Música

Un añu más l’alcordanza de los músicos de Felepeyu Ígor Medio y Carlos Redondo, finaos en 2006 nun accidente de tráficu, sigue vivu. Los sos collacios y siguidores van recordar la figura d’estos músicos esti xueves, 5 de xunetu, con un conciertu folk nel Café Trisquel.

Esta nueche, a les nueve y media la nueche y dientro de les espiches-conciertu qu’organiza la sidrería Tierra Astur Águila, en Cualloto (Siero), va poder sentise la música de la cantadora Anabel Santiago y l’acurdionista David Varela.

El ciclu “cantares de chigre” nes sidreríes de la cai Gascona d’Uviéu, remata’l xueves dia 28 coles actuaciones del Coru Solvay de Lieres, la Bandina Los Gascones y la banda de gaites Xiranda. Según espliquen dende la organización “les actuaciones musicales de los xueves en Gascona tuvieron un gran exito participando diversos coros, ochotes, cuartetos y cantantes solistes amás de bandines de folk y de gaites”. El cuntar con un cancioneru” coles mas populares cantares del folclore asturianu, convidó a acompañar a interpretar nuna folixa enllena del meyor sabor ástur. Por mor del ésitu d’ésta iniciativa promovida pola Asociacion de Sidreríes de la Cai Gascona d’Uviéu, volverá repitise la seronda próxima.

Un añu más l’alcordanza de los músicos de Felepeyu Ígor Medio y Carlos Redondo, finaos en 2006 nun accidente de tráficu, sigue vivu. Los sos collacios y siguidores van recordar la figura d’estos músicos asturianos col yá tradicional Conciertu n’alcordanda d’Ígor y Carlos, que nesta ocasión va tener dos cites, una pal 28 de xunu, con un conciertu pop-rock na Sala Acapulco de Xixón, y otra’l 5 de xunetu, con un conciertu folk nel Café Trisquel.

La cita na Sala Acapulco entamará a les diez de la nueche, mientres que nel conciertu a celebrar nel Trisquel de Xixón, la hora d’entamu sedrá les ocho la tarde.

N’esti mes de xunu la cantante llangreana Marisa Valle Roso ta faciendo un percorríu per diferentes puntos d’Asturies, presentando’l so primer trabayu discográficu en solitariu, tituláu “De lo fondero l’alma”. Esti vienres 22 de xunu va tocar a les ocho y media la tarde nel Teatru Toreno de Cangas del Narcea, y el llunes que vien, 25 de xunu nel Auditoriu Teodoro Cuesta de Mieres del Camín, a la mesma hora. El preciu de los conciertos ye de cinco euros.

Xunto a ella participen Pablo Carrera, a la gait, Xaime Arias al pianu y Rodrigo Sturm a la guitarra.

Alfredo González y Nacho Vegas van protagonizar el Día de la Música nel Centru Cultural Internacional Avilés, esti xueves 21 de xunu, de magar les ocho la tarde. González va tocar temes del so discu nuevu “Dobleces”, mientres que Vegas presentará los temes del so discu más recién “Cómo hacer Crac”.

El sábadu pasáu, 16 de xunu, tuvo llugar en Martimporra la final del “XIII Concursu de Gaiteros y Gaiteres Mozos de Bimenes”, certame entamáu coincidiendo cola Romería de la Oficialidá. El ganador d’esta edición foi’l gaiteru sierense Álvaro Álvarez Fernández, de 17 años d’edá, que llevó los 300 € en metálicu y el troféu del primer premiu.

El segundu premiu, dotáu con 200 € y troféu, foi pal gaiteru local Andrés Blanco Montes, de 15 años. Y el ganador del tercer premiu, al que se-y apurríen 100 € y troféu, foi Fernando Vázquez Cárcaba, de 18 años y tamién de Siero. Nel concursu participaren trece gaiteros y gaiteres qu’interpretaren dos pieces cada ún, siendo valoraes les mesmes por José Ramón García Navia, José Luis García Díaz y Eugenio Otero Vega, miembros del xuráu na edición d’esti añu.

Na entrega premios, que tuvo llugar el mesmu día, l’Ayuntamientu Bimenes apurrió-y un obsequiu a Álvaro García Suárez, gaiteru yerbatu que ganó’l Premiu AMAS 2012, que tamién recibió un detái del Grupu Folklóricu “La Flor del Pumar”, de Nava.

Yá se conocen los finalistes del II Concursu de canción asturiana Conceyu de Siero. El xuráu formáu por Xaime González Arias, espertu en tonada y profesor de pianu, y pola cantante Chucha de Niembra, escoyó a ocho homes y cinco muyeres de los 44 participantes, que tomaron parte nel Concursu mientres cuatro eliminatories. La gala final y de la que van salir el ganadores va tener llugar esti domingu 24 de xunu a les 12 hores, nel Auditoriu de La Pola Siero.

Nesta ocasión a diferencia del pasáu añu, estableciéronse dos categoríes estremaes pa homes y muyeres: va haber ocho premios na categoría masculina y cinco pa la femenina, que se van partir un total de 2.670 euros en metálicu. La entrega de premios va ser el domingu 8 de xunetu, tamién a les 12:00 hores.

El Concursu de Cantar Asturianu Conceyu de Siero ta entamáu col patrociniu del Conceyu de Siero, y presentáu por Anabel Santiago y José Luis Remis.

Llistáu de finalistes:

Homes

Celestino Rozada

Héctor Braga

Manuel Collado

Fernando Valle Roso

Adolfo Uría

Carlos Velasco

Urbano Prieto

Juan José Martínez

Muyeres:

Marisa Valle Roso

María Latores

Laudelina Hortal

Liliana Castañón

Silvia Suárez

Artistes del mundu de la canción asturiana, como José Manuel Collado, José Antonio Cantu la Vara, Anabel Santiago, Héctor Braga, María Latores, José Manuel García, el gaiteru Iván Rionda y el grupu folclóricu Ruxidera, van facer un homenaxe nuna yá tradicional cita añal, el novenu Alcuentru col mitu de la canción asturiana Juanín de Mieres.

L’actu va celebrase n’El Parque de Mieres, coincidiendo coles fiestes de San Xuan, esti martes 19 de xunu, de magar les ocho la tarde.

La Sala La Palmera de La Pola L.lena va acoyer un conciertu de presentación del discu ‘Al altu la lleva’ de Fala non Caduca. Sedrá esti sábadu 16 a les once y media la nueche con entrada llibre. Dientro podrá mercase’l discu por cinco euros.