Música

El Coru Infantil de la Fundación Príncipe d’Asturies va participar, al pie de la Orquesta Sinfónica del Principáu d’Asturies (OSPA), nel estrenu del cuentu musical Nora, Mauro y los suaños del autor Nachu Fonseca, orquestado y empobináu por Daniel Sánchez, que va tener llugar el próximu sábadu, 10 de mayu, a les 19.00 hores, nel Teatru de la Llaboral de Xixón, nel marcu de les actividaes de la XXXV Selmana de les Lletres Asturianes qu’entama la Conseyería d’Educación, Cultura y Deporte del Principáu d’Asturies.

L’accesu a esti conciertu ye llibre hasta completar aforu. Les entraes pueden retirase na recepción de Llaboral Ciudá de la Cultura y nel Centru Cultural Niemeyer d’Avilés (máximu 4 localidá per persona). Esti vienres 9 de mayu celebrará un preestrenu pa escolares a les 11.00 hores.

Nachu Fonseca ye Académicu correspondiente de l’Academia de la Llingua Asturiana y ceador y director de los grupos Seliquín y Xentiquina, ye maestru, especialista en Filoloxía, Llingua asturiana y Educación musical. Publicó discos de cantares pa neños como Seliquín, cancios pa neños, Xentiquina, Yera la princesa d´un país, Llambionaes, Nun mos gusten -yos lenteyes, Marchóme la gata y El sapu y la lluna; y discos del cancioneru tradicional afechos pa la escuela, como Cantares vieyos…voces nueves y Blimes. Foi distinguíu, ente otres reconocencies, col Premiu Andrés Solar (1987), el Urogallo de Bronce del Centru Asturianu de Madrid (1991), el premiu al meyor cantar en llingua asturiana na XIII edición de los Premios de la Música de la Sociedá Xeneral d’Autores y primer premiu del XIV Concursu Cuentos pola Oficialidá del Conceyu de Bimenes (2011).

Esti sábadu 10 de mayu na Llaboral de Xixón, los neños van poer disfrutar de “Cancios pa pasalo perbién “, un conciertu didácticu entamáu pola cantautora Sara Cangas cola collaboración de la cantante Anabel Santiago. L´oxetivu de l´actividá ye dar a conocer a través de la música, conceptos, idees y estratexes rellacionaes coles diferentes estayes del xéneru musical. Pa esta actividá utilizaranse cancios allegaos a los neños, que seyan dinámicos, participativos y didácticos.

Pa facilitar la so eficacia pedagóxica, combina la teatralidá cola interpretación en directo, yá seya de canciones enteres como de cachos. Canten tanto Sara Cangas como Anabel Santiago, unes veces por separao y otres al empar, col acompañamientu de Sara a la guitarra o d’Anabel col panderu.

Anabel Santiago ye profesora d´Educación Musical y desendolca la so actividá docente na Escuela de Música Tradicional d´Uviéu. Amás, ye una de les figures más representatives de la tonada asturiana. Sara Cangas, cantautora que acaba d’espublizar so primer discu en solitario, ye profesora de música de la Escuela de Música de Gozón.

La Web del Lient International Festival, el Festival de européu de música de les llingües minoritaries d’Europa va tener llugar el 12 d’Avientu nuna ciudá del norte d’Alemaña, Oldenburg, algamando asina la so décima edición depués de que Córcega nun pudiere organizar el Festival en 2013 y de l’ésitu de la edición de 2012 que se celebró en Xixón. La creación del Liet debese a la minoría de Frisia (Países Baxos). La so primer edición celebrose en 2002, en Ljouwert / Leeuwarden y a partir de 2006 entamóse’l festival en dellos llugares d’Europa, patrocináu pol Conseyu d’Europa.

Liet International ye un concursu de canciones en llingues minoritaries que ñació nel añu 2002 en Frisia (Países Baxos). Depués de les ediciones celebraes en Frisia, na zona del territoriu sami asentada en Suecia, Bretaña y Friul, Asturies foi llar del Liet International nesti añu 2012, y Xixón la primer ciudá de la Península Ibérica que lu acoyó. Por ser ún de los eventos más importantes pa la promoción de les llingües europees minoritaries y la música interpretada nun idioma rexonal, fue reconocíu pol Conseyu d’Europa, que lu patrocina dende 2008.

