Música

Esta fin de selmana, del 22 al 23 de xunetu, Candás acueye la celebración del 15 Festival de Bandes de Gaites Villa de Candás, qu’esti añu va cuntar con formaciones de Galicia, Bretaña, Cataluña y Asturies.

Los actos van entamar el vienres a les siete y media la tarde con un pasacáis.

Participantes: Banda Gaites Candás, Bagad Roñsed-Mor, Banda de Gaites Villaviciosa El Gaitero, Banda de Gaitas A Carballeira, la Bandina Infantil de los escolinos de Candás y l’Agrupación Sacaires de Tarragona.

Un añu más l’Asociación Cultural Ruiu Nora, en collaboración cola Fundación Cultural de Siero entama les “Xornaes de música na cai na Pola Siero”. Les actuaciones entamarán a les 20.00 hores na Plaza Les Campes a lo llargo de los díes 21, 22, 23 y 24 de xunetu, con grupos como N’Ochobre o Expropiazión, presentaos toos ellos por Teatroncho.

-Xueves 21: N0Ochobre (folk-rock) y Alvarito & Pi (canta-autor, canta-mañanas…)

-Vienres 22: Scärr (heavy-metal) y Lavandera (pop)

-Sábadu 23: Kursk (hard-rock) y Blackout (rock-heavy)

-Domingu 24: MNR (rap) y Expropiazión (punk)

Más información sobre les Xornaes

Francisco Fernández Álvarez, de Villaviciosa, foi ganador del XII Concursu de Gaiteros y Gaiteres Mozos de Bimenes, nel que nun pueden participar músicos mayores de 21 años, que se cellebró’l pasáu sábadu, 2 de xunetu, nel marcu de la XV Fiesta de la Oficialidá de la Llingua Asturiana de Bimenes.

El primer premiu taba dotáu con troféu y 300 €. En segundu llugar quedó Álvaro Álvarez Fernández, de Siero, que recibió troféu y 200 €, y el tercer clasificáu foi Fernando Vázquez Cárcaba, tamién de Siero, al que se-y apurrieron 100 € más troféu. Los miembros del xuráu fueron los mayestros gaiteros José Ramón García Navia, Eugenio Otero Vega y José Luis García Díaz.

Coincidiendo cola fin del grupu infantil Xentiquina, dempués de más de 25 años d’actividá musical, el grupu va recibir un homenaxe na tarde d’esti xueves, 30 de xunu, a partir de les ocho la tarde. El célebre grupu asturianu “Xentiquina”, dirixíu dende va venticinco años pol maestru, músicu y miembru de l’Academia de la Llingua Asturiana, Nacho Fonseca, diz adiós pa siempres nel Auditoriu Príncipe Felipe d’Uviéu y arrodiaos de grupos como Skama la Rede, Soncai, Los Berrones o Llangres.

El grupu infantil ñació baxo’l nome de Seliquín nun colexu de Porrúa, siguiendo darréu nel destín de Fonseca nel colexu de Lieres (Siero) y hasta agora. La prexubilación del so creador significa tamién agora la fin del grupu.

La actuación cabera va cuntar con munches sorpreses. Nun espectáculu de dos hores de duración, la formación de Lieres va cuntar con actuaciones de grupos y amigos versionando a Xentiquina, y munches más sorpreses “que fadrán qu’esi día seya inolvidable pa los neños, y pa toa esa xente qu’algún día tamién fueron neños, y disfrutaron cola música de Xentiquina”.

“Xentiquina Crew!”

Amás el grupu va ser protagonista d’un doble cedé y DVD. Pablo A. Quiroga Prendes preparó pa esta ocasión un documental sobre la hestoria del grupu, que va editase xunto a un discu nel que 24 grupos de la escena asturiana van facer un homenaxe y reconocimientu a la trayectoria musical de Seliquín y Xentiquina, versionando los sos temes. Tuenda, Tejedor, Skama la Rede, Soncai, Los Berrones, Llangres, Mala Reputación o Anabel Santiago, tán ente los collaboradores d’esti trabayu.

https://asturnews.com/index2008.php?idn=11244

Amás, el trabayu inclúi’l documental “Seliquín- Xentiquina. Una ferramienta pedagóxica al serviciu de la escuela n’Asturies”,nel que se recueye la hestoria d’estes dos agrupaciones poniendo especial interés na utilidá pedagóxica que supunxo la so apaición. Nel documental, dirixíu pol director asturianu Pablo A. Quiroga Prendes, les imáxenes d’archivu s’entemecen con valiosos testimonios que sofiten la narración. La so duración ye d’1 hora y 17 minutos.

