Música

El Nuevu Teatru La Felguera va acoyer la presentación del primer discu en solitariu de Marisa Valle Roso, “De lo fondero l’alma”. El conciertu va tener llugar a les 20:15 hores d’esti próximu vienres 2 d’avientu. “De lo fondero l’alma” ye’l primer discu de Marisa Valle Roso en solitariu. Nelli, Marisa busca reflexar tola so trayectoria dientro la canción asturiana, dexando grabaes aquelles canciones que nestos años fueron les más representatives del so repertoriu.

Nesti discu Marisa tamién pretende tocar diferentes estilos de la canción asturiana, d’esta manera, atopamos en De lo fondero l’alma canción del altu la lleva, arrieres, ayeranes, d’autor, vaqueira, etc. Marisa ta acompañada nesti trabayu musical por prestixosos músicos del altor del gaiteru Pablo Carrera, Xaime Arias al pianu, Rodrigo Sturm a la guitarra o les percusiones tradicionales d’Estefanía Moro. El conciertu va presentalu Fernando Valle Roso y la entrada ye llibre.

Currículu:

Marisa Valle Roso ñació en Llangréu en 1987, empezando nel añu 2000 el so camín nel mundu la canción asturiana tradicional de la mano d’Alfredo Canga, una de les voces más reputaes y premiaes de la segunda metá del sieglu XX. D’entós p’acá, Marisa Valle Roso llevó dalgunos de los principales premios nos concursos y festivales de canción asturiana. Como xuvenil fízose colos primeros premios de los concursos de L’Entregu (2003), Xixón (2003), Amieva (2004), Xixón (2004), La Nueva (2005) y L’Entregu (2006). Yá na categoría absoluta consiguió los primeros premios de los concursos de La Nueva (2007, 2008), Uviéu (2007, 2010,2011), Avilés (2007), Amieva (2007, 2008, 2009), L’Entregu (2007,2008, 2009, 2010,2011), Mieres (2008, 2009, 2010), Xixón (2008, 2009), La Pola Siero (2011) y Uviéu (renovación, 2008, 2009). Igualmente, el Comité d’Espertos del Memorial Silvino Argüelles consideróla Meyor Cantadora del Añu nel 2006, 2007, 2008, 2009, 2010 pol, amás de recibir el Premiu de la crítica de la RPA” y el premiu Amas a la meyor voz del 2008. Nesti sentíu, Marisa Valle ye anguaño la voz más importante de la canción asturiana tradicional, empezando a destacar nel apartáu de renovación, como pudo comprobase al ganar el primer premiu del Ciudá d’Uviéu.

Como dúu col so hermanu Fernando, los Hermanos Valle Roso, mantienen tradiciones de la canción asturiana como la tonada dialogada y la tonada a dos voces, siendo subcampiones en categoría abosulta del concursu de La Nueva (2002 y 2003). Les sos voces apaecen nuna montonera grabaciones colectives, yá dende l’añu 2003 cuando salen na recopilación d’AICA (Asociación d’Intérpretes de la Canción Asturiana), interpretando canción dialogada y nel discu propiu tituláu Un pasu más. Individualmente Marisa Valle Roso realizó delles collaboraciones en discos y esti vienres 2 d’avientu presenta’l so primer trabayu musical en solitariu De lo fondero l´alma.

A les 20:00 hores d’esti xueves 1 d’avientu, el Centru de Referencia de la Cultura y la Llingua Asturiana va acoyer la charra “La huella etnográfica de la mujer en la Cultura Asturiana reciente: Desde la ruptura con la vida campesina hasta la crisis del modelo industrial. Apuntes sobre un futuro incierto” d’Heri Gutiérrez García. Con esta charra remata la programación de les xornaes culturales De castilletes y Carbón qu’organiza l’Ayuntamientu de Llangréu en collaboración cola Fundación Nuberu.

El ramu a estes actividaes va ponelu’l míticu grupu Nuberu con un conciertu nel Nuevu Teatru La Felguera’l próximu 4 d’avientu, día de Santa Bárbara. D’esta forma, vamos poder disfrutar otra vuelta del históricu grupu encabezáu por Chus Pedro y Manolo Peñayos enriba l’escenariu dempués d’una despidida que los llevo per tola xeografía nacional. El conciertu de Nuberu va tener llugar nel Nuevu Teatru La Felguera’l próximu domingu 4 dávientu a les 20.15 hores y la entrada, la voluntá.