El Coleutivu Muyeres, una de les Asociaciones de Música Tradicional con más raigañu n’Asturies d’anguño, va repasar los sos 20 años de trayeutoria que vieno acabante de cumplir esti vienres 25 d’abril a partir de les 20 hores nel Teatru Nuevu de La Felguera, en conceyu Llangréu. El Colectivu “Muyeres” estrenó esti conciertu de los sos “20 años sobre la escena asturiana” el sábadu 25 de Xineru nel centru cultural Valey Teatru del conceyu Castrillón.

Nel conciertu del Valey, esti grupu de Muyeres percorrió esos 20 años d’escenariu y de les sos grabaciones discográfiques que van de “Muyeres, Dancies, bailles, ramos, romances y cantares de los conceyos d´Asturies” (FonoAstur, 1993), a “Muyeres II” (FonoAstur, 1997), “Pasamentu” (FonoAstur, 2001) y “Onde la culiebra canta” (FonoAstur, 2006) o el espectáculu INDA SUENEN representáu per toa Asturies ente 2010 y 2012. Un camín que van percorrer otra vuelta esti día en Llangréu.

Nel añu 1993, y coordinaes por Lisardo Lombardía, muyeres procedentes de dalgunos de los grupos d’investigación etnográfica más destacaos – Andecha Folclor d´Uviéu, L´Aniciu, Escontra´l Raigañu, Xurgar nas Costumes y Concetsones – formen el Colectivu Muyeres. Lo que nun principiu yera reivindicar la variadísima música de percusión del país y el papel de la muyer como protagonista y depositaria de la tradición musical asturiana, convertir nuna de les aventures musicales más apasionantes de los últimos años. Porque amás de los sos impecables y emocionantes grabaciones – Muyeres, Dancies, bailles, ramos, romances y cantares de los conceyos d´Asturies (FonoAstur, 1993), Muyeres II (FonoAstur, 1997), Pasamentu (FonoAstur, 2001) y Onde la culiebra canta (FonoAstur, 2006) – caúna d’éstes teníen el reflexu d’un espectáculu nel que se combinaba tola potencia de la tradición más pura cola maxa del ritu. Porque si daqué vien de les grabaciones de Muyeres, y sobre manera de los sos espectáculos en directu, ye esa verdá apolmonante que tien lo que naz no fondero de la tierra. Fragmentu de la ponencia lleida por Inaciu Llope nel branu de 2009 na Universidá Menéndez Pelayo de Santander, col títulu de: La música tradicional asturiana, un aproximamientu xenealóxicu.

Demientres los años 2010, 2011 y 2012, Muyeres llevó a cabu INDA SUENEN un espectáculu novedosu en compañía del grupu teatral Factoría Norte que recibió una gran acoyida per parte del públicu con actuaciones nel Centru Cultural Niemeyer, Teatro Xovellanos, Teatru Filarmónica, Teatru Palaciu Valdés, Centru Cultural Valey de Castrillón y otros llugares. Esti espectáculu encontáu nel discursu de muyeres, resulta radicalmente feminista partiendo sicasí de la música y los valores de la sociedá tradicional.

El Teatru Prendes de Candás (Carreño) acoyía la estrena del espectáculu escénicu “Palabres”, los díes 8 y 9 de payares de 2013 pol Grupu de Baille “San Félix” de Candás que presentaba la obra basada nuna idega orixinal del escritor Xurde Fernández, en coproducción col propiuTeatru Prendes. Dende entós, l’espectáculu vien percorriendo dellos llugares de la xeografía asturiana y aporta agaora al Teatru Vital Aza de L.lena onde va presentase esti xueves 25 d’abril cola participación, amás del Grupu de Baille Tradicional San Félix, de Marcos García, Manu Molina, Mapi Quintana, Thomas Welvaadt y Rubén Bada.

