Música

Ernesto Gacia Rodríguez vio reconocía la so llabor a la gaita col recibimientu del Premiu Nacional de Folclore “Martínez Torner”. En pallabres del xuráu el gaiteru algamó’l premiu por ser “un de los personaxes dientro de la cultura tradicional asturiana que más enfotos dedicó pola gaita, sobre manera nel campu de les bandes”.

Ernesto Gacia Rodríguez vien desendolcando la so llabor dende 1968 cuando funda la banda “Los Son d’Arriba” en Gangas del Narcea. Tamien fui fundador de la Coral Polifónica “Cangas del Narcea”, y la Escuela de Música de Gaita “Respingo”.

El vienres 28 Tuenda va actuar nel chigre Inis Mor, asitiáu n’Uviéu, de magar les once la nueche. El grupu, formáu por Pepin, Elías y Ambás va tocar temes de los sos trés discos, que tienen como base los cantares tradicionales del país.

El XII Ciclu “Los vienres de la tradición” que se celebra cada añu nel Muséu Etnográficu “El Caserón-Universidá Popular José Hierro”, en San Sebastián de los Reis, Madrid, va recibir la música de la cantadora Anabel Santiago y el músicu David Varela, miembru de La Bandina. Sedrá’l próximu vienres 21 d’ochobre, de magar les siete la tarde.

L’homenaxe celebráu n’honor de Leonard Cohen, cola presencia del propiu autor, nel Teatru Xovellanos de Xixón, tuvo espaciu pal asturianu. El cantautor xixonés Nacho Vegas versionó n’asturianu’l cantar «The partisan» del autor qu’esta selmana va recibir el Premiu Príncipe d’Asturies na so categoría cultural.

El folk chilenu aporta a Asturies con una xira de la cantante Paula Herrera, que vien d’actuar en Barcelona, Madrid, Valencia y Bilbao. La so música, que puede sentise nel so discu últimu “Verde y celeste”, defínese como folk pero cunta con munches influyencies pop, y foi comparáu colos cantantes Víctor Jara y Violeta Parra, anque con una visión más actual.

Los sos conciertos n’Asturies van entamar n’Uviéu, esti miércoles, 19 d’ochobre, na Cervecería L’esperteyu d’Uviéu, na Caleya la Ciega. El xueves tará n’El Cafetón d’Avilés, mientres que’l vienres va actuar en Villanueva (Santu Adrianu), nel chigre El Sabil, pesllando’l so pasu per Asturies en La Pola Siero, nel chigre El Cuévano, asitiáu na Plaza les Campes.

La Universidá d’Uviéu va celebrar un conciertu qu’afirmen “va crear, mientres la nueche del día 20 d’ochobre, una conxunción bien especial de talentos que salieron de les sos aules”. Un actu que va facese como homenaxe al recién nomáu Premiu Príncipe d’Asturies de les Lletres a Leonard Cohen. “First we take Milán” ye’l títulu d’esti eventu que va axuntar a un grupu d’antiguos alumnos del Campus del Milán de la Universidá d’Uviéu, con sólides y solventes carreres musicales, y que, de la mesma, quieren espresar el so agradecimientu y ciñu a la Universidá d’Uviéu.

Un conciertu que va xirar en redol al legáu de Cohen y a la so influencia nesta xeneración de músicos, y que tamién pretende dar a conocer a los estudiantes de güei una hestoria que se cocinó dientro del Campus mientres los años 90, y que quiciabes sirva d’inspiración pa les sos propies fazañes vinientes. El Paraninfu, quiciabes el llugar más emblemáticu de la Universidá, va ser el qu’acueya esta singular ocasión.

El Vicerrectorado d’Estensión Universitaria, Cultura y Deportes organiza esti homenaxe doble: a Leonard Cohen, músicu, poeta, y pintor, aprovechando la ocasión única de la so estancia n’Uviéu pa recibir el Premiu Príncipe d’Asturies de les Lletres; y per otru llau, nel mesmu actu, a una xeneración d’antiguos alumnos de la institución qu’empecipiaron les sos carreres musicales mientres la mayoría d’ellos estudiaba nel campus d’El Milán.

