Música

Esti llunes 7 de xunetu arranca’l III Sol Celta d’Avilés, festival autoxestionáu de cultura tradicional qu’acueye a dellos de los nomes folk más importantes del país y que va tener la so xornada cimera col tributu a The Pogues y a otres bandes mítiques irlandeses del vienres 11 de la mano d’esta banda d’Arrasate. The Potes surde en 2013 col oxetivu de facer un tributu a los irlandeses The Pogues. La veteranía de los sos componentes –ente los que s’alcuentru Jul, exguitarrista de la mítica banda punk RIP, y miembros de formaciones como Dirty Brothers o Los Galerna-, caracteriza a un grupu qu’enriba d’un escenariu recueye lo meyor del folk-rock celta: The Dubliners, Mahones, Flogging Molly… amás de los mentaos RIP y The Pogues, son dalgunes de les bandes a les qu’homenaxeen estos músicos guipuzcoanos.

Esti llunes 7 de xunetu arranca’l III Sol Celta d’Avilés, festival autoxestionáu de cultura tradicional qu’acueye a dellos de los nomes folk más importantes del país. Nél van tocar The Potes, grupu folk-rock d’Arrasate-Mondragón que fai versiones de los históricos The Pogues. La so actuación va ser el próximu vienres 11 de xunetu a les 23 hores y con entrada de baldee.

La so actuación nel III Sol Celta d’Avilés va ser la primera que den n’Asturies, dempués de que yá compartieran escenariu cola banda asturiana de punk-folk Skontra nel gaztetxe d’Elorrio. El conciertu ye posible gracies al puxu d’El Cafetón –local qu’organiza’l festival- por incluyir propuestes novedoses nel so cartel y a la xestión d’Ixuxú Asturies-Euskal Herria elkartea, asociación d’asturianos nel País Vascu que fai de ponte sociocultural ente los dos pueblos.

El conciertu d’esti llunes va tener como protagonistes na Cai Sol a Elías García y Rubén Bada y a lo llargo de tola selamana podrá visitase el Mercáu artesanal que tamien entama güei.

Mañana a les 21,30 horas habrá Romances y otros cantares con bandurria asturiana por Dani García de la Cuesta y a les 22,30 un conciertu de De Mandilín.

Talleres infantiles, de baille, y de danza prima completen un programa que tamién cuntará coles actuaciones de Ximielga la Saya esti miércoles y Rebelguinos,Cerezal y SEU, el xueves.

Un añu más la Nueche Folk de Fitoria trae un cartelu perdestacáu, por mor del granible trabayu del Grupu de Baille Tradicional de Fitoria, qu’entama en collaboración de la Sociedá de Festexos,la Nueche Folk de Fitoria. Una nueche Folk qu’esti añu cumple so 14ª edición. Esti eventu cuntará esti añu cola actuación de trés grupos bien destacaos: La Tarrancha, Degañan’s y Tejedor, que conformen un cartelu nel que s’amesten grupos bien conocíos nel panorama folk asturianu nel práu la fiesta de Fitoria dende les 22 hores d’esti vienres.

Les galeríes de la mina de Arnao estrénense esti vienres como coliséu musical cola iniciativa “Anfiteatru mineru”, un proyeutu que va dexar utilizar les galeríes de la mina, amás de pa visites davezu como pa conciertos y delles otres actividaes. Y el músicu castrillonense Ernesto Paredano va ser quien abra’l ciclu con un conciertu de temes compuestes pa la ocasión. Va Ser un conciertu bien singular y especial y unu de los primeres realizaos nes galeríes d’una mina, sigún asoleyaba esta selmana la organización.

“Analicemos les galeríes como escenografía y tienen grandes posibilidaes, con una acústica cavernosa qu’espubliza’l soníu y una organización en cruceta na cual la escampada onde llega l’ascensor va ser l’escenariu y los trés galeríes que conflúin ellí’l patiu de butaques”, indicó Iván Muñiz, director cultural del Muséu de la Mina de Arnao que xestiona la empresa Sadim del Grupu Hunosa. Poles semeyances que les parés de lladriyu de les galeríes guarden cola arquitectura romana denominóse al ciclu “Anfiteatru mineru”, sigún espublizaba un periódicu local.