La propuesta tien un nidiu calter multidisciplinar y axunta música, baille tradicional, lliteratura y arte audiovisual nun espectáculu únicu del que ya amosó avances el grupu San Felix n’imporantes actuaciones como les que lu llevaron a Lorient hai poco.

PALABRES ye un espectáculu del Grupu de Baille “San Félix” de Candás que, en coproducción col Teatru Prendes de Candás, desendolca una idea orixinal del escritor Xurde Fernández (Candás,1975). Nella, la música, la lliteratura, la danza tradicional y l’arte audiovisual conviven nun mesmu espaciu escénicu, xenerando asina un discursu artísticu nuevu que s’articula alredor d’un doble oxetivu: el respetu a la tradición propia; y la anovación y creación de víes d’accesu afayadices p’atraer a nuevos públicos interesaos en reflexonar sobre’l propiu conceptu de “tradición”.

Esta presentación nel Vital Aza de L.lena tien un preciu na entrada de 6 euros, pudiendo mercase anticipadamente na Casa de la Cultura de La Pola.

Skontra y La Tarrancha representen a Asturies nel EHrZ, concursu de grupos de música de naciones ensin estáu y que tien como premiu participar nun recopilatoriu xunto a 20 grupos y tocar nel propiou festival Euskal Herria Zuzenean (EHZ), principal festival del País Vascu francés. Sofitar y espardir la creación musical de les cultures oprimíes o ensin estáu ye l’oxetivu d’esti concursu musical nel qu’Asturies va tar representada poles bandes punk-folk Skontra y ska-fusión La Tarrancha.

El doble premiu ye participar nun recopilatoriu xunto a 20 grupos y tocar nel festival Euskal Herria Zuzenean (EHZ). El xuráu va formalu Fermin Muguruza y otros músicos vascos, amás del votu popular al traviés de la web. Con 20 años de trayectoria, Euskal Herria Zuzenean ye’l principal festival euskaldun de Iparralde (País Vascu francés). Cinco son los años que lleva entamando’l EHrZ, un concursu que per primer vegada amplíase a grupos d’otres cultures y llingües minorizaes amás de la vasca.

Bretones, catalanes, corsos, occitanos, gallegos, quebequeses… un total de 77 bandes van participar nesti eventu. Los representantes d’Asturies van ser Skontra colos cantares “Billete ensin vuelta”, “Nun se pue” y “Unidá”; y La Tarrancha con “De Tazones a Candás”, “Cántame” y “Somos”. Amás de por cantar n’asturianu, otru de les razones que-yos dio la posibilidá de formar parte d’esti concursu ye’l de cumplir el requisitu de tener tola so obra con llicencia Creative Commons y nun pertenecer a nenguna sociedá privada de xestión de derechos d’autor. Votaciones y xuráu Dende’l martes 18 de marzu y hasta’l próximu 15 d’abril pueden facese les votaciones al traviés de la web del festival. El públicu va decidir la metá de los votos; la otra metá va facelo un xuráu formáu polos músicos Fermin Muguruza (Kortatu, Negu Gorriak…), Igor Otsoa (Oreka TX) y Jurgi Erkiza (Willis Drummond). El 1 de mayu van decidise los 20 grupos que van integrar el recopilatoriu y el 28 de xunu van actuar nel EHZ Festibala, que se cellebra en Lekorne. La inscripción de Skontra y La Tarrancha nesti concursu fíxose gracies a la xestión d’Ixuxú Asturies-Euskal Herria elkartea, l’asociación d’asturianos emigraos al País Vascu que fai de ponte sociocultural ente los dos países.

Esti prósimu sábadu día 22 de marzu del 2014, celebraráse en LLaranes, Asturies, un CURSÍN de bandurria asturiana empobináu pol músicu Dani García de la Cuesta, y un ALCUENTRU DE BANDURRIEROS.