Los músicos que van participar son Nacho Vegas, Xabel Vegas, Montse Álvarez, Roberto Nicieza, José Luis García, Fany Álvarez, Fernando Marín, Igor Paskual, Alicia Álvarez, Chus Neira y David Guardado.

Información sobre’l conciertu y la venta d’entraes

El viniente 23 d’ochobre, a les ocho la tarde, el Teatru de La Llaboral de Xixón va acoyer un conciertu con pieces de Vivaldi, Bach, Mozart, Albéniz y Saint-Saëns ufiertáu pola Filarmónica de Cámara de Coloña, fundada nel 2003. Dende entós yá seya nos recónditos pueblos australianos, los fiordos noruegos o la ciudá cosmopolita de Berlín, la Orquesta Filarmónica de Cámara de Coloña púnxose como meta faer sonar la música clásica en tol mundu.

L’aquello especial del so programa consiste na combinación de pieces populares con otres menos conocíes de diverses dómines musicales. Esti amiestu promete una diversidá al más altu nivel.

El próximu 15 d’ochobre, el grupu de Bual “Mezá”, va tener oportunidá d’actuar demientres la celebración de la Festa del Viño de Pezós a partir de les 20:00 hores y, pela so parte y, pa terminar la serie de conciertos entamaos pol Parque Hestóricu del Navia, la Feria del Miel de Bual va acoyer de nuevu al grupu Tuenda na nueche del sábadu 29 d’ochobre.

Los conceyos del Parque Históricu del Navia, en collaboración cola Oficina de Coordinación Cultural y Llingüística de la Fundación Parque Históricu del Navia, organicen esta serie de conciertos colos grupos y solistes del discu editáu dende esa mesma Oficina nel añu 2010.

Les actuaciones, cofinanciaes pola Conseyería de Cultura y Turismu d’Asturies y los conceyos de la contorna, vencéyense a dellos actos populares celebraos en caún de los conceyos participantes. D’esta miente realícense, dende’l pasáu 8 d’agostu, diversos conciertos nos que puede vese a artistes como la solista de Puertu de Vega Elisa, o grupos como los bualeses Mezá, los franquinos Cádaba o’l grupu de Xosé “Ambás” y los suyos, Tuenda.

La compañía valenciana Cienfuegos Danza, dirixida pol asturianu Joshua Cienfuegos, celebra la so primer década d’esistencia con una obra que surde tantu de l’almiración al gran xeniu creador Leonardo da Vinci, como de puntu d’inflexón metodolóxicu y artísticu.

L’espectáculu va poder vese nel Teatru Xovellanos de Xixón esti vienres 7 d’ochobre a les 20:30 hores dientro de la programación del Festival Danza Xixón.

El coreógrafu y baillarín Joshua Cienfuegos, pon en marcha la compañía Cienfuegos Danza nel añu 1999, en recibiendo’l Primer Premiu nel Certame Coreográficu de Madrid. A lo llargo de la so trayectoria, Cienfuegos Danza, punxo sobre escena más d’once producciones, desenvolviendo siempres un trabayu rigorosu col que consiguió numberosos premios según la reconocencia de públicu y crítica especializada. El postreru gran galardón recibíu por Cienfuegos foi’l Premiu Nacional de Danza de Costa Rica 2010.

Esta trayectoria artística asitió a esta formación como una de les compañíes de danza referencial nel panorama internacional, realizando espectáculos de gran formatu, propuestes de cai, pieces curties, collaboraciones y encargos pa grandes compañíes nacionales y una siguida presencia en países como Italia, Francia, Dinamarca, L’Arxentina o Brasil.

La Conceyalía de Cultura del Conceyu de Grau informó de qu’esti miércoles 5 d’ochobre s’abre’l plazu pa matricular de la Escuela Municipal de Música de Grau. L’horariu de matrícules va ser de 16 a 18 hores de llunes a vienres nes mesmes dependencies de la Escuela de Música. Pa más información puede llamase al teléfonu 985 754 657.

Les clases del nuevu cursu van dar empiezu’l miércoles 2 de payares.