Esti próximu vienres a les 19:30 hores, el Cine Felgueroso de Sama va acoyer la proyección del primer videuclip del grupu Duerna, Fiestes de prau. Esti cantar, compuestu por Tante Blanco y con arreglos del grupu val de promoción pal primer discu del grupu (dempués de grabar la maqueta Dende’l chigre). Duerna ñació a finales del añu 2008 colos músicos Andrés Martínez, Estefanía Moro, Pedro Pablo Iglesias y Pablo Carrera. El pasáu mes d’abril una montonera xente acudió al prau Los cuarteles de la Formiguera (La Felguera) que se convirtió nel escenariu natural d’una auténtica romería asturiana pa la grabación d’esti videuclip. Señor Paraguas Artes Audiovisuales encargóse de la grabación y nella apaecen les escenes típiques de cualquier folixa tradicional d’Asturies.

Dempués de recibir nel añu 2008 el premiu de la crítica RTPA como grupu revelación, Duerna ta acabante de ganar el VI Concursu Internacional de Música Folk Escenario prau en Cantabria. En pocos díes va tar na cai’l que ye’l so primer trabayu discográficu Manca la maera, discu que van presentar de forma oficial el próximu 24 de xunetu dientro de les fiestes de Santiago en Sama.

Esti actu presentación del videoclip Fiestes de prau va tener llugar mañana vienres a les 19:30 hores nel Cine Felgueroso de Sama. La entrada va ser de baldre y, amás de los miembros del grupu, nél van participar Tante Blanco, Algamar producciones, Señor Paraguas y María Esther Díaz García, alcaldesa de Llangréu.

Esti vienres, 24 de xunu, a les 21:00 hores, en Los Jardinillos de Navia, va actuar el grupu de folk Cádaba, formación ñacida en 2001 na asociación cultural Arcángel San Miguel, d’A Caridá (El Franco), y compuesta por Miryam González (curdión), Araceli López (gaita), Javier González (bodhram, tambor), Daniel González (gaita, whistle, voz), Pelayo H. López (gaita, baxu, voz), Adrián López (bombu), Laura López (pandereta) y José Luis Nogueiría (guitarra, voz) y con dos discos nel mercáu “Do y Sidemól” y “Camíos de ferro”, dambos dos en gallego-asturianu.

Hasta’l 27 de xunu ta abiertu’l plazu pa inscribise na Escuela de Música Tradicional Asturiana “Manolo Quirós”, onde s’imparten clases de gaita, curdión diatónicu, canción asturianu, baille tradicional, bandurria, investigación, zanfonía, iniciación, baille infantil y tambor.

Les clases van impartirse n’Oteru, Pumarín, Les Campes, La Corredoria, Trubia, Ciudá Naranco, Nuevu Tartiere. El plazu de matrícula ta abiertu hasta’l 27 de xunu y la matriculación pue facese nel Estadiu Carlos Tartiere (Puerta 0) de llunes a vienres de 10 a 13h y de 16 a 19 hores.

Más información nel teléfonu: 985 25 50 49 y en emtasturiana@ayto-oviedo.es

La sétima edición del festival cántabru “Folkomillas”, organizada pola asociación cultural L’Escanillu, va tener ente les sos actuaciones a los grupos asturianos Corquiéu, P’Amusquis yDuerna. El festival que cunta con concursu folk, teatru, mercáu medieval y otres actividaes va celebrase esti fin de selmana, del 17 al 19 de xunu, na llocalidá cántabra de Comillas.

El programa completu pue consultase na web del festival.

Programa completu

Esti festival, que cumple cinco ediciones en 2011, vuelve a les cais de la capital lleonesa’l xueves 16 de xunu, con dellos recortes por mor de la situación económica. Nel programa apaecen el grupu Rapabestas (El Bierzu), el gaiteru Anxo Lorenzo (Galicia), el grupu Tejedor (Asturies) y el gaiteru John McSherry (Irlanda), que pieslla’l Festival el día 19.

Amás, y coincidiendo con estos actos, el 18 de xunu va celebrase’l “Día de la Llingua”, onde per sestu añu consecutivu, los lleoneses van homenaxear al so idioma. L’actu sedrá a les doce la mañana nel Palaciu de Don Gutierre, onde se lleerán obres en variedaes lleoneses del asturianu, como’l pal.luezu, cabreirés o cepedanu. Darréu d’ello, la Banda de Gaites Ciudá de Lleón, va tocar dellos temes.

Esti domingu 19 de xunu, a les 21 hores, l’auditoriu del Centru Niemeyer d’Avilés acueye una actuación del grupu folk asturianu Tejedor, onde van presentar el so discu nuevu “Positivu”, cuatru trabayu de la banda. El preciu de la entrada ye de 12 euros.

“Positivu” contién 12 temes, de los que diez son nueves composiciones. Los otros dos son un set de xotes tradicionales y ún de los cantares populares asturianos que más-yos presta a los hermanos d’Avilés «El veleta».