L’actuación de la banda punk-folk Skontra y la participación de Ixuxú nun mercadín de colectivos representa a Asturies nel festival euskaldun Euskal Herria Zuzenan Festibala (EHZ), nel qu’otru añu más Asturies vuelve tar representada, esta vegad por partida doble. Per un llau, Skontra va actuar el sábadu 28 por ser una de les bandes ganadores del concursu de grupos musicales de naciones ensin Estáu. Pel otru, Ixuxú Asturies- Euskal Herria elkartea va participar el domingu 29 nel mercadín de colectivos qu’entama añalmente’l festival euskaldun más importante d’Iparralde (País Vascu francés).

El 27, 28 y 29 de xunu la localidá de Lekorne (provincia de Lapurdi) va acoyer la 22 edición del Euskal Herria Zuzenean. Nél van actuar destacaes bandes vasques (Zea Mays, Esne Beltza, Kashbad, Ruper Ordorika…) y internacionales (Ska-P, Pendulum, Dub Inc, Amadou et Marian, Mexican Institute of Sound…), amás van realizase otres actividaes como danza, cine y charres sobre movimientos de lliberación nacional y feminismo.

Esti 2014 la organización convocó’l EHrZ, un concursu de grupos de música provenientes de naciones ensin Estáu y cultures minorizaes. La Tarrancha y Skontra fueron les participantes asturianes, resultando esta postrera una de les vencedores del concursu tantu p’apaecer na compilación de 20 grupos editada pol mesmu festival, como pa llevar el so punk-folk al escenariu. Los gallegos Os Cuchufellos, los catalanes The Bombins y los occitanos Gojats of Hedas son los otros grupos ganadores del concursu que van actuar en festival.

Per segundu añu consecutivu Ixuxú Asturies-Euskal Herria elkartea -asociación d’asturianos emigraos al País Vascu que busca tender pontes socioculturales ente los dos pueblos- va participar nel EHZ. Va facelo formando del parte del mercadín de colectivos que se celebra’l domingu 29. Nél pondránse a la venta discos de música y materiales de movimientos sociales asturianos como Darréu, La Semiente, Asturies en Pie, FUSOA o la Xunta Pola Defensa de la Llingua Asturiana.

Nel EHZ empiecen les actividaes de branu de l’asociación, que pel momentu confirmó los conciertos de La bandina l’Ixuxú -el 29 de xunu nes fiestes de San Pedro d’Orio (Gipuzkoa)-, del grupu rock-folk de Mondragón The Potes –el 11 de xunetu nel festival Sol Celta d’Avilés (Asturies)-, y de la banda asturiana de ska-fusión La Tarrancha –el 20 d’agostu en Komantxe Konpartsa, dientro de la programación de les fiestes de Bilbao.

Los díes 27 y 28 de xunu va desenvolvese en Xixón el festival N’Alcordanza, en memoria y homenaxe de los músicos asturianos Ígor Medio y Carlos Redondo, finaos n’accidente de tráficu en 2006. Amás de la faceta señardosa, el festival tamién tresmite un mensaxe reivindicativu del oficiu de músicu. Dende fai 8 años, grupos y locales de la ciudá de Xixón axúntense alrodiu l’alcordanza d’Ígor Medio y Carlos Redondo, figures clave de la música asturiana, y que finaron n’accidente de tráficu cuando diben tocar a Barcelona la nueche de San Xuan de 2006.

En 2014 el Festival N’Alcordanza vuelve apostar pol formatu del añu pasáu, conciertos repartíos per tou Xixón de distintos estilos en dos intensos díes. Asina, 17 grupos van participar a partir del vienres 27 de xunu hasta la nueche del 28 en 9 conciertos en delles de la sales y locales xixoneses más xuníos al mundu de la música. Puede consultase los horarios y llugares de los conciertos na páxina web del festival www.nalcordanza.com.

Pero al igual que l’añu pasáu, N’Alcordanza tamién quier sirvir d’altavoz pa reivindicar una meyor considerancia, por parte de munchos sectores, del oficiu de músicu. Si na edición anterior publicóse un manifiestu, en 2014 más de venti artistes asturianos realizaron una serie de Postales nes que representen qué ye pa ellos la música y la xera y trabayu de facela. A lo llargo de tol mes de xunu va espublixándose cada día’l trabayu d’un artista. Esta iniciativa lleva’l nome de “Les Postales”, y tamién se puede ver na web asina como en las redes sociales del festival.