El cursín tá despeslláu a tolos niveles y nun fai falta tener conocimientos previos. Tendrá esti horariu, de 10,30 a 14 hores y de 16 a 20, y desendolcaráse como vien darréu: -Sábadu día 22, LLaranes, nos locales del Aula de Cultura Popular, Centru Municipal d’Asociaciones, tercer pisu, Plaza Mayor de LLaranes. L’Alcuentru de bandurrieros, celebraráse nel chigre El Cafetón, c/ Sol 8, Avilés, a partir de les 21,30.

L’Alcuentru tá despieslláu a la llibre participación de músicos venceyaos a la bandurria, el rabel y la gaita rabil. La xente interesao puede contautar anantes cola organización o averase dafechu al llugar.

El coste de matrícula del cursín ye de 15 euros. AL TANTU, col enfotu d’atender lo meyor posible a les persones participantes, ufiértense SEIS PLACES, si hubiere más xente interesao la organización intentará entamar otros cursinos en feches prósimes.

Aquelles persones que nun tengan instrumentu, tendrán de comunicalo nel intre d’apautase, pa, na midía les posibilidaes de la organización, apurri-yos ún. Les persones interesaes pueden contautar cola organización nes señes que vienen darréu, onde facilitaráse tola información complementaria sobre esti eventu: dagarcuesarrobayahoo.es

El tema «Volviche», de la Banda de Gaitas El Trasno, yescoyíase’l cantar ganador de la octava edición del Premiu al Meyor Cantar esta fin de selmana nuna interesante competencia con delles ufiertes tamién novedoses de la escena asturiana. El ganador fízose públicu demientres una Gala que se celebró’l pasáu vienres 14 de marzu nel Teatru de la Llaboral, Ciudá de la Cultura (Xixón).

La Banda de Gaitas El Trasno créase nel añu 1999 na Escuela de Música Tradicional del conceyu de Cuaña, y la mayoría de los sos componentes son escolinos y escolines d’esti centru, onde ponen clas los hermanos José Manuel y Javier Tejedor. El so repertoriu ta compuestu, na mayor parte, de pieces tradicionales asturianes, aunque cuenten con un bon piñu de melodíes de creación nueva. Nestos quince años d’andadura, la banda tien actuao per tol territoriu asturianu y en dellos festivales europeos.

Nel mes d’avientu del 2013 editaron el discu Axeitín, baxo la dirección musical de Javier Tejedor, y onde participaron dellos músicos de sonadía dientro de la escena folk d’Asturies, como José Manuel Tejedor, Rubén Bada, Rubén Álvarez o Israel Sánchez. Nesti discu predominen los temes instrumentales, anque incluye tamién dos pieces cantaes: «La Capitana», del músicu xixonés Carlos Rubiera; y «Volviche», con lletra en gallego-asturianu del escritor tapiegu Xosé Miguel Suárez Fernández y que ye’l tema ganador d’esta edición del Premiu.

Web del Premiu al Meyor Cantar

El Teatru de Llaboral Ciudá de la Cultura (Xixón) va acoyer esti vienres 14 de marzu a les 19.30 hores la Gala d’entrega del VIII «Premiu al Meyor Cantar» en llingua asturiana o gallego-asturianu. Nel trescursu d’esti actu, y depués de l’actuación en directu de los cuatro finalistes, un xuráu formáu por espertos en música y llingua asturiana va escoyer el cantar ganador de la presente edición del premiu, al qu’opten 4 finalistes Rafa Lorenzo, Vriende, la BG el Trasno y Silvia Quesada.

Opten al gallardon:

RAFA LORENZO, con Ente mazanos (lletra: Rafa Lorenzo)

Compositor de más de cuatrocientos cantares en castellán y asturianu, el cantautor Rafa Lorenzo Antón empecipió bien aína la so carrera musical. Tres de fundar el grupu Jekes cuando yera entá estudiante de Bachilleratu nel so Tinéu natal, en 1975 entama la so carrera como cantautor, percorriendo cola so voz y la so guitarra numberosos locales y sales d’Asturies, Llión, Galicia, Madrid… Tien publicaos siete trabayos discográficos, que fueron apaeciendo ente 1997 y 2013 de la mano de distintos sellos: «La otra Asturies» (FonoAstur, 1997); «A camín» (FonoAstur, 2011); «Sou vaqueiru» (Grabaciones Pola, 2003); «Pabirún, pabirún» (Trabe, 2005); «Primos hermanos» (Editora Discográfica del Principáu, 2007); «Voi pa la braña» (Editora del Principáu, 2010) y «A fierro y fueu», editáu nel 2013 y nel que ta incluyida la composición Ente mazanos, cola que va competir el 14 de marzu na final del Premiu al Meyor Cantar.