Esti xueves 1 d’avientu de magar les ocho la tarde, Héctor Braga & La Bandina’l Bache van tocar na Feria Muestres d’Asturies, en Xixón, dientro del espaciu de Caxastur.

Nel conciertu van participar, amás d’Héctor Braga, a la voz, harpa, gaita y zanfona; el Valentín Benavente, na gaita y percusión; Arsenio Ruiz, na percusión y Nel Sánchez al curdión.

Más información sobre’l conciertu

La versión del tema de Xentiquina “El canciu les mentires” fecha pol cantautor Bueno pal discu d’homenaxe a esti grupu espublizáu por Algamar Producciones “Xentiquina crew!”, yá tien videoclip y puede vese na rede. El videoclip ye una obra de Sonia Fernández y Alberto Menéndez.

El Nuevu Teatru de La Felguera va acoeyer el vienres 9 d’avientu a les ocho la tarde, la presentación del discu nuevu de Duerna, “¡A mansalva!”. Nel actu van participar la Banda gaites “Conceyu Llangréu”, la Banda gaites “Conceyu Siero”, el Coro Padre coll, Tomás Fernández, al Saxu, Rubén Menéndez, a la Trompeta, Marisa Valle, como cantante, Orestes Barbachan, na percusión llatina, la pareya de baille formada por Joaquín y Cintya, el Grupo Reija de Llangréu y Tante Blanco, a la guitarra llétrica.

Les entraes anticipaes tán a la venta na Casa la cultura Escueles Dorado de Sama (3 euros), nel teatru nos díes de función. (3 euros) y nos Caxeros Tiquexpress de Caxastur) (3,50 euros).

Los hermanos José Manuel y Javier Tejedor actuarán esti martes 29 d’avientu nel Teatru Filarmónica d’Uviéu, presentando na capital del país el cuartu discu del grupu, primeru de la so nueva etapa. El conciertu entamará de magar les ocho la tarda, y tará enmarcáu nel ciclu “Música del sieglu XX”, de la Obra Social Caxastur, y el preciu de la entrada cuesta 3 euros.

Tres la presentación oficial del discu nel Centru Niemeyer va dellos meses, Tejedor siguirá presentando’l so discu a lo llargo y ancho d’Asturies na nueva etapa de la formación carauterizada pal cambéu de componentes nel grupu avilesín. Les sos nueves composiciones espeyen esmoliciones musicales y l’enfotu del grupu por aumentar el so repertoriu.

El Nuevu Teatru de La Felguera, en Llangréu, va acoyer la presentación del discu nuevu de Marisa Valle Roso “De lo fondero l’alma”, esti vienres 2 d’avientu, de magar les ocho la tarde. Nel actu van participar, Pablo Carrera, a la gaita; Rodrigo Sturm, a la guitarra; Estefanía Moro, cola percusión y Xaime Arias, al pianu, presentando la gala Fernando Valle Roso.

Esti martes 22 de payares y por cuenta del 25 Aniversariu del Conservatoriu Profesional de Música de Xixón aprovecha la Festividá de Santa Cecilia pa celebrar la so patrona de forma especial, de magar les 8 la tarde, nel teatru de La Llaboral. L’estrenu d’una obra escrita pa Gaita y Orquesta (una de les poques qu’esisten) con Xuacu Amieva como solista, que va poner la guinda a un eventu musical nel que nun va faltar música asturiana, instrumental y vocal.

Amás, va aprovechase la ocasión pa presentar el postreru y nuevu númberu de la Revista qu’edita’l Conservatoriu, “Dando la Nota”. La entrada ye llibre hasta completar aforu.

El grupu que representaba a la llingua asturiana nel festival Liet Internacional celebráu esti sábadu n’Udine, nel estáu italianu, quedó n’octavu llugar col tema “Condenáu”. Fízose victoria la cantautora frisia Janna Eijer.

Esti sábadu 19, a partir de les 19 hores, va tener llugar n’Udin (Friûl) el denomáu Liet International, festival de canciones en llingües minorizaes d’Europa, onde Asturies va tar representada pol grupu Skama la Rede. La TPA nun va emitir como n’otres ocasiones la gala, pero va poder sentise al traviés de Radio Sele.