Música ya imaxe xúntense n’alcordanza d’Ígor y Carlos, asina como n’acción de protesta por una mayor considerancia y respetu que merez la música y les persones que la faen.

El sábadu 7 de xunu, organizáu pola Xunta pola Defensa de la Llingua Asturiana, va facese otru añu más el Conciertu pola Oficialidá, ún de los principales festivales musicales d’Asturies, qu’encara la so ventésimu sesta edición.

Nesta ocasión ta preparáu un cartelu colos grupos Pop Piquiñín, Tuenda, Xera, La Tarrancha, Misiva, Asgayah Sound y Skama la Rede. La novedá d’esti añu ye’l sitiu: ye la primer vez que se fai’l conciertu onde la Playa’l Natahoyo, nuna carpa xigante que va tar asitiada na esplanada énte l’Acuariu de Xixón. La hora pa empezar la música va ser alredor de les 19:30 y les entraes van vendese a 8 euros anticipaes y a 10, na puerta. Les anticipaes van tar a la venta n’Uviéu (L’Esperteyu Chigre Folk, Cervecería Malá Strana), Xixón (Café Trisquel Chigre, Sidrería Canteli), Avilés (El Cafetón), Candás (Pub Creisi), La Pola (L.lena) (La Palmera), La Pola Siero (Abre César), Mieres (L’Abellugu), Grau (Llibrería Las Dos Vías), L’Infiestu (La Traviesa), Arenas (Cabrales) (Sidrería Los Pegoyos), L’Entregu (La Semiente) y Cangas del Narcea (Bar Azul).

La reivindicación y la folixa xúnense una vez más nel Conciertu pola Oficialidá, que promete hores de bona música al mesmu tiempu que s’esixen los derechos que tien que tener la llingua asturiana n’Asturies.

Esti sábadu, na Casa Cultura de La Pola Llaviana, va celebrase la edición 2014 de TRADIS, entamáu pol Grupo AMansalva, que presenta un cartelu espectacular y busca con esta iniciativa dignificar l’entamu d’eventos venceyaos a la música tradicional del país. Mari Luz Cristóbal, Omar Martínez, Marisa Valle Roso, Thalía Noriega y El Che de Cabaños van facer compañía bel escenario a Lisardo Prieto, David Varela, Xuacu Amieva, Estefanía Moro, Luis Ángel Fernández y Pablo Carrera.

Tres l’ésitu de TRADIS 2013, que se diseñó como un espectáculu d’humor y música tradicional que percorrió dellos conceyos del país nel mes d’avientu, la organización decidió da-y continuidá con una xornada única más enfocada a lo musical y una partipación cuantitativa más importante d’artistes. Escoyóse la Casa Cultura de La Pola Llaviana pal eventu y esto sábadu, a les 19 hores, AMansalva, la compañía qu’entama esti conciertu espera enllenar la Casa la Culturagracies al cartelu espectacular de TRADIS 2014.

El dúu asturianu fomáu pola cantante Mapi Quintana (Blima, Aire) y el bouzoukista Elías García (Llan de Cubel, Tuenda) espublicen, el prósimu día 1 de Xunu, la so primer referencia discográfica: “Severina”.

Dempués d’un periodu de descubrimientu y selección de canciones tradicionales recoyíes nel conceyu L.lena, Elías García y Mapi Quintana entamen a estructurar ya arreglar, nel mes de Mayu de 2012, un repertoriu basáu nel material recoyíu, na búsqueda d’un nuevu contestu estéticu pa eses melodíes tradicionales. Al traviés de progresiones armóniques heredaes del jazz y la música europea del sieglu XX, amás de la improvisación ya una aprosimación fresca y novedosa al indie-jazz más contemporáneu, Mapi y Elías consiguen xenerar una nueva ya enriquecúa atmósfera sonora, qu’ofrez nueves perspectives de la música tradicional asturiana na que se basa.

