 a 13h y de 16 a 19 hores.

Más información nel teléfonu: 985 25 50 49 y en emtasturiana@ayto-oviedo.es

El Conxuntu de Clarinetes de la Escuela Internacional de Música de la Fundación Príncipe d’Asturies va ufiertar dos conciertos los díes 7 y 8 de xunu nel Centru Cultural Cajastur Jerónimo Ibrán 10 de Mieres y nel Teatru Riera de Villaviciosa, respectivamente, so la dirección del maestru portugués Antonio Saiote. Dambos conciertos van empezar a les 20,00 hores y van ser de llibre accesu hasta completar aforu.

El Conxuntu ta integráu por 22 estudiantes, d’edaes entendíes ente los 14 y los 27 años, procedentes d’España, Portugal y Venezuela. Estos nuevos intérpretes participaron nos Cursos de Branu de la Escuela Internacional de Música de la Fundación, xuntu al maestru Saiote, titular de l’asignatura de clarinete, y profesor de la Escuela Cimera de Música y Artes del Espectáculu de Porto.

El programa que van interpretar inclúi les siguientes obres pa clarinete: Rikudim, de Jan Van der Roost; La boda de Luis Alonso, de Gerónimo Giménez; Scholem y Csárdás, de Vittorio Monti; Suite Española, op. 47, de Isaac Albéniz; y Guisganderie, de Faustin y Maurice Jeanjean. Na segunda parte del conciertu, va encetase un repertoriu pa conxuntu de clarinetes y solistes con Il Convegno, de Amilcare Ponchielli; Fantasía y Rondó, de Carl Maria von Weber; y Konzertstuck, n.º 2, op. 114, de Mendelssohn.

Esti vienres 3 de xunu, a les 19.30 hores, va tener llugar nel Muséu Casa Natal de Xovellanos, allugada na Plaza Xovellanos, 2, en Cimavilla, Xixón, un conciertu a cargu del guitarrista Carlos Almoril. La entrada ye gratuita y hasta completar aforu. El programa del conciertu inclúi obres de Bach (1685-1750), Giulio Regondi (1822-1872) o Joaquín Turina (1882-1949), ente otros.

Esti sábadu, 4 xunu, el grupu Spanta la Xente prepara un importante conciertu pa la presentación del so discu nuevu, “Alienda”. Más de 70 músicos van pasar pel escenariu pa collaborar col grupu. La entrada ye llibre y de baldre, hasta enllenar el Teatru Vital Aza de La Pola L.lena, onde amás va grabase l’actuación pa la edición d’un dvd.

“Spanta la Xente” ta conformáu por xente mozo que s’axuntó en 2006 y que faen música ente’l pop, el folk y el rock. Chus Pedro (ex-Nuberu) ye’l productor executivu col so sellu discográficu La Mula Torda.

El Conceyu Bimenes tien abiertu’l plazu pa presentase a una nueva edición del Concursu de Gaiteros y Gaiteres Mozos. El requisitu imprescindible pa poder participar nel mesmu ye ser menor de 21 años a fecha 30 de xunu de 2011. El plazu p’apuntase, apurriendo la documentación afayadiza al Ayuntamientu Bimenes, acaba’l 20 de xunu a les 12’00 hores.

El concursu tendrá, si el númberu de participantes ye mayor de diez, una fase semifinal que se cellebrará na Casa la Cultura de Santuyano’l sábado 25 de xunu. La final tendrá llugar nel mesmu sitiu, una selmana dempués (sábadu 2 de xunetu). Repartiránse 600 € en premios, pa los tres primeros clasificaos, asina como dellos trofeos.