VRIENDEN, con Vivu en dalgún llugar (lletra: Xurde Fernández)

El cuartetu integráu por Juan Duarte, Xurde Fernández, Pedro Santiago y Nel Suárez conforma’l grupu Vrienden, una banda naveta formada en setiembre del 2010 y caracterizada por un estilu que los mesmos integrantes del grupu califiquen como folk fusión-alternativu, nel que’l folk celta vese arriquecíu con toa mena d’influyencies (funk, música clásica, rock, punk, música india, etc.).

Grupu llamáu a tener protagonismu na escena musical asturiana de los años vinientes, el so estilu particular, frescu y innovador fíxo-yos acreedores nel 2012 de la X edición del Concursu de música en directu «Abierto Hasta El Amanecer», dirixíu a grupos y solistes menores de 35 años. Van participar na final del «Premiu al Meyor Cantar» col tema Vivo en dalgún llugar, incluyíu nel so primer trabayu discográficu (Tierra Discos, 2013), y col que tamién consiguieron una nominación a los Premios Amas na categoría de «Meyor discu folk».

GRUPU DE GAITES “EL TRASNO”, con Volviche (lletra: Xosé Miguel Suárez)

Nel mes d’avientu del 2013 salió a la lluz Axeitín, el primer discu de la Banda de Gaites “El Trasno”, creada en 1999 na Escuela de Música Tradicional de Cuaña y integrada anguaño por 18 músicos baxo la dirección de Javier Texedor. Axeitín entemez pieces tradicionales asturianes con melodíes nueves compuestes pol mesmu Javier Texedor. Destaca la presencia nel discu de dos pieces cantaes: «La Capitana», del músicu xixonés Carlos Rubiera, n’asturianu; y «Volviche», con lletra en gallego-asturianu y cola qu’esti grupu del occidente asturianu va participar na final del «Premiu al Meyor Cantar».

SILVIA QUESADA, con La pena abierta (lletra: Alfredo González).

La cantante ya instrumentista asturiana Silvia Quesada cunta yá, magar la so mocedá, con una trayectoria musical destacada. Tres de cursar estudios de gaita y flauta trevesera, vinculó la so carrera a formaciones como la Banda de Gaites Cántara, el colectivu Muyeres o los grupos folk Gatos del Fornu y Blima, participando amás como cantante, gaitera o percusionista en trabayos de Celia González (Cantares yá bordones), Tejedor (Positivu) o Alfredo González (Dobleces). Nel 2013 da un pasu más na so carrera cola publicación del so primer discu en solitariu, La pena abierta, nel que s’incluyen diez creaciones de temática sentimental compuestes dende’l prisma de la decepción o la derrota. Silvia Quesada va participar na Gala final del «Premiu al Meyor Cantar» col tema «La pena abierta», visión señardosa del mitu de Penélope y Ulises.

La Gala va empezar a les 19.30 hores y la entrada ye llibre. L’espectáculu va cerrase cola actuación de Taranus, grupu vencedor na edición anterior d’esti premiu.

Tola información d’esta y de les ediciones anteriores del «Premiu al Meyor Cantar» ta disponible nel sitiu web del concursu, nel que s’incluyen noticies, fotografíes, información de los grupos y cantares finalistes. Amás d’ello, un reproductor dexa escuchar los temes que van competir na Gala.

Tuenda, el tríi de música tradicional asturiana que llidera Xosé Ambás actuará esti vienres a partir de les 20 hores nel CSOA La Madreña. Tuenda ye una de les formaciones más populares ya influyentes nel ámbitu de la escena folk asturiana.