Frutu d’esti trabayu, el dúu rexistra, en Payares de 2013, 9 temes grabáos en directu. baxo’l títulu “Severina”.

El discu dixital ya ta disponible al traviés del siguiente enllaz, onde podéis escuchalu al completu, de forma totalmente gratuita: http://quintanaygarcia.bandcamp.com. Asimesmo, adelantámosvos que’l conciertu-presentación de “Severina” tendrá llugar nel Teatru Vital Aza (La Pola – Conceyu L.lena) el prósimu día 22 de Xunu, a les 19.30h [entráes prósimamente a la venta]

El discu pue escuchase de baldre na web

Esti vienres 23 de mayu, a les 12 hores, va descubrise nel Muséu del Pueblu d’Asturies una placa na memoria del gaiteru y constructor de gaites Alberto Fernández Velasco y va presentase una de les primeres gaites que salieron del so taller, vendida al Muséu de la Gaita polos sos familiares. El fallecimientu d’Alberto Fernández Velasco (1942 – 2011) constituyó un acontecimientu de notable repercusión nel ámbitu de la cultura asturiana y especialmente nel de la música tradicional, nel que gociaba d’una escelente reputación por cuenta de la so dilatada carrera como artesanu fabricante de gaites.

Alberto Fernández, padre del también pernomau gaiteru Alberto Fernández Varillas, destacó polos preseos que lleven la so firm,a pola calidá de la factura de les sos gaites, pola so precisa afinación y pol excelente tímbe d’eses gaites, llogrando compatibilizar con ésitu les traces más tradicionales de la sonoridá de les gaites asturianes colos estándares acústicos del nuesu tiempo.

Anque na so familia nun había tradición musical, Alberto Fernández Velasco aficionose a la música asturiana siendo bien neñu, mercando la so primer gaita cuando tenía dieciséis años. En 1968 treslladose a Xixón pa trabayar como ebanista, oficiu qu’abandonaría pa dedicase a la gaita, faciendo la primera en 1979 según el modelu tradicional del reputáu artesanu Ántonio Álvarez Vega, “Cogollu”, del conceyu de Les Regueres.

Convencíu de que’l punteru de la gaita precisaba ameyorar no referente a la so sonoridá, empezó a investigar nel campu de l’acústica pa desenvolver preseos que, calteniendo la característica sonoridá de les antigües gaites asturianes, siguieren criterios académicos no referente al so afinación. Fixo’l so primer punteru con escala temperada en 1985 y, de magar, les sos gaites convirtiéronse nes preferíes de munchos gaiteros solistes, tando presente en bona parte de les ediciones del Festival Intercélticu de Lorient dende 1986. La so mayor innovación foi’l punteru cromáticu de dos octaves, desenvueltu a partir de 1988.

El Conceyu Bimenes vieno acaban esto día de convocar una nueva edición del so concursu de gaita, que nesti 2014 cumple laso XV edición. El requisitu imprescindible pa poder participar nel mesmu ye ser menor de 21 años a fecha 30 de xunu de 2014. El plazu p’apuntase, apurriendo la documentación afayadiza al Ayuntamientu Bimenes, fina’l 20 de xunu a les 12’00 horas.

El concursu tendrá, si’l númberu de participantes ye mayor de quince y asina lo decide’l xuráu a comuña cola organización del certame, una fase semifinal que se cellebrará na Casa la Cultura de Santuyano’l domingu 29 de xunu.

La final cellebraráse una selmana dempués, domingu 6 de xunetu, nun llugar entá por afitar. Repartiránse 600 € en premios, pa los trés primeros clasificaos, asina como dellos trofeos.

La edición de 2013 celebróse’l 6 de xunetu en Martimporra, ganado esa edición e’l gaiteru sierense Fernando Vázquez Cárcaba, de 19 años d’edá, que llevó los 300 € en metálicu y el troféu del primer premiu. Amás, al ganador apurrióse-y un exemplar del “Cancioneru de la gaita asturiana”, obra iguada por Eugenio Otero Vega, Fonsu Fernández García y Gausón Fernande Gutierri, editada, y donada pa la ocación, pol Muséu del Pueblu d’Asturies.

El segundu premiu, dotáu con 200 € y troféu, foi pal gaiteru Álvaro Álvarez Fernández, de 18 años y tamién de Siero. Y el ganador del tercer premiu, al que se-y apurríen 100 € y troféu, foi Diego Lobo Tuñón, de 18 años y que vieno del conceyu d’Ayer. Nel concursu participaren finalmente catorce gaiteros y gaiteres qu’interpretaren dos pieces cada ún, siendo valoraes les mesmes por José Ramón García Navia, Martín Poladura Berros y Álvaro García Suárez, miembros del xuráu na edición d’esi añu 2013.

Les bases de la XV edición son les que vienen darréu:

“1.-Podrán tomar parte tolos concursantes que quieran, siempres a títulu personal. Los participantes han de tener menos de 21 años el día 30 de xunu de 2014.

.2. La propuesta d’inscripción tien de formalizase unviando per corréu postal los datos personales nuna fueya (onde constarán nome y apellíos, direición, corréu lletrónicu y teléfonu de contautu), amás d’una fotocopia’l DNI a: Ayuntamientu de Bimenes XV Concursu de Gaita de Bimenes Martimporra, s/n. CP 33527 – Bimenes (Teléfonu d’información: 985700004).

.3. El concursu va tener dos estayes: semifinal y final, dambes abiertes al públicu. Si’l númberu de participantes inscritos ye menor de 15, tolos participantes pasarán direutamente a la final. Sicasí, si’l númberu de participantes inscritos ye mayor de 15, la decisión cabera sobre la cellebración de semifinal tomaránla los miembros del xuráu a comuña cola organización del certamen. En casu d’haber semifinal, el concursante tien d’interpretar un tema de llibre elleición. Pasaríen a la final los 8 participantes con meyor puntuación. Pa la final, el concursante tendrá d’interpretar 2 temes, ún de la llista que vien darréu y otru de llibre elleición. Les canciones han de ser interpretaes ensin añedíos nin supresiones.

1.- Muñeira de Remis 2.- Floréu de Remis 3.- Diana floriada de Veriña 4.- Fandangu puntiáu 5.- Muñeira Barganaz 6.- Xota’l Centru 7.- Muñeira Lliberdón 8.- Alborada’l paxarín 9.- Xota l’Oriente 10.- Carretera d’Avilés 11.- Saltón

.4. La fecha tope pa la receición de les inscripciones ye’l día 20 de xunu a les 12:00 horas.

.5. La rellación de participantes fadráse pública’l día 23 de xunu, nun actu abiertu al públicu que se va facer na Casa Conceyu de Bimenes a les 12:00 hores. Nesti actu va sortease l’orde de participación na semifinal y / o final.

.6. La semifinal va facese’l domingu 29 de xunu, a partir de les 11:00 hores, na Casa la Cultura de Bimenes. Nel casu de que’l númberu de participantes seya mui altu, la preseleición continuará’l mesmu día pela tardi, a la hora qu’afite’l xuráu.

.7. La final del concursu va ser el domingu 6 de xunetu de 2014, a les 17:00 hores, nel llugar que determine’l Conceyu Bimenes, que se dará a conocer cuando se faiga pública la rellación de participantes.

.8. La non presentación o incomparecencia na semifinal o na final tendrá de ser comunicada cola másima antelación y va trayer consigo la descalificación del concursante. El concursante tendrá de presentase, como mínimo, 30 minutos enantes del entamu, tanto pa la semifinal como pa la final.

.9. Los concursantes han d’emplegar como instrumentu la gaita tradicional asturiana (d’un sólu roncón) en cualesquiera de les sos modalidaes. Tamién ye obligatoriu l’usu del traxe tradicional asturianu, anque sólo na final del concursu.

.10. Afítense los premios que vienen darréu: 1u .- 300 € y troféu 2u .- 200 € y troféu 3u .- 100 € y troféu

.11. El xuráu tará compuestu por miembros cualificaos, designaos por esti Ayuntamientu, y presidíu pol alcalde del Conceyu Bimenes o persona na que delegue.

.12. El fallu del xuráu sedrá inapelable; asina mesmo, resérvase’l drechu a la meyor interpretación d’estes bases, a les que s’obligarán los concursantes pol fechu de formalizar la so